Torrutiinnarlugu oqaluussisinnaavutit!

1. (a) Torrutiinnarlugu oqaluussineq qanoq isumaqarpa? (b) Qassit maani najuuttut torrutiinnarlugu oqaluussinikkut sallusuissut tusaqqaarsimavaat?

¹ Qassit illit ilagiinni ornittakkanni torrutiinnarlugu oqaluussinikkut sallusuissut tusaqqaarsimavaat? Akissut immaqa tupaallaatigissavat. Torrutiinnarlugu oqaluussineq isumaqarpoq inunnut ulluinnarni naapittakkatsinnut nutaarsiassamik nuannersumik oqaluussineq — angalagaangatta, ilaquttavut sanilivulluunniit pulaaraangatsigit, pisiniarfiliaraangatta, atuarfimmiikkaangatta, suligaangatta il.il. Nalunaajaasuni kuisimasuni eqimattani 200-t sinneqartuni 40%-iisa torrutiinnarlugu oqaluussinikkut sallusuissut tusaqqaarsimavaat! Taamaattumik, oqaluusseriaaseq taanna sunniuteqarluartuuvoq.

2. Torrutiinnarlugu oqaluussinerit suut Biibilimi atuarneqarsinnaappat?

² Ukiuni hundredelinni siullerni oqaluussisartut torrutiinnarlugu oqaluussikulasarput. Assersuutigalugu, Jiisusi Samaariakkoorami Jaakup puilasuata eqqaani arnaq imertartoq oqaluussiffigaa. (Joh 4:6-26) Filipip oqaloqatigiinneq aallarnerpaa, dronningip atorfilittaa Etiopiamioq Esajap allagaani atuartoq aperigamiuk: “Atuakkatit paasivigit?” (ApS 8:26-38) Apustili Paulusi Filippimi parnaarussaaqqalluni parnaarussanik paarsisoq oqaluussiffigaa. (ApS 16:23-34) Kingusinnerusukkut, Paulusi aneqqusaannginnermini ‘imminut orniguttut tamaasa ilassisarpai. Guutip naalagaaffia oqaluussissutigisarpaa Naalagarlu Jiisusi-Kristusi nakimmateqarani akornusersorneqaranilu ajoqersuutigisarlugu’. (ApS 28:30, 31) Aamma illit, ittooraluaruilluunniit torrutiinnarlugu oqaluussisinnaavutit. Qanoq?

3. Ittuunnginnissatsinnut suna iluaqutigisinnaavarput?

³ Qanoq aallartittoqarsinnaasoq: Amerlanerusugut inuit ilisarisimanngisavut oqaloqatiginiarneri sapernartittarparput. Allaat ilisarisimariikkatsinnut sallusuissut oqaloqatigiissutigissallugu ajornakusoorsinnaavoq. Jehovalli ajunngissusia anersaakkullu erlinnartuutit kiffaminut tunniussimasai, aamma inuit silarsuarmiittut atugaat nuanniitsut eqqarsaatigeqqissaarutsigik nakimaassuseqarluta oqaluussinissatsinnut iluaqutigisinnaavavut. (Jona 4:11; Tuss 40:6; Matt 13:52) Aammattaaq Jehova qinnuigisinnaavarput ‘nakimaassuseqalersitaanissatsinnik’ ikioqqulluta. (1 Th 2:2) Gileadimi atuarsimasoq oqarpoq: “Akulikitsumik misigisarpara, inuit oqaloqatiginissaat sapernartikkaangakku, qinuneq iluaqutaalluartartoq”. Allat oqaloqatiginissaanut nangaaguit, naatsunnguamik nipaatsumik qinugit. — Neh 2:4.

4. Aallaqqaammut suna anguniagarisinnaavarput, aamma sooq?

⁴ Soorlu oqaatsimi ‘torrutiinnarlugu oqaluussinermi’ ersersinneqartoq, oqaloqatigiinneq piareersarluakkamik saqqummiinermik Biibilimiluunniit allassimaffimmik takutitsinermik aallartinneqartariaqanngilaq. Ingerlaannaq oqaluussinermik aallartinngikkaluarluni inuit oqaloqatigiinnarsinnaanissaat anguniagarissallugu iluaqutaasinnaassaaq. Oqaluussisartut amerlasuut oqarput, inuit oqaloqatigilaaginnarsimallugit nutaarsiassaq nuannersoq kingorna oqaluuserilissallugu sapiinnerulertarlutik. Naapitatta oqaluukkusunngippatigut, pisariaqanngilaq oqalunniinnassalluni. Oqaloqatigiinneq inussiarnersumik naggaseriarlugu ingerlaqqiinnarit.

5. Qatanngutip arnap ittuutuup torrutiinnarlugu oqaluussinissamut suna iluaqutigisimavaa?

⁵ Qatanngut arnaq ittuutooq oqaluttuarpoq, niueriartortarfimmut pisiniaraangami inuk isaatigut attaveqarfiginiartarlugu qiviaraangallu inussiarnersumik qungujutarlugu. Qungujulluni akigaangat naatsumik oqaaseqartarpoq. Ajunngitsumik qisuariarpat oqaloqatigiinnarnissaanut sapiissuseqalertarpoq. Tusarnaarluaqqissaartarpoq aalajangiunniartarlugulu tusarliussami nuannersumi qulequtaq sorleq inummut tassunga tulluartuussanersoq. Taamaaliornermigut qatanngut arnaq atuagassiarpassuarnik tunisisarpoq allaallu Biibilimik atuaqqissaaqateqartalerluni.

6. Qanoq torrutiinnarlugu oqaluussineq aallartissinnaavarput?

⁶ Oqaloqatigiinneq qanoq aallartinneqarsinnaasoq: Oqaloqatigiinneq aallartinniarlugu qanoq oqarsinnaavugut? Jiisusip arnaq puilasuliap eqqaani oqaloqatigigamiuk, annikitsunnguamik aallarniuteqarpoq arnaq qinnuigigamiuk imermik tuneqqulluni. (Joh 4:7) Immaqa uagut oqaloqatigiinneq aallarnersinnaavarput inussiarnersumik ilassinnikkut apeqquteqarnikkulluunniit. Oqaloqatigiinnerup ingerlanerani periarfissarsissagunarputit Biibilimiit eqqaasaqarnissannut taamaalillutillu immaqa sallusuissutsip naatsiassartaanik siaruarteralutit. (Oqal 11:6) Ilaat, alapernaalersitsisunik paasisaqarusunnerulersitsisunillu kinguneqarluartumik oqaaseqartarput. Assersuutigalugu, nakorsiarluta utaqqisarfimmi utaqqitilluta oqarsinnaavugut, “napparsimasarunnaarnissannut qilanaaqaanga.”

7. Maluginiaaqqissaartarnerput torrutiinnarlugu oqaluussinermut qanoq iluaqutigisinnaavarput?

⁷ Maluginiaaqqissaarinitsigut oqaloqatigiinneq aamma aallartissinnaavarput. Meeqqat perorsarluarsimasut takugutsigit angajoqqaat nersualaarsinnaavavut aperalugillu, “meeqqassinnik taamak iluatsilluartigisumik perorsaagassi angajoqqaatut qanoq iliorassi?” Qatanngutip arnap suleqatimi suut oqaluuserineraat tusarnaartarpai, soqutigisaannullu tunngasunik biibililersaarutinik tunisarlugit. Suliffimmini arnaq katinnissaminut pilersaaruteqartoq paasigamiuk, Vågn op!-imik katinnissap qanoq pilersaarneqarsinnaanera pillugu tunivaa. Tamanna Biibilimik tunngasunik oqaloqatigiittarnernik kinguneqarpoq.

8. Qanoq biibililersaarutit oqaloqateqarnissamut aallarniutitut atortarsinnaavavut?

⁸ Aamma inuit allatut oqaloqatiginiarneqarsinnaapput, biibililersaarutit ersittumi atuartarnerisigut. Qatanngutip angutip Napasuliaq-mi imaluunniit Vågn op!-imi allaaserisaq soqutiginartumik qulequtalik qupperiarlugu atualertarpaa. Malugigaangamiuk allap atuagassiaq isigigaa apeqquteqarfigisarpaa imaluunniit atuakkaminik oqaluttuutilaartarpaa. Tamanna oqaloqatigiinnermik nalunaajaanermillu kinguneqakkajuttarpoq. Biibililersaarutit saqqummitiinnartarnerisigut suleqativut atuaqativulluunniit alapernaasersinnaapput apeqqutissaqalersissinnaallugillu.

9, 10. (a) Torrutiinnarlugu oqaluussinissamut qanoq periarfissarsiorsinnaavugut? (b) Torrutiinnarlugu oqaluussinissamut illit qanoq periarfissarsiortarpit?

⁹ Qanoq periarfissarsiortoqartartoq: Oqaluussinermi suliap nukingernera eqqarsaatigissagaanni, torrutiinnarlugu oqaluussineq nalaatsornerinnakkut suliassatut isumaqarfigissanngilarput. Aappaatigulli ulluinnarni oqaluussinissamut periarfissarsiortariaqarpugut. Inuit naapikkumaakkatit takorluukkit eqqarsaatigalugu inussiarnersumik qanoq oqaloqatigiinneq aallartissinnaanerlugu. Soqutiginnittumut Biibili biibililersaarutillu piareersimatikkit. — 1 Petr 3:15.

¹⁰ Nassaassarsiullaqqinnermigut oqaluussisartorpassuit torrutiinnarlugu oqaluussinissamut periarfissarsisarsimapput. Qatanngut arnaq inissiarsuarmi sillimaniarnermik atortorissaarutilerujussuarmi najugalik, ineqartut ataatsimoorfigisartagaanni ikkussortakkanik pinngortitamik kusanartumik assiliartalimmik ikkussuisarsimavoq. Inuit unillutik assiliaq kusanartoq oqaaseqarfigigaangassuk, periarfissaq atorluarlugu “qilak nutaaq nunalu nutaaq” pillugit oqaluttuuttarpai. (Saqq 21:1-4) Qanoq allatut torrutiinnarlugu oqaluussinissamut periarfissamik eqqaasaqarsinnaavit?

11. Torrutiinnarlugu oqaluussigaangatta soqutiginninneq qanoq ineriartorteqqissinnaavarput?

¹¹ Qanoq soqutiginninneq ineriartortinneqarsinnaasoq: Tusaajumasoqarpat soqutiginninneq ineriartorteqqiguk. Naleqquppat oqarsinnaavutit: “Nuannaarutigaara oqaloqatigisinnaagakkit. Oqaloqatigiinnerput nangeqqissinnaajumallugu sumi naapeqqissinnaavakkit?” Oqaluussisartut allat sumi najugaqarnertik oqaatigisarpaat oqarasuaatimiluunniit normua tunniuttarpaat oqarlutillu: “Oqaloqatigiinnerput nuannaarutigaara. Oqaloqatigiissutigisatsinnik paasisaqarnerorusukkuit attavigisinnaavarma.” Nammineerlutit soqutiginninneq ineriartorteqqissinnaanngikkukku ilagiinni taamaaliortoqarnissaa isumagisinnaavat immersugassaq Besøg venligst (S-43) immersupallanneratigut ilagiinnilu allatsimut tunniullugu.

12. (a) Sooq torrutiinnarlugu oqaluussinermut piffissaq atorneqartoq naatsorsorlugulu nalunaarsortariaqarparput? (b) Torrutiinnarlugu oqaluussinikkut qanoq angusaqartoqarsimava? (Ungalusaq takuuk “Torrutiinnarlugu oqaluussineq angusaqarfiusarpoq!”)

¹² Piffissaq torrutiinnarlugu oqaluussinermut atugarput nalunaarsussavarput, taamaattumik minutsialuinnaalluunniit atorneqartut nalunaarsorneqassapput. Una eqqarsaatigeriassagit: Oqaluussisartut tamarmik ullormut 5 minutsit atorlugit torrutiinnarlugu oqaluussisaraluarunik, taava qaammammut katillugit akunnerit 17 millionit sinnerlugit atorneqassagaluarput!

13. Torrutiinnarlugu oqaluussinermut suna kajumississutigissavarput?

¹³ Torrutiinnarlugu oqaluussinissamut pissutissaqarluarpugut — tassa Guutimut tullermullu asanninneq. (Matt 22:37-39) Uummatitta Jehovap pissusiinik siunertaanillu pingaartitsinermik ulikkaartup kajumissisippaatigut “kunngeqarfiata alutornangaassusia” oqaluuserissallugu. (Tuss 145:7, 10-12) Tullitsinnut ilumoorluta soqutigiginninnitta kajumissisippaatigut piffissaqarnerani periarfissat tamaasa atorlugit nutaarsiassamik nuannersumik tusartissallugit. (Rom 10:13, 14) Piareersimalaarneq piareersalaarnerlu atorlugit tamatta torrutiinnarlugu oqaluussisinnaavugut, immaqalu inummut ilumoortumut sallusuissut pillugu oqaluttuarnitsigut nuannaarneq misigalugu.

[Issuagaq 4-mi assiliartaq]

Ingerlaannaq oqaluussinermik aallartinngikkaluarluni inuit oqaloqatigiinnarsinnaanissaat anguniagarissallugu iluaqutaasinnaassaaq

[Issuagaq 5-mi assiliartaq]

Nassaassarsiullaqqinnermigut oqaluussisartorpassuit torrutiinnarlugu oqaluussinissamut periarfissarsisarsimapput

[Ungalusaq 5-mi assiliartaq]

Aallarniinissamut siunnersuutit

◼ Aallarniinissamut ikioqqullutit Guuti qinnuigiuk

◼ Inuit inussiarnerpasissut eqqissisimarpasissullu qinikkit

◼ Isaatigut isigiuk, qungujugit soqutigisaqaqatigisassinnillu eqqaasaqarit

◼ Tusarnaallaqqittuugit

[Ungalusaq 6-mi assiliartaq]

Torrutiinnarlugu oqaluussineq angusaqarfiusarpoq!

• Qatanngut angut biilileriffimmi biilini suliaritittoq utaqqitillugu inuit eqqaminiittut oqaluussiffigai tamanullu ammasumik oqalugiaammut qaaqqusissummik tunisarlugit. Ukioq ataaseq qaangiuttoq ataatsimeersuarnermi qatanngutip angutip ilisarisimanngisami qamannga pisumik ilassivaani. Sunaaffa, siorna biilileriffiup silataani angutit qaaqqusissummik tunisimasaata ilaat! Angutip oqalugiaat tamanut ammasoq tusarnaariarsimavaa Biibilimillu atuaqqissaaqatigineqarnissani qinnutigisimallugu. Maannalu nulianilu kuisereersimapput.

• Qatanngutip arnap, torrutiinnarlugu oqaluussinikkut sallusuissummik ilikkagaqarsimasup, meeqqani pingasut aqqutigalugit inuit attaveqarfigisartakkani immikkut angalaarfigisartakkamisut isigai. Sanilini angajoqqaallu atuarfimmi naapittakkani atuarfimmilu ataatsimiinermi naapittakkani angalaarfigisartagaasa ilagaat. Ilisaritinnerit tamaasa naatsumik oqaatigisarpaa meeqqanik perorsaanermi Biibili iluaqutaasartoq, taamaaleriarluni oqaluuserisani allanngortittarpai. Oqaloqatigiinneq qeratavallaarunnaaraangat kingusinnerusukkut Biibili oqaloqatigiissutigissallugu piuminarnerutittarpaa. Taamaaliortarnermigut qatanngutip arnap inuit aqqaneq-marluk kuisinnissaannut ikiorsimavai.

• Qatanngut arnaq sillimmasiinermut tunngasunik tuniniaasartumik pulaarneqarami nalunaajaanissamut periarfissarsivoq. Aperivaa peqqissutsiminut, pilluarnermut inuunermullu naassaanngitsumut qularnaveeqquserusunnersoq. Angerpoq aperalunilu sillimmasiineq suna eqqartorneraa. Qatanngutip arnap Biibilip neriorsuutaanik takutippaa biibililersaarutinillu tunillugu unnuk ataatsip ingerlanerani naallugit atuarsimasaanik. Biibilimik atuaqqissaaqatigineqartalerpoq ataatsimiigiartalerluni kingusinnerusukkullu kuisilluni.

• Qatanngutip arnap timmisartortilluni, arnaq sanilini oqaloqatigilerpaa nalunaajaaffigalugulu. Timmisartoq mimmat najukkani oqarasuaatimilu normua tunniuppai kajumissaarlugulu tulliani Jehovap Nalunaajaasuinik pulaarneqaruni Biibilimik atuaqqissaaqatigineqarnissaminik piumasaqaqqullugu. Ulloq ataaseq qaangiutiinnartoq Jehovap Nalunaajaasui arnap angerlarsimaffianut kasuttorput. Biibilimik atuaqqissaaqatigineqartalerpoq. Siuariapallappoq kuisillunilu. Erniinnaq nammineq pingasunik Biibilimik atuaqqissaaqatigisaqalerpoq.

• Qatanngut angut tappiitsoq 100-nik ukiulik utoqqaat illuani najugalik oqakulasarpoq, “Naalagaaffik pisariaqartipparput.” Tamanna Naalagaaffiup suuneranik nassuiaanissamut periarfissaqalersitsisumik napparsimasunik paarsisut najugaqartullu apeqqutissaqalerneranik kinguneqarsimavoq. Arnaq utoqqaat illuani sulisoq aperivoq paratiisimi suleriniarnersoq. Akivoq: “Isigisaqaqqilissaanga, pisuttaleqqissaanga issiavigalu assakaasulik ikuallassavara.” Qatanngut tappiitsuugami, arnaq peqquaa atuagassianik nipituumik atuffateqqulluni. Qatanngutip angutip pania pulaarmat sulisup aperaa atuagassiat angerlaassinnaanerlugit. Napparsimasunik paarsisoq panianut oqarpoq: “Utoqqaat illuani nutaamik oqariartaasitaaratta: ‘Naalagaaffik pisariaqartipparput.’”

• Qatanngut arnaq neriniartarfimmi utaqqitilluni tusaalerpaa angutit utoqqaat politiki pillugu assortuuttut. Angutit ilaat oqarpoq naalakkersuisut ajornartorsiutit iluarsisinnaanngikkaat. Qatanngut arnaq imminut oqarfigaaq, ‘periarfissaqalerpunga.’ Naatsunnguamik qinuvoq angutillu ornillugit. Ilisaritereerami naalagaaffik inuiaat ajornartorsiutaannik aaqqiisussaq pillugu oqaluttuuppai, tassa Guutip Naalagaaffia. Taamaaleriarluni atuagassiaaqqamik nassataminik neqeroorfigai. Taamaalisorlu pisortap ornippai. Qatanngut arnaq isumaliorpoq aneqqullugu piumaffigileraani. Anisinnaguli oqarfigaa oqaasii tusarnaarsimallugit atuagassiaaqqamillu aamma nammineq perusulluni. Sulisut ilaat aamma oqaluuserisaanut tusarnaarsimasoq qullilisimalluni orniguppoq. Siornatigut Biibilimik atuaqqissaaqatigineqartarsimavoq atuaqqissaartaleqqikkusullunilu.