Ilaqutariinnut iluaqutissaq

1. Ilaqutariit Israelikkut sabbati qanoq iluaqutigisarpaat?

¹ Sabbati Jehovamit asannittumik aaqqissuussaavoq ilaqutariinnut iluaqutaasoq. Ulloq taanna Israelikkut suliffimminit nalinginnaasunit sulinngiffeqartarput, Jehovallu ajunngissusia tassungalu attaveqarnertik eqqarsaatiginissaannut piffissaqartarlutik. Angajoqqaat periarfissaq taanna atorluarlugu inatsisit meeqqaminnut puiuikkiutsinniartarpaat. (5 Mos 6:6, 7) Sapaatip akunneri tamaasa Guutip innuttai anersaakkut ittunik sammisaqarnissaminnut sabbati periarfissarisarpaat.

2. Jehova pillugu sabbatimik inatsisip qanoq ilikkagaqartippaatigut?

² Nalitsinni ilaqutariit sabbatisiornissaat Jehovap piumasaqaatiginngilaa. Sabbatimilli inatsisip Guuti pillugu ilikkagaqartippaatigut. Innuttami anersaakkut ingerlalluarnissaat soqutigingaartuarsimavaa. (Es 48:17, 18) Ullumikkut Jehovap asannittumik soqutiginninnerminik ersersitsinerata ilagaat unnuk ilaqutariittut anersaakkut ittunik sammisaqarfik.

3. Unnuup ilaqutariittut anersaakkut ittunik sammisaqarfiup suna siunertaraa?

³ Unnuup ilaqutariittut anersaakkut ittunik sammisaqarfiup suna siunertaraa? Januaari 2009-miit unnummi Teokratiimik Ilinniarfiusumi aamma oqaluussinermut tunngasumik ataatsimiiffiusumi ilagiit Biibilimik atuaqqissaaqatigiittarnerat aallartippoq. Allannguinermut tamatumunnga pissutaasut ilagaat ilaqutariit ilaqutariittut atuaqqissaaqatigiinnerminni sapaatip akunneri tamaasa unnummi aalajangersimasumi anersaakkut nukittorsarnissaminnut periarfissaqarniassammata. Ilaqutariit tamarmik immikkut kajumissaarneqarput, ajornanngippat, ilaqutariittut atuaqqissaaqatigiittarnertik unnummut siornatigut ilagiinni atuakkamik atuaqqissaaqatigiittarfiusimasumut inisseqqullugu, Biibilimillu eqqartuineq atuaqqissaaqatigiinnerlu, ilaqutariit pisariaqartitaannut tulluarsarneqarsimasoq, piffissaqarfigilluaqqullugu.

4. Ilaqutariit Biibilimik eqqartueqatigiinnerat nalunaaqquttap akunneranik ataatsimik killeqartissavaat? Nassuiaruk.

⁴ Ilagiinni atuakkamik atuaqqissaaqatigiinnermut peqataaniaraangatta piffissaq atisalersornermut, taakunnarnermut, il.il. atortarparput. Amerlanersatsinnut, ataatsimiinneq nalunaaqquttap akunneranik ataatsimik sivisussusilik, unnuk tamangajaat atorneqartarpoq. Ataatsimiinnermi saqqummiunneqartuni allannguinerit pisinnaatilerpaatigut unnuup tamatuma ilaqutariittut Jehovamut pallorfiginninnermut atortalernissaanut. Taamaattumik unnuk ilaqutariittut anersaakkut ittunik sammisaqarfik nalunaaqquttap akunneranut ataasiinnarmut killilertariaqanngilarput, ilaqutattali pisariaqartitaat aamma piginnaasaat eqqarsaatiginerusariaqarpavut taakkulu naapertorlugit piffissaq tulluarsarlugu.

5. Eqqartueqatigiinnermut piffissaq tamaat atorneqassava? Nassuiaruk.

⁵ Eqqartueqatigiinnermut piffissaq tamaat atorneqassava? Aappariit ilaqutariillu meerartallit Biibilimik tunngasunik eqqartueqatigiikkaangata tamanut qiimmassaataasarpoq. (Rom 1:12) Ilaqutariit imminnut qaninnerulertarput. Biibilimik tunngasunik eqqartuinerit unnummi ilaqutariittut anersaakkut ittunik sammisaqarfimmi pingaarnerutinneqartariaqarput. Tamatumali saniatigut aamma ilaqutariinni ataasiakkaat nammineq atuaqqissaarnissaq piffissaqarfigissavaat. Ilaqutariittut eqqartueqatigeereernerup kingorna ilaqutariit avissaartuuttariaqanngillat, ataasiakkaalli ataatsimiinnermut piareersarsinnaapput atuagassianilluunniit atuarlutik. Ilaqutariit ilaat aalajangersimapput unnummi tamatumani fjernsyni ikinniarnagu.

6. Eqqartuineq qanoq ingerlanneqarsinnaava?

⁶ Eqqartuineq qanoq ingerlanneqarsinnaava? Apeqqutit akissutillu tamatigut atorneqarnissaat pisariaqanngillat. Unnuup ilaqutariittut anersaakkut ittunik sammisaqarfiup uummaarissumik soqutiginartumillu ingerlanneqarnissaanut iluaqutissatut pilersaarusiap ulluinnarni ataatsimiinnermi atorneqartartup assinga ilaqutariippassuit najoqqutarisarpaat. Ilaqutariittut eqqartueqatigiinneq assigiinngitsunut immikkoortitertarpaat assigiinngitsunillu sammisaqarfigisarlugu. Assersuutigalugu, ataatsimoorlutik Biibili atuartarpaat, ataatsimiinnissap ilaannaanut piareersaqatigiittarput oqaluussinissamullu sungiusaqatigiittarlutik. Qupperneq 6-imi siunnersuuteqarpoq.

7. Anersaaq qanoq ittoq angajoqqaat isumagissavaat?

⁷ Anersaaq qanoq ittoq angajoqqaat isumagissavaat? Ilaquttatit asannippaluttumik eqqissisimasumillu avatangiiseqarunik ilikkagaqarnerussapput. Silagitsillugu silami atuaqqissaarsinnaassaasi. Pisariaqartinneqaraangat unillatsiartaritsi. Ilaqutariittut atuaqqissaareernerup kingorna ilaqutariit ilaat sutugassaqartitsisarput. Angajoqqaat unnuk ilaqutariittut anersaakkut ittunik sammisaqarfik naveersinermut oqaaqqissaarinermulluunniit atorniassanngilaat, ajornartorsiummilli imaluunniit ileqquliuttoorsimasamik maluginiagaqarunik immaqa piffissaqarfiginialaarsinnaassavaat. Meeqqamulli eqqartugassat peqqusiileqinartuuppata pitsaanerussaaq sapaatip akunnerata ingerlanerani taakku qaqileqqissallugit qatanngutai najuutsillugit meeraq peqqusiileqinnginniassammat. Unnuk ilaqutariittut anersaakkut ittunik sammisaqarfik qeratasuujussanngilaq pikkunaatsuunaniluunniit, Guutimilli pilluartumik pallorfiginninnitsinnut ersiutaassaaq. — 1 Tim 1:11.

8, 9. Ilaqutariit ittuat qanoq piareersartarsinnaava?

⁸ Ilaqutariit ittuat qanoq piareersarsinnaava? Unnummut ilaqutariittut anersaakkut ittunik sammisaqarfimmut ilaqutariit ittuat piareersareertaruni aalajangiussimaguniullu suna aamma qanoq sammineqassanersoq ilaqutariit pissarsiaqarfiginerussavaat. (Uss 21:5) Taakku pillugit uiusup nuliani oqaloqatigiguniuk pitsaassaaq. (Uss 15:22) Ilissi ittuususi, soormi meeqqasi aperilaartarussigit suut sammerusunneraat? Taamaaliortarussi qanoq uummammioqarnersut ilisimanerussavasi.

⁹ Ilaqutariinni ittuusup piareersarnerminut piffissarujussuaq tamatigut atussallugu pisariaqanngilaq. Pinerit tamaasa ittuusoq sammisassanik nutaanik sanasannginniassammat sapaatip akunneri tamaasa periikkanik uteqqiilaartarnissaq ilaqutariit nuannaarutigissagunarpaat. Immaqa unnuk ilaqutariittut anersaakkut ittunik sammisaqarfik naaniariartoq, ilaqutariit anersaakkut pisariaqartitaat eqqaamanerani sapaatip akunnerata tulliani pisassat piareersarsinnaassavai. Ilaqutariinni ittuusut ilaat naatsunnguamik pilersaarusiortarput ilaqutariillu takusinnaasaannut, assersuutigalugu nillataartitsivimmut nivinngarlugu. Taamaaliorneq ilaqutariinnut nuannaarsaataasarpoq qilanaartuutaasarlunilu pisariaqarpallu ilaqutariit piareersarnermut piffissaqarluarsinnaallutik.

10. Angerlarsimaffimminni kisimiittut unnuk ilaqutariittut anersaakkut ittunik sammisaqarfik qanoq atorsinnaavaat?

¹⁰ Kisimiittuuguma qanoq iliussaanga? Angerlarsimaffimminni kisimiittut, unnuk ilaqutariittut anersaakkut ittunik sammisaqarfik nammineq atuaqqissaarnermut atorsinnaavaat. Nammineq atuaqqissaarnermut pilersaarusiami tunngaviusumi Biibilimik atuarneq, ataatsimiinnermut piareersarneq Napasuliaq Alapernaarsuiffik-mik Vågn op!-imillu atuarneq ilaasariaqarput. Oqaluussisartut ilaat nammineq atuaqqissaarnissammut pilersaarusiorsimapput. Immaqa ilaannikkut oqaluussisartoq alla imaluunniit ilaqutariit Biibilimut tunngasunik ineriartornartumik eqqartueqatiginniarlugit qaaqqusinnaavaat.

11, 12. Unnuk ilaqutariittut anersaakkut ittunik aalajangersimasumik sammisaqarfik sunik iluaqutissartaqarpa?

¹¹ Unnuk ilaqutariittut anersaakkut ittunik aalajangersimasumik sammisaqarfik sunik iluaqutissartaqarpa? Pallorfiginninnermut ilumoortumut qamannga pisumik peqataasut Jehova qaninnerulissavaat. Aamma ilaqutariit Jehovamut pallorfigeqatigiittut akunnerminni attaveqarnerat nukittunerulissaaq. Aappariit pilluaqqussutit misigisimasatik pillugit allapput: “Pioneritut meerartaqanngitsutut unnuk ilaqutariittut pallorfiginneqatigiiffipput qilanaarisarparput. Misigisarpugut immitsinnut Ataatatsinnullu qilammiusumut qaninnerulerluta. Ullormi atuaqqissaaqatigiiffissatsinni iteraangatta immitsinnut oqarfigisarpugut: ‘Eqqoriaruk unnugu sussasugut? Ilaqutariittut pallorfiginneqatigiissaagut!’”

¹² Ilaqutariit ulapittut unnukkut ilaqutariittut atuaqqissaaqatigiinnissamut aamma iluaqutigisarpaat. Anaanaq kisimiittoq pioneriusoq marlunnillu ernilik allappoq: “Siornatigut ilaqutariittut atuaqqissaaqatigiittarnerput iluatsippallaarneq ajorpoq. Qasusarnermik nalaatsornerinnakkut piareersarnertaqanngitsumillu pisarpoq. Takorloorsinnaaneq ajorpara qanoq iluatsissanerlugu. Taamaattumik ilissinnut allappunga unnuk ilaqutariittut anersaakkut ittunik sammisaqarfik pillugu qujarusullunga. Ilaqutariittut atuaqqissaaqatigiittarnerput iluatsippoq iluaqutaaneralu malugaarput.”

13. Aaqqissuussaq tamanna ilaqutassinnut qanoq iluaqutaatigissanersoq suna aalajangiisuua?

¹³ Unnuk ilaqutariittut anersaakkut ittunik sammisaqarfik sabbatitulli Ataatatsinnit qilammiusumit tunissutaavoq ilaqutariinnut iluaqutaasoq. (Jaak 1:17) Ilaqutariit Israelikkut anersaakkut qanoq pissarsiaqartiginerannut sabbatimik qanoq atuisimanerat apeqqutaavoq. Tamatumunnga assingusumik unnummik ilaqutariittut pallorfiginninnermut periarfissarilersimasatsinnik qanoq atuinerput aalajangiisuuvoq ilaquttatta qanoq iluaqutigitigissaneraat. (2 Kor 9:6; Gal 6:7, 8; Kol 3:23, 24) Aaqqissuussamik tamatuminnga atuilluarnikkut ilaquttatillu tussiaasiortutut oqarumassaasi: “Kisianni Guuti qanillugu inuuneq tassa pilluarnartora. Qimarnguffigaara Guuti [Jehova] suliatit tamaasa oqaluttuarisinnaaniassagakkit.” — Tuss 73:28.

[Issuagaq 5-mi assiliartaq]

Unnuk ilaqutariittut anersaakkut ittunik sammisaqarfik qeratasuujussanngilaq pikkunaatsuunaniluunniit, Guutimilli pilluartumik pallorfiginninnitsinnut ersiutaassaaq

[Ungalusaq 6-mi assiliartaq]

TOQQORUK

Unnummut ilaqutariittut anersaakkut ittunik sammisaqarfimmut isumassarsiat

Biibili:

• Sapaatip akunneranut Biibilimi atuagassat ilaat atuaqatigiissutigisigit. Atuagassamut tulluarpat, arlaat oqaluttuartuusinnaavoq allallu inuttat assigiinngitsut oqaasiinik atuartuusinnaallutik

• Biibilimi atuagassap ilaa isiginnaartitsissutigineqarsinnaavoq

• Ilaqutariinniittut tamarmik immikkut Biibilimi kapitalinik siumut atuagassinneqarlit atuagassanullu ataatsimik marlunnilluunniit apeqqutissanik sanallit. Apeqqutinullu akissutit ataatsimoorlusi nassaariniarsigit

• Sapaatip akunneri tamaasa Biibilimiit versi pappiaqqamut allattaruk, eqqaamaniarsariuk paasiniarlugulu qanoq isumaqarnersoq. Sapaatip akunneranut suliasi uteqqittarsigit paasiniarlugu allassimaffiit qassit alanngaarlugit eqqaamasinnaanerisi

• Biibilimik atuaanermik immiussamut Biibilissinni malinnaajutigalusi tusarnaaritsi

Ataatsimiinnerit:

• Ataatsimiinnermi sammisassat ilaannut piareersaqatigiigitsi

• Guutip Naalagaaffiata erinarsuutaanik tulliani ataatsimiinnermi atugassanut sungiusaritsi

• Teokratiimik Ilinniarfimmi pisassaqartoqarpat imaluunniit oqaluussinermut tunngasumik ataatsimiinnermi takutitsisoqarniarpat ilaqutariinnut tamanut tusartinneqarsinnaavoq imaluunniit qanoq iliortoqarsinnaanera oqaluuserisinnaavarsi

Ilaqutariinni pisariaqartitat:

• Atuakkanit ‘Unge spørger’-mit imaluunniit Ajoqersuisorsuaq ilinniarfigiuk-mit sammisaqaritsi

• Unamminiarnartut atuarfimmi nalaatarineqarsinnaasut qanoq anigorniarneqarsinnaanerinik isiginnaartitsisioritsi

• Angajoqqaat meeqqallu isiginnaartitsisiornermi paarlaaqatigiillit. Meeqqat sammisassamik misissuissapput angajoqqaallu eqqarsalersinniarlugit oqaloqatigalugit

Oqaluussineq:

• Aallarniummik weekendimi atugassassinnik sungiusaqatigiigitsi

• Eqqaaniaalluni nalliuttorsiornerup imaluunniit feeriap nalaani oqaluussinerunissamut ilaqutariit piviusorsiortumik anguniagarisinnaassaat eqqartorsigit

• Ilaqutariinniittut tamarmik immikkut oqaluussinermi apeqqutit nalaanneqarsinnaasut qanoq akineqarsinnaaneri minutsialunnik periarfissalerlugit takutitsillit isiginnaartitsisiorlutillu

Siunnersuutit allat:

• Atuagassiani kingullerni allaaserisamik atuaqatigiigitsi

• Ilaqutariinniittut tamarmik immikkut atuagassiani kingullerni allaaserisamik soqutigisaminnik atuarsimasaminnik unnummi ilaqutariittut anersaakkut ittunik sammisaqarfimmi uteqqiillit

• Unnummi ilaqutariittut pallorfiginneqartigiinnissinnut oqaluussisartoq imaluunniit aappariit, immaqa apersorsinnaasasi, ilaannikkut qaaqqusarsigit

• Filmiutitta ilaat takusiuk oqaloqatigiissutigalugulu

• Allaaserisaq Vågn op!-imeersoq “Unge spørger” imaluunniit “Til brug i familien” oqaloqatigiissutigisiuk

• Allaaserisaq Napasuliaq Alapernaarsuiffik-meersoq “Qitornatit ilinniartikkit” imaluunniit “Atuartartunut inuusuttunut” oqaloqatigiissutigisiuk

• ’Årbogen’-imi kingullermi imaluunniit ataatsimeersuarnermi saqqummersumi nutaami immikkoortoq atuarluguluunniit oqaloqatigiissutigisiuk

• Ataatsimeersuarnermi imaluunniit ataatsimeersuaararnermi najuuffigisassinni pingaarnerit uteqqiiffigisigit

• Jehovap pinngortitaanik isiginnaaritsi, assersuutigalugu naasut uumasulluunniit, oqaloqatigiissutigalugulu Jehova pillugu taakkua qanoq ilinniartissinnaaneraatigut

• Assiliilluni sanalukkamik, nunap assinganik allattorsimaffimmilluunniit suleqatigiillusi sammisaqaritsi