Job qasujuissimavoq — uaguttaaq taamaassinnaavugut!
’Ata, ilalaartut [qasujuitsut] pilluarneraraavut.’ — JÂKO 5:11.
1. Kristumiu utoqqaq misilinneqarnini pillugit ilaanni qanoq oqarsimava?
’DIAAVULUP persaraanga! Jobitorluinnaq misigaanga!’ Oqaatsit taakku atorlugit A. H. Macmillanip misigissutsini Jehovap Nalunaajaasuisa qullersaqarfianni ikinngumminut anissimavai. Qatanngutip Macmillanip nunarsuarmi inuunini aggustip 26-ani 1966-imi, 89-inik ukioqarluni, naavaa. Nalunngilaa kristumiut tanitat immisut ittut aalajaallutik kiffartornerminni akissarsiassaata ’malissagaat’. (sarĸúmersitat 14:13) Tassami tanitat Jehovamut kiffartortuaannarsinnaassapput qilammi toqujuissutsimut makititaanermikkut. Qatanngutip Macmillanip akissarsiassamik tamatuminnga angusinera ikinngutaasa nuannaarutigaat. Nunarsuarmili inuunini naajartortillugu assigiinngitsorpassuarnik misilinneqartarsimavoq, ilaatigut timikkut peqqiilliuutinit. Tamanna taassumunnga ersarissumik tassaavoq Guutimut assuarnaassutsiminik Satanip aseruiniarnera.
2, 3. Job kinaava?
2 Job qatanngut Macmillanip eqqartugaa tassaavoq uppernikkut misiligarneqarnernik annertuunik qasujuilluni atuisimasoq. Job ’nunami Usimi najugaqarsimavoq,’ qularnanngitsumik ullumikkut Arabiap avannaani. Noap ernerata Semip kinguaaraa Jehovamik pallorfiginnittoq. Jobip misilinneqarnera pisimannguatsiarpoq piffissami Josefip toqunerata Mosesillu assuarnaassutsiminik ersersitsinerata akornanniittumi. Piffissami tamatumani Guutimut tunniusimanikkut Job nallernissaqarsimanngilaq. Jehovap Job assuarnaatsutut Guutimillu mianerinnittutut isigaa. — Job 1:1, 8.
3 Job ’angutini kangiamiuni pissaaneqarnerpaasimavoq’ kiffarpassuaqarsimallunilu, 11500-nillu uumasuuteqarsimalluni. Anersaakkulli pisuussutit pingaarnerpaatissimavai. Ullumikkut ataataasut Guutimik mianerinnittut assigalugit Jobip ernini arfineq-marluk paninilu pingasut Jehova pillugu ilinniartittarsimassavai. Allaat namminneq angerlarsimaffeqalereeraluartut ilaqutariinni ittuusutut taakku pillugit pilliisarsimavoq, ajortulioriataarnissaat eqqarsaatigalugu. — Job 1:2-5.
4. (a) Sooq kristumiut qinugisaasut Jobimik pisimasoq eqqarsaatigiuartariaqarpaat? (b) Job pillugu suna misissussavarput?
4 Kristumiut qinugisaasut naammagittarlutik qasujuinnissaminnut nukissaqarusullutik Jobip maligassiaa eqqarsaatigisinnaavaat. ’Ata,’ ajoqersugaq Jakob allassimavoq, ’[qasujuitsut] pilluarneraraavut; Jobip [qasujuissusianik] tusarsimavusi, Jehovallu aniguiffigititaa ilisimavarsi, Jehova nallittuillunilu isumassuinertoqimmat.’ (Jâko 5:11) Job assigalugu Jesusip ajoqersugai tanitaasut ’amerlangaartunullu’ ilaasut ullumikkut uppernikkut misilinneqarnerminni aniguissagunik qasujuissuseqartariaqarput. (sarĸúmersitat 7:1-9) Misilinneqarnerit suut Jobip qasujuilluni atortariaqarsimagamigit? Sooq misilinneqarsimava? Misigisimasaalu qanoq iluaqutigisinnaavavut?
Apeqqut pingaaqisoq
5. Jobip nalusaanik qilammi susoqarsimava?
5 Jobip ilisimanngisaanik apeqqut akerleriissutaasoq pingaaruteqaqisoq qilammi pilersinneqarsimavoq. „Ullut ilaanni Guutip erneri takkupput [Jehovamullu] sassarlutik.“ (Job 1:6) Guutip ernitua, Oqaaseq, najuuppoq. (Juánase 1:1-3) Aamma najuupput inngilit assuarnaatsut inngilillu ’guutit’ naalanngitsut. (1 Moses 6:1-3) Aamma Satan najuuppoq, aatsaammi Naalagaaffik 1914-imi pilersinneqareerpat qilammit peersitaasussaagami. (sarĸúmersitat 12:1-12) Jehovap saani Satan apeqqummik pingaarluinnartumik pilersitsivoq. Apeqquserpaa Jehova pinngortitaminut tamanut kisimi ilumut oqartussaasussaviunersoq.
6. Satanip suna anguniarpaa, qanorlu Jehova mamarlerpaa?
6 „Sumit aggerpit?“ Jehova aperivoq. Satan akivoq: „Nuna tamanut tamaanga angalaarfigigakku.“ (Job 1:7) Inunnik iisassarsiorsimavoq. (1 Pîtruse 5:8, 9) Jehovap kiffai ataasiakkaat assuarnaassusiisa aserorniarsarinerisigut Satanip uppernarsarniarsaraa kinaluunniit Guutimut asanninneq kisiat pissutigalugu naalattuaannarnavianngitsoq. Jehovap Satan oqarfigaa: „Taavami kiffara Job arajutsisigunanngilat. Taanna nunami tamarmi nalissaqanngilaq assuarnaatsuullunilu peqqusersuitsuugami Guutimillu mianerinnittuulluni ajortumik iliuuseqarnaveersaartuugami.“ (Job 1:8) Jobip Guutip inunnut naammalluinnanngitsunut najoqqutassiai maleruarpai. (Tussiaat 103:10-14) Satanili akiuivoq: „Jobimi pissutissaqarluarunarpoq Guutimik mianerinninnerminut. Taanna ilaqutaalu pigisaalu tamaasa tamatigut sernissugarisimannginnerpigit? Sulinera tamaat pilluaqqusimavat, nersutaataalu amerlangaaramik nunamut tamarmut siaruarsimapput.“ (Job 1:9, 10) Taamaalilluni Diaavulup Jehova mamarlerpaa oqarniarlunilusooq kinaluunniit taassuminnga asannivinnini pissutigalugu pallorfiginninngitsoq pinngortitanili akilerlugit pinngitsaalillugit imminut kiffartortikkai. Job namminissarsiorluni, Guutimut asanninnini pissutiginagu, kiffartornerarpaa.
Satan saassussivoq!
7. Diaavulup qanoq Guuti unammillerpaa, Jehovalu qanoq qisuariarpa?
7 „Ataguli,“ Satan oqarpoq, „assat isatsillugu pigisaanik piiaaffigeriassagit, taava kiinnat toqqavillugu perloqqussagaluarpaatit.“ Taama kannguttaatsigisumik unammillerneq tamanna Guutip qanoq akiniassavaa? „Pigisai tamaasa,“ Jehova oqarpoq, „piumasannik iliorfigisinnaavatit, taannali nammineq pinerlissanngilat.“ Diaavulu oqarsimavoq Jobip pigisai tamarmik pilluaqqusaasut, amerliartortitaasut sernissugaasullu. Jobip timimigut pinerlineqanngikkaluarluni naalliunnissaa Guutip akueraa. Ajortumik iliornissani aalajangiusimallugu Satan katersuussimasunit qimaguppoq. — Job 1:11, 12.
8. (a) Pigisatigut sunik Job annaasaqarpa? (b) ’Inneq Guutimeersoq’ sumerpiaq piva?
8 Sivitsunngitsoq Satan saassussilluni aallartippoq. Kiffaasa ilaata Job nuanniitsumik matuminnga tusarlerpaa: „Ussigit assallatserummik uniartillugit siutituullu arnavissat eqqaanni mangiartillugit Sabamiut tikiullutik tamakku tiguaat kiffallu panamik toqullugit.“ (Job 1:13-15) Jobip pigisai sernissorneqarunnaarsimapput. Kingunitsianngua anersaapiluit saassussinerata kingunerisaanik kiffaq alla nalunaariartorpoq: „Guutip innerata qilammit nakkarluni savat paarsisuilu tuffigai ikuallatsillugillu.“ (Job 1:16) Ajunaarnernut taama ittunut kiffaanut tuttunut Guutip pisuutinnissaa ilumut diaavulorpalaaq! Inneq qilammeermat Jehovap pisuutinnissaa ajornanngitsuararsuuvoq, anersaapilunninngaanneersuuvorli.
9. Jobip pigisatigut annaasaqarnera Guutimut attaveqarneranut sunniuteqarpa?
9 Satan saassusisaqattaartillugu kiffaq alla nalunaarpoq Jobip qatigattuujutai Kaldæerit tigusimagaat paarsuisuilu panamik toqorarsimagaat. (Job 1:17) Naak suutaarussaagaluarluni Jobip Guutimut attaveqarnini attatiinnarpaa. Illit pigisatigut taama annertutigisumik annaasaqaraluaruit Jehovamut assuarnaassutsit attatiinnassagaluarpiuk?
Eqqugaaneq suli anneq
10, 11. (a) Jobip meerai qulit qanoq pippat? (b) Meeqqani alianartumik toqoreermata Jobip Guuti qanoq isummerfigaa?
10 Diaavulup Job suli eqqissitinngilaa. Kiffaq aamma alla nalunaarpoq: „Ernitit panitillu qatanngummik angajulliup illuani nerillutillu imertillugit tassanngaannaq anorersuaq inoqajuitsup tungaanit pitorarpoq. Anorip illup teqeqqui sisamat eqqormagit illu uppippoq inuusuttut nanerlugit toqulugillu. Uanga aniguisutuaallunga tamatuminnga nalunaarfigiartorpakkit.“ (Job 1:18, 19) Paasinerluisoq immaqa oqarumassagaluarpoq aseruineq ’Guutip iliuuseqarneranik’ pissuteqartoq. Anersaapiluulliuna Job ikilertiaffiisigut saassukkaat.
11 Aliatsaqaluni Jobip ’qallersaatini alittorpaa nutsanilu killorlugit, nunamullu naallulluni pallorpoq kiinnani nunamut tutsillugu.’ Oqaasiili tusarnaariakkit: „[Jehova] tunniussigami [Jehova] tigusivoq, [Jehovap] aqqa unnersiutigineqarli!“ Oqaluttuaq ima nangippoq: „Job tamakkuninnga tamanik pineqaraluarluni ajortuliunngilaq Guutilu oqaatsimik ataatsimilluunniit oqaaserluffiginagu.“ (Job 1:20-22) Satan aamma ajorsartitaaqqippoq. Uagummi Guutip kiffaasut qanigisatsinnik annaasaqassagaluarutta alianartumik qanoq qisuariassaagut? Namminissarsiornata Jehovamut tunniusimalluta taassuminnga tunaarinnikkutta Jobip iliorsimaneratut assuarnaassutsitsinnik attassiinnarsinnaassaagut. Tanitat suleqataasalu nunarsuarmi inuunissaminnik neriugisaqartut Jobip qasujuissusianik oqaluttuaq tamanna tuppallersaatigalugulu nakussatsissutigilluarsinnaavaat.
Pissutsit najummassimanarsipput
12, 13. Anersaat katersuuteqqinneranni Satan sumik piumasaqarpa, Guutilu qanoq qisuariarpa?
12 Sivitsunngitsoq Jehovap anersaat qilammi katersorteqqippai. Job qitornaarussimavoq, suutaarulluni, isumaqarluni Guutip taamatut atugarliortikkaani, taamaakkaluartorli assuarnaassutsini attatiinnarlugu. Soorunami Satanip nassuerutigiumanavianngilaa Guutimut Jobimullu saassussinini pissutissaqanngitsut. ’Guutip ernerisa’ illua’tungeriit oqaasissatik saqqummiukkaat maanna tusarnaassavaat, Jehovap Satan kimikkaa aalajangiinermik pilersitsilluni.
13 Satan nassueqqullugu Jehovap aperaa: „Sumit aggerpit?“ Qanoq akineqarpa? „Nuna tamanut tamaanga angalaarfigigakku.“ Jehovap kiffani Guutimik mianerinnittoq assuarnaassutsiminillu attassiuaannartoq, Job, eqqaasitsissutigeqqippaa. Diaavulu akivoq: „Ameq amermik naleqararaaq! Inuummi pigisani tamaasa akigeriaannaasarpai inuunini annaajumanagu. Assat isatsillugu Job nammineq timaatigut ajoquseriassagit, taava kiinnat toqqavillugu perloqqussagaluarpaatit.“ Taava Guuti oqarpoq: „Piumasannik iliorfigisinnaavat. Taamaallaat inuunera asattuutissavat.“ (Job 2:2-6) Satanip oqaatigimisaarpaa Jehovap Jobimik sernissuinini suli piivissimanngikkaa, piumasaqaatigalugulugulu saarnginik uinnganillu naalliutsitsinissaminut piginnaaneqartinneqarnissani. Jobip toqunnissaanut Diaavulu akuerisaanngilaq, nalunngilaali nappaatit Job naalliutsissagaat imalu isikkoqalersillugu isertortumik ajortuliai pillugit Guutip pillaraa.
14. Maanna Satanip Job qanoq eqqorpaa, aamma sooq inummit kimilluunniit Job ajorunnaarsinneqarsinnaanngila?
14 Satan qimaguppoq pilersaarutipilunilu nuannaapilulluni aallartippaa, „Jobilu perlutsippaa ajuarsuarnik aluinit kasseranut“. Job avaanngusussimassaqaaq arsani issialerami marriukkap aseqquanik imminut kiliortorluni. (Job 2:7, 8) Anniaatai maajunnartut nikanarsaataasullu Satanip piliarimmagit nakorsamit ajorunnaarsinneqarsinnaanngilaq. Jehovap kisimi Job ajorunaarsissinnaavaa. Illit napparsimaguit puiunngisaannassavat qasujuinnissannut Guutip nakussatsissinnaammatit, silarsuarmilu nutaami nappaateqanngiffiusumi inuunermik tunisinnaammatit. — Tussiaat 41:2-4; Jesaja 33:24.
15. Nuliata Job qanoq kajumissaarpaa, Jobilu qanoq akiva?
15 Kingunerileraa Jobip nulia oqarpoq: „Assuarnaassutsit suli aalajangiusimaniinnarniarpiuk? Guuti perloqquinnaruk, toquinnaruit pitsaanerummat.“ Assuarnaassuseq aamma nassuiarneqarsinnaavoq assuarnaateqanngitsumik tunniusimanermik, immaqalu nuliata mitallerpaluttumik oqaluffigaa Guutimik perloqqusiniassammat. Jobili akivoq: „Arnatut silaatsutut oqalupputit! Ajunngitsut Guutimit pisut tigusinnaasaratsigit ajortut aamma tigusariaqannginnerpavut?“ Allaat Satanip peqqusersuumik saassussinera tamanna iluaqutaanngilaq. Allassimavoq: „Job tamakkuninnga tamanik pineqaraluarluni oqaatsigimigut ajortuliunngilaq.“ (Job 2:9, 10) Aamma uagut qanigisatta ilaasa oqarfigisinnaavaatigut kristumiutut kiffartornermi ulapinnerput silaatsuliornerusoq, kajumissaarlutalu Jehova miserratigissagipput. Misilinneqarnerni taama ittuni Jobitut qasujuissinnaavugut Jehova asagatsigu aqqalu illernartoq unnersiutigerusukkatsigu. — Tussiaat 145:1, 2; Eprîarit 13:15.
Salloqittaasut pingaakujuttut pingasut
16. Kikkut Job tuppallersarniartuusaarlugu takkuppat, Satanilli qanoq kimippai?
16 Satanip ajortunngorsimanersua aamma erseqqippoq ’ikinngutaasut’ pingasut Job tuppallersariartortuusaarlugu takkummata. Ilaat tassa Elifaz, qularnanngitsumik Abrahamip kinguaava Isakikkoortumik taavalu Esauikkoortumik. Elifaz oqalunnermi siuttuugami qularnanngitsumik taakkunannga utoqqaanersaavoq. Aappaa tassa Bildad, Sjuap, Abrahamip Keturamit ernerisa ilaata, kinguaava. Pingajuat tassa Zofar, ilaquttani imaluunniit najugaqarfini, Arabiap avannaa-kitaani issimagunartoq, malillugu Na’amamiumik taaneqartartoq. (Job 2:11; 1 Moses 25:1, 2; 36:4, 11) Soorlu ullumikkut Jehovap nalunaajaasuinik Guutimik tunussititsiniaasartut taama pineqartartut pingasut taakku Satanimit sunnerneqarput Job eqqunngitsumik unnerluutigineqarnermini pisuusutut nalunaartinniarsaralugu assuarnaassusialu aserorniaraluarlugu.
17. Pulaartut qanoq iliorpat ullunilu unnuanilu arfineq-marlunni qanoq iliunngillat?
17 Angutit taakku pingasut misiginneqataasuusaartupilussuupput, qissallutik, atisatik alittorlugit niaqqutillu arsaterlugit. Taavali ulluni unnuanilu arfineq-marlunni Jobimi unnuipput tuppallernartumik ataasinnguamilluunniit oqaaseqaratik! (Job 2:12, 13; Lúkarse 18:10-14) Salloqittaasut pingaakujuttut pingasut taakku ima anersaakkut eqqarsaateqanngitsigipput Jehova siunertaalu pillugit ataatsimilluunniit oqaasissaqaratik. Eqqunngitsunik isummertarput aliasuffissarlu qaangiunniariarpat tamakku Jobimut atornissaannut piareersimallutik. Soqutiginarpoq angut inuusuttoq Elihu ullut arfineq-marluk taakku suli qaangiutsinnagit tusarnaarsinnaalerluni inissimmat.
18. Sooq Job eqqissilluni toqorusukkaluarpa?
18 Kiisami Jobip nipaanneq kipitippaa. Pulaartui tuppallersaataasimanngeqaat, maannalu ulloq inuuini perloqquaa, paasisinnaanagulu atuagarliornini sooq ingerlaannartoq. Eqqissilluni toqorusuppoq eqqarsarlunilu inuutilluni nuannaaqqissinnaanani, taama piitsuutigaluni, kiserliortigaluni napparsimatigalunilu. Inuuneranilli arsaarinnissinnaasumit Guutip Job eqqugaatinngilaa. — Job 3:1-26.
Jobip unnerluussisai saassussipput
19. Elifazip qanoq Job eqqunngitsumik unnerluutigaa?
19 Oqallinneq pingasunik immikkoortulik, Jobip assuarnaassusianut misilinneqaataaqqittoq, aallarnerlugu Elifaz siullersaalluni oqalulerpoq. Siullermik oqalunnermini ima aperaaq: „Assuarnaatsunik nungutitaasoqartarnerpa?“ Aalajangiusimavaa Job arlaannik ajortuliorsimagami Guutimit pillarneqartoq. (Job, kapitalit 4, 5) Aappassaanik oqalunnermini Jobip ilisimassusia nikassaavigaa aperalunilu: „Suna ilisimaviuk uagut nalusarput?“ Imminut iluartuutinniarluni oqarpoq Jobip Ajugaqanngitsoq akimorniarsarigaa. Elifazip aappassaanik oqalunnini naggaserlugu Job oqaatiginerluppaa tunussinerarlugu, peqquserluttuliornerarlugu unneqqaserlunnerarlugulu. (Job 15) Naggataamik oqaaseqarnermini eqqunngitsumik Job unnerluutigaa ajortuliornerpassuarnut, soorlu ingasaassiniaannarluni iluanaarniuteqarsimasutut, pisariaqartitsisunik iffiamik imermillu tunisiumanngissimasutut kiisalu uillarnernik iliarsunnillu naqisimannissimasutut. — Job, kapitali 22.
20. Bildadip Jobimut unnerluussutai sumik ilisarnaateqarpat?
20 Oqallinnermi immikkoortuni pingasuni tamani Bildad tulliulluni oqaaseqartarpoq, annerusutigullu Elifazip eqqartugai eqqartorlugit. Bildad sivikinnerusumik annernarnerusunilli oqaaseqartarpoq. Allaat Jobip meerai unnerluutigai ajortuliorsimasutut toqumik kinguneqartumik. Pissutissaqanngivilluni ima assersuusiorpoq: Soorlu ivigarsuit imeqanngippat naasinnaanngitsut „Guutimik puiuisut tamarmik“ tamanna pillarneqaatigisariaqarpaat. Tamanna ilumoorpoq, Jobimulli atorneqarsinnaanngilaq. (Job 8) Bildadip Jobip naalliuutai guutiitsut eqqorneqaatigisartagaannut naligitippai. (Job 18) Pingajussaanik naatsumik oqaaseqarnermini Bildadip oqaatigaa inuk tassaasoq „quperloq“ aamma „qullugiaq“, tassa Guutip isaani minguttuujulluni. — Job, kapitali 25.
21. Zofarip Job qanoq unnerluutigaa?
21 Zofar kingullersaalluni oqaaseqarpoq. Eqqarsaatai annerusutigut Elifazip Bildadillu saqqummiussaannut assingupput. Job guutiitsutut unnerluutigaa kajumissaarlugulu ileqquni ajortilippalaartut taamaateqqullugit. (Job, kapitali 11, 20) Oqallinnerit immikkoortuisa aappaata kingorna Zofar nipangerpoq. Pingajussaanni ilassutissaqanngilaq. Oqallinnerli tamaat Jobip unnerluutiginnitsini akisarpai. Assersuutigalugu ima oqarpoq: „Tamassi tuppallersaasuuvusi erloqisitsiinnartut. Oqaatsit isumaqanngitsut qaquguuna aniatikkunnaarniarisi.“ — Job 16:2, 3.
Aamma uagut qasujuissinnaavugut
22, 23. (a) Diaavulup Jobimik misiliisimanermisut qanoq ililluni Jehova Guutimut assuarnaassuserput immaqa misilinniassavaa? (b) Naak nalunngikkaluarlugu Job misilinneqarnermini qasujuissimasoq taamaattoq isumaanut tunngatillugu suna paasiniassallugu soqutiginarpa?
22 Soorlu Jobimut pisimasoq aamma uagut ataatsikkut arlalinnik misilinneqarsinnaavugut, immaqa Satanip sapiissuseerutinniarsarisarpaatigut allatigulluunniit assuarnaassuserput kipitinniartarlugu. Immaqa aningaasatigut ajornartorsiulerutta Jehovamit tunussitinniassavaatigut. Qanigisarput toquppat, imaluunniit napparsimalerutta, immaqa Guutimik pisuutitsiniartissavaatigut. Allat Jobip ’ikinngutaatut’ iliorlutik eqqunngitsumik unnerluutigisinnaavaatigut. Soorlu qatanngut Macmillan oqarsimasoq Satanip ’persarisinnaavaatigut’, qasujuissinnaavugulli.
23 Soorlu misissoreeripput Job assigiinngitsunik misilinneqarnermini qasujuissimavoq. Peqqavillunili taamaaliorpaa? Sapiissuseerulluinnarpa? Ilanngutassiami tulliuttumi takussavarput Job ilumut neriuutaarutivissimanersoq. (wE 15/11 94)
Qanoq akissavit?
□ Apeqqut akerleriissutaasoq pingaartoq suna Satanip Jobip nalaani pilersippaa?
□ Job qanoq sakkortunerpaaffissaa tikillugu misilinneqarpa?
□ „Ikinngutaasa“ Job qanoq unnerluutigaat?
□ Satanip Jobimik misiliisimanermisut qanoq ililluni Jehova Guutimut assuarnaassuserput immaqa misilinniassavaa?
[Qupp. 10-mi assiliartaq]
A. H. Macmillan