Assuarnaassutsit Jehovap uummataanik nuannaartitsisarpoq
“Ernera, ilisimasuuniarit taamalu uummatiga nuannaartillugu, mitallersikka akisinnaaniassavakka.” — USSATIT 27:11.
1, 2. (a) Saatanip unnerluutiginnissutaa suna Jobimik allakkani allaatigineqarpa? (b) Sumit erserpa Saatani Jobip kingorna suli Jehovamik mitalliisartoq?
JEHOVAP akueraa kiffami aalajaatsup Jobip assuarnaassusianik Saatanip misiliinissaa. Tamatuma kingunerisaanik Jobip nersutaatini qitornanilu annaavai peqqiilliulerlunilu. Saatanilli Jobip assuarnaassusia apeqquseramiuk Jobi kisiat eqqarsaatiginngilaa. Ima oqarpoq: “Ameq amermik naleqararaaq! Inuummi pigisani tamaasa akigeriaannaasarpai inuunini annaajumanagu.” Taamatut unnerluutiginnimmat apeqqut Jobimuinnaanngitsoq tunngasoq pilerpoq. Jobilu qangarsuarli toqoreeraluartoq Saatani inuit assuarnaassusiannik suli apeqqusiisarpoq. — Jobi 2:4.
2 Jobip misilinneqarneranit ukiut 600-t missaat qaangiuttut Jehovap Salomo ima allannissamut isumassarsisippaa: “Ernera, ilisimasuuniarit taamalu uummatiga nuannaartillugu, mitallersikka akisinnaaniassavakka.” (Ussatit 27:11) Tamatumani paasinarsivoq Saatanip unnerluutiginnissutaa tamatuma nalaani suli atuuttoq. Apustilip Johannesip takorruukkamini takugamiuk Saatani qilammit igitaasoq — tassa Guutip naalagaaffiata 1914-imi pilersinneqarnerata kingorna — aamma takuaa Saatani Guutip kiffaanik unnerluutiginnittoq. Aap, allaat ullumikkut, silarsuarmik aaqqissuussinerup ajortup maanna atuuttup ulluini kingullerni naangajalersuni, Saatani Guutip kiffaasa assuarnaassusiannik suli apeqqusiisarpoq. — Saqqummersitat 12:10.
3. Jobimik allakkat sumik ilinniarfigisinnaavavut?
3 Jobimik allakkanit ilinniarfigisinnaasavut pingasut pingaarutillit misissoriartigit. Siullermik, taakkunani erserpoq kinarpiaq inunnut akeraanersoq aamma Guutip innuttaasa akerlilersorneqarnerannut kinarpiaq pisuunersoq, tassa Saatani Diaavulu. Aappassaanik, taakkunani erserpoq Jehovamut qanittumik attaveqarnerput pissutigalugu qanorluunniit misilinneqaraluarluta assuarnaattuarsinnaassasugut. Pingajussaanik, taakkunani erserpoq Guuti, arlaatigut misilinneqalerutta, Jobimik annertoqqusersuisimanermisut uagutsinnik annertoqqusersuiumaartoq. Ullumikkut oqaatsini, peqatigiissortani anersaanilu illernartoq atorlugit annertoqqusersuisarpoq.
Eqqaamajuaruk kinarpiaq akeraanersoq
4. Silarsuarmi pissutsinut maanna atuuttunut kina pisuua?
4 Inuppassuit Saatanip piunera upperinngilaat. Immaqa silarsuarmi pissutsit isumakuluutigaat, paasinngilaalli tamakkununnga pisuusorpiaq tassaasoq Saatani Diaavulu. Ilumoorpoq inuiaat naalliuutaasa ilarpassui inuit namminneq akisussaaffigigaat. Siuaasavut siulliit, Adami Evalu, Pinngortitsisumit siulersorneqarniarnatik aalajangerput. Taamanimiilli kinguaariit tulliuttut sianiilliungaartarput. Taamaakkaluartorli Diaavulu taannaavoq Evamik salloqittaasoq Guutimut pikitsitsisillugu. Taannaavoq nunarsuarmi maani silarsuarmik aaqqissuussinermik naalagaaffigisaminik pilersitsisimasoq. ‘Silarsuarmut matumunnga guutiummat’ taassuma ilisarnaatai inuiannit ersersinneqartarput — makitaneq, assortuiumatuneq, sinnganeq, piumatuneq, pikitsitsiumatuneq salloqittaaqqajaasarnerlu. (2 Korinthimiut 4:4; 1 Timotheusi 2:14; 3:6; atuaruk Jaaku 3:14, 15). Taamatut pissuseqarnerup kingunerisaanik politikkikkut upperisarsiornikkullu akerleriittoqarpoq, uumissuisoqarluni, peqquserluttuliortoqarluni paatsiveeruttoqarlunilu inuiaat nuanniitsunik atugaqarnerannut pissutaangaatsiartunik.
5. Naleqangaartunik ilisimasaqaratta sussaagut?
5 Jehovamut kiffaagatta naleqangaartunik ilisimasaqarpugut. Nalunngilarput silarsuarmi pissutsit ajorsiartuinnarnerannut kinarpiaq pisuunersoq. Eqqissiviilliortitsisup kinarpiaanera pillugu inunnut paasissutisseeqataasariaqartutut misigivugut, ilaa? Aamma Guutimik ilumoortumik, Jehovamik, illersuisinnaanerput taassumalu Saatanimik qanoq piuneerutitsiumaarnera inuiaallu naalliuutaannik qanoq nungutitsiumaarnera pillugit allanut nassuiaasinnaanerput nuannaarutigaarput, ilaa?
6, 7. (a) Ilumoortumik pallorfiginnittut malersugaanerannut kina pisuua? (b) Itsaq Elihup maligassiaa qanoq malissinnaavarput?
6 Saatani silarsuarmi pissutsinut nuanniitsunut pisuuginnarani aamma Guutip innuttaasa akerlilersorneqarnerannut pisuuvoq. Uagutsinnik misiliinissani aalajangiusimavaa. Jiisusip Kristusip apustili Petrusi ima oqarfigaa: “Siimuut, Siimuut! Saatanip piumavaasi qajuusiassatut nakkalatserumallusi.” (Lukasi 22:31) Jiisusip tumaanik atuaasut tamarmik arlaatigut misilinneqassapput. Petrusip Diaavulu ‘løvimut uiannisaartumut iisassarsiorluni angalasartumut’ assersuuppaa. Aamma Paulusi ima allappoq: “Guuti mianeralugu Kristusi-Jiisusimi inuujumasut tamarmik qinugineqartarput.” — 1 Petrusi 5:8; 2 Timotheusi 3:12.
7 Uppeqatitta alianartumit nalaanneqarnerani qanoq ililluta ersersissinnaavarput nalunagu kinarpiaq akeraanersoq? Uppeqaterput qanillinaveersaarnagu Elihup, ikinngutitut ilumoortutut Jobimut oqaluttup, pisimaneratut iliussaagut. Qatannguterput tapersersussavarput tamatta akeqqatsinnut, Saatanimut, akiuunnerani. (Ussatit 3:27; 1 Thessalonikamiut 5:25) Anguniagarput tassaavoq uppeqatitta ikiornissaa qanorluunniit pisoqaraluarpat assuarnaattuarnissaanut, taamaalillunilu Jehovap uummataanik nuannaartitsissaaq.
8. Sooq Saatanip Jobimik Jehovamik ataqqinartitsiunnaarsitsiniaanera iluatsinngila?
8 Saatanip Jobi piiaaffigeqqaaramiuk nersutaataanik piiaaffigaa. Nersutit naleqangaarput, immaqa inuussutissarsiutigai. Aammali Jobip Guutimik pallorfiginninnermi taakku atortarpai. Jobi qitornani illernarsareeraangamigit “ullaannguakkut makilluni ikikkagassanik pilliisarpoq ernini tamaasa immikkut pilliuteqartillugit, isumaliortarami: ‘Immaqa ernikka ajortuliorsimassapput uummatimikkullu Guuti perloqqusimallugu.’ Jobi tamatigut taamaaliortarpoq.” (Jobi 1:4, 5) Tassa Jobi Jehovamut aalajangersimasumik uumasunik pilliuteqartarpoq. Misilinneqarnini aallartimmat taamaaliorsinnaajunnaarpoq. Pisuussutaaruppoq Jehovamik ataqqinartitsissutigisinnaasaminik. (Ussatit 3:9) Qarluminilli Jehovamik ataqqinartitsisinnaavoq — taamaaliorporlumi!
Jehovamut qanittumik attaveqarnerit ineriartortiguk
9. Uagut inuunitsinni pingaaruteqarnerpaasoq sunaava?
9 Pisuujugaluarutta piitsuugaluaruttaluunniit, inuusuttuugaluarutta utoqqaagaluaruttaluunniit, peqqissuugaluarutta peqqiikkaluaruttaluunniit Jehovamut qanittumik attaveqarniarluta iliuuseqarsinnaavugut. Qanorluunniit misilinneqaraluarutta, Jehovamut qanittumik attaveqarutta nammineq assuarnaattuarsinnaavugut taassumalu uummataa nuannaartissinnaallugu. Sallusuissut pillugu killilimmik paasisimasaqaraluartulluunniit sapiillutik Jehovamik aalajangiussisimapput assuarnaattuarsimallutillu.
10, 11. (a) Qatanngutitta ilaata misilinneqarnini qanoq periarfigisimavai? (b) Qatanngut arnaq taanna qanoq ililluni Saatanimut akissutaasimava kimittooq?
10 Assersuutigeriartigu qatanngut arnaq Valentina Garnovskaja, Ruslandimi Jehovamut nalunaajaasorpassuit misilinneqangaaraluarlutik Jobitut assuarnaattuartut ilaat. 1945-mi, 20-t missaani ukioqarluni, qatanngummit angummit oqaluussiffigineqarpoq. Taanna Biibili oqaluuseriniarlugu marloriarluni pulaaqqippoq, kingornali takoqqinngisaannarpaa. Taamaakkaluartorli Valentinap eqqaamiuni oqaluussiffigisalerpai. Tamatuma kingunerisaanik tigusarineqarpoq pinngitsaaliissummillu sulisitsivimmi ukiuni arfineq-pingasuni sulisussatut eqqartuunneqarluni. 1953-imi iperagaavoq, ingerlaannarlu oqaluusseqqilerpoq. Tigusaaqqippoq parnaarussassanngortinneqarlunilu — tamatumuuna ukiuni qulini. Ukiuni arlalinni sulisitsivinni assigiinngitsuneereerluni sulisitsivimmut allamut nuutsitaavoq. Sulisitsivimmi tassani qatannguteqarpoq arnanik Biibileqartunik. Ullut ilaanni qatanngutip arnap Biibili taanna Valentinamut takutippaa. Tamanna killitsissutigingaarpaa! Manna tikillugu Biibili takusimasatuaa tassaavoq qatanngutip angutip 1945-mi imminik oqaluussiffiginnittup nassataa!
11 Valentina 1967-imi iperagaavoq, Jehovamullu tunniulluinnarnini imermi kuisinnermigut kiisami ersersissinnaanngorpaa. Kiffaanngissutsini eqiasuilluni oqaluusseqataanermut atorpaa 1969 tikillugu. Taavali tigusaaqqippoq, tamatumuuna ukiuni pingasuni parnaarussassanngortinneqarluni. Taamaakkaluartoq oqaluussiuarpoq. Inuit 44-t sallusuissummik paasinninnissaannut ikiorsimavai. Ukiuni 21-ni parnaarussivinniillunilu sulisitsivinniissimavoq. Assuarnaattuarumalluni sunik tamanik, aamma kiffaanngissutsiminik, isumakkeerinissamut piumassuseqarsimavoq. 2001-imi toqunngitsiarluni ima oqarpoq: “Nammineq angerlarsimaffeqarsimanngisaannarpunga. Pigisakka tamarmik kuffertip ataatsip iluaniissinnaapput. Jehovamulli kiffartorsinnaanera nuannaarutigalugulu nalerisimaarutigaara.” Tamanna Saatanip misilinneqartoqartillugu Guutimik ilumoorfiginnittuarumasoqannginneraaneranut akissutaavoq kimittooq! (Jobi 1:9-11) Qularutiginngilluinnarsinnaavarput Jehovap uummataata nuannaarsimanissaa aamma Valentinamik allanillu aalajaallutik toqusimasunik makititsinermigut inuulersitseqqinnissaminut qilanaarnera. — Jobi 14:15, NV.
12. Jehovamut attaveqarnitsinni asanninneq qanoq pingaaruteqartigaa?
12 Jehovamik ikinnguteqarnerput taassumunnga asanninnitsinnik tunngaveqarpoq. Jehovap pissusii nuannaraavut sapinngisarpullu tamaat iliorpugut taassuma siunertaanut naapertuuttumik inuuniarluta. Diaavulup oqaasiinut akerliusumik iliorpugut nammineq piumassutsitsinnik piumasaqaateqanngivillutalu Jehovamik asanninnitsigut. Qamannga pisumik asanninnerput tamanna misilinneqarnermi assuarnaattuarnissamut nakussatsissutigaarput. Jehovallu ‘ilumoorfiginnitsimi aqqutaat paarisarpai’. — Ussatit 2:8; Tussiaat 97:10.
13. Jehova pillugu iliuuserisartakkavut taassuma qanoq isigai?
13 Asanninneq Jehovap aqqanik ataqqinninnissamut kajumississutigisarparput, misigigaluaraangattaluunniit iliuuserisinnaasavut killeqartut. Pissutiginiakkavut ajunngitsut takusarpai eqqartuuttarnatalu iliuusererusutavut tamaasa iliuuserisinnaanngikkutsigit. Pingaaruteqartoq tassaaginnanngilaq suut iliuuserinerivut, aammali iliuutsitsinnut pissutigisarput pingaaruteqarpoq. Jobi aliasukkaluarluni sorpassuillu naammagalugit atortariaqaraluarlugit, Jehovamik asanninnini unnerluutiginnitsiminut oqaluuseraa. (Atuaruk Jobi 10:12; 28:28). Jobimik allakkani kapitalimi kingullermi Jehovap ersersippaa Elifazi, Bildadi Sofarilu kamaallugit eqqunngitsumik oqaluuserimmanni. Aammattaaq ersersippaa Jobi akueralugu, oqaaseq ‘kiffara’ taanna pillugu sisamariarluni atoramiuk taannalu peqqugamiuk tuppallersaaneq nalusunik taakkuninnga qinnusseqqullugu. (Jobi 42:7-9) Qanortoq uaguttaaq Jehovamit iluarisaalissutigisatsinnik iliuuseqartarisa.
Jehovap kiffani aalajaatsut annertoqqusersortarpai
14. Jehovap Jobi eqqarsartaatsiminik naqqiinissaanut qanoq ikiorpaa?
14 Jobi naammalluinnanngitsuugaluarluni assuarnaattuarpoq. Sakkortuumik misilinneqartilluni ilaannikkut kukkusumik isiginnittaaseqartarpoq. Assersuutigalugu Jehovamut ima oqarpoq: “Suaaraluarakkit akinngilatit . . . peqqarniitsumillu saassullunga.” Aamma Jobi imminut illersorniarpallaarpoq ima oqarami: “[Pinngitsuuvunga]”, aamma ‘assakka nakuusernermut atunngilakka qinnutigalu peqqusersuippoq’. (Jobi 10:7; 16:17; 30:20, 21) Taamaakkaluartorli Jehovap Jobi inussiarnerluni ikiorpaa arlalinnik apeqquteqarfigineratigut, Jobi imminut eqqarsaatigivallaarunnaarniassammat. Aamma Jobip taakku pissutigalugit Guutip angingaassusia inuillu suunngissusiat takulluarsinnaanerulerpaa. Jobip siunnersorneqarnini akueraa siunnersorneqarninilu malillugu iliorluni. — Atuaruk Jobi 40:8; 42:2, 6.
15, 16. Jehovap kiffani ullumikkut qanoq ikiortarpai?
15 Ullumikkuttaaq Jehovap kiffani inussiarnerluni aalajangersimallunilu siunnersortarpai. Aamma pingaarutillit allat iluaqutigisinnaavavut. Assersuutigalugu Jiisusi utertitsissutitut imminut pilliutigaaq taamaalillunilu ajortitta isumakkeerfigineqarsinnaanissaannut tunngaviliilluni. Pilliut tamanna tunngavigalugu naammalluinnanngitsuugaluarluta Jehovamut qanittumik attaveqarsinnaavugut. (Jaaku 4:8; 1 Johannesi 2:1) Misilinneqaraangatta Guutip anersaavanit illernartumit nakussatsinneqarlutalu ikiorneqarnissarput qinnutigisinnaavarput. Aamma Biibili tamaat pigaarput, aamma atuarutsigu imarisaalu eqqarsaatigigutsigit uppernikkut misilinneqarnissamut piginnaanngorsarsinnaavugut. Atuaqqissaarneq Jehovap qilammi nunamilu oqartussaanera pillugu assuarnaassuserpullu pillugu akerleriissutit paasinissaannut iluaqutigissavarput.
16 Aammattaaq silarsuaq tamakkerlugu qatanngutigiissuarnut, Jehovap “inussiaq aalajaallunilu silatooq” aqqutigalugu anersaakkut inuussutissanik pilersugaanut, ilaanerput iluaqutigingaarparput. (Matthæusi 24:45-47, NV) Jehovap Nalunaajaasuisa ilagiivini 100.000-init amerlanerusuni tamavinni ataatsimiittoqartarpoq uagutsinnik ilinniartitsiffiusunik uppernikkullu misilinneqariataarnissamut uagutsinnik nakussatsitsiffiusunik. Tamatuma ilumoornera niviarsiaqqap tyskip 15-inik ukiullip Sheilamik atillip misigisimasaani erserpoq.
17. Ullumikkut Jehovap peqatigiissortai aqqutigalugit ilikkakkatsinnik maleruaanerup qanoq silatusaarnerutiginera assersuuteqarlutit oqaluttuariuk.
17 Sheila ullut ilaanni atuartillugu ilinniartitsisoq inimit atuarfianit anigallarpoq. Sheilap atuaqatai aalajangerput ouija-rnermut atortumik misiliiniarlutik. Sheila inimit atuarfimminnit ingerlaannaq anivoq, anisimaninilu nuannaarutigaa qanoq pisoqarsimanera kingusinnerusukkut paasigamiuk. Atuartut ouija-rnermut atortumik misileraatillugit taakkua ilaasa anersaapiluit najuunnerat malugisinnaasimavaat paatsiveerullutillu qimaallutik. Suna pissutigalugu Sheila inimit atuarfimminnit taama anipallatsigaa? Sheila ima oqaluttuarpoq: “Taamatut pisoqanngitsiniarnerani naalagaaffilersaarfimmi ataatsimiinnermi ouija-rnermut atortunik atuinerup navianaatai eqqartorpavut. Taamaattumik sussanerlunga nalunngilara. Jehovamut nuannaarutaasumik iliorusuppunga, soorlu Biibilimi Ussatit 27:11-mi allassimasoq.” Sheilap ataatsimiigiarsimanini sammineqartunillu tusarnaaqqissaarsimanini nuannaarutigeqaa!
18. Illit sunissat aalajangiusimaviuk?
18 Qanortoq tamatta immikkut Jehovap peqatigiissortaani siunnersuutigineqartunik ilikkakkatsinnillu maleruaanissarput aalajangiusimatigu. Ataatsimiigiartuarnitsigut, Biibilimik atuartarnitsigut, Biibililersaarutinik atuaqqissaartarnitsigut, qinusarnitsigut kristumiunillu inersimalluartunik peqateqartarnitsigut pisariaqartitatsinnik siunnersorneqartarlutalu tapersersorneqartarpugut. Jehovap kissaatigaa assuarnaattuarniarluta akiuunnitsinni ajugaassasugut, qularutiginngilaalu ilumoorfiginnittuarnissarput. Jehovap aqqanik ataqqinartitseqataaneq, assuarnaattuarneq Jehovallu uummataanik nuannaartitsineq immikkut pisinnaatitaaffiupput angingaartut!
Eqqaamavigit?
• Pissutsinut misilinneqaatinullu sunut Saatani pisuua?
• Uagut inuunitsinni suna pingaaruteqarnerpaava?
• Jehovamik ikinnguteqarnerput sumik tunngaveqarpa?
• Ilaatigut qanoq Jehovap ullumikkut ikiortarlutalu annertoqqusersortarpaatigut?
[Qupp. 14-mi assiliartaq]
Ilisimasannik naleqangaartunik allanut ingerlatitseqqinnissannut kajumissuseqarpit?
[Qupp. 15-mi assiliartaq]
Uppeqativut assuarnaattuarnissaannut ikiorsinnaavavut
[Qupp. 16-mi assiliartaq]
Valentina assuarnaattuarumalluni sunik tamanik pilliuteqarumavoq