Atuartartut apeqqutaat

◼ Iikkami allannernik Belsazzarip sukuiaassunneranut tunissutisinissani itigartitsissutigereeraluarlugu sooq Daniel aappillarissumik atisitinneqarlunilu qungatsimigut kuultiusumik ujamilerneqarpa?

Babylonip Mediamiunit Persiamiunillu uppitinneqarnissaa sioqqutitsiarlugu kunngi Belsazzar kunngikkormioqataalu nerersuaqatigiipput. Nerersuartillutik Belsazzarip qummuattat, Jerusalemimi Jehovap naalaffiutaaniissimasut, tiguai, taakkunanngalu qaaqqusani peqatigalugit viinnisorluni Babylonip guutii unnersiutigiitigalugit. Nerersuarnerli kipitinneqarpoq iikkami assaat eqqumiitsut paasissaanngitsunik allalermata. — Dâniale 5:1-5.

Belsazzar neriorsuivoq allakkanik atuaasinnaallunilu sukuiaasinnaasoq ujamimmik kuultiusumik aammalu naalakkersuisuni atorfimmik qutsissumik akilerumaarlugu, kisianni Babylonimi ilisimasut imaluunniit ulloriarsiortut arlaannaataluunniit taamaaliornissani saperpaa. — Dâniale 5:7-9.

Naggataagut Daniel imminut sassartinneqarmat kunngip neqeroorutini uteqqippaa — neriorsorpaa aappillarissumik atisitikkumaarlugu, qungasiagut kuultiusumik ujamilerumaarlugu aammalu naalagaaffimmi naalakkap tulliata tullinngorumaartoq. Pruffiitilli ileqqorilluni ima akivaa: ’Tunissutissamaakkatit pigiinnakkit, akiliutigiumasatillu allamut tunniukkit; allannerit taamaattoq kunngimut atuassavakka sukuiaatissaannillu nalunaarfigalugu.’ — Dâniale 5:17.

Danielip allannerit sukuiarnissaannut isertortukkut imaluunniit isertortuunngitsukkut akilerneqarnissani pisariaqartinngilaa. Kunngip tunniukkumasani tigummiinnarsinnaavai imaluunniit allamut tunniullugit. Danielip allannerit sukuiarpai akilerneqarnissani pinnagu, kisianni sukuiarpai Jehovamit, Guutimit ilumoortumit, Babylonimik eqqartuussilersumit, pissaanermik tunineqarami.

Danielip neriorsuutini naapertorlugu allannerit atuarlugillu sukuiareeraalu, Dâniale 5:29 naapertorlugu kunngi peqqusivoq taamaakkaluartoq Danielip akissarsiassaq piinnassagaa. Danielip aappillarissumik atisitinneqarnera kuultiusunillu ujamilerneqarnera nammineq piumasarinngilaa, kisianni kunngi Belsazzarip, naalagaaffimmi naalagaanerup, peqqusinera malillugu tamanna pivoq. Tamanna Dâniale 5:17-imut akerliunngilaq, tassani pruffiitip ersersimmagu namminissarsiortumik iliunnginnini.

Kingorna Jesus oqarsimavoq ’pruffiiti inuup ilassiguniuk pruffiitiummat pruffiitisut akissarsissasoq’. (Matîuse 10:41) Belsazzarili taama iliortutut oqaatigineqarsinnaannginnguatsiarpoq, tassami taassuma Danielimut inussiarnisaarnera peqquteqanngimmat taassuma Guutimut ilumoortumut pruffiitiunera pillugu ataqqinninneranik. Kunngi Belsazzarip tunissutit taakkorpiaat allannernik sukuiaasinnaasumut kimulluunniit, Guutimik nalusut ulloriarsiortorigaluarpassulluunniit, neriorsuutigigaluarpai. Kunngip ’akissarsiaq’ akissarsiarisariaqakkani pivaa, akissarsiaq iikkami allannernut siulittuutaasunut naapertuuttoq: ’Unnuaq tamanna Belsazzar Kaldæamiut kunngiat toqutaavoq. Dariusip Mediamiuusup naalagaaffik pigilerpaa.’ — Dâniale 5:30–6:1. (wD 1/10 88)