Kristumiutut inuunerput kiffartornerpullu – Najoqqutassaq-mut innersuussutit

JUUNIP 4-10

GUUTIP OQAASIANI ERLINNARTUUTIT | MARKUSI 15-16

“Siulittuutit Jiisusimut eqquutitinneqartut”

nwtsty Mark 15:24, 29-mut nassuiaatit

atisaalu agguaallugit: Mat­thæusip, Markusip Lukasil­lu eq­qaan­ngisaat Joh 19:23, 24-mi ilaan­ngun­neqarsimap­put: Jiisusip qaavatigut iluatigul­lu atisai Romamiut sak­kutuuisa im­meraatigisimavaat; Jiisusip qaavatigut atisai sak­kutuut “sisaman­ngorlugit im­mik­koor­titer­paat, im­mik­koor­toq ataaseq sak­kutuumut ataatsimut”; iluatigut atisaq avik­kusun­ngin­namik­ku im­meraatigaat; Mis­siarsil­lu atisaanik im­meraas­sineq Tuss 22:19-imi siulit­tuutip eq­quun­neraa. Pil­lak­kanik toqutas­sanik toqutsisar­tut toqutap atisai pisarsimavaat, pinerlut­torlu atisaminik pigisaminil­lu arsaar­neqar­tarami taman­na taas­sumun­nga nikanarsaataaneruler­tar­poq.

mitaatigaat: Nutsiin­navil­lugu: “Ileqimisaar­torfigaat.” Oqaaseqaatigaluni ileqiminisaar­tor­neq amerlaner­tigut mitaatigin­nin­nerusar­poq, suusupagin­nin­nerusar­poq il­laruaatigin­nin­nerusarluniluun­niit. Saneq­qut­tut taamaalior­nermik­kut Tuss 22:8-mi siulit­tuum­mik piaarinatik eq­quutitsip­put.

nwtsty Mark 15:43-mut nassuiaatit

Josefi: Iivangkiiliunik al­lat­tut Josefi pil­lugu as­sigiin­ngitsunik paasis­sutis­siip­put. Mat­thæusi akileraar­titsisar­toq al­lap­poq taan­na ‘angutaasoq pisooq’; Markusip Romamiuunerusunut al­lat­tup tas­saanerar­paa “Kil­lisiuisoqatigiin­ni ilaasor­taq akimasoq” Guutip naalagaaf­fianik utaq­qisuusoq; Lukasi nakorsaq misigit­tar­toq al­lap­poq taan­na ‘ajun­ngitsuul­luni iluar­tuusoq’ Kil­lisiuisoqatigiit Jiisusimik pin­nin­neran­nik tapersersuin­ngitsoq; Johan­nesip kisimi al­laatigaa ‘juutit an­nilaangagalugit [Jiisusimut] ajoqersugaanerminik iser­tuus­sisuusoq’. – Matt 27:57-60; Mark 15:43-46; Luk 23:50-53; Joh 19:38-42.

Anersaakkut erlinnartunik ujarlerneq

nwtsty Mark 15:25-mut nassuiaatit

Nalunaaquttap-akunnerisa pingajuanni: Tas­sa ul­laap tungaani qulingiluat mis­saat. Oqalut­tuami matumani pif­fis­saliineq Johan­nesip pif­fis­saliineranit al­laaneror­pasip­poq, tas­sami Joh 19:14-16-imi al­las­simavoq “nalunaaqut­tap-akun­nerisa arfer­nata mis­saani” Pilatusip Jiisusi toqutas­satut tun­niuk­kaa. Biibilimi nikingas­sut taman­na nas­suiar­neqan­ngik­kaluar­toq eq­qarsaatigisas­sat arlaqar­put: Jiisusip nunarsuarmi inuunerani ul­lormi kingul­lermi pisimasut pif­fis­saler­neqar­neran­nut tun­ngatil­lugu iivangkiiliuni oqalut­tuarineqar­nerat an­ner­tuner­tigut im­min­nut naaper­tuup­put. Oqalut­tuani sisamani taak­kunani ersersin­neqar­poq palasit utoq­qaaner­tal­lu ul­laaralaak­kut ataatsimeeriarlutik Jiisusi Romamiut naalagaatitaan­nut Pontiusi-Pilatusimut tun­niuk­kaat. (Matt 27:1, 2; Mark 15:1; Luk 22:66-23:1; Joh 18:28) Mat­thæusip, Markusip Lukasil­lu tamarmik oqalut­tuaraat Jiisusi nap­pak­kami kikiat­tugaareersoq ‘nalunaaqut­tap-akun­nerisa arfer­nan­niit akun­nerit qulingiluaat tikil­lugu’ nunarsuarmi tamarmi taarsisoq. (Matt 27:45, 46; Mark 15:33, 34; Luk 23:44) Jiisusip pil­lar­neqar­nerata qaquguk­kut aal­lar­tin­neqar­neranut tun­ngatil­lugu uku eq­qarsaatigineqar­tariaqar­put: Taamani isumaqar­toqar­poq iperar­tor­neqar­neq pil­lar­neqar­nermut ilaasoq. Iperar­tor­neqar­neq ilaan­nik­kut sak­kor­tusangaarmat iperar­tor­neqar­toq toqusar­poq. Jiisusip iperar­tor­neqar­nera sak­kor­tungaarmat nap­pagaq an­niar­titaaf­fis­sani ersul­lugu apuus­sin­naan­ngim­magu al­lamut ersuk­kiutsin­neqar­poq. (Luk 23:26; Joh 19:17) Iperar­tor­neqar­neq pil­laanermut ilaasutut isigineqar­pat Jiisusip pil­lar­neqar­nera aal­lar­tis­simas­saaq nap­pak­kami an­niar­titaaf­fim­mi kikiat­tor­neqar­nera sioq­qutingaatsiarlugu. Tamatumun­nga naaper­tuut­tumik iperar­tor­neqar­neq nap­pak­kamilu pil­lar­neqar­neq ataatsik­kut Matt 27:26-mi aam­ma Mark 15:15-imi eq­qaaneqar­put. Taamaat­tumik inuit as­sigiin­ngitsut pil­laanerup qanga aal­lar­tin­nera as­sigiin­ngitsumik pif­fis­salersin­naavaat, suna pil­laanermut ilaasutut isiginerlugu apeq­qutaatil­lugu. Taman­na Pilatusip Jiisusi nap­pak­kamut kikiat­tor­neqar­nermi kingunitsian­ngua toqusoq paasigamiuk tupaal­lan­neranut nas­suiaataasin­naavoq. (Mark 15:44) Aam­ma Biibilimik al­lat­tut ileq­quusoq malil­lugu ul­lup ingerlanera sisaman­ngorlugu aggor­tar­paat, tamarmik nalunaaqut­tap-akun­neranik pingasunik sivisus­susilin­nik, soorlu un­nuaq aam­ma taamaalior­taraat. Taman­na nas­suiaataasin­naavoq sooq nalunaaqut­tap-akun­nerisa pingajuat, arfer­nat qulingiluaal­lu – seqer­nup nuineraniit ul­laak­kut arfer­ngup mis­saan­niit – eq­qar­tor­neqar­tar­nersut. (Matt 20:1-5; Joh 4:6; ApS 2:15; 3:1; 10:3, 9, 30) Aam­ma inuit nalingin­naasumik eq­qoq­qis­saar­tunik nalunaaqutaqan­ngim­mata ul­lup qanoq ilinerata oqaatiginerani oqaaseq “mis­saani” ator­neqarajup­poq, Joh 19:14-imi al­las­simaneratut. (Matt 27:46; Luk 23:44; Joh 4:6; ApS 10:3, 9) Eqik­kaaneq: Markusip iperar­tor­neqar­neq nap­pak­kamul­lu kikiat­tor­neqar­neq pil­laaneq sivisus­susileramiuk ilan­ngus­simasin­naavai, Johan­nesil­li nap­pak­kamut kikiat­tor­neqar­neq kisiat pisimasin­naavaa. Al­lat­tut taak­ku marluul­lutik qas­sin­ngor­nera oqaatigigamik­ku ul­lup nalunaaqut­tap-akun­nerinut pingasuk­kuutaarlugu aggor­neqar­neranut qanin­ner­paamut akun­naal­lisil­lugu taasimasin­naavaat, Johan­nesil­lu qas­sin­ngor­nera oqaatigigamiuk oqaaseq “mis­saani” ator­paa. Tamak­ku qas­sin­ngor­neranik oqaatigin­nin­nermi nikingas­sutaasimasin­naap­put. Kiisalu Johan­nesip, ukiut 30-t sin­nerlugit kingusin­nerusuk­kut al­lat­tup, pif­fis­saliinerata Markusip pif­fis­salius­saanit al­laaneruneranut ersiutaavoq Johan­nesi Markusip al­lataanik is­suaagin­narsiman­ngitsoq.

nwtsty Mark 16:8-mut nassuiaatit

annilaangagamik: Al­lagatoq­qat as­sam­mik al­latat pisoqaaner­paat naaper­torlugit Markusip iivangkiiliua versi 8-mi al­las­simasutut taama naavoq. Oqar­toqarsimavoq al­lak­kat al­las­simaq­qaarfii taama naasimas­sap­pata akun­nap­pal­laar­toq. Markusil­li naatsukul­lam­mik al­lat­taasia eq­qarsaatigalugu isum­mius­sineq taamaat­toq eq­qor­tuusariaqan­ngilaq. Aam­ma 300-k­kun­ni Biibilimik ilisimatuut Hieronymusip aam­ma Eusebiosip ersersimisaar­paat al­las­simaq­qaarfiit taak­ku naanerigaat oqaaseq “an­nilaangagamik”.

Al­lagatoq­qat as­sam­mik al­latat grækerisuut oqaatsinul­lu al­lanut nutsik­kat arlaqar­put versip 8-p kingor­na naggasius­samik takisuumik naatsumil­luun­niit ilaqar­tut. Naggasius­saq takisooq (versit aq­qaneq-marluusut) ukunani ilan­ngun­neqarsimavoq: Codex Alexandrinus, Codex Ephraemi Syri rescriptus aam­ma Codex Bezae Cantabrigiensis, tamarmik Kr.in.king. 400-kkun­nin­ngaan­neersut. Aam­ma ukunaniip­poq: Vulgata latinerisooq, Syrus Curetonianus aam­ma Peshitta Syriamiusooq. Al­lak­kanili as­sam­mik al­latani 300-kkun­neersuni grækerisuuni marlun­ni – Codex Sinaiticus aam­ma Codex Vaticanus – aam­ma Codex Sinaiticus Syriacusimi 300-kkun­ni 400-kkun­niluun­niit al­latani aam­ma Markusip iivangkiiliuanik nutsik­kami sahidicisuumi kopterisuumi pisoqaaner­paami 400-kkun­neersumi ilaan­ngilaq. Taamatul­li Markusip iivangkiiliuanik nutsik­kat Armeniamiutuut aam­ma Georgiamiutuut pisoqaaner­paat versi 8 naanerivaat.

Al­lak­kat grækerisuut oqaatsinul­lu al­lanut nutsik­kat ilaan­ni naggasius­saq naatsoq (oqaaseqatigiit amerlan­ngitsuusut) ilan­ngun­neqarsimavoq. Codex Regiusimi 700-k­kun­neersumi naggasius­saq takisooq naatsorlu, naatsoq siul­lin­ngorlugu, ilan­ngun­neqarsimap­put. Naggasius­sat taak­ku marluk Codex Regiusimi naatsumik nas­suiaam­mik aal­lar­tip­put, tas­sani al­las­simavoq versit pineqar­tut ilisimatuut ilaan­nit ator­neqarlutil­lu akuerisaasut, Codex Regiusimili arlaan­naal­luun­niit naggasius­satut akuerineqan­ngilaq.

NAGGASIUSSAQ NAATSOQ

Naggasius­saq naatsoq Mark 16:8-p kingor­na ilan­ngun­neqarsimasoq Al­lak­kanut isumas­sarsiarititaasunut ilaan­ngilaq. Imaap­poq:

Im­min­nut peq­qus­sutigineqar­tut tamaasa naatsun­nguamik oqalut­tuaraat Petrusip ilaanut. Taava Jiisusip nam­mineq taak­kunatigut kangianiit kitaanut tusarliup­paa naas­saan­ngitsumik an­nan­nis­samik nalunaarut il­ler­nar­toq atajuar­tus­sarlu. Amen.

NAGGASIUSSAQ TAKISOOQ

Naggasius­saq takisooq Mark 16:8-p kingor­na ilan­ngun­neqarsimasoq Al­lak­kanut isumas­sarsiarititaasunut ilaan­ngilaq. Imaap­poq:

⁹ Jiisusi sabbatip-akun­nerata ul­luisa siul­lian­ni ul­laaralaan­nguaq toqusunit makik­kami takuteq­qaar­poq Maria Magdalenemut, taas­suman­nga anersaapiluit arfineq-marluk anisis­simavai. ¹⁰ Taas­suma oqarfigiar­tor­pai ilagisar­tagai maan­na aliasul­lutik qiasut. ¹¹ Taak­kuali tusaramik­ku Jiisusi uumasoq Maria Magdalenel­lu takusimagaa up­perin­ngilaat. ¹² Tamatuma kingor­na ajoqersuk­kat ilaat marluk nunaan­narmukar­til­lugit saq­qum­merfigai al­latut isik­koqarluni. ¹³ Taak­kua aam­ma ilatik al­lat oqalut­tuuk­kiar­tor­paat; taak­kuat­taarli up­perin­ngilaat. ¹⁴ Kiisalu takutip­poq taak­kunun­nga aq­qanilin­nut nerrivim­miitil­lugit; avoq­qaaraalu up­pin­ngim­mata uum­mataal­lu man­nger­tuum­mata makin­nermi kingor­na im­minik takun­nis­simasut up­perin­ngim­matigit. ¹⁵ Taava oqarfigai: “Aal­laritsi silarsuarmut tamarmut iivangkiiliulu oqaluus­sis­sutigalugu pin­ngor­titanut tamanut. ¹⁶ Up­perlunilu kuisit­toq an­nak­kumaar­poq, up­pin­ngitsorli eq­qar­tuun­neqas­saaq. ¹⁷ Nalunaaqutil­lu mak­ku up­per­tut malin­nitsigis­savaat: Uanga atik­kut anersaapiluit anisik­kumaar­paat, oqaatsinik nutaanik oqaluk­kumaar­put, ¹⁸ pulateriaarsuit as­sam­min­nik tigujumaar­paat, toqunar­tumil­lu imeraluarunik ajoqutigis­san­ngilaat; nap­parsimasut as­sam­min­nik patil­lugit ajorun­naarsis­savaat.”

¹⁹ Naalagaq Jiisusi taak­kunun­nga oqaloreerami qilaliar­tin­neqar­poq, ingip­porlu Guutip taler­piata tungaanut. ²⁰ Taak­kuli aal­lar­put tamanilu oqaluus­sil­lutik, Naalagarlu suleqataavoq oqaaserlu aalajangersil­lugu nalunaaqutitigut ilan­ngut­tutigut.

JUUNIP 11-17

GUUTIP OQAASIANI ERLINNARTUUTIT | LUKASI 1

Anersaakkut erlinnartunik ujarlerneq

nwtsty Luk 1:69-imut nassuiaatit

nassummik annassummik: Imaluun­niit: “An­naas­sisumik pis­sarsuarmik.” Biibilimi uumasut nas­sui nukim­mut, tiguaanermut ajugaanermul­lu as­sersuutaagajup­put. (1 Sam 2:1; Tuss 75:5, 6, 11; 148:14) Aam­ma nas­suit naalak­kersuisunut kun­nginul­lu kinguaariin­nut ajun­ngitsunut ajor­tunul­lu as­sersuutaasar­put, taak­kualu ajugaanerat nas­sum­miisutut al­laatigineqar­tarluni. (5 Mos 33:17; Dan 7:24; 8:2-10, 20-24) Versit ataqatigiin­neran­nit matumani “nas­sum­mik an­nas­sum­mik” al­las­simanerani Mis­siarsi an­naas­sinis­samut pis­saaneqar­toq, an­naas­sisoq pis­sarsuaq pineqar­poq.

nwtsty Luk 1:76-imut nassuiaatit

Naalakkap siornagut ingerlassagavit: Johan­nesi Kuisisoq “Naalak­kap sior­nagut” ingerlas­saaq, ima paasil­lugu Jiisusi, Ataataminut sinniisuusoq Ataatamilu aq­qani tikiut­toq, aq­qutis­siuutis­savaa. – Joh 5:43; 8:29.

JUUNIP 18-24

GUUTIP OQAASIANI ERLINNARTUUTIT | LUKASI 2-3

“Meeqqat inuusuttullu – anersaakkut ineriartorpisi?”

nwtsty Luk 2:41-mut nassuiaatit

angajoqqaavi ... Jerusalemimukartarput: Inatsisini ar­nat poorskisioriar­tor­tar­nis­saat peq­qus­sutigineqan­ngilaq. Marial­li Josefi ukiut tamaasa Jerusalemimut nal­liut­torsioqatigiar­tor­tar­paa. (2 Mos 23:17; 34:23) Josefik­kut meerar­tatik amerliar­tuin­nar­tut ilagalugit ukiut tamaasa 300 kilometeringajan­nik isorar­tutigisoq angalasar­paat.

nwtsty Luk 2:46, 47-mut nassuiaatit

aperisarlugillu: Jiisusimut tusar­naar­tut qisuariar­neran­nit erser­poq taas­suma apeq­qutai tas­saagin­nan­ngitsut nukap­piaq­qap alaper­naagin­narluni apeq­qutai. (Luk 2:47) Grækerit oqaasiat “aperisarlugil­lu”-mik nutser­neqar­toq aam­ma eq­qar­tuus­sivim­mi kil­lisiuisoqar­til­lugu apersuineq apereq­qit­tar­nerlu pil­lugit ator­neqar­tar­poq. (Matt 27:11; Mark 14:60, 61; 15:2, 4; ApS 5:27) Oqalut­tuarisaanermik ilisimatuut al­lap­put nal­liut­torsior­nerup kingor­na up­perisarsior­nik­kut siut­tut nuimanerit ilaat angerlar­tin­natik naalaf­fiup eq­qaani ilin­niar­titsisar­tut. Inuit taak­kua eq­qaan­nut ingil­lutik tusar­naarlutil­lu aperisar­put.

ajasoorutigeqaat: Uani grækerit oqaasian­nit ator­neqar­tumit erser­poq tupigusuutigin­nit­tuar­neq imaluun­niit tupigusuutigin­neqat­taar­neq pineqarsin­naasoq.

nwtsty Luk 2:51, 52-imut nassuiaatit

naalallugillu: Imaluun­niit: “Naalat­tuarlugil­lu.” Grækerit oqaasian­nit uani ator­neqar­tumit erser­poq Jiisusip Guutip oqaasianik ilisimasaqar­nini pil­lugu naalaf­fim­mi ilin­niar­titsisut ajasoor­tereerlugit angerlarami maniguul­luni angajoq­qaaminut naalat­tuar­toq. Jiisusip taamatut naalan­nera meeq­qat al­lat naalan­neran­nit maluginiar­nar­neruvoq; naalan­neratami Mosesip inatsisaani al­las­simasut tamavim­mik eq­quun­neraat. – 2 Mos 20:12; Gal 4:4.

Anersaakkut erlinnartunik ujarlerneq

(Luk 2:14, Biibili-mi quppernerup ataani ilanngussaq) “Naalan­narsili Guuti qutsin­nermi nunarsuarmilu inun­ni nuan­narisaani eq­qis­sineqarli!”

nwtsty Luk 2:14-imut nassuiaatit

nunarsuarmilu inunni nuannarisaani eqqissineqarli: Al­lagatoq­qat as­sam­mik al­latat ilaan­ni oqaatsit ator­neqar­tut ima nutser­neqarsin­naap­put: “Nunarsuarmilu eq­qis­sineqarli! Inun­ni nuan­narisaasuni!” Biibilimil­lu nutsik­kat ilaan­ni taamatut nutser­neqarsimap­put. Biibili-mili qup­per­nerup ataani ilan­ngun­neqarsimasutut nutser­neqar­nera al­lagatoq­qat naaper­torlugit tun­ngavis­saqar­nerungaar­poq. In­ngilip taamatut nalunaaruteqar­nerani pineqan­ngil­lat inuit qanorluun­niit isigin­nit­taaseqarlutil­lu iliuuseqar­tar­tut Guutimit nuan­narineqar­nerat. Pineqar­pul­li Guutimut up­per­ner­tik er­neranul­lu ajoqersugaaner­tik pil­lugit nuan­narisaasut. – Takuuk versimi matumani oqaatsit inunni nuannarisaani nas­suiaataat.

inunni nuannarisaani: Oqaatsip “nuan­narisaani”-p grækerit oqaasiat una nagguigaa: eudokiʹa. Oqaaseq taan­na aam­ma ima nutser­neqarsin­naavoq: “Iluarisaaneq; nuan­naarutaaneq; akuerisaaneq.” Oqaluut tamatumun­nga as­singusoq eudokeʹo ukunani ator­neqar­poq: Matt 3:17; Mark 1:11; Luk 3:22. Taak­kunani Guutip er­nermi kuisin­nerata kingor­na taas­sumun­nga oqaasii al­laatigineqar­put. Grækerit oqaasiat taan­na ima isumaqar­poq: “Akuerin­nin­neq; iluarin­nin­neq; nuan­narin­nin­neq.” Taamaam­mat oqaatsit “inun­ni nuan­narisaani” (anthroʹpois eudokiʹas) isumaqar­put inuit Guutip akueralugil­lu iluarigai, aam­ma ima nutser­neqarsin­naap­put: “Inuit akuerisai; inuit nuan­naril­luagai.”

JUUNIP 25-JUULIP 1

GUUTIP OQAASIANI ERLINNARTUUTIT | LUKASI 4-5

“Jiisusi ilaarlugu ussernartut akiukkit”

nwtsty filmi

Naalaffiup inngia

Saatanip Jiisusi ‘naalaf­fiup in­ngianut’ [imaluun­niit ‘por­tuner­taanut’] pisis­simasin­naavaa am­mul­lu nak­kaq­qul­lugu, Jiisusili sumer­piaq nikorfasimasin­naanersoq ilisimaneqan­ngilaq. ‘Naalaf­fik’ pineqaraangat naalaf­fit­taa tamatumalu eq­qaa naalaf­fim­mut at­tuumas­suteqar­tut uani pineqarsimasin­naap­put. Jiisusi naalaf­fiup kujataata kangiatungaata teqeq­quani (1) nikorfasimasin­naavoq, aam­mali naalaf­fiup teqeq­quani al­lamiis­simasin­naavoq. Jehova iliuuseqan­ngip­pat sumiif­fiit taak­kua arlaan­nit nak­kar­neq toqus­sutaas­saaq.

Anersaakkut erlinnartunik ujarlerneq

nwtsty Luk 4:17-imut nassuiaatit

pruffiitip Esajap allagai: Esajap al­lagai imusat Im­map Uumaatsup eq­qaani nas­saat pergamentinik 17-inik katitigaap­put, imusat taak­ku 7,3 meterisut takitigip­put 54-inil­lu spalteqarlutik. Al­lak­kat imusat Nazaretimi synagogimi ator­neqar­tar­tut taamatut takis­suseqarsimasin­naap­put. Jiisusip al­lak­kani taamani kapitalilersor­neqaratil­lu versilersor­neqan­ngitsuni atuarusutani nas­saariniar­tus­saavaa. Pruf­fiitil­li oqaasii sumi al­las­simanersut nas­saarai, tamatuman­ngalu erser­poq Jiisusip Guutip oqaasia nalun­ngil­luaraa.

nwtsty Luk 4:25-mut nassuiaatit

ukiut pingasut qaammatillu arfinillit: 1 Kng 18:1 naaper­torlugu Eliap paner­nersuaqar­nerata naanera “ukiut pingasut qaangiut­tut” nalunaarutigaa. Taamaat­tumik Jiisusip oqaasii 1 Kun­ngit-mi al­las­simasunut naaper­tuutin­nginerar­neqar­put. Al­lak­kanili Hebræerisuuni al­las­siman­ngilaq paner­nersuaq ukiunit pingasunit sivikin­nerusoq. Oqaatsil­li “ukiut pingasut qaangiut­tut” Eliap paner­nersuaqar­nis­saanik Akabimut oqaatigin­nin­neraniit pif­fis­samut aal­lar­tit­tumut tun­ngatin­neqarunar­put. (1 Kng 17:1) Sial­lersarfiun­ngitsoq – qaam­matit arfinil­lit pal­lil­lugit sivisus­suseqar­tar­toq, taamanili pisar­nermit sivisunerusimasin­naasoq – aal­lar­tereerunar­toq Elia taamatut nalunaar­poq. Aam­mami “ukiut pingasut qaangiut­tut” Eliap Akabimukaq­qin­niariar­toq sial­lilin­ngilaq, aatsaal­li qaq­qami Karmelimi pis­saaneqar­niuut­toqareersoq sial­lilermat paner­nersuaqarun­naar­poq. (1 Kng 18:18-45) Taamaat­tumik Jiisusip oqaasii uani is­suar­neqar­tut, aam­ma Kristusip af­farmik qatan­ngutaata oqaasii taak­kunun­nga as­singusut Jaak 5:17-imi al­las­simasut, 1 Kng 18:1-imi pisimasunik pif­fis­saliiner­nut naaper­tuup­put.