Guutip uagutsinnut asanninnini takutippaa

‘Saammaanneq iluarnikkut naalagaassaaq naassaanngitsumik inuunissamut.’ — ROMAMIUT 5:21.

1, 2. Tunissut suna inuppassuit naleqartutut isigaat, tunissulli suna naleqarnerungaarpa?

“ROMAMIUT . . . kinguaaminnut tunissutaat annerpaaq tassaavoq inatsisitik taakkulu malillugit inuusoqartoqartariaqarneranik misiginertik.” (David J. Williams, Australiami University of Melbournemi professori Biibilimillu nutserisoq) Oqaatsit taakku qanorluunniit ilumoortigigaluarpata tunissuteqarpoq naleqarnerungaartumik. Guutip isaani iluarisaasutut naapertuilluartuusutullu isigineqarsinnaanerput aamma annaanneqarnissamik naassaanngitsumillu inuusinnaanermik taassuma periarfissiissutaa naleqarnerungaarput.

² Guutip tunissummik tamatuminnga pineqarsinnaanngortitseriaasia inatsisinut tunngasortaqarpoq. Tamakku apustilip Paulusip Romamiunut allakkani kapitali 5-imi nassuiaramigit inatsisit annikitsualuttortai ilanngussunngilai. Isumalluarsaarillunili kapitali ima aallartippaa: “Uppernikkut iluartuutitaagatta Guuti eqqisseqatigaarput Naalakkatsigut Jiisusi-Kristusikkut.” Guutip tunissutaanik pisut asanninnerata akinissaanut killinneqarput. Paulusi aamma killinneqarluni ima allappoq: ‘Guutip asanninnera Anersaakkut Illernartukkut uatsinnut tunniunneqartukkut uummatitsinnut kuineqarsimavoq.’ — Romamiut 5:1, 5.

3. Apeqqutit suut akissutissarserusuppavut?

³ Soormiuna tunissut tamanna asannittumik tunniussaq pisariaqartoq? Guutip naapertuilluartumik inunnullu tamanut iluaqutaasumik qanoq tunniussinnaavaa? Inuttullu ataasiakkaatut tunissut tamanna piumallugu qanoq iliortariaqarpugut? Taakkua akissutaat nalerisimaarnartut Guutillu asanninnera taakkunannga qanoq erseqqissarneqarnersoq misissoriartigik.

Guutip asanninnera aamma ajorti

4, 5. (a) Jehova qanoq asannittuliungaarsimava? (b) Ilisimariikkat suut iluaqutigalugit Romamiut 5:12 paasisinnaavarput?

⁴ Jehovap asanningaarnermini inuit ikiorniarlugit ernituani aallartippaa. Tamanna Paulusip ima allaatigaa: “[Guutip] uagutsinnut asanninnini takutippaa ajortiliugallartilluta Kristusip pilluta toquneratigut.” (Romamiut 5:8) Oqaaseq una eqqarsaatigilaaruk: “Ajortiliugallartilluta.” Qanoq ajortilinngorsimanerput inuit tamarmik paasissallugu pisariaqartippaat.

⁵ Paulusip tamanna nassuiarlugu ima aallartippoq: “Soorlu inukkut ataasiinnakkut ajorti silarsuarmut tikiuttoq ajortikkullu toqu tikiulluni, taamatut toqu inunnut tamanut annguppoq tamarmik ajortuliormata.” (Romamiut 5:12) Guutip inuuneq nunarsuarmi qanoq aallartittoq allattissimammagu tamanna paasisinnaavarput. Jehovap inuit marluk, Adami Evalu, pinngortippai. Pinngortitsisoq naammalluinnartuuvoq, inuit taakku marluk, siuaasavut aamma naammalluinnartuusimapput. Guutip inuit taakku ataasiinnarmik inatsiseqartippai, oqarfigaalu tamanna unioqqutippassuk toqumik pillarneqassasut. (1 Mosesi 2:17) Aalajangerpulli Guutip inatsisaanik inornanngitsumik unioqqutitsinikkut aserornartumik iliorniarlutik, taamaaliornikkullu Guutip Inatsisiliortuunera Kisimilu Oqartussaasuunera akueriumanngilaat. — 5 Mosesi 32:4, 5.

6. (a) Sooq Adamip kinguaavi Guutip inatsisai Mosesikkut tunniunneqartut sioqqullugit kingornatigullu toquppat? (b) Ajorti kingornussaq sumut assersuunneqarsinnaava?

⁶ Adami ajortuliornermi kingorna aatsaat qitornartaarpoq qitornaminullu tamanut ajorti tamatumalu sunniutai kingornutsillugit. Taassuma inatsimmik Guutimeersumik unioqqutitsineratut qitornai unioqqutitsinnginnamik Adamip unnerluunneqarneratut unnerluunneqanngillat; aammami inatsisit allassimasut suli piginngilaat. (1 Mosesi 2:17) Taamaattoq Adamip kinguaavisa ajorti kingornuppaat. Taamatut ajorti toqulu ‘naalagaapput’ Guutip Israelikkunnut inatsisinik allassimasunik, ajortiliunerannik erseqqissumik ersersitsisunik, tunniussinissaata tungaanut. (Atuakkit Romamiut 5:13, 14). Ajorti kingornussaq assersuunneqarsinnaavoq nappaammut innarluummulluunniit kingornuttakkamut, soorlu hæmofilimut. Immaqa Aleksej, russit zariata Nikolaj II-ata Aleksandrallu ernerat, aakkut nappaammik kingornuttakkamik hæmofilimik nappaatilik pillugu atuarsimavutit. Ilumoorpoq ilaqutariinni taamaattuni qitornaasut ilaasa napparsimassutigilerneq ajoraat, nappaalli kingornussimasinnaavaat. Ajortimut Adamimeersumut tunngatillugu taamaanngilaq. Inuit tamarmik pinngitsoqaratik innarluuteqalersitsisumik ajortiliupput. Toqussutaajuaannarpoq. Qitornaasunut tamanut ingerlateqqinneqartarpoq. Ajorti qaqugumulluunniit anigorneqarsinnaava?

Guutip Jiisusi Kristusi aqqutigalugu pilersitaa

7, 8. Angutit naammalluinnartut marluk inuuneri qanoq assigiinngilluinnartumik kinguneqarpat?

⁷ Jehovap asanninnermini inuit ajortimit kingornussamit aniguisinnaanngortippai. Paulusip nassuiarpaa tamanna ajornarunnaarsimasoq inukkut, Adamitut naammalluinnartukkut — taanna tassaavorlusooq Adami alla. (1 Korinthimiut 15:45) Angutilli taakku marluk inuunerisa kinguneri assigiinngitsorujussuupput. Qanoq? — Atuakkit Romamiut 5:15, 16.

⁸ ‘Saammaassaaneq ajortuliornerlu missigiissinneqarsinnaanngillat,’ Paulusi allappoq. Ajortuliorneq uani pineqartoq Adamip ajortuliaraa, pissutissaqarluartumillu iluarisaanngitsutut eqqartuunneqarpoq — toqumik. Taannali kisimi toqunngilaq. Ima allassimavoq: “[Inuup] ataatsip ajortuliornera pissutigalugu inuit amerlasuut toqupput.” Adamip naapertuilluartumik eqqartuunneqarnera kinguaavinut tamanut, ilaatigut uagutsinnut, atuuppoq. Tuppallersaatigisinnaavarpulli nalunnginnatsigu angut naammalluinnartoq Jiisusi tamatuma akerlianik kinguneqartumik iliuuseqarsinnaasoq. Qanoq kinguneqartumik? Inuit tamalaat ‘inuusussatut naapertuilluartuutitaasut’ Paulusip eqqartorpai. — Romamiut 5:18, NV.

9. Romamiunut allakkani 5:16, 18-imi allassimasutut Guutip inuit naapertuilluartuutitaanerarmagit qanoq isumaqarpa?

⁹ Grækerit oqaasii ‘iluarnermik kinguneqartumik’ aamma ‘naapertuilluartuutitaasumik’ nutserneqartut qanoq isumaqarpat? Biibilimik nutserisup tamakku ima nassuiarpai: “Tassani pineqarpoq assersuut inatsisinut tunngasoq, oqariartaaseq inatsiserpalaartoq. Inuup ilorlikkut pissusiata allanngornera pineqarnani Guutimut attaveqarnerata allanngornera pineqarpoq. . . . Assersuummi Guuti assersuunneqarpoq eqqartuussisumut unnerluutigisap — Guutip eqqartuussivianut naapertuilluanngitsuliorsimasutut sassartinneqarsimasutullusooq ittup — iluaqutigisaanik aalajangiisumut. Guutip unnerluutigisaq pinngitsuutippaa.”

10. Jiisusi inuit naapertuilluartuutitaanissaannut tunngaviliilluni qanoq iliorpa?

¹⁰ Guutip naapertuilluartumik ‘nunarsuarmik tamarmik eqqartuussisuusup’ suna tunngavigalugu naapertuilluanngitsuusoq pinngitsuutissinnaavaa? (1 Mosesi 18:25) Siullertut asanninnermini ernituani nunarsuarmut aallartippaa. Jiisusi usserneqartaraluarluni, mitallerneqartaraluarluni ajorluinnartumillu pineqartaraluarluni Ataatami piumasaa uniunngilluinnarlugu iliortarpoq. Assuarnaattuarpoq, allaat nappakkami anniartitaaffimmi toqumut. (Hebræerit 2:10) Inuunermi naammalluinnartup pilliutigineratigut utertitsissut, Adamip kinguaavisa ajortimit toqumillu aniguisitaassutigisinnaasaat, pilersippaa. — Matthæusi 20:28; Romamiut 5:6-8.

11. ‘Utertitaassutissap’ naleqataa eqqartorneqartoq suua?

¹¹ Paulusip allami ‘utertitaassutissaq’ annaasap naleqataa eqqartorpaa. (1 Timotheusi 2:6) Naleqataa — qanoq paasisariaqarpa? Adami milliardilinnik naammalluinnanngissutsimik toqumillu kingornussisitaminik kinguaaqarpoq. Ilumoorpoq Jiisusi naammalluinnartuugami inunnut naammalluinnartunut milliardilinnut siuaasaasinnaagaluartoq.a Taamaattumik ima paasineqarsimavoq Jiisusip inuunera kinguaarisinnaasarigaluisalu tamarmik inuuneri tassaasoq pilliut Adamip kinguaavisalu naammalluinnanngitsut inuunerisa nalingat. Biibilimili allassimanngilaq Jiisusip kinguaarisinnaasarigalui utertitsissummut ilaasut. Romamiunut allakkani 5:15-19-imi erseqqissarneqarpoq aniguisitaaneq “inuup ataatsip” toquneratigut pilersinneqartoq. Aap, Jiisusip inuunera naammalluinnartoq Adamip inuunerata naammalluinnartup naligaa. Jiisusi Kristusi kisimi utertitsissutaavoq. Inuit tamalaat tunissummik inuunermillu pinissaannik ajornarunnaarsitsisoq tassaavoq Jiisusip ‘iliuusia naapertuilluartuutitsisoq ataaseq’, tassa naalattuarnera assuarnaattuarneralu allaat toqumut. (Romamiut 5:18, NV; 2 Korinthimiut 5:14, 15; 1 Petrusi 3:18) Qanoq aniguisitaasoqarpa?

Pinngitsuutitaaneq utertitsissumik tunngavilik

12, 13. Sooq naapertuilluartuutitaasut Guutip nallittuinera asanninneralu pisariaqartippaat?

¹² Jehovap Guutip ernermi utertitsissutitut pilliutaa akueraa. (Hebræerit 9:24; 10:10, 12) Jiisusilli ajoqersugai nunarsuarmiittut, aamma apustilii aalajaatsut, suli naammalluinnanngitsuupput. Ajortuliornaveersaartuupput, iluatsittuaannanngillalli. Sooq? Ajorti Adamimit kingornukkamikku. (Romamiut 7:18-20) Guutilli tamanna iliuuseqarfigisinnaavaa, iliuuseqarporlu. ‘Utertitaassutissaq’ akueraa inunnullu kiffartortiminut kajumilluni iluaqutissanngortikkusuppaa.

¹³ Imaanngilaq Guutip apustilit inuillu allat ajunngitsuliorsimammata utertitsissut taakkununnga iluaqutissanngorlugu atortariaqaraa. Aap, nallittuinermini asanningaarnerminilu iliuuseqarpoq. Aalajangerpoq apustilit allallu, maanna ajortimit kingornussamit minguiarneqarsimasutut isigalugit, eqqartuunneqarnerannit pinngitsuutinniarlugit. Paulusi erseqqissumik ima allappoq: “[Saammaannermit] taassuminnga annatsitaavusi uppernikkut. Tamanna nammineq pilersitarinngilarsi, Guutimuna tunissutaa.” — Efesosimiut 2:8.

14, 15. Guutip naapertuilluartuutitaasa akissarsiaq suna neriuutigaat, qanorli iliortuartariaqarpat?

¹⁴ Guutip ajugaqanngitsup inuk ajortimit kingornussaanit eqqunngitsuliarisimasaanillu tamanit isumakkeerfiginninnerata tunissutisiaanerata angissusia eqqarsaatigiuk! Inuup kristumiunngortinnani ajortuliarisimasarpassui kialuunniit kisissinnaanngilai, Guutilli utertitsissut tunngavigalugu ajortuliat tamakku tamaasa isumakkeerfigisinnaavai. Paulusi ima allappoq: “Tunissut amerlasuut unioqqutitsineri pillugit tunniunneqartoq iluarnermik kinguneqarpoq.” (Romamiut 5:16) Apustilit allallu tunissutisiamik asannittumik tunniussamik tamatuminnga pisut, naapertuilluartuutitaasut, soorunami Guutimik ilumoortumik uppernikkut pallorfiginnittuartariaqarput. Taamaaliorunillu siunissami qanoq akissarsisinneqassappat? “Iluarsutsip saammaanneranik tunissutaanillu angingaartumik pissarsisut . . . naalagaassuseqalissapput inuuneqalersitaassallutillu ataasiinnarluinnakkut, tassa Jiisusi-Kristusikkut.” Aap, ‘iluarsutsip saammaanneranik tunissutip’ Adamip ajortuliornerata sunniutai atuukkunnaarsippai. Tunissutisiaq tamanna inuussutaavoq. — Romamiut 5:17; atuakkit Lukasi 22:28-30.

¹⁵ Tunissutisiamik tamatuminnga pisut, naapertuilluartuutitaasut, Guutip anersaakkut ernerilerpai. Kristusip kingornusseqatissaasut Guutip qitornaviitut anersaajusutut qilammut makititaanissaq aamma neriuutigaat, tassanilu Jiisusi Kristusi ‘naalagaassuseqatigissavaat’. — Atuakkit Romamiut 8:15-17, 23.

Guutip inuit allat aamma asavai

16. Nunarsuarmi inuunissamik neriugisallit tunissut suna pisinnaavaat?

¹⁶ Kristumiutut ilumoorfiginnittutut Guutimik upperinnittut kiffartorfiginnittullu ilaannaasa Kristusi qilammi kunngioqatigissavaat. Inuppassuit kristumiut sioqqullugit Guutimut kiffaasut neriuuteqarnerattut neriuuteqarput Biibilimik tunngavilimmik. Neriuutigaat nunarsuarmi paratiisiusumi naassaanngitsumik inuunissaq. Maannangaaq Guutip asannilluni tunissutaa, nunarsuarmi inuunissamik neriuuteqarluni naapertuilluartutut isigineqarneq, pisinnaalereerpaat? Paulusip Romamiunut allagai tunngavigalugit isumalluarluta angersinnaavugut!

17, 18. (a) Aaperaap uppertuunera eqqarsaatigalugu Guutip taanna qanoq isigaa? (b) Sooq Jehovap Aaperaat naapertuilluartutut isigisinnaavaa?

¹⁷ Paulusip Aaperaat maligassiuilluartoq assersuutigaa. Angut taanna uppernini pillugu ilisimaneqarpoq, Jehovallu Israelikkut inatsisinik allassimasunik suli tuninngikkallarmagit Kristusillu qilaliarnissamik ammaassinera sioqquterujussuarlugu inuuvoq. (Hebræerit 10:19, 20) Ima allassimavoq: “Aaperaap kinguaavisaluunniit silarsuarmik kingornussinissaminnik neriorsuutisiaat inatsisitigut pinngilaq, iluarnikkulli uppernermit pisukkut.” (Romamiut 4:13; Jaaku 2:23, 24) Tassa Guutip Aaperaat uppertuunera pillugu naapertuilluartutut naatsorsuuppaa. — Atuakkit Romamiut 4:20-22.

¹⁸ Imaassimanavianngilaq Aaperaat Jehovamut ukiorpassuarni kiffartornermini ajortuliorsimanngitsoq. Aap, naapertuilluartuunera taama isumaqanngilaq. (Romamiut 3:10, 23) Jehovalli ilisimassuseqangaarluni naliliinermini Aaperaap uppernera immikkut ittoq uppernikkullu iliuusii eqqarsaatigai. Aaperaap ‘kinguaassamik’ neriorsuutigisamik nammineq kinguaariligassaminik upperinninnera immikkut pingaaruteqarpoq. Paasinarsivoq kinguaassaq taanna tassaasoq Missiarsi, imaluunniit Kristusi. (1 Mosesi 15:6; 22:15-18) Taamaattumillu ‘Kristusi-Jiisusikkut aniguisitaaneq’ tunngavigalugu siornatigut ajortuliarisimasat Guutip Eqqartuussisuusup isumakkeerfigisinnaavai, tassa Aaperaat uppertullu allat kristumiut sioqqullugit inuusut toqusunit makititaassapput. — Atuakkit Romamiut 3:24, 25; Tussiaat 32:1.

Naapertuilluartutut isigineqarsinnaavutit

19. Sooq Guutip Aaperaamut isiginnittaasia inuppassuit qiimmaallaatigisinnaavaat?

¹⁹ Asannissutsip Guutiata Aaperaat naapertuilluartutut naatsorsuummagu ullumikkut kristumiunut qiimmaallannangaarpoq. Jehovamit anersaamik illernartumik taninneqarlutik ‘Kristusip kingornussisussaaqatigiligaasa’ naapertuilluartuutitaanerattut Aaperaat naapertuilluartuutitaanngilaq. Taakku eqimattaapput amerlagisassaanngitsut ‘illernartooqqullugit qaaqqusaasut’ ‘Guutillu qitornaasut’ isigineqartut. (Romamiut 1:7; 8:14, 17, 33) Aaperaalli taamatut pineqarnani ‘Guutimut ikinngutaalerpoq’, taamaalivorlu utertitsissutitut pilliut suli pilersinneqanngitsoq. (Jaaku 2:23; Esaja 41:8) Kristumiummi nunarsuarmi paratiisimi pilerseqqitami inuunissamik neriugisallit?

20. Jehovap ullumikkut inuit Aaperaamik naapertuilluartutut isiginninnermisut naapertuilluartutut isigisani sunissaat piumasaraa?

²⁰ Taakku ‘iluarsutsip tunissutaanik’ tunineqanngillat ‘Kristusi-Jiisusikkullu aniguisitaanikkut’ qilaliarnissaq neriuutiginagu. (Romamiut 3:24; 5:15, 17) Taamaattoq Guutimik taassumalu pilersitaanik upperinnilluartuupput, uppernertillu ajunngitsuliornikkut ersersippaat. Taamaaliorput ilaatigut ‘Guutip naalagaaffia oqaluussissutigalugu Naalagarlu Jiisusi-Kristusi ajoqersuutigisarlugu’. (Apustilit Suliaat 28:31) Taamaattumik Jehovap Aaperaamik naapertuilluartutut naatsorsuussinermisut taakku naapertuilluartutut isigisinnaavai. Tunissutisiaat — Guutimut ikinngutaaneq — tanitat ‘tunissutisiaannit’ allaaneruvoq. Tunissutisiartilli qujamasuutigingaarpaat.

21. Jehovap asanninnera naapertuilluarneralu qanoq iluaqutigaavut?

²¹ Silarsuarmi politikkikkut siuttut neriorsuuteqartaraluarlutik qularnaatsumik neriuuteqalersitsisinnaanngillat. Nunarsuarmi naassaanngitsumik inoorusukkuit ilisimaarilluartariaqarpat ilinnik taama periarfissaqartitsisoq tassaanngimmat inuk, tassaallunili qilammi nunamilu Kisimi Oqartussaasoq ilisimassuseqartoq. Jehova siunertani naammassiniarlugu iliuuseqareerpoq. Iliuusii naapertuilluarnivimmut naapertuutiinnaratik, aamma asanningaarneranut ersiutaapput. Paulusip allatai uku ilumoorput: “[Guutip] uagutsinnut asanninnini takutippaa ajortiliugallartilluta Kristusip pilluta toquneratigut.” — Romamiut 5:8.

[Quppernerup ataani ilanngussaq]

Eqqaamavigit?

• Adamip kinguaavisa suna kingornuppaat, qanorlu kinguneqarpa?

• ‘Utertitaassutissaq’ qanoq pilersinneqarpa, annaasallu naleqatigigaa qanoq paasisariaqarpa?

• Naapertuilluartutut isigineqarneq tunissutisiaasoq qanoq neriuuteqalersitsiva?

[Qupp. 18-mi assiliartaq]

Inuk naammalluinnartoq Adami ajortuliorpoq. Inuk naammalluinnartoq Jiisusi pilliuteqarpoq ‘utertitaassutissamik’

[Qupp. 20-mi assiliartaq]

Nutaarsiassap nuannissusia — Jiisusip iliuuseqarneratigut naapertuilluartutut isigineqarsinnaavugut!