Noa ulersuarlu — oqaluttuaq piviusoq
SILARSUAQ pitsaanerusoq — silarsuaq inuit eqqisseqatigiillutik inuuffigisaat, silarsuaq sorsuffiunngitsoq, pinerluffiunngitsoq naqisimanniffiunngitsorlu — erinigaajuk? Taamaakkuit, oqaluttuaq piviusoq nalunngereerunakkat qiimmaallaatigisinnaavat. Taanna tassaavoq Noamik, inummik ilumut ajunngitsumik, oqaluttuaq nunarsuaq tamakkerlugu ulersuarmat inuit ajortut ajunaarutigisaannik nammineq ilaquttamilu annassutigisaminnik umiarsualiortoq.
Oqaluttuaq taanna silarsuarmi ilisimaneqarnerpaat ilagaat. Biibilimi Mosesip allagaani siullerni kapitali 6-imit 9-mut oqaluttuarineqarpoq, Koranimilu nunarsuarmilu sumi tamaani inuiaat oqaluttuaanni qasseerpassuarni oqaluttuareqqinneqarluni. Ilumut ulersuaqarsimava, assersuutaannaavaluunniit eqqortuliornissamik kajumilersitsisoq? Ukiuni hundredelinni arlalinni teologit ilisimatuullu apeqqut taanna oqallisigisarsimavaat. Biibilimili, Guutip oqaasiani, erseqqilluinnarpoq — oqaluttuaq ilumoortuuvoq, oqaluttualiaannaanngilaq. Uku eqqarsaatigeriakkit:
Mosesimik allakkani siullerni allassimavoq ukioq sunarpiaq, qaammat sunarpiaq ullorlu sunarpiaq Ulersuaq aallartittoq, qangarpiaq sumerpiarlu umiarsuaq tinuguttoq, qangarpiarlu nuna panerluinnartoq. Noap umiarsuaanut tunngasut allat aamma eqqorluaqqissaarput — qanoq sananeqarnera, qanoq angitiginera, suullu atorlugit sananeqarnersoq. Oqaluttuaannaalli erseqqilluanngitsumik oqaluttuarineqarajupput.
Biibilimi Noa kinguaariit allattorsimaffiini marlunni eqqaaneqarpoq, tamannalu ilumut inuusimaneranut uppernarsaataavoq. (1 Nalunaarsuutit 1:4; Lukasi 3:37) Ezra Lukasilu, kinguaariit allattorsimaffiinik taakkunannga suliarinnittut, misissuinerminni marluullutik peqqissaartuupput. Lukasip Noa Jiisusi Kristusimut siuaasaanerarpaa.
Noa Ulersuarluunniit pruffiitinit Esajamit Ezekielimillu apustilinillu kristumiunit Paulusimit Petrusimillu aamma eqqaaneqarput. — Esaja 54:9; Ezekieli 14:14, 20; Hebræerit 11:7; 1 Petrusi 3:19, 20; 2 Petrusi 2:5.
Jiisusip Ulersuaq ima eqqaavaa: „Soorlumi Noap ulluini ittoq, taamatuttaaq Inuup Ernerata ullussaani ikkumaarpoq. Taamani nerillutillu imerput, nuliartaarlutillu uinitsitaapput, ulloq Noap umiarsuarmut ikiffia tikillugu, ulersuarlu nalliuppoq tamaasalu nungutillugit.“ (Lukasi 17:26, 27) Ulersuaqarsimanngikkaluarpat, ’Inuup Ernerata ullussai’ pillugit Jiisusip oqaasii isumaqassanngikkaluarput.
Apustilip Petrusip siulittuutigaa inoqalerumaartoq ’mitallerlutik’ Biibilimi allassimasunik itigartitsisunik. ’Inuit taama oqaluttut arajutsisimavaat . . . silarsuaq taamanernisaq imermit qarsunneqarluni piujunnaartoq,’ Petrusi allappoq. Uagut aamma tamanna arajutsissavarput? Taamaattariaqanngilluinnarpugut. Petrusi ima nangippoq: „Qilaat nunalu maannakkut ittut . . . atatinneqarput utaqqisitaallutillu ullormi eqqartuussivissami iluaatsut nungutitaanissaanni ikuallagaanissaminnut.“ — 2 Petrusi 3:3-7.
Guuti inunnik ajortunik piiaaqqissaaq, aamma tamatumani aniguisoqassaaq. Noap maligassiaa malikkutsigu, naapertuilluartut silarsuarmut pitsaanerusumut aniguisut akornanniissinnaavugut.