Jehovap qanoq eqqaamassavaatigut?

„EQQAAGINGA, Guutiga.“ Oqaatsit taakku atorlugit Nehemiasip arlaleriarluni Guuti torlorfigisimavaa. (Nehemja 5:19; 13:14, 31) Pissusissamisoorpoq nalornillunilu aliasunnermi taama qinnunikkut Guutimut saaffiginnittarneq.

Kisianni inuit Guutimut eqqaamaqqullutik qinugaangamik suna eqqarsaatigisarpaat? Soorunami atiinnarmik eqqaamaneqarnissaat neriuutiginngilaat. Qularnanngilaq pinerluttutut Jesusip toqutaaqatigisaatut neriuttut. Taassuma pinerluttoqatini assiginagu Jesus qinnuigaa: ’Naalagaallutit tikiukkuit eqqaaginga.’ Kinaanini Jesusimut eqqaamaqquinnanngilaa, kisianni kissaatigaa Jesus iliuuseqassasoq — tassa toqusunit makitissagaani. — Lúkarse 23:42.

Tamatumunnga naapertuuttumik Biibilimi takutinneqarpoq Guutip inuit eqqaamagaangagit isumaqartoq taakku iluaqutissaannik iliuuseqartoq. Assersuutigalugu allaatigineqarpoq ulluni 150-ini ulersuaqarmat ’Guutip puigorsimanngikkaa Noa . . ., Guutilu nunap qaavagut anorersuartitsimmat imeq appariartulersoq’. (1 Moses 8:1) Ukiut hundredilikkaat tamatuma kingorna Samson filisterinit tappiillisinneqarsimasoq kalunnernillu qilersugaasimasoq qinuvoq: „[Jehova] Guuti, eqqaannga, nukissinngalu matumuunarpiaannaq.“ Jehovap Samson eqqaamavaa Guutip akeraanik akiniaanissaanut nukeqangaalersillugu. (Eqqartuussisut 16:28-30) Jehovap Nehemiasimut iliornermisut ilungersornera pilluaqquaa, Jerusalemimilu pallorfiginninneq ilumoortoq atulerseqqinneqarpoq.

’Siornagummi allassimasut tamarmik allassimapput uatsinnut ilinniutissaallutik nerioqqulluta erinitsannata allakkallu tuppallersaatigalugit,’ apustili Paulus allappoq. (Rûmamiut 15:4) Jehova eqqaamagutsigut piumasaanik iliorniarnitsigut, soorlu itsaq kiffai aalajaatsut taamaaliorsimasut, qularutigissanngilarput Jehovap eqqaamassagaatigut ullormut pisariaqartitatsinnik isumagaluta, misilinneqarnitsinni nakussatsilluta, ullormilu eqqartuussiffissami iluaatsut pillarneqarfissaanni annaatissalluta. — Matîuse 6:33; 2 Pîtruse 2:9. (wE 1/2 2000)