Ernioqqissitaaneq — annaanneqarnissamut aqqut?

APEQQUT una qanoq akissagaluarpiuk: “Illit ernioqqissitaavit?” Silarsuaq tamakkerlugu uppertut millionillit apeqqut taanna aalajangersimalluinnarlutik “aap”-imik akissagaluarpaat. Qularutiginngilluinnarpaat ernioqqissitaaneq, imaluunniit ernioqqinneq,a kristumiut ilumoortut tamarmik ilisarnaatigigaat aamma annaanneqarnissamut aqqutissatuaasoq. Taakkua upperisarsiornikkut siuttut, soorlu teologi Robert C. Sproul, isumaqatigaat. Taanna ima allappoq: “Inuk ernioqqissitaanngikkuni, . . . kristumiuunngilaq.”

Ernioqqissitaasimagaanni annaanneqarnissamut aqqutikkoorsorinnittut ilagaatsit? Taamaappat qularnanngitsumik eqqarlitit ikinngutitillu aqqummik tamatuminnga nanisinissaannut tassuunalu ingerlalernissaannut ikiorusuppatit. Annaanneqarnissamulli aqqutikkoorsinnaassagunik inuup ernioqqissitaasimasup inuullu ernioqqissitaasimanngitsup assigiinngissutaannik paasinnittariaqarput. Taava ernioqqissitaanerup qanoq paasisariaqarneranik illit qanoq nassuiaatissagaluarpigit?

Inuk ‘ernioqqissitaasimanerarneqaraangat’ inuppassuit isumaqartarput taanna Guutimut Kristusimullu kiffartorniarluni pingaartorsiorluni neriorsuisimasoq, tamatumalu kingunerisaanik anersaakkut uummarsimasoq anersaakkut toqungareerluni. Qinerlerfissiami atorneqarajuttumi allassimavoq inuk ernioqqissitaasimasoq ernioqqissitaasimasinnaasoq upperisamut tunngasumik killitsinnangaartumik misigisaqareerluni.

Immaqa tupaallaatigissavat paasigukku ernioqqissitaaneq, imaluunniit ernioqqinneq, Biibilimi taamatut nassuiarneqanngitsoq. Guutip oqaasiani sunarpiaq ajoqersuutigineqarnersoq paaserusuppiuk? Tamatuminnga misissuinerit qularnanngitsumik iluaqutigissavat, oqaatsimmi taakkua qanoq paasisariaqarnerannik eqqorluartumik paasinninneq inuuninnut siunissamullu neriuutinnut sunniuteqassapput.

Biibilimi suna ajoqersuutigineqarpa?

Biibilimi oqaaseq ‘ernioqqinneq’ Johannesi 3:1-12-imi atorneqarpoq. Allassimaffimmi tassani Jiisusip upperisarsiornikkullu siuttuusup Jerusalemimi oqaloqatigiinnerat soqutiginartoq oqaluttuarineqarpoq. Biibilimi oqaluttuarineqartoq taanna tamarmi ungalusami ilanngunneqarsimavoq. Kajumissaarpatsigit taanna atuaqqissaaqqullugu.

Oqaluttuami tamatumani Jiisusip ‘ernioqqinnermut’ tunngasut arlallit erseqqissarpai. Taassuma oqaasii apeqqutit tallimat pingaarutillit uku akissutisinissaannut iluaqutigissavavut:

◼ Ernioqqissitaaneq qanoq pingaaruteqartigaa?

◼ Ernioqqissanerluni nammineq aalajangerneqarsinnaava?

◼ Ernioqqinnermut suna siunertaava?

◼ Qanoq ililluni ernioqqittoqartarpa?

◼ Guutip ernioqqissitaasimasullu attaveqatigiinnerat qanoq allanngortarpa?

Apeqqutit taakku ataasiakkaarlugit sammeriartigit.

[Quppernerup ataani ilanngussaq]

[Qupp. 4-mi ungalusaq/​assiliartaq]

“Ernioqqittariaqarpusi”

“Anguteqarpoq farisiiarit ilaannik Nikodemusimik atilimmik juutini killisiuisoqatigiinnut ilaasuusumik. Taassuma Jiisusi unnuakkut ornippaa oqarfigalugulu: ‘Rabbi, ilisimavarput ajoqersuisuusutit Guutimit pisoq; ilittummi nalunaaqutiliorsinnaasoqanngilaq Guutip najunngippani.’ Jiisusip akivaa: ‘Ilumut, ilumut oqarfigaakkit: Guutip naalagaaffia inuup takusinnaanngilaa ernioqqissimanngikkuni.’ Nikodemusip oqarfigaa: ‘Qanoq ililluni inuk erniusinnaava utoqqaaguni? Aappassaanik anaanami timaata iluanut pisinnaanavianngilaq erniusinnaanaviarnanilu.’ Jiisusi akivoq: ‘Ilumut, ilumut oqarfigaakkit: Inuk imermit anersaamillu erniusimanngikkuni Guutip naalagaaffianut pisinnaassanngilaq. Uinimmit erniusoq uiniuvoq, Anersaamillu erniusoq anersaajuvoq. Tupigusuutigissanngilat ima oqarfigigakkit: Ernioqqittariaqarpusi. Anorip sammivigiumasani sammivigisarpaa. Siorsuppalua tusaasarpat nalulluguli sumit pinersoq sumullu ingerlanersoq. Anersaamit erniusimasoq kinaluunniit taamaappoq.’ Nikodemusip aperaa: ‘Qanoq ililluni taama pisoqarsinnaava?’ Jiisusip akivaa: ‘Israelikkunni ajoqersuisuugaluarlutit tamanna paasinngiliuk? Ilumut, ilumut oqarfigaakkit: Ilisimasatsinnik oqaluppugut takusatsinnillu nalunaajaalluta, nalunaajaaterpulli ilassinngilarsi. Nunap piinik ilissinnut oqalukkaangama upperneq ajorassi taava qanoq ilillusi uppersinnaassavisi qilaap piinik oqaluffigigussi?’” — Johannesi 3:1-12.

Ernioqqissitaaneq — qanoq pingaaruteqartigaa?

JIISUSIP Nikodemusimik oqaloqateqarnermigut erseqqissarpaa ernioqqissitaanissaq, imaluunniit ernioqqinnissaq, pingaaruteqangaartoq. Tamanna qanoq paasiuminarsarpaa?

Maluginiaruk Jiisusip Nikodemusimik oqaloqateqarnermini ernioqqinnissap pingaaruteqassusianik erseqqissaanera. Ima oqarpoq: “Guutip naalagaaffia inuup takusinnaanngilaa ernioqqissimanngikkuni.” (Johannesi 3:3). Uiguutit “-sinnaanngilaa” aamma “-simanngikkuni” ernioqqittariaqarnermut erseqqissaataapput. Assersuutigalugu inuk oqaruni: “Ulloq qaammarissisinnaanngilaq seqineq nuinngippat,” isumaqarpoq ulloq qaammarissisinnaaqqullugu seqernup nuinissaa pisariaqarluinnartoq. Tamatumunnga assingusumik Jiisusi oqarpoq ‘Guutip naalagaaffianik’ takunnissinnaajumalluni ernioqqinnissaq pisariaqarluinnartoq.

Tamanna pillugu qularunnaarsitsiniarluni Jiisusi ima oqarpoq: “Ernioqqittariaqarpusi”. (Johannesi 3:7) Jiisusi naapertorlugu Guutip naalagaaffianut ‘pisinnaajumalluni’ ernioqqinnissaq pisariaqarpoq, piumasaqaataavoq. — Johannesi 3:5.

Jiisusip ernioqqinnissaq pingaaruteqangaartutut isigimmagu kristumiut qulakkeertariaqarpaat tamatumunnga tunngasut eqqortumik paasisimanerlugit. Assersuutigalugu, kristumiu nammineq aalajangersinnaava ernioqqissitaassalluni? Illit qanoq isumaqarpit?

[Qupp. 5-mi assiliartaq]

“Ulloq qaammarissisinnaanngilaq seqineq nuinngippat.”

Ernioqqissitaaneq — nammineq aalajangigassaava?

KINA ernioqqissitsisarpa? Palasit ilaasa tusarnaartutik ernioqqissitaaqqullugit kajumissaaraangamikkit Jiisusip oqaasii uku issuartarpaat: “Ernioqqittariaqarpusi.” (Johannesi 3:7) Palasit taakku oqaaseq taanna peqqussutitut atortarpaat. Ima oqartarpullusooq: “Ernioqqigitsi!” Taamaalillutik oqartarput inuup nammineq aalajangigassarigaa Jiisusimut naalassanerluni ernioqqissitaaniarlunilu iliuuserineqartariaqartut iliuuseralugit. Tunngavilersuut tamanna naapertorlugu nammineq aalajangigassaavoq. Jiisusilli Nikodemusimut oqaasiinut naapertuuppa?

Jiisusip oqaasiinik taakkuninnga misissueqqissaarnermi paasinarsivoq Jiisusi oqanngitsoq inuup ernioqqinnissani nammineq aalajangigassarigaa. Sooq taamatut oqarsinnaavugut? Oqaaseq grækerisooq ‘ernioqqinneq’-mik nutserneqartoq aamma “pavannga erniusoq”-mik nutserneqarsinnaavoq.a Taamaattumik nutsigaq taanna malillugu ernioqqissitaaneq “pavannga”, tassa qilammit, imaluunniit ‘Ataatamit’, pivoq. (Johannesi 19:11; Jaaku 1:17) Aap, Guuti ernioqqissitsisuuvoq. — 1 Johannesi 3:9.

Oqariartaaseq “pavannga erniusoq” eqqaamagutsigu, inuup nammineq ernioqqissinnaannginnera paasiuminarpoq. Inunngortoqartarnera eqqarsaatigiinnariaruk. Illit nammineq aalajangikkavit kingunerisaanik inunngorpit? Soorunami naamik! Inunngorputit, imaluunniit erniuvutit, ataatavit kinguaassiarimmatit. Tamatumunnga assingusumik ernioqqittoqarsinnaavoq aatsaat Guutip, Ataatatta qilammiusup, ernioqqissitsineratigut. (Johannesi 1:13) Apustili Petrusi eqqortumik ima allappoq: “Unnersiutigineqarli Guuti Naalakkatta Jiisusi-Kristusip Ataataa, naakkinninnersuani naapertorlugu Jiisusi-Kristusip toqusunit makinneratigut ernioqqissikkamisigut neriugisamut uumasumut.” — 1 Petrusi 1:3.

Peqqussutaava?

Inuit ilaat immaqa ima eqqarsarput: ‘Ernioqqissitaassanerluni nammineq aalajangertoqarsinnaannginnera ilumoorpat, taava sooq Jiisusi “ernioqqeqqusiva”?’ Taamatut aperinissamut pissutissaqarluarpoq. Oqaasermi Jiisusip atugaa peqqussutaasimasuuppat, taassuma iliuuserisinnaanngisatsinnik peqqusimassagaluarpaatigut. Tamannalu ingasaassinerussagaluarpoq. Oqaaserli “ernioqqittariaqarpusi” qanoq paasisariaqarami?

Oqaatsimik tamatuminnga allassimaqqaarfinni misissuinermi erserpoq taanna inatsiniutaanngitsoq, tassa peqqussutaanngitsoq. Pineqartorli nalunaarutaavoq. Allatut oqaatigalugu, Jiisusi oqarami ‘ernioqqinnissaq’ pisariaqartoq, peqqusinani tamatuma pisariaqarnera erseqqissaannarpaa.

Peqqussutip nalunaarutillu assigiinngissutaannik paasinninniarluni ima assersuusiortoqarsinnaavoq: Takorlooriaruk illoqarfik atuarfippassualik. Atuarfiit taakku ilaat meeqqanut nunap inoqqaavinut ilaasunut illoqarfimmit ungasissumi najugalinnut atuarfissiaavoq. Ilaanni nukappiaqqap nunap inoqqaavinut ilaanngitsup atuarfimmi tamatumani pisortaasoq ima oqarfigaa: “Illit atuarfinni atuartussatut allatsikkusuppunga.” Atuarfiup pisortaata ima oqarfigaa: “Aatsaat nunap inoqqaavinut ilaaguit maani atuartussatut allatsissinnaavutit.” Taassuma oqaasii soorunami peqqussutaanngillat. Nukappiaraq ima oqarfiginngilaa: “Nunap inoqqaavinut ilaalerit!” Imali oqarpoq: “Maani atuartussatut allatsissinnaajumallutit nunap inoqqaavinut ilaasariaqarputit.” Atuarfiup pisortaata erseqqissaannarpaa atuarfimmi tamatumani atuartuusinnaajumalluni piumasaqaatit suut naammassineqartariaqartut. Jiisusimut tunngatillugu aamma taamaappoq. Oqarami: “Ernioqqittariaqarpusi,” erseqqissaannarpaa ‘Guutip naalagaaffianut pisinnaajumalluni’ piumasaqaatit suut naammassineqartariaqarnersut.

Oqaatsit kingulliit ilaat taakku — Guutip naalagaaffia — ernioqqissitaanermut tunngasumut allamik eqqaasitsipput. Apeqqummut matumunnga tunngavoq: Ernioqqissitaanermut suna siunertaava? Apeqqummut tamatumunnga akissummik ilisimanninneq ernioqqissitaanerup qanoq paasisariaqarneranik eqqorluartumik paasinninnissamut ‘matuersaataavoq’.

[Quppernerup ataani ilanngussaq]

[Qupp. 6-mi assiliartaq]

Ernioqqissitaanerup ilumoortumillu inunngornerup suna assigiissutigaat?

Ernioqqissitaaneq — suna siunertaralugu?

INUPPASSUIT isumaqarput naassaanngitsumik annaanneqarsinnaajumalluni ernioqqinnissaq pisariaqartoq. Maluginiariarulli Jiisusi ernioqqissitaanermut siunertaasoq pillugu qanoq oqarnersoq: “Guutip naalagaaffia inuup takusinnaanngilaa ernioqqissimanngikkuni.” (Johannesi 3:3) Taamaattumik Guutip naalagaaffianut iserniarluni — imaanngitsoq annaanneqarumalluni — ernioqqittariaqarpoq. Inuit ilaat immaqa akerliliiumassapput oqarlutik oqariartaatsini taakkunani marlunni — ‘Guutip naalagaaffianut pineq’-mi ‘annaanneqarneq’-milu — akissarsiassaq ataaseq pineqartoq. Taamaanngilarli. Taakku assigiinngissutaat paasiumallugu oqaatsit “Guutip naalagaaffia” qanoq isumaqarnersut misissulaartariaqarparput.

Naalagaaffik naalakkersuisoqartarpoq. Taamaattumik ‘Guutip naalagaaffiani’ naalakkersuisoqarsimassaaq. Biibilimi ajoqersuutigineqarpoq Jiisusi Kristusi, “Inuup Ernera”, Guutip naalagaaffiani kunngiusoq, aamma naalakkersueqateqartoq. (Danieli 7:1, 13, 14; Matthæusi 26:63, 64) Aammattaaq apustilip Johannesip takorruugaani paasinarsisinneqarpoq Kristusip naalakkersueqatai tassaasut inuit “naggueqatigiinnit immikkullu oqaasilinnit inuiannillu inuiaqatigiinnillu tamanit” immikkoortinneqarsimasut, taakkualu ‘nunamut kunngiussasut’. (Saqqummersitat 5:9, 10, 1936; 20:6) Guutip oqaasiani nangilluni paasinarsisinneqarpoq kunngisut naalakkersuisussat ‘savarpannguusut’, tassa inuit 144.000-it, “akiliunneqarlutik nunamiikkunnaarsitat”. — Lukasi 12:32; Saqqummersitat 14:1, 3.

Guutip naalagaaffia sumiippa? Guutip naalagaaffia aamma ‘Qilaap Naalagaaffianik’ taaneqarpoq, tamatumanilu erserpoq Jiisusi kunngioqataalu qilammit naalakkersuissasut. (Lukasi 8:10; Matthæusi 13:11) Taamaattumik Guutip naalagaaffia qilammiippoq, Jiisusimik Kristusimik naalakkersueqataanillu eqimattanik inuiannit immikkoortinneqarsimasunik naalakkersuisulik.

Jiisusimmi suna pivaa oqarami ernioqqinnissaq pisariaqartoq ‘Guutip naalagaaffianut pisinnaajumalluni’? Pisaa tassaavoq ernioqqissitaanissaq pisariaqartoq qilammi Kristusimik naalakkersueqateqarumalluni. Taamaattumik oqaatigilluaannarlugu ernioqqissitaanermut siunertaasoq tassaavoq inunnik killilimmik amerlassusilinnik qilammi naalakkersuinissamut piareersaanissaq.

Maannamut paasivarput ernioqqissitaaneq pingaaruteqangaartoq, Guutimit pilersinneqartoq aamma inunnik eqimattanik qilammi naalakkersuinissamut piareersaataasoq. Ernioqqissitaanerli qanoq pisarpa?

[Qupp. 7-mi issuagaq]

Ernioqqissitaanermut siunertaavoq inunnik killilimmik amerlassusilinnik qilammi naalakkersuinissamut piareersaanissaq

[Qupp. 7-mi assiliartaq]

Jiisusi Kristusi naalakkersueqataasussallu inuiannit immikkoortitat Guutip naalagaaffiani naalakkersuisuussapput

Ernioqqissitaaneq — qanoq pisarpa?

JIISUSIP Nikodemusi oqaloqatigigamiuk ernioqqissitaanerup pingaaruteqassusia aamma ernioqqissitaanermut pissutaallutillu siunertaasut sammiinnarnagit aammali qanoq pisarnera sammivaa. Jiisusi ima oqarpoq: “Inuk imermit anersaamillu erniusimanngikkuni Guutip naalagaaffianut pisinnaassanngilaq.” (Johannesi 3:5) Tassa inuk imeq anersaarlu iluaqutigalugit ernioqqittarpoq. Oqaatsilli “imermit anersaamillu” qanoq paasisariaqarpat?

‘Imeq anersaarlu’ — assersuutaanngitsut assersuutaasulluunniit?

Nikodemusip, juutiugami upperisarsiornermik ilinniarsimasoq, qularnanngitsumik Allakkani Hebræerisuuni oqariartaatsimik — Guutip nukinga sulisoq maluginiarnarluinnartunik naammassinnitsitsilluni inunnut sunniuteqarsinnaasoq pillugu atorneqartartumik — ‘Guutip anersaava’-nik atueriaaseq nalunngilaa. (1 Mosesi 41:38; 2 Mosesi 31:3; 1 Samueli 10:6) Taamaattumik Jiisusip oqaaseq ‘anersaaq’ atormagu, Nikodemusip paasisimassavaa anersaaq illernartoq, Guutip nukinga sulisoq, pineqartoq.

Jiisusip imeq innersuussutigigamiuk suna pivaa? Oqaaseq anersaaq assersuutaanngitsutut paasineqassappat oqaaseq ‘imeq’ aamma assersuutaanngitsutut paasigutsigu silatusaassaagut. Maluginiakkit pisimasut Jiisusip Nikodemusimik oqaloqateqarnerata siunitsianngua kingunitsianngualu eqqartorneqartut. Taakkunani erserpoq Johannesip Kuisisup Jiisusillu ajoqersugai imermik kuisisartut. (Johannesi 1:19, 31; 3:22; 4:1-3) Kuisisarneq Jerusalemimi ilisimaneqarluarpoq. Taamaattumik Jiisusip imeq eqqartormagu Nikodemusip nalusimassanngilaa Jiisusip imeq nalinginnaasoq pinnagu, imerli kuissutaasoq eqqartoraa.

“Anersaamik Illernartumik” kuineqartut

Oqariartaatsimi ‘imermit erniuneq’-mi imermik kuisinneq pineqarpat, taava oqariartaaseq ‘anersaamit erniuneq’ qanoq paasisariaqarpa? Jiisusip Nikodemusimik oqaloqateqarnerata siorna Johannesip Kuisisup nalunaarutigisimavaa imiinnaanngitsoq, aammali anersaaq kuisinnermut tunngatillugu pingaaruteqarumaartoq. Ima oqarpoq: “Uanga imermik kuivassi, taassumali [Jiisusip] Anersaamik Illernartumik kuissavaasi.” (Markusi 1:7, 8) Iivangkiiliumik allattup Markusip taamatut kuisittoqaqqaarnerani qanoq pisoqarnersoq ima allaatigaa: “Ulluni taakkunani Jiisusi Nazaretimit Galilæamiittumit tikiuppoq Jordanimilu Johannesimut kuisilluni. Imermit qaqillunilu takuaa qilaat qupisut Anersaallu tuisut illuni aqqarfigigaani.” (Markusi 1:9, 10) Jiisusi Jordanimi morsutsinneqarami imermik kuineqarpoq. Anersaaq illernartoq qilammit pigamiuk ingerlaannaq anersaamik illernartumik kuineqarpoq.

Jiisusip kuisinnerminit ukiut pingasut missiliorlugit qaangiuttut ajoqersukkani ima neriorsorpai: “Ullut amerlanngitsut qaangiuppata Anersaamik Illernartumik kuineqarumaarpusi.” (Apustilit Suliaat 1:5) Tamanna qanga piva?

Ukiumi 33-mi piinsip ulluani Jiisusip ajoqersugai 120-t missaanniittut illumi Jerusalemimiittumi katersorsimapput. “Tassanngaannarlu perpaluk anoraasuarsuartut qilammit tutsiuppoq, illulu isersimaffigisaat tamaat ulikkaarpaa. Oqqallu innertut ittut taakkununnga takutipput. . . . Taava tamarmik Anersaamik Illernartumik ilumioqangaalerput.” (Apustilit Suliaat 2:1-4) Ullormi tamatumanerpiaq Jerusalemimiittut allat imermik kuisinnissamut kajumissaarneqarput. Apustilip Petrusip inuppassuit ima oqarfigai: “Allamik isumataaritsi, Jiisusi-Kristusillu aqqani tamassi kuisigitsi ajortissi isumakkeerneqaatissaannik, taava Anersaaq Illernartoq tunissutisiarissavarsi.” Inuit qanoq periarpat? “Oqaasiinik ilassinnittut kuisipput, ullorlu taanna inuit 3.000-ingajaat ilagiinnut ilanngutitaapput.” — Apustilit Suliaat 2:38, 41.

Kuissutit assigiinngitsut marluk pisariaqarput

Kuissutit assigiinngitsut marluk taakku ernioqqissitaaneq pillugu sumik ersersitsippat? Ernioqqissitaaneq marlunnik immikkoortoqartoq, taakkualu iluaqutigalugit ernioqqittoqartartoq. Maluginiaruk Jiisusi siullermik imermik kuineqartoq. Taava anersaamik illernartumik pivoq. Ajoqersukkat siulliit anersaamik illernartumik pinnginnerminni imermik kuineqarput — ilaat Johannesimit Kuisisumit. (Johannesi 1:35, 36) Ajoqersuganngorlaat 3000-it aamma imermik kuineqaqqaarput, kingornalu anersaamik illernartumik pipput.

Ukiumi 33-mi piinsip ulluani kuissutigineqartut assigiinngitsut marluk eqqarsaatigalugit, ullumikkut ernioqqissitaanerup qanoq pisarnissaa ilimagisinnaavarput? Jiisusip apustiliisa ajoqersugaasalu siulliit ernioqqissitaasarsimanerattut. Siullermik, inuup ajortuliani peqqissimissutigissavai, ajortumut ingerlajunnaarluni, inuunini Jehovamut tunniulluinnarlugu taanna pallorfiginiarlugu kiffartorfiginiarlugulu, taavalu tunniulluinnarnini tamanut nalunaarutigalugu imermik kuisinnermigut. Taava Guutip naalagaaffiani naalakkersuisussatut Guutimit qinerneqarsimaguni, anersaamik illernartumik taninneqassaaq. Immikkoortoq siulleq (imermik kuisinneq) inuup nammineq iliuuseqarneratigut pisarpoq; immikkoortulli aappaa (anersaamik kuisinneq) Guutip iliuuseqarneratigut pisarpoq. Inuup kuissutit assigiinngitsut marluk taakku misigereerunigit ernioqqissitaassaaq.

Soormiuna Jiisusip Nikodemusi oqaloqatigigamiuk oqariartaaseq ‘imermit anersaamillu erniusoq’ atoraa? Imermik anersaamillu kuineqartut atugaasa maluginiarnartumik allanngorumaarnerat erseqqissarniarlugu. Allaaserisami tulliuttumi ernioqqissitaanermut tunngasoq tamanna sammineqassaaq.

[Qupp. 9-mi assiliartaq]

Johannesip Israelikkut peqqissimisut ilaat imermik kuivai

Ernioqqissitaaneq — sumik kinguneqartarpa?

SOOQ Jiisusip anersaamik illernartumik kuineqarneq oqaluuserigamiuk oqariartaaseq ‘anersaamit erniusoq’ atorpaa? (Johannesi 3:5) Oqaaseq ‘erniuneq’ assersuutaasumik isumaqarpoq ‘aallartinneq’. Taamaattumik ernioqqissitaanermi pineqarpoq nutaamik aallartinneq. Tassa assersuutaasumik erniuneq ernioqqinnerlu eqqartorneqaraangata, Guutip anersaamillu illernartumik kuineqarsimasut attaveqatigiinnerata nutaamik aallartinnera erseqqissarneqartarpoq. Taakku attaveqatigiinnerat qanoq ililluni allanngorluinnartarpa?

Guutip inunnik qilammi naalakkersuinissamut qanoq piareersaasarnera nassuiarumallugu, apustili Paulusi ilaqutariittut inuunermeersumik assersuusiorpoq. Taassuma kristumiut nalimini inuusut allaffigai qitornavissiartaarineqarumaartut imaluunniit ‘qitornaassusermik pigisaqalerumaartut’, taamaattumillu Guutip “ernerusutut” iliorfigisinnaagai. (Galatiamiut 4:5; Hebræerit 12:7) Qitornavissiartaarnermik assersuut inuk anersaamik illernartumik kuineqaraangat qanoq allanngortoqartarneranik paasinninnissamut iluaqutigaarput. Taamaattumik nukappiaqqamik, nunap inoqqaavinut ilaasunut atuarfissiaasumi atualertussatut allatsikkusuttumik, assersuusiaq uterfigeriartigu.

Qitornavissiartaarineqarneq pissutigalugu allannguut

Assersuusiami nukappiaraq atuarfimmi tassani allatsissinnaanngilaq nunap inoqqaavinut ilaannginnami. Maanna takorlooriaruk ullut ilaanni allanngorujussuartoqartoq. Inatsisit tunngavigalugit ataataasumit nunap inoqqaavinut ilaasumit qitornavissiartaarineqarpoq. Tamanna nukappiaqqamut qanoq kinguneqarpa? Ernerusutut qitornavissiartaarineqarami inuusuttut nunap inoqqaavinut ilaasut pisinnaatitaaffigisaattut pisinnaatitaaffeqalerpoq — ilaatigut atuarfimmut tassunga allatsinnissaq pisinnaatitaaffigilerlugu. Qitornavissiartaarineqarnera pissutaalluni periarfissai allanngorluinnarput.

Tamanna ernioqqissitaasunut pingaaruteqarnerusumik qanoq pisoqartarneranut erseqqissaataavoq. Assigiissutaat maluginiariakkit. Nukappiaraq atuarfimmi tassani atuartussatut allatsissinnaajumalluni piumasaqaammik pinngitsoorani naammassisassaqarpoq — tassa nunap inoqqaavinut ilaalertariaqarpoq. Piumasaqaat tamanna nammineq naammassisinnaanngilaa. Taamatuttaaq inuit ilaat Guutip naalagaaffiani inissaqassapput, piumasaqaammilli pinngitsooratik naammassinnittussaapput, tassa ‘ernioqqissitaasariaqarput’. Namminneq taamaaliorsinnaanngillat, ernioqqissitaanissamummi Guuti aalajangiisuuvoq.

Pissutsinuna angutip inuusuttup atugai sumit allanngortinneqartut? Inatsisit tunngavigalugit qitornavissiartaarineqarneranit. Soorunami tamanna inuttut allannguutiginngilaa. Qitornavissiartaarineqareerluni suli taannaavoq. Qitornavissiartaarineqarnissamulli piumasaqaatit inatsisinik tunngaveqartut naammassineqareermata angut inuusuttoq nutaamik inissisimaffeqalerpoq. Oqartoqarsinnaavoq nutaamik aallartittoq — ernioqqittoq. Qitornavissiartaarineqarpoq, tamannalu pissutigalugu atuarfimmi atualernissaq ataatarsiamilu ilaqutaanut ilaalernissaq pisinnaatitaaffigilerpai.

Taamatuttaaq Jehova pissutsinik inuit naammalluinnanngitsut eqimattat atugaannik allanngortitsivoq, qitornavissiartaarsinnaanissamut inatsisitigut tunngavissanik pilersitsiniarluni iliuuseqarnermigut. Apustilip Paulusip, eqimattanut taakkununnga ilaasup, uppeqatini ima allaffigai: “[Tunineqarsimavusi] anersaamik qitornaassuseqartitsisumik taassumuunalu ima torlulavugut: ‘Abba, Ataataq!’ Anersaaq nammineq uagut anersaarput peqatigalugu nalunaajaavoq Guutip qitornarigaatigut.” (Romamiut 8:15, 16) Aap, taamatut qitornavissiartaarineqarneq aqqutigalugu kristumiut taakku Guutip ilaqutaanut, imaluunniit ‘Guutip qitornaanut’, ilaalerput. — 1 Johannesi 3:1; 2 Korinthimiut 6:18.

Guutip taakkuninnga qitornavissiartaarnera soorunami taakkuninnga inuttut allannguinngilaq, sulimi naammalluinnanngitsuupput. (1 Johannesi 1:8) Taamaakkaluartorli Paulusi naapertorlugu taakku inatsisit tunngavigalugit qitornavissianngornissamut piumasaqaatit naammassereeramikkik nutaamik inissisimaffeqalerput. Tamanna ilutigalugu Guutip anersaavanit qitornavissiartaarineqartut taakku qilammi Kristusi peqatigalugu inuulernissaminnik qularutiginnikkunnaarsinneqarput. (1 Johannesi 3:2) Tamatuminnga qularutiginninngilluinnarnertik inuunermut allatorluinnaq isiginnittaaseqalissutigaat. (2 Korinthimiut 1:21, 22) Aap, nutaamik aallartinneq — ernioqqinnerlusooq — misigaat.

Guutimit qitornavissiartaarineqartut pillugit Biibilimi ima allassimavoq: ‘Guutimut Kristusimullu palasiussapput kunngioqatigissallugulu ukiuni taakkunani 1.000-ini.’ (Saqqummersitat 20:6) Guutip qitornavissiartaavisa Kristusi Guutip naalagaaffiani kunngioqatigissavaat. Apustilip Petrusip kristumioqatini allaffigai ‘qilanni paarineqartumik taakkununnga pisassarititaasumik aserortussaanngitsumik, mingutsinneqartussaanngitsumik toquliortussaanngitsumillu’ — erlinnangaartumik — ‘kingornussiumaartut’. — 1 Petrusi 1:3, 4.

Apeqqulli naalagaaffimmut tunngasoq suli alla pilerpoq. Ernioqqissitaasimasut qilammit kunngitut naalakkersuissappata, taava kikkunnut naalakkersuissappat? Apeqqut tamanna allaaserisami tulliuttumi sammineqassaaq.

[Qupp. 10-mi assiliartaq]

Paulusi qitornavissiartaarineqarneq pillugu qanoq allappa?

Inuppassuit iluaqutissaannut ikittunnguit naalakkersuissapput

APUSTILIT nalaanniilli Guuti inunnik, kristumiunik aalajaatsunik killilimmik amerlassusilinnik, toqqaasarsimavoq taakku qitornavissiartaarisarlugit. Allannguut tamanna qitornavissiartaarineqartut taakku misigisaat ima allannguilluinnartigaaq Guutip oqaasiani ernioqqissitaanertut allaatigineqarluni. Guutimut kiffaasut taamatut ernioqqissitaanerannut siunertaavoq taakku qilammi naalakkersuisunngornissaannut piareersarnissaat. (2 Timotheusi 2:12) Naalakkersuisunngorsinnaajumallutik toqunermik kingorna qilammi inuunermut makititaassapput. (Romamiut 6:3-5) Tassani Kristusi peqatigalugu ‘nunamut’ (1936) kunngiussapput. — Saqqummersitat 5:10; 11:15.

Guutilli oqaasiani aamma allassimavoq ernioqqissitaasut saniatigut allat naassaanngitsumik annaanneqassasut. Biibilimi (Allakkani Hebræerisuuni aammattaaq Kristumiut Allagaataanni Grækerisuuni) eqqaaneqarpoq Guutip inuit eqimattat marluk — naalakkersuisut ikittunnguit qilammi inuusussat, aamma innuttaasut amerlasoorpassuit nunami najugaqartussat — annaakkumaarai. Assersuutigalugu maluginiariaruk apustilip Johannesip qatanngutini ernioqqissitaasimasut Jiisusi pillugu qanoq allaffigigai: ‘Taanna pilliutaavoq saammaannartitsissut uaguinnaanngitsut [ikittunnguit] silarsuulli [inuppassuit] ajortai tamaasa pillugit.’ — 1 Johannesi 2:2.

Apustili Paulusi tamatumunnga assingusumik ima allappoq: “Pinngortitammi [inuppassuit] erinisullutik Guutip qitornaasa [ikittunnguit] saqqummersitaanissaat utaqqivaat.” (Romamiut 8:19-21) Apustilit Johannesip Paulusillu oqaasii taakku qanoq paasisariaqarpat? Ima paasisariaqarput: Ernioqqissitaasut qilammi naalakkersueqataassapput. Suna siunertaralugu? Inuit millionillit, Guutip naalagaaffiani innuttaasut naassaanngitsumik inuusussat, naassaanngitsumik iluaqutissinniarlugit. Taamaattuminguna Jiisusip ajoqersukkani ima qinunissamik ilinniartikkai: “Naalagaaffiit tikiulli, piumasat qilammisut nunamissaaq pili.” — Matthæusi 6:10.

Aammattaaq Allakkani Hebræerisuuni eqimattat marluk annaanneqarumaarnerat eqqaaneqarpoq. Assersuutigalugu maluginiariaruk Jiisusip siuaasaa Aaperaat Jehovamit qanoq oqarfigineqartoq: ‘Illit kinguaassakkut [ikittunnguakkut] nunarsuarmi inuiaat tamarmik [inuppassuit] pilluaqqunarsissapput.’ (1 Mosesi 22:18) Aap, nunarsuarmi inuiaat tamarmik Aaperaap ‘kinguaassaa’ aqqutigalugu pilluaqqussutisinissaminnut periarfissaqarput.

‘Kinguaassaq’ taanna kinaava? Tassaavoq Jiisusi Kristusi, ernioqqissitaasimasut — Guutip qitornavissiartaavi — peqatigalugit. Apustili Paulusi ima nassuiaavoq: ‘Kristusip pigimmasi Aaperaattaaq kinguaaraasi.’ (Galatiamiut 3:16, 29) Inuillu inuiannit tamaneersut ‘kinguaassaq’ taanna aqqutigalugu suna neriuutissaraat? Guutimit akuerineqarnermik nunarsuarmilu paratiisimi naassaanngitsumik inuunermik immikkut pisinnaatitaaffeqarnissaq. Tussiaasiortoq Daavi ima siulittuivoq: “Iluartut nuna kingornutissavaat najugaqassallutillu tassani naassaanngitsumik.” — Tussiaat 37:29; Esaja 45:18; Saqqummersitat 21:1-5.

Qilammi naalakkersuisussatut immikkoortinneqarsimasut nunami inuusussanut naleqqiullugit ikittunnguupput, naalakkersuineratali sunniutaat — nunarsuarmi inuuneq naassaanngitsoq pilluaqqussutissartarpassuilu — inuppassuit nuannaarutigisinnaavaat. Qamannga pisumik neriuppugut illit ilaquttatillu Guutip naalagaaffiata naassaanngitsumik iluaqutissartai ilangiiffigiumaarisi. (wp09 04/01-E)

[Qupp. 12-mi assiliartaq]

Inuit millionilippassuit nunarsuarmi inuunermik naassaanngitsumik pilluaqquneqassapput. Taakkununnga ilaajumaarpit?