Alapernaarsuisut Israalikkuusut illoqarfimmut Jeerikomut pigamik Raahabbip illuanukarput. Tamanna Jeerikomi kunngip paasigamiuk sakkutuunik Raahabbip illuanut aallartitsivoq. Raahabbip alapernaarsuisut marluk illup qaavanut toqqoreeramigit sakkutuut ingerlateqqippai. Taava alapernaarsuisut oqarfigai: ‘Ikiorusuppassi nalunnginnakku Jehovap ilagigaasi nunalu tiguarumaarissi. Neriorsorsinga ilaquttakka ajortumik pineqas­sanngitsut.’

Alapernaarsuisut Raahabbimut oqarput: ‘Neriorsorpatsigit illumi najugaqatitit ajortumik pineqar­navianngitsut.’ Oqarpullu: ‘Allunaasaq aappalaartoq igalaamut nivinngaruk, taava ilaquttatit annaanneqassapput.’

Raahabbip alapernaarsuisut allunaasamik igalaakkut ammukartippai. Taakku qaqqanukarput ullunilu pingasuni Josvamut utinngin­nerminni toqqoqqallutik. Taava Israalikkut kuussuakkut Jordanikkut ikaarput nunallu tiguarnissaanut piareersalerlutik. Ajugaaf­figisaasa siullersaraat illoqarfik Jeeriko. Jehovap oqarfigai ulluni arfinilinni illoqarfik ullormut ataasiarlutik kaajallat­tassagaat. Ullut arfineq-aappaanni illoqarfik arfineq-marloriarlutik kaajallappaat. Taava palasit trompetiminnik qarlortarput sakkutuullu nipitoorsuarmik nilliallutik. Ingerlaannarlu illoqarfiup qarmarsui uppikaapput! Raahabbilli illua qarmarsuarmut atasoq aserunngilaq. Raahabbip Jehova tatigigamiuk ilaquttanilu aniguipput.

Kaanaanimi inuiaat assigiin­ngitsut Jeerikomi pisimasoq tusarpaat. Kunngii aalajangerput ikioqatigiillutik Israalikkunnut sorsunniarlutik. Gibeonimiulli allamik pilersaaruteqarput. Nungullar­nikunik atiseriarlutik Josvamukarput oqarlutillu: ‘Nunamit ungasis­sorsuarmiittumit aggerpugut. Jehova pillugu ilissinnullu iliuuserisimasai pillugit Egyptenimi Moabimilu pisut tusarpagut. Saassun­niarnata neriorsorutsigut taava ilissinnut kiffaasaagut.’

Josvap upperivai saassun­niarnagillu neriorsorlugit. Taavali aqaguaguani paasivaa ungasin­ngitsunnguami najugaqartut, Kaanaanimeersuugamimmi. Josvap Gibeonimiut aperivai: ‘Sooq salloqit­taratsigut?’ Akippullu: ‘Ersigatta! Nalunngin­natsigu Jehovap Guutissi ikioraasi. Toqoqinatigut!’ Josvap neriorsuutini eqqortippaa inuutiin­narlugillu.

Kingunin­nguatigut kunngit Kaanaanikkuusut tallimat sakkutuuisalu Gibeonimiut saassun­niarlugit Gibeoni unguaat. Josvap sakkutuuisalu annaanniarlugit unnuaq naallugu ingerlaarput ullaaralaakkullu akiuutilerlutik. Kaanaanikkut sumut tamaanga qimarrapput. Sumulluunniit qimaagaluaraangata Jehovap nataqqor­narsuarnik nakkaatitsivigai. Taava Josvap seqineq unitseq­qullugu Jehova qinnuigaa. Seqineq siornatigut uninngisaan­narsimammat sooq tamanna qinnutigaa? Upperil­luinnaramiuk Jehova taamaaliorsinnaasoq. Seqineq ulloq naallugu uninngaannarpoq Israalikkullu Kaanaanikkut kunngiinut sakkutuuinullu ajugaareermata aatsaat tarrilluni.