“Asanninnerat killitsissutigaarput”

2015-IMI arfinin­ngor­neq apriilip 25-an­ni Nepalimi qaq­qar­tuumi, Indiap avan­naaniit­tumi, nunap sajun­nera richterskalamik uut­torlugu 7,8-voq. Il­loqarfiup pingaar­nersaata Kathmandup avan­naata-kitaanit 80 kilometerisut ungasitsigisumi nuna sajup­poq. Ajoraluar­tumik Nepalimi pin­ngor­titami ajunaar­nersuar­ni nalunaarsor­neqarsimasuni aatsaat taama amerlatigisut, 8.500-nit amerlanerusut, ajunaar­put. Angerlarsimaf­fiit 500.000-nit amerlanerusut aseror­put. Nepalimi Jehovamik Nalunaajaasut 2.200-up­put, taak­kualu amerlaner­paat eq­qugaaf­fiusumi najugaqar­put. Ajoraluar­tumik ar­naq Nalunaajaasoq meeraalu marluk ajunaar­put.

Nalunaajaasoq Michellemik atilik ima oqar­poq: “Sumiif­fim­mi eq­qugaaner­paasumi ilagiit ataatsimiitsil­lugit nuna sajuler­poq. Amerlasuut angerlarsimatil­lugit nuna sajus­simasuup­pat ajunaar­tut amerlanerusimas­sagaluar­put.” Sooq ataatsimeeqataasut aq­qunan­ngil­lat? Naalagaaf­filersaarfin­nik sanaar­toriaaseq pis­sutiginerul­lugu.

“MAANNA ILUAQUTISSARTAI TAKUSINNAAVAVUT!”

Nepalimi naalagaaf­filersaarfiit nutaaliat nunap sajun­nerini atasin­naan­ngorlugit sanaajup­put. Naalagaaf­filersaarfin­nik sanaar­toqataasar­toq Man Bahadur oqar­poq: “Aperineqar­tar­pugut sooq il­lut angival­laan­ngitsut patajaatsunik toq­qaviler­tar­nerivut. Maan­na iluaqutis­sar­tai takusin­naavavut!” Nunap sajun­nerata kingor­na naalagaaf­filersaarfiit qimar­nguiunis­saat akuerineqar­poq. Nuna sak­kukin­nerusumik sajoq­qit­taraluar­toq Jehovap Nalunaajaasui saniliilu naalagaaf­filersaarfin­ni aarlerin­ngil­lat.

Utoq­qaaner­tat kristumiut ilagiin­nut ilaasor­tanik maqaasineqar­tunik ujarliler­put. Nalunaajaasoq Babitamik atilik ima oqar­poq: “Ilagiin­niit­tut peq­qis­susaat utoq­qaaner­tat sunit tamanit pingaar­nerutip­paat. Asan­nin­nerat kil­litsis­sutigaar­put.” Ataatsimiititaliamut Jehovap Nalunaajaasuisa Nepalimi suliaan­nik nak­kutigin­nit­tumut ilaasor­tat pingasut ilagiin­nik nak­kutil­liisut angalasar­tut ilagalugit suut pisariaqar­tin­neqar­nersut paasiniarlugu utoq­qaaner­tal­lu tapersersor­niarlugit nunap sajun­nerata aqaguani ilagiin­nut tikeraar­put.

Nunap sajun­neranit ul­lut arfinil­lit qaangium­mata Gary Breaux, Jehovap Nalunaajaasuisa USA-mi qul­lersaqarfian­neersoq, nuliani Ruby ilagalugu Nepalimut tikip­poq. Reuben, ataatsimiititaliamut eq­qaaneqareersumut ilaasor­taq, ima oqar­poq: “Kathmandumi paatsiveerun­neqarmat nunalu sak­kukin­nerusumik sajoq­qit­tarmat qatan­ngutip Breauxip tikis­sin­naanera qularutigaar­put. Tikin­nis­sanili aalajangiusimavaa – iluatsip­porlu! Nalunaajaasut nunaqavis­sut tikeraar­neqar­ner­tik as­sut qujamasuutigaat.”

‘AATSAAT TAAMA IMMITSINNUT QANITSIGILERPUGUT’

Silas, Nepalimi Nalunaajaasut al­laf­feqarfian­ni sulisoq, ima oqar­poq: “Oqarasuaatit at­taveqaq­qilermata oqarasuaater­put ingerlaan­naq ul­loq un­nuarlu sianiin­naler­poq! Nalunaajaasoqatit­ta nunanit tamalaaneersut isumaalugaatigut. Ilaasa oqaasii paasisin­naan­ngik­kaluarlutigit asan­nin­nerat ikiuerusungaar­neral­lu ersarip­poq.”

Nuna sajoreermat ul­luni arlalin­ni Nalunaajaasut nunaqavis­sut inuit pisariaqar­titsisut nerisas­saan­nik naalagaaf­filersaarfin­nut pajut­tar­put. Tamatuma saniatigut ajunaar­nersuaqar­til­lugu ikiuiniar­nermut ataatsimiititaliaq pilersin­neqar­poq, sivitsun­ngitsorlu pingaar­ner­tut Bangladeshimit, Indiamit Japanimil­lu inuus­sutis­sat ator­tul­lu tikius­sor­neqaler­put. Ul­lualuit ingerlaneran­ni Nalunaajaasut nakorsat Europameersut tikip­put naalagaaf­filersaarfiil­lu ilaan­ni nakorsiar­titsisalerlutik. Ingerlaan­naq aq­qunarsimasut misis­sulerlugil­lu misigis­sutsik­kut naner­tisimasut ikiuler­paat.

Ar­nap Ut­taramik atil­lip amerlasuut misigis­susaat ima oqaatigaa: “Nunap sajun­nera amiilaar­naqaaq. Tamatumali kingor­na anersaak­kut ilaqutariit­tut aatsaat taama qanitsigiler­pugut.” Aap, nunap sajun­nera pis­sutigalugu Nalunaajaasut asaqatigiin­nerat Jehovamil­lu asan­nin­nerat an­nikil­linani nakus­satsin­neqar­poq.