Paanninneq ajunngila?

MEEQQANIK nukittuniakujunnermik nuannarisaqartunik paannikkumatuunillu nalunngisaqarpit? — Taakku ilagissallugit nuannaraajuk? Imaluunniit ilagerusunneruigit inussiarnersut eqqissisimarusuttullu? — Ajoqersuisorsuaq ima oqarpoq: “Pilluarput eqqisseqatigiissitsisut, taakkumi ‘Guutip qitornaanik’ taaneqassapput.” — Matthæusi 5:9.

Ilaannikkut allat kamaammissutaasinnaasunik iliuuseqartarput. Ilaa tamanna ilumoorpoq? — Immaqa akiniaarusutsannarsinnaavoq. Ilaanni ajoqersugaanut taama pisoqarpoq taakku Jiisusimik Jerusalemiliaqateqartillugit. Tamanna oqaluttuarissavara.

Ingerlangaatsiareerput. Taava Jiisusip ajoqersukkami ilaat siuartippai Samariami nunaqarfiit ilaannut qasuersaarfigisinnaasaminnik ujaasiartortillugit. Samariamiulli tassaneeqqunngilaat, Samariamiummi allamik upperisaqarput. Aammattaaq Jerusalemiliarlutik Guutimik pallorfiginnikkiartortut nuannarinngilaat.

Illit qanoq iliussagaluarpit taama nalaataqartuuguit? Kamaammissagaluarpit? Nunaqarfimmiut pillarniassagaluarpigit? — Jaaku Johannesilu, ajoqersukkat ilaat, taamaaliorusukkaluarput. Jiisusimut ima oqarput: ‘Qilammiit innermik nakkartitsissaagut nunaqarfimmiut ikuallallutik toquniassammata?’ Tupinnanngilaq Jiisusip taakku Kallerup ernerinik taammagit! Jiisusilli akivai inuit allat taama iliorfigisassaanngitsut. — Lukasi 9:51-56; Markusi 3:17.

Immaqa ilaannikkut illit ajortumik pineqartarputit. Meeraqarsinnaavoq pinnguaqatigiumanak oqartunik. Immaqa allaat ajattaatigalutit ima oqarsinnaaput: “Peerniarit!” Nuannerneq ajorpoq taama pisoqaraangat, akiniaarusutsannarsinnaasarporlu. Taamaaliortariaqarpali? —

Biibilit tigoriaruk. Quppissavarput Ussatit, atuarlugulu kapitali 24, versi 29. Allassimavoq: “Ima oqaqinak: ‘Uannut iliorsimanerata assinganik iliorfigissavara; iliornerata nalinganik akiniassavara.’”

Tamanna qanoq paasisariaqarsoraajuk? — Akiniaaniassanngitsugut. Allat ajortumik pimmatigut ajortumik pissanngilavut. Taavami allap paanneqquppatit? Immaqa kamassaarlutit kusanaatsunik taagorpaatit, imaluunniit illaatigaluni qunutunerarpaatit. Taava qanoq iliussavit? Unataqqusaaviuk? —

Biibilimi qanoq allassimasoqarnersoq takoqqeriartigu. Qupperiaruk Matthæusip iivangkiiliua, kapitali 5, versi 39. Jiisusi tassani ima oqarpoq: “Ajortumik pinninniartumut akersuuteqinasi. Kialuunniilli ulussakkut talerperlikkut isappatit illuattaaq maniuk.” Qanormitaavaana Jiisusip tamanna isumaqartikkaa? Kialuunniit isaruloorpatit taava aamma ulussavit illuagut isaqqussavit? —

Naamik. Jiisusip ‘isatsinneq’ eqqartoraangamiuk annernarnera eqqarsaatigineq ajorpaa, allalli ilinnut uumisaarinera pineruaa. Immaqa allap kamatsikkusuppaatit akiseqqullutillu. Akisiguit qanoq pisoqassava? — Aap, nalunanngitsumik tamanna paanermik kinguneqassaaq.

Jiisusilli kissaatiginngivippaa ajoqersukkami allanik paanninnissaat. Taamaattuminguna oqartoq annersinneqarutta akisissanngitsugut. Kamassassanngilagut paannilerlutalu. Taamaaliorutta aallartittumit pitsaanerussanngilagut.

Perulluliortoqalerpat taava qanoq iliussalluni ajunnginnerussava? — Tassa qimagutiinnarluni. Immaqa suli allap ajattassavaatit imaluunniit annerseqqillutit, susoqaqqinnavianngilarli. Qimagunneq qununerunngilaq. Eqqortuliornissamulli sapiissuseqarneruvoq.

Immaqa eqqarsarputit nukittoqigavit alla paagukku ajugaaffigisinnaallugu. Taamaaliorneq eqqortuliornerua? — Naamik. Immaqa paanermi ajugaasinnaagaluarputit, ajugaaffigisalli ikinngutini allat ilagalugit utersinnaavoq. Savinnik sakkunilluunniit allanik ulorianartunik nassataqarsinnaapput. Paasisinnaaviuk sooq Jiisusip paanneqqunngikkaatigut? —

Qanormi iliussaagut allat paasut takugutsigit? Arlaat ikiorniassavarput? — Biibilimi allassimavoq qanoq iliussasugut. Ussatit kapitali 26, versi 17 qupperiaruk. Tassani allassimavoq allat paanerannut akuliukkutta ‘qimmimik siutaasigut tigusineq assigigaa’.

Qimmeq siutaasigut tigummigukku qanoq pisoqassasoraajuk? Qimmimut annernarpoq, keeriassavaatillu, ilaa? Qimmeq qimaaniartillugu siutai assoruunnerullutit tigummisariaqarpatit, qaasussigaluttuinnassaarli. Qimmerlu iperarukku nalunanngitsumik qaasussilluni sakkortuumik kiissavaatit. Siutaali tigummiuarsinnaanngilatit, ilaa? —

Aamma taama ajortigisumik pisoqarsinnaavoq paasoqartillugu akuliukkutta. Naluarpulli suna kamaassutigineraat imaluunniit kina aallartinnersoq. Imaassinnaavoq unartaasoq tilliffigitissimasoq. Ikiorutsigu taava tillittoq ikiussavarput, taamatullu iliorusunngilagut.

Qanormi iliussavit allat paasut takugukkit? — Atuarfimmi paasoqarpat imminnullu ingasattumik annersittarpata ilinniartitsisumut oqarnissaq pisariaqarsinnaavoq. Atuarfimmiunngippat taava immaqa ataatannut imaluunniit anaanannut inersimasumulluunniit allamut oqaatigisinnaavatit. Uagut nammineq paannilissanngilagut.

Jiisusip ajoqersugai ilumoortut sapinngisartik tamaat kamaattunut ilanngunnaveersaartarput. Taamaalilluta takutissavarput eqqortuliornermik ilungersuussisuulluta. Biibilimi allassimavoq Jiisusip ajoqersugaa ‘saqitsaassisussaanngitsoq, tamanulli inussiarnersuussasoq’. — 2 Timotheusi 2:24.