Ilanngussat
1. Babylonnersuaq sunaava?
Qanoq nalunngilarput “Babylonnersuaq” upperisarsioqatigiinnut eqqunngitsunut assersuutaasoq? (Saqqummersitat 17:5) Ilaatigut uku pissutigalugit:
Nunarsuarmut tamarmut sunniivoq. Babylonnersuaq pillugu allassimavoq ‘inuiaat inuppassuillu’ issiaffigigai. Aamma ‘nunarsuarmi kunnginik naalakkersuivoq’. – Saqqummersitat 17:15, 18.
Tassaasinnaanngilaq politikkikkut niuernikkulluunniit pissaanilik. Piuneerussaammat ‘kunngit’ aamma ‘nioqquteqartartut’ piuneerussaanngillat. – Saqqummersitat 18:9, 15.
Guuti salluliuutigisarpaa. Aningaasatigut allatigullu naalakkersuisut iluanaarniarfigisaramigit arnamik atortittartumik taaneqarpoq. (Saqqummersitat 17:1, 2) Inuit nunanit tamalaaneersut salloqittartarpai inuppassuillu toqunerannut pisuulluni. – Saqqummersitat 18:23, 24.
Ilinniagassaq 13 immikkoortoq 6 uterfigiuk
2. Missiarsi qaqugu tikiuttussaasimava?
Biibilimi siulittuutigineqarpoq sapaatit-akunneri 69-it ingerlareerpata Missiarsi tikiuttussaasoq. – Danieli 9:25.
Sapaatit-akunneri 69-it qanga aallartippat? Kr.in.si. ukiumi 455-imi aallartipput. Ukiumi tamatumani Nehemiap naalagaatitaasup Jerusalemmi ‘iluarsarniarlugu kingumullu qarmarniarlugu’ tikippaa. – Danieli 9:25; Nehemia 2:1, 5-8.
Sapaatit-akunneri 69-it qanoq sivisutigippat? Siulittuutit Biibilimiittut ilaanni ulloq ukiumik naleqartinneqartarpoq. (Mosesimik 4. 14:34; Ezekieli 4:6) Taamaattumik sapaatip-akunnera ataaseq tassaavoq ukiut arfineq-marluk. Siulittuummi pineqartumi sapaatit-akunneri 69-it tassaapput ukiut 483-it (69 x 7).
Sapaatit-akunneri 69-it qanga naappat? Kr.in.si. ukiumiit 455-imiit ukiunik 483-inik kisitsigutta Kr.in.king. ukiumut 29-mut pissaagut.a Ukiumi tamatumani Jiisusi imermut morsutsinneqarluni Missiarsinngorpoq. – Lukkarsi 3:1, 2, 21, 22.
Ilinniagassaq 15 immikkoortoq 5 uterfigiuk
3. Nakorsaariaatsit aammik atuinertallit
Nakorsaariaatsit ilaanni inuup nammineq aava atorneqartarpoq. Taakkua ilaat akuerisinnaanngilagut, soorlu allap aalersuutissaanik aaversinneq aamma pilatsinnissaq sioqqullugu nammineq aalersuutissamik aaversinneq. – Mosesimik 5. 15:23.
Nakorsaariaatsilli allat immaqa akuerineqarsinnaapput, soorlu cell-saver atorlugu aammik atoqqiineq, hæmodialyse, hæmodilution aamma maskiina uummataasaliaq puaasaliarlu.b Nakorsaariaatsini taakkunani allanilu aak suliarineqareerluni ingerlaannaq timimut ingerlateqqinneqartarmat kristumiup nammineq aalajangissavaa nakorsaariaatsit taamaattut pilatsinnermini imaluunniit katsorsartinnermini akuerisinnaanerlugit. Aamma misissugassamik aaversinnermut tunngatillugu taamaappoq. Nakorsaariaatsinik taamaattunik atueriaatsit assigiinngimmata kristumiup akuersinnginnermini paaseqqaartariaqarpaa aanni qanorpiaq atorneqassanersoq. Apeqqutit uku eqqarsaatigikkit:
Aak timiga avaqqullugu ingerlaartinneqarpat, aallu kaaviiaarnera allaat unitsinneqarallarluni, taava ilerasunnanga isumaqassaanga aak taanna suli timima ilagigaa taamaattumillu ‘nunamut kuineqartariaqarnani’? – Mosesimik 5. 12:23, 24.
Nakorsamit misissorneqarninni suliaritinninniluunniit aama maqinneqarnera, suliarineqarnera taavalu timinnut utertinneqarnera akuerisinnaavara, imaluunniit Biibilimit ilikkakkakka tunngavigalugit ilerasulissaanga?
Ilinniagassaq 39 immikkoortoq 3 uterfigiuk
4. Averuserneq
Biibilimi aappariit averuseqquneqanngillat, ersersinneqarporli averusertut allamik aappartaarsinnaanngitsut. (Korintimiunut 1. 7:10, 11) Taamaakkaluartoq kristumiut ilaat averuserniarlutik aalajangersimapput, soorlu ima pisoqartillugu:
Ilaquttanik pilersuiumanngilluinnarneq: Uiusoq ilaquttaminik pilersuiumanngimmat nuliaasup meeqqallu pisariaqartilluinnakkatik amigaatigippatigit. – Timuutiusimut 1. 5:8.
Persuttaasarneq: Aapparminit persuttarneqartoq timimigut ajoquserneqangaarsinnaavoq inuuneraluunniit navianartorsiortinneqarluni. – Galaatiamiut 5:19-21.
Jehovamut attaveqarnermik ingasattumik navianartorsiortitsineq: Uiusup nuliaasulluunniit aappani Jehovamut kiffartorsinnaatinngilluinnarpagu. – Apustilit Suliaat 5:29.
5. Nalliuttorsiornerit
Kristumiut nalliuttorsiornerit Jehovap iluarinngisai peqataaffigineq ajorpaat. Nalliuttulli nalaanni nalaassinnaasani qanoq qisuariarfigissanerlugit kristumiup Biibilimit ilikkakkani tunngavigalugit nammineq aalajangertussaavaa. Assersuuteqariarta.
Nalliuttuni pilluaqquneqarputit. Ima oqaannarsinnaavutit: “Qujanaq.” Pilluaqqusisoq paasisaqarnerorusuppat sooq nalliuttorsioqataaneq ajortutit nassuiaassinnaavat.
Aappavit Jehovamik Nalunaajaasuunngitsup nalliuttorsiornermi ilaquttassinnut nereqataajartoqquaatit. Ilaanissat ilerasuutigissanngikkukku nereqatigiinneq sioqqullugu aappat nassuiaassinnaavat nalliuttorsiornermi ileqqunut peqataasinnaanak.
Nalliuttut nalaanni sulisitsisuppit akissarsiatit ilaniarpai. Akuerissaviuk? Una eqqarsaatigiuk: Tigugukkit sulisitsisut isumaqassava nalliuttorsioqataasutit, imaluunniit sulilluarninnut qujamasunnini ersersinniaannarpaa?
Nalliuttut nalaanni tuniniarneqarputit. Tunissuteqarniartoq ima oqarsinnaavoq: “Nalliuttorsioqataaneq ajortutit nalunngilara, unali tunissutigerusuppara.” Immaqa ajunngisaarfigiinnarusuppaatit. Aammali imaassinnaavoq misilinniaraatit nalliuttorsioqataatinniaraatilluunniit. Tamanna eqqarsaatigereerukku nammineq aalajangissavat tunissutiginiagaa tigussanerlugu. Aamma tamatumani minguilluinnartumik nalunngeqatiginnissuteqarusuppugut Jehovamullu aalajaattuarusulluta. – Apustilit Suliaat 23:1.
Ilinniagassaq 44 immikkoortoq 1 uterfigiuk
6. Nappaatit tuniluuttartut
Inuit asagatsigit nappaammik tunillannaveersaartarpagut. Ingammik tamanna eqqumaffigissavarput tuniluuttartumik nappaateqarluta nalunngikkutsigu pasitsaassimagutsiguluunniit. Taamaaliornitsigut Biibilimi peqqussut una maleruassavarput: “Inoqatit imminut asanittut asassavat.” – Romamiut 13:8-10.
Tuniluuttartumik nappaateqartup inoqatiminut asanninnini qanoq ersersissinnaavaa? Inuit allat eqitaassanngilai kuninnagilluunniit. Aamma inuit ilaasa ilaquttatik illersorumallugit qaaqqorusunngippanni qisuariapiluussanngilaq. Aamma imermut morsutsinneqalerusukkuni utoqqaanertaqatigiinni ataqatigiissaarisoq nappaateqarnini pillugu paasitittariaqarpaa, taamaalilluni imermut morsutsinneqalersut allat illersorneqarniassammata. Nappaammik tunillanneqarsimasinnaaguit aappassiaqalinnginninni nappaateqarnerlutit paasiumallugu aaversinnissat nangaassutigissanngilat. Taamaaliornikkut ersersissavat inoqatit asallugulu ‘nammineq iluaqutissatit kisiisa eqqarsaatiginagit aammali allat iluaqutissaat eqqarsaatigalugit’. – Filippimiut 2:4.
Ilinniagassaq 56 immikkoortoq 2 uterfigiuk
7. Niuernermut inatsisinullu tunngasut
Aningaasanut tunngatillugu isumaqatigiissutit allattarutsigit – isumaqateqarfigisarput uppeqatigigutsiguluunniit – ajornartorsiornaveersaartassaagut. (Jeremia 32:9-12) Ilaannikkulli kristumiut aningaasat pillugit isumaqatigiinngissuteqarsinnaapput. Isumaqatigiinngissutit minnerit amerlanertigut eqqissilluni allallu akuutinnagit aaqqipallanneqarsinnaapput.
Taavami ilungersunarnerusumik pisoqarpat, soorlu peqquserluttuliortoqarpat nikassaalluniluunniit salluliuutiginnittoqarpat? (Matiusi 18:15-17 atuarsigit). Jiisusip uku pingasut iliuusereqquai:
Allat akuliuutitinnagit aaqqinniaqqaarsiuk. – Versi 15 takuuk.
Aaqqissinnaanngikkussiuk anersaakkut inersimalluartunik ataatsimik marlunnilluunniit ilalerlusi oqaloqatigiigitsi. – Versi 16 takuuk.
Ajornartorsiut suli aaqqinneqanngippat aatsaat utoqqaanertanut saaffiginnissutigissavarsi. – Versi 17 takuuk.
Jehova ilagiillu tusaamanerlunneqaleqqunagit uppeqatigullu isumaqatigiinngissuteqarutta amerlanertigut eqqartuussivinnut suliassanngortinneqartariaqanngillat. (Korintimiunut 1. 6:1-8) Ilaannikkulli eqqartuussivinnut suliassanngortitsisariaqartarpugut, soorlu ukununnga tunngatillugit: avinneq, angajoqqaatut akisussaaneq, aapparinikuusamut akilersuineq, sillimmasiisarfiit akiligassaat, akiliisinnaajunnaarneq imaluunniit kingornussassialiornermi uppernarsaasiineq. Kristumiup eqqisseqatigiinneq anguniarlugu taamaattunik eqqartuussivikkoortitsinera Biibilimi peqqussummik unioqqutitsinerunngilaq.
Aamma pinerluttuliortoqarsimappat – soorlu pinngitsaaliilluni atoqateqartoqarsimappat, meeqqamik atornerluisoqarsimappat, saassussisoqarsimappat, annertunerusumik tillittoqarsimappat toqutsisoqarsimappalluunniit – kristumiup oqartussaasunut nalunaarutiginninnera Biibilimi peqqussummik unioqqutitsinerunngilaq.
a Kr.in.si. 455-imiit 1-ip tungaanut ukiut 454-iupput. Kr.in.si. 1-imiit Kr.in.king. 1-ip tungaanut ukioq ataasiinnaavoq (ukioq 0-qanngimmat). Kr.in.king. 1-imiit 29-p tungaanut ukiut 28-upput. Katillugit ukiut 483-iupput.
b Nakorsaariaatsit taakku pillugit paasisaqarnerorusukkuit allaaserisaq “Derivatit aammeersut inuullu nammineq aava atorlugu nakorsaariaatsit qanoq isumaqarfigaakka?” Guutip naalagaaffianut kiffartorneq novembari 2006-imoortumiittoq takuuk.