Guuti ilumut uagutsinnik isumassuivoq — Tamanna qanoq nalunngilarput
GUUTIP asappatigut, taava sooq taama naalliuutit amerlatigippat? Apeqqut tamanna pingaarutilik itsarsuarli inuit ukiuni tusindilinni eqqarsaatigisarsimavaat. Inuk alla nuannarigaanni inuup taassuma naalliunnissaa kissaatigineqarneq ajorpoq, ajornartorsiulissagaluarpallu ikiorniarneqartarpoq. Taamaattumik silarsuarmi taama naalliuuteqartigimmat inuppassuit isumaqarput Guutip soqutiginngilluinnaraatigut. Tamanna eqqarsaatigalugu pissusissamisuussaaq Guutip uagutsinnik asanninneranut isumassuineranullu uppernarsaatit misissorutsigik.
Pinngortitarsuaq Guutip asanninneranut uppernarsaataavoq
Jehova Guuti ‘qilammik nunamillu immamillu taakkunaniittunillu tamanik pinngortitsisuuvoq’. (Apustilit Suliaat 4:24) Jehovap pinngortitai eqqarsaatigeqqissaaraangatsigik taassuma soqutigigaatigut paasilluarsinnaavarput. Assersuutigalugu nuannaarutigisartakkatit eqqarsaatigikkit. Nerisassanik illinnarsaakkanik mamarisaqarpit? Jehovap inuuginnarsinnaaqqulluta nerisassanik assigiiaaginnarnik tunisimasinnaagaluarpaatigut. Assigiinngitsorpassuarnilli mamarsaatigisinnaasatsinnik pinngortitsivoq. Aammattaaq Jehovap inuunermik nuannersunngortitsillutillu soqutiginartunngortitsisunik nunarsuarmi assigiinngitsorpassuarnik orpeqarnissaa, naasoqarnissaa nunallu alianaatsuunissaa isumagisimavaa.
Aamma qanoq pinngortinneqarsimanerput eqqarsaatigiuk. Quiasaarsinnaanerput aamma nipilersuummik pinnissusermillu nuannaarutiginnissinnaanerput inuuinnarumalluni pisariaqanngillat — tamakkua Guutimit tunissutaapput inuunitsinnut pisuunnguallaataasut. Aamma inunnut allanut attaveqarnerit eqqarsaatigiuk. Ikinngutigilluakkanik ilagisaqarneq asasamilluunniit eqitaarneqarneq nuannersuuvoq, ilaa? Aap, asannittuliorsinnaaneq Guutimit, nammineq asannittuliortumit, tunissutaavoq! Guutip inuit asannittuliorsinnaatimmagit, asannittuliorsinnaaneq pissusiisa ilagisimassavaat.
Guutip uagutsinnik asanninnera Biibilimi uppernarsarneqarpoq
Biibilimi allassimavoq Guuti tassaasoq asanninneq. (1 Johannesi 4:8) Asanninnera pinngortitarsuarmi takuneqarsinnaaginnarani, aammali oqaasiani, Biibilimi, erserpoq. Assersuutigalugu Biibilimi najoqqutassiaqarpoq peqqissuunissamut iluaqutaasunik, sutigut tamatigut ingasaassinaveersaarnissamut kajumissaaruteqarpoq aamma imerajunnermut nerrersuallaarnermullu mianersoqqussuteqarluni. — 1 Korinthimiut 6:9, 10.
Aammattaaq Biibilimi qanoq ililluni allanut attaveqarluartoqarsinnaanera pillugu pitsaasunik siunnersuuteqarpoq. Tassani kajumissaarneqarpugut asannittuliortarnissatsinnik allanullu ataqqinnittuullutalu inussiarnersuunissatsinnik. (Matthæusi 7:12) Tassani iliuutsit isummallu allanut ajoqutaasut — piumatuujuneq, oqaatissuaaneq, sinnganeq, allasiorneq toqutsinerlu — assuarineqarput. Inuit tamarmik siunnersuutinik pitsaasunik Biibilimiittunik maleruaaniarpata qularnanngilluinnarpoq silarsuarmi naalliuutit ikinneerarsuussasut.
Guutilli inuiaat aniguisinniarlugit ernerminik, Jiisusimik, tunniussinera Guutip asanninneranut uppernarsaataavoq pingaarnerpaaq. Johannesi 3:16-imi ima allassimavoq: “[Guutip] silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.” Tassa Jehova toqu naalliuutillu tamaasa atuukkunnaarsilluinnarniarlugit iliuuseqareerpoq. — 1 Johannesi 3:8.
Erseqqippoq Jehovap uagutsinnik asanninneranut uppernarsaatissarpassuaqartoq. Taamaammat naalliunnissarput kissaatigisimanavianngilaa. Naalliuutit atuukkunnaarsinniarlugit akuliutissaaq. Qanoq iliorumaarnera isumakuluutigisariaqanngilarput, Biibilimimi allassimavoq Guuti naalliuutinik qanorpiaq atuukkunnaarsitsissasoq.
[Qupp. 4-mi assiliartaq]
Asannittuliorsinnaaneq Guutimit, nammineq asannittuliortartumit, tunissutaavoq