‘Anersaaq Guutip itissusiinik misissueqqissaartarpoq’
‘Anersaap suut tamaasa killisiortarpai [misissoqqissaartarpai, NV] Guutip itissusiinut allaat.’ — 1 KORINTHIMIUT 2:10.
1. Paulusip anersaamut illernartumut tunngatillugu 1 Korinthimiut 2:10-mi suna erseqqissarpaa, tamannalu sunik apeqqutissaqalersitsiva?
JEHOVAP anersaavanik illernartumik qujamasuutiginninnissamut pissutissaqarluarpugut. Anersaaq Biibilimi ‘ikiuisutut’, tunissutisiatut, nalunaajaasutut uagutsinnillu qinnussisartutut eqqartorneqarpoq. (Johannesi 14:16, NV; Apustilit Suliaat 2:38; Romamiut 8:16, 26, 27) Apustili Paulusi anersaap illernartup suliassaanik pingaarutilimmik allamik ima erseqqissaavoq: ‘Anersaap suut tamaasa killisiortarpai [misissoqqissaartarpai, NV] Guutip itissusiinut allaat.’ (1 Korinthimiut 2:10) Aap, Jehova anersaani illernartoq atorlugu anersaakkut sallusuissutinik itinerusunik paasinarsisitsisarpoq. Taanna iluaqutiginagu Jehovap siunertaanik paasisaqarsimanavianngikkaluarpugut, ilaa? (Atuakkit 1 Korinthimiut 2:9-12). Makkuli apeqqutaalerput: ‘Anersaaq’ qanoq ililluni ‘Guutip itissusiinik misissueqqissaartarpa’? Ukiuni hundredelinni siullerni kikkut aqqutigalugit Jehova ‘itissutsinik’ taakkuninnga paasinarsisitsiva? Anersaaq ullumikkut qanoq ililluni kikkullu aqqutigalugit Guutip itissusiinik misissueqqissaartarpa?
2. Anersaaq sutigut marlutsigut sunniuteqartussaava?
2 Jiisusi naapertorlugu anersaaq marlutsigut sunniuteqartussaavoq. Taassuma toqunngitsiarluni apustilini ima oqarfigai: “Illersuisulli [Ikiuisulli, NV], Anersaap Illernartup, Ataatap uanga atinni aallartitassaata tamanik ajoqersussavaasi ilissinnullu oqaaserisannik tamanik eqqaasikkumaarlusi.” (Johannesi 14:26) Tassa anersaaq illernartoq ajoqersuisutut, imaluunniit ilinniartitsisutut, eqqaasitsisutullu sunniuteqartussaavoq. Kristumiunik ilinniartitsissaarlusooq taakkua siornatigut paasisimanngisaat pillugit. Aamma nassuiarneqarsimasunik eqqaamanninnissamut atuinissamullu taakkua taanna iluaqutigissavaat.
Ukiuni hundredelinni siullerni
3. Oqaatsinit sunit erserpa ‘Guutip itissusii’ paasinarsisikkiartuaarneqarumaartut?
3 Jiisusip ajoqersukkani sallusuissuterpassuarnik aatsaat tusagaannik ilinniartippai. Taamaakkaluartorli suli allarpassuarnik ilinniagassaqarput. Apustilit ima oqarfigai: “Suli oqaasissaqarfigigaluaqaassi, maannali artorallarpasi. Tikiukkunili, tassa sallusuissutip anersaavata, sallusuissut tamaat ilissinnut ilitsersuutigissavaa.” (Johannesi 16:12, 13) Jiisusip taamaalilluni paasinarsisippaa anersaakkut sallusuissutit itinerusut anersaaq illernartoq iluaqutigalugu taakkununnga paasinarsisikkiartuaarneqarumaartut.
4. Ukiumi 33-mi piinsip ulluani anersaaq illernartoq ilinniartitsisutut eqqaasitsisutullu qanoq sunniuteqarpa?
4 Ukiumi 33-mi piinsip ulluani ‘sallusuissutip anersaava’ tikiuppoq kristumiunut Jerusalemimi katersuussimasunut 120-t missaanniittunut kuineqarmat. Tamatumunnga takussaasumik tusarsaasumillu uppernarsaatissaqarpoq. (Apustilit Suliaat 1:4, 5, 15; 2:1-4) Ajoqersukkat oqaatsit assigiinngitsorpassuit atorlugit “Guutip tupinnangaartuliai” pillugit oqalupput. (Apustilit Suliaat 2:5-11) Nutaanik paasinarsisitsinissamut piffissanngorsimavoq. Pruffiiti Joeli anersaap illernartup kuineqarnissaa pillugu siulittuisimavoq. (Joeli 3:1-5) Najuuttut siulittuutip naatsorsuutigisamit allaanerusumik eqquunneranik takunnittuupput, apustililu Petrusi pisunik nassuiaaniarluni sassartuuvoq. (Atuakkit Apustilit Suliaat 2:14-18). Anersaaq illernartoq matumani ilinniartitsisutut sunniuteqarpoq, Petrusimummi erseqqissarpaa ajoqersukkat maanna misigisaat siulittuutitoqqap eqquunnerigaa. Anersaaq aamma eqqaasitsisutut sunniuteqarpoq, Petrusimmi Joelimit issuaaginnarani aamma Daavip tussiaasiaasa ilaat marluk issuaavigai. (Tussiaat 16:8-11; 110:1; Apustilit Suliaat 2:25-28, 34, 35) Katersorsimasut takullugillu tusagaat anersaakkut sallusuissutaapput itinerusut Guutimeersut.
5, 6. (a) Angerusisaaq pillugu apeqqutit pingaarutillit suut ukiumi 33-mi piinsip ulluata kingorna akineqartariaqarpat? (b) Kikkut aqqutigalugit apeqqutit apeqqutigineqarpat, qanorlu aalajangiiffigineqarpat?
5 Ukiuni hundredelinni siullerni kristumiut paasisariaqagaat suli amerlaqaat. Assersuutigalugu angerusisaaq piinsip ulluani tamatumani atuutilersoq pillugu arlalinnik apeqqutissaqartoqarpoq. Angerusisaaq taamaallaat juutinut juutillu upperisaannut ilanngussimasunut atuuppa? Imaluunniit aamma juutiunngitsut angerusisaamut ilanngutitinneqassappat anersaamillu illernartumik taninneqarlutik? (Apustilit Suliaat 10:45) Angutit juutiunngitsut kipineqaqqaartariaqarlutillu Mosesip inatsisaanut naalatsigitileqqaartariaqarpat? (Apustilit Suliaat 15:1, 5) Apeqqutit taakku pingaaruteqarput, Jehovallu anersaava anersaakkut ittunik itinerusunik tamakkuninnga misissueqqissaarnissamut pisariaqarpoq. Kikkulli aqqutigalugit sunniuteqassava?
6 Apeqqutit taakku tamarmik qatanngutinit angutinit akisussaassusilinnit apeqqutigineqarlutillu eqqartorneqarput. Petrusi, Paulusi Barnabalu siulersuisoqatigiit ataatsimiinneranni najuupput Jehovallu juutiunngitsunik kipineqanngitsunik soqutiginnilersimanera oqaluttuaralugu. (Apustilit Suliaat 15:7-12) Siulersuisoqatigiit Allakkani Hebræerisuuni allassimasut eqqarsaatigiitigalugit uppernarsaatit taakku eqqarsaatigeqqissaareerlugit anersaallu illernartup ikiuineratigut aalajangiipput. Taava aalajangiunneqartoq ilagiinnut allakkatigut paasissutissiissutigineqarpoq. — Atuakkit Apustilit Suliaat 15:25-30; 16:4, 5; Efesosimiut 3:5, 6.
7. Suut iluaqutigalugit anersaakkut sallusuissutit itinerusut paasinarsisinneqarpat?
7 Apeqqutit allarpassuit allakkat Johannesimit, Petrusimit, Jaakumit Paulusimillu isumassarsisitaanikkut allanneqartut aqqutigalugit akineqarput. Kristumiulli Allagaataasa Grækerisuut naammassineqarnerata kingorna siulittuisoqarsinnaajunnaarlunilu tupinnartuliornikkut ilisimasaqalertoqarsinnaajunnaarpoq. (1 Korinthimiut 13:8) Anersaaq ilinniartitsisutut eqqaasitsisutullu sunniuteqartuassava? Guutip itissusiinik misissueqqissaarnissamut kristumiunut iluaqutaajuassava? Siulittuutinit erserpoq taamaattuarumaartoq.
Naggatissap nalaani
8, 9. Kikkut naggatissap nalaani anersaakkut paasisimasaqarnermik ‘qaammarikkumaarpat’?
8 Naggatissap nalaa pillugu inngili ima oqarpoq: “[Paasisimasartuut] qaammarikkumaarput qilaap qaarujunnerata qaammarissusiatut. Amerlasuunillu unnersuussisut iluarnermut ullorissatut qaamassapput naassaanngilluinnartumik. . . . [Paasisimasaqarneq] annertusiartussaaq.” (Danieli 12:3, 4) ‘Paasisimasartuujullutik’ ‘qaammarittussat’ kikkuuppat? Jiisusip qajuusiassat naasupiluillu pillugit assersuusiaani tamanna paasinarsisinneqarpoq. Jiisusip pissutsit aaqqissuussaanerata naggataatungaa eqqaavaa, tamatumalu kingorna ima oqarpoq: “Iluartut Ataatamik naalagaaffiani seqinertut qaammarikkumaarput.” (Matthæusi 13:39, 43) Jiisusip nassuiaanermini “iluartut” tassaanerarpai “Naalagaaffiup qitornai”, tassa kristumiut tanitat. — Matthæusi 13:38.
9 Kristumiut tanitat tamarmik ‘qaammarikkumaarpat’? Ilaatigut aap, taakkumi tamarmik oqaluusseqataallutillu ajoqersuganngortitsiortoqataallutillu ataatsimiinnerni ineriartorteqatigiittarput taamaalillutillu kristumiunut allanut tamanut maligassaallutik. (Zakaria 8:23) Aamma naggatissap nalaani anersaakkut sallusuissutit itinerusut paasinarsisinneqarumaarput. Assersuutigalugu tamannarpiaq pillugu Danielip siulittuutaa naggatissap nalaata nalliunnissaata tungaanut ‘naqissuserneqarsimavoq’. (Danieli 12:9) Anersaap qanoq ililluni kikkullu aqqutigalugit ‘itissutsit’ taakku misissoqqissaassavai?
10. (a) Kikkut aqqutigalugit anersaaq ulluni kingullerni anersaakkut sallusuissutinik itinerusunik paasinarsisitsisarpa? (b) Sallusuissutit Jehovap naalaffissuanut anersaakkut ittumut tunngasut qanoq paasiortorneqartut nassuiaruk.
10 Nalitsinni sallusuissummik paasinarsisitsinissamut piffissanngoraangat, qatanngutit angutit akisussaassusillit Jehovap Nalunaajaasuisa qullersaqarfianni ‘inussiamut aalajaallunilu silatuumut’ ilaasut anersaakkut sallusuissutinik itinerusunik siornatigut paasineqarsimanngitsunik paasinninnissamut anersaaq illernartoq iluaqutigisarpaat. (Matthæusi 24:45, NV; 1 Korinthimiut 2:13) Siulersuisoqatigiinniittut tamarmik nassuiaatinik naqqiisoqartariaqarnersoq misissorlugulu eqqarsaatigeqqissaartarpaat. (Apustilit Suliaat 15:6) Taava aalajangiisarput, pisariaqaraangallu tamanna kikkut tamarmik iluaqutissaannut nalunaarutigisarpaat. (Matthæusi 10:27) Piffissaq ingerlatillugu erseqqissaanerunissaq pisariaqalersinnaavoq, taamaattoqartilluguttaaq peqqissaartumik nassuiaasoqartarpoq. — Takuuk ungalusaq “Naalaffiup anersaakkut ittup suunera anersaap qanoq paasinarsisikkaa”.
Ullumikkut anersaaq qanoq iluaqutigineqartartoq
11. Ullumikkut kristumiut tamarmik anersaaq illernartoq anersaakkut sallusuissutinik itinerusunik paasinarsisitsinermi qanoq ilillutik iluaqutigisarpaat?
11 Kristumiut aalajaatsut tamarmik anersaakkut sallusuissutinik itinerusunik paasinarsisitsinermi anersaaq illernartoq iluaqutigisarpaat. Ukiuni hundredelinni siullerni kristumiut pisimanerattut, ullumikkut uagut atuaqqissaartakkavut anersaap illernartup ikiuineratigut paasillugillu eqqaaqqillugillu atortarpavut. (Lukasi 12:11, 12) Anersaakkut sallusuissutit itinerusut nalunaarutigineqarsimasut paasisinnaajumallugit qaffasinnerusumik ilinniagaqartariaqanngilagut. (Apustilit Suliaat 4:13) Qanoq ililluta Guutip itissusiinik paasinninnerusinnaavugut? Siunnersuutit misissoriartigit.
12. Qaqugukkut anersaap illernartup siulersuinissaa qinnutigisariaqarparput?
12 Anersaaq illernartoq qinnutigiuk. Biibilimut tunngasunik misissuitinnak anersaap illernartup siulersuinissaa qinnutigeqqaartariaqarpat. Taamaaliortarnissaq pisariaqarpoq kisimiikkaluaraanniluunniit aamma sivikitsuinnarmik misissuissagaluaraanniluunniit. Taamatut maniguulluni qinuneq Ataatatsinnut qilammiusumut nuannaarutaassaaq. Soorlu Jiisusi oqartoq, Jehovap maniguulluta qinnuigigutsinni anersaaminik illernartumik tuneriaannaavaatigut. — Lukasi 11:13.
13, 14. Guutip itissusiinik paasinnikkumagaanni ataatsimiinnernut piareersarneq qanoq pingaaruteqarpa?
13 Ataatsimiinnernut piareersartarit. Inussiaqatigiit aqqutigalugit ‘nerisassanik piffissaq eqqorlugu’ tunineqartarpugut. ‘Inussiap’ tamatumunnga tunngatillugu akisussaaffini isumagisarpaa ilagiit Biibilimut tunngasunik paasissutissinnerisigut atuaqqissaaqatigiinnissamullu ataatsimiinnernullu pilersaarutinik aaqqissuussinermigut. Qatanngutigiissuit paasissutissanik aalajangersimasunik eqqarsaatiginneqqunissaannut isumaliutigilluakkanik pissutissaqarpoq. (Kolossemiut 4:16; Judasi 3) Anersaaq illernartoq suleqatigisarparput uagutsinnut unnersuussutigineqartut malinniarlugit sapinngisarput tamaat iliuuseqaraangatta. — Saqqummersitat 2:29.
14 Kristumiut ataatsimiinnerinut piareersaraangatta silatusaartassaagut allassimaffiit innersuussutigineqartut quppertarutsigit taakkualu sammineqartumut qanoq tunngassuteqarnerat paasiniarsaralugu. Taamaalilluta Biibilimik paasinninnerujartuinnassaagut. (Apustilit Suliaat 17:11, 12) Allassimaffinnik quppiisarnerput eqqarsartaatsitsinnut ima sunniuteqartarpoq anersaap illernartup kingusinnerusukkut allassimaffiup imarisaanik eqqaamanninnissamut ikiorsinnaalluta. Aammattaaq allassimaffik Biibilimi quppernerup suatungaaniinnersoq takusarutsigu, atorfissaqartilerutsigu nassaareqqinnissaanut iluaqutigisassavarput.
15. Sooq saqqummersinneqartut tamaasa malinnaavigisariaqarpavut, qanorlu ililluta malinnaavigisinnaavavut?
15 Saqqummersinneqartut tamaasa malinnaavigisakkit. Saqqummersinneqartut ilaat ataatsimiinnerni sammineqarneq ajorput, uagulli iluaqutissatsitut suliaapput. Aamma atuagassiat kikkunnut tamanut neqeroorutigineqartartut uagutsinnuttaaq naatsorsuussaapput. Silarsuarmi ulapiffioqisumi amerlanertigut arlaannik utaqqisariaqagaqartarpugut. Atuagaq atuagassiarluunniit suli naallugu atuarsimanngisarput nassarutsigu utaqqinitsinni atuarsinnaavarput. Ilaat saqqummersinneqartunut malinnaasarput arlaannut pisutsillutik biilertillutilluunniit immiussanik tusarnaartarnermikkut. Uagut iluaqutissatsinnut misissoqqissaarneqarlutillu allanneqarsimasut tamarmik sallusuissummik paasinninnerulissutigalugillu qujamasuutiginninnerulissutigissavavut. — Habakkuki 2:2.
16. Atuarnitsinni apererusulissutigisatsinnik allattuisarneq misissuisarnerlu qanoq iluaqutigissavarput?
16 Eqqarsaatiginneqqissaartarit. Biibilimi atuagassianiluunniit tamatuminnga tunngaveqartuni atuakkavit eqqarsaatiginissaat piffissaqarfigisaruk. Atuartillutit immaqa apeqqutissaqaleriartuinnassaatit. Apeqqutissatit tamakku allattarsinnaavatit kingusinnerusukkullu akissutissarsiniarlugit. Apererusulissutigisatsinnik misissuigaangatta amerlanertigut atuaqqissaarnitsinni misissuilluarnerulertarpugut. Paasisavut ilisimasatsinnik ‘peqqumaasivitsinnut’, pisariaqaleraangat atorsinnaasatsinnut, ilaalissapput. — Matthæusi 13:52.
17. Ilissi ilaqutariittut namminerluunniit atuaqqissaarnissamut sunik pilersaaruteqarpisi?
17 Ilaqutariittut atuaqqissaaqatigiinnissaq piffissaqarfigisaruk. Siulersuisoqatigiit tamatta kajumissaarpaatigut sapaatit-akunneri tamaasa nammineq ilaqutariittulluunniit atuaqqissaarnissamut piffissamik immikkoortitsisaqqulluta. Ataatsimiittarnitta allanngortinneqarnerata kingunerisaanik tamatumunnga periarfissaqalerpugut. Unnummi ilaqutariittut anersaakkut ittunik sammisaqarfimmi suut sammisarpisigit? Ilaat Biibilimik atuartarput allassimaffinnillu atuarusulissutigisaminnik misissuisarlutik Biibiliminnilu naatsunik allattuisarlutik. Ilaqutariit ilarpassuisa sammisamik ilaqutariinni qanoq atorneqarsinnaaneranik misissuinissamut piffissamik immikkoortitsisarput. Ilaqutariinni ittuusut ilaasa ilaquttamik ilisimasariaqagaattut isigisaminnik ilaqutariinniittulluunniit sammiumasimasaannik sammisaqarnissartik toqqartarpaat. Qularnanngitsumik illit ilissi sammisinnaasassinnik suli allanik piffissap ingerlanerani eqqaasaqarsinnaassaatit.a
18. Sooq sallusuissutinik itinerusunik Guutip oqaasianiittunik misissueqqissaarnissarput tunuarsimaarfigissanngilarput?
18 Jiisusi oqarpoq anersaaq ikiuiumaartoq. Taamaattumik sallusuissutinik itinerusunik Guutip oqaasianiittunik misissueqqissaarnissarput tunuarsimaarfigissanngilarput. Sallusuissutit taakku ‘Guuti pillugu ilisimasaqarnermut’ (NV) erlinnartumut ilaapput, taakkuninngalu ‘ujaasinissatsinnut’ kajumissaarneqarpugut. (Atuakkit Ussatit 2:1-5). Taakku “Guutip asasiminut piareersagai” pillugit paasisaqarnartupilussuupput. Guutip oqaasia pillugu paasisaqarnerujumalluta iliuuseqaraangatta anersaap illernartup ikiortassavaatigut, “Anersaammi suut tamaasa killisiortarpai [misissoqqissaartarpai, NV] Guutip itissusiinut allaat”. — 1 Korinthimiut 2:9, 10. (w10 07/15-E)
[Quppernerup ataani ilanngussaq]
a Aamma takuuk Rigets Tjeneste oktobari 2008-moortumi qupp. 8.
Qanoq akissavit?
• Anersaap ‘Guutip itissusiinik’ misissueqqissaarnissamut sutigut marlutsigut ikiortarpaatigut?
• Anersaaq illernartoq kikkut aqqutigalugit ukiuni hundredelinni siullerni anersaakkut sallusuissutinik itinerusunik paasinarsisitsiva?
• Ullumikkut paasinninnerunissamut anersaap illernartup qanoq ikiortarpaatigut?
• Anersaaq illernartoq iluaqutigiumallugu susinnaavit?
[Qupp. 26-mi ungalusaq]
Naalaffiup anersaakkut ittup suunera anersaap qanoq paasinarsisikkaa
Ukiuni hundrelinni siullerni anersaakkut sallusuissutinut itinerusunut paasinarsisinneqartunut ilaavoq toqqup naapeqatigiittarfiup, imaluunniit illernartuutip, kingusinnerusukkullu naalaffiit pingaaruteqarnerungaartumut siumut assersuutaanerat. Paulusip pingaaruteqarnerungaartoq tamanna taavaa ‘Tupermik Naapeqatigiittarfimmik piviusumik, inunnit pinnani Jehovamit namminermit napparneqarsimasumik’. (Hebræerit 8:2) Tamanna naalaffissuuvoq anersaakkut ittoq; aaqqissuussaq Guutimut qanillinissamut iluaqutissaq, Jiisusip Kristusip pilliuteqarneratigut palasitullu kiffartorneratigut atuussinnaanngortoq.
‘Tupeq Naapeqatigiittarfik piviusoq’ ukiumi 29-mi Jiisusi kuisimmat Jehovallu taanna pilliutaasussatut naammalluinnartutut akuerimmagu piulerpoq. (Hebræerit 10:5-10) Jiisusi toqunermi makititaanermilu kingorna naalaffimmi anersaakkut ittumi Illernarnerpaamut iserpoq pilliutimilu nalinga “Guutip kiinaata saanut” sassaallugu. — Hebræerit 9:11, 12, 24.
Allassimaffimmi allami apustili Paulusi allappoq kristumiut tanitat ‘ineriartortut tassaalerlutik naalaffik illernartoq Jehovami’. (Efesosimiut 2:20-22) Naalaffiup tamatuma ‘Tupeq Naapeqatigiittarfik piviusoq’ Paulusip hebræerinut allakkamini kingusinnerusukkut allaatigisaa assigiinnarpaa? Jehovap kiffai ukiorpassuarni taama isumaqarput. Kristumiut tanitat nunarsuarmiittut Jehovap naalaffiani qilammiittumi ‘ujaraasussatut’ ilusilersorneqarsorineqarput, imaluunniit naleqqussarneqarsorineqarput. — 1 Petrusi 2:5.
1970-ikkulli aallartinneranni inussiaqatigiinnut ilaasut akisussaassusillit paasilerpaat naalaffik Paulusip Efesosimiunut allakkamini eqqartugaa tassaasinnaanngitsoq Jehovap naalaffissua anersaakkut ittoq. ‘Tupeq Naapeqatigiittarfik piviusoq’ kristumiunut tanitanut makititaasimasunut assersuutaappat, taanna piulersimassaaq aatsaat taakkua ‘Naalakkap tikiunnerata’, imaluunniit najuunnerata, nalaani makititaajortulereernerata kingorna. (1 Thessalonikamiut 4:15-17) Illernartuulli pillugu Paulusi ima allappoq: “Taanna nalitsinni pissutsinut . . . assersuutaavoq.” — Hebræerit 9:9.
Allassimaffinnik taakkuninnga allanillu naleqqiusseqqissaartarnikkut paasinarsivoq naalaffik anersaakkut ittoq sananeqalinngitsoq, aamma kristumiut tanitat ‘ujaraanngitsut’ kingusinnerusukkut tamatumunnga tapiliussassatut nunarsuarmi naleqqussarneqalersut. Kristumiulli tanitat naalaffiup anersaakkut ittup silarliani Illernartumilu naalaffimmi anersaakkut ittumiittumi kiffartorput, Guuti ullut tamaasa ‘qujaniutinik pilliivigisarlugu’. — Hebræerit 13:15.
[Qupp. 27-mi assiliartaq]
Guutip itissusiinik qanoq ililluta paasinninnerulersinnaavugut?