Utertitsissut uagutsinnut qanoq annaassissutaasoq
“Ernermut uppertoq naassaanngitsumik inuuneqarpoq; Ernermut naalasseriitsup inuuneq takussanngilaa, Guutilli kamannerata qulangersimajuassavaa.” — JOHANNESI 3:36.
1, 2. Zion’s Watch Tower-ip saqqummersinneqartalerneranut pissutaasut ilaat suua?
“BIIBILIMIK peqqissaarlutik atuartartut kikkulluunniit Kristusip toqunerata pingaartinneqarnera maluginianngitsoorsinnaanngilaat.” Zion’s Watch Tower-imi (Napasuliaq Alapernaarsuiffik) saqqummertut sisamaanni oktobari 1879-imoortumi taama allassimasoqarpoq. Allaaserisaq maluginiarnartumik ima naggaserneqarpoq: “Kristusip pilliutitut toqunerata ajortitsinnik matoorineranik suusupaginnittut, imaluunniit miserratiginnittut, kikkulluunniit mianersorfigitigit.” — Atuakkit 1 Johannesi 2:1, 2.
2 Zion’s Watch Tower-ip 1879-imi juulip qaammataani saqqummersinneqartalerneranut pissutaasut ilaat tassaavoq utertitsissut pillugu Biibilimi ajoqersuutip illersorumaneqarnera. Atuagassiami allassimasut ‘piffissaq eqqorlugu nerisassaapput’, 1800-kkummi naajartulerneranni kristumiuunerartut amerliartuinnartut Jiisusip toqunerata ajortitsinnit uagutsinnik utertitsisinnaanera qularisalerpaat. (Matthæusi 24:45) Taamanikkut inuppassuit pinngoriartuaarsimaneraaneq, inuup aallaqqaammut naammalluinnassutsiminit ungasillerujussuarsimaneranik ajoqersuummut Biibilimiittumut akerliusoq, upperilerpaat. Pinngoriartuaarsimaneraanermik tapersersuisut inuit namminneq pitsanngorsartarnerarpaat utertitsissullu pisariaqartinnginnerarlugu. Taamaattumik apustilip Paulusip Timotheusimut siunnersuutaa una naleqqulluarpoq: “Timotheusi, ilinnut paarisassanngortitaq paarilluarniaruk; tunukkit oqalunneq iluaatsoq piunngitsorlu akerliliissutillu ilisimasaqarnermit eqqunngitsumik taama taaneqartartumit pisut. Tamakkuninnga nassuerutiginninnermikkut ilaasa uppernertik tunussimavaat.” — 1 Timotheusi 6:20, 21.
3. Apeqqutit suut maanna sammissavavut?
3 Illit ‘uppernermik tunussinnginnissat’ qularnanngitsumik aalajangiusimavat. Upperluartuarumalluni apeqqutit uku eqqarsaatigilluarnissaat pitsaassaaq: Sooq utertitsissut pisariaqartippara? Utertitsissummut tunngatillugu qanoq pilliuteqartigisoqartariaqarsimava? Aaqqissuussaq akisooq Guutip kamanneranit annassutigisinnaasara tamanna qanoq ilillunga uanga iluaqutigisinnaavara?
Guutip kamanneranit annaanneqarneq
4, 5. Sumit erserpa Guutip kamannera silarsuarmik ajortumik matuminnga qulangersimannittuartoq?
4 Biibilimi oqaluttuarisaanermilu erserpoq Guutip kamannera Adami ajortuliormalli inuiannik ‘qulangersimannittuartoq’. (Johannesi 3:36) Tamanna paasinarsivoq inuup kialuunniit pinngitsoorani toqusussaaneranit. Saatanip unammillerluni naalakkersuineratigut inuiaat ajunaarnernut illersorneqarsinnaasimanngillat, aamma nunami naalakkersueriaatsit tamarmik innuttaasut pisariaqartitaannik pingaarnerpaanik tamanik matussusiisinnaasimanngillat. (1 Johannesi 5:19) Taamaattumik inuit sorsunnernik, pinerluttoqartarneranik piitsuussusermillu naalliuuteqartuarput.
5 Erseqqippoq Jehovap silarsuaq ajortoq pilluaqqunngikkaa. Paulusi allappoq ‘Guutip kamannera qilammit saqqummersitaasartoq inuit soqqusaassusiinut iluaassusiinullu tamanut’. (Romamiut 1:18-20) Taamaattumik peqqissiminatik Guutip iluarinngisaanik inooriaaseqartut inooriaatsimik kingunerat misiginngitsoornavianngilaat. Ullumikkut Guutip kamannera eqqartuussutit Saatanip silarsuaanut naalliunnartutut kuerarneqartut aqqutigalugit ilisimatitsissutigineqarput, paasissutissallu tamakku Biibililersaarutaatitta ilarpassuiniipput. — Saqqummersitat 16:1.
6, 7. Kristumiut tanitat suliaq suna siuttuuffigaat, inuillu Saatanip silarsuaanut ilaasut sunissamut suli periarfissaqarpat?
6 Imaappa inuit Guutimit iluarisaalerlutik Saatanip naalakkersuineranit aniguisinnaajunnaareersut? Naamik, Jehovamik saammaateqateqarnissamut suli periarfissaqarluarpoq. Kristumiut tanitat, ‘Kristusi sinnerlugu oqariartortitaasut’, tamanut kiffartuuteqarneq inunnik inuiannit tamaneersunik ilungersorluni ima kajumissaariffiusoq siuttuuffigaat: “Guutimut saammaannartigitsi!” — 2 Korinthimiut 5:20, 21.
7 Apustili Paulusi allappoq Jiisusi tassaasoq “kamannermit piumaartussamit aniguisitsisissarput”. (1 Thessalonikamiut 1:10) Harmagedoni nalliuppat Jehovap kamannera peqqissiminngitsut tamarmik naassaanngitsumik peersitaanerannik kinguneqassaaq. (2 Thessalonikamiut 1:6-9) Kikkut aniguissappat? Biibilimi ima allassimavoq: “Ernermut uppertoq naassaanngitsumik inuuneqarpoq; Ernermut naalasseriitsup inuuneq takussanngilaa, Guutilli kamannerata qulangersimajuassavaa.” (Johannesi 3:36) Aap, silarsuaq manna naappat Jiisusimik utertitsissummillu upperinnittut tamarmik ullormi Guutip kamaffiani suujunnaarsitaanavianngillat.
Utertitsissut qanoq sunniuteqartoq
8. (a) Adami Evalu nuanningaartumik qanoq siunissaqaraluarpat? (b) Jehovap qanoq ersersippaa Guutiulluni naapertuilluarluinnartoq?
8 Adami Evalu naammalluinnartutut pinngortitaapput. Taakku Guutimut naalattuarsimasuuppata nunarsuaq taakkua kinguaavinik, paratiisimi pilluarlutik inooqatigisimasinnaasaraluannik, ulikkaassagaluarpoq. Ajoraluartumilli siuaasavut siulliit Guutip inatsisaanik piaaralutik unioqqutitsipput. Taamaattumik naassaanngitsumik toqunissamut eqqartuussaapput paratiisimillu anisitaallutik. Adami Evalu meerartaarmata ajorti inuiannut tamanut sunniuteqarpoq, piffissarlu ingerlatillugu taakku utoqqalipput naggataatigullu toqullutik. Tamatumannga erserpoq Jehova oqaatsini naapertorlugu iliortuaannartoq. Aamma Guutiuvoq naapertuilluarluinnartoq. Jehovap Adami mianersoqqusimavaa paarnamik nereqqusaanngitsumik nerineq toqumik kinguneqarumaartoq — taamatullumi kinguneqarpoq.
9, 10. (a) Adamip kinguaavisa toqusarnerannut suna pissutaava? (b) Naassaanngitsumik toqunissaq qanoq anigorsinnaavarput?
9 Adamimut kinguaajugatta timi naammalluinnanngitsoq ajortimut toqumullu naalatsigitittoq kingornupparput. Adami ajortuliormat taassuma kinguaavisut suli inunngunngikkallarnitsinnili ajortilinngorpugut. Taamaammat toqumut eqqartuussut uagutsinnuttaaq atuuppoq. Jehova utertitsissummik akiliisoqartinnagu toqujartortarnermik atuukkunnaarsitsisimasuuguni oqaatsini naapertorlugu iliorsimanavianngikkaluarpoq. Paulusi ilumoortumik tamavitta sinnerluta oqaluppoq ima allakkami: “Nalunngilarput inatsisit anersaamit pisuusut. Uangali uinimmit pisuuvunga akigineqarsimallunga ajortimut kiffaalerlunga. Uangannguakkuluk! Kia kiffaajunnaarsissavaanga timimit matumannga toqup pianit?” — Romamiut 7:14, 24.
10 Jehova Guuti ajortitsinnik isumakkeerfiginnissinnaanermut naassaanngitsumillu toqunissamik pillarneqarnissamit uagutsinnik aniguisitsisinnaanermut inatsisitigut tunngavissiisinnaasutuaavoq. Taamaaliorpoq ernermi asangaakkami qilammit aallartinneratigut inuttullu naammalluinnartutut, inuunerminik uagut utertitsissutissatsitut tunniussisinnaasutut, inunngortillugu. Jiisusi Adamitut pinnani naammalluinnartuujuarpoq. Aap, “taanna ajortuliunngilaq.” (1 Petrusi 2:22) Tassa Jiisusi inuiannut naammalluinnartunut siuaasanngorsimasinnaagaluarpoq. Guutimulli akeraasunit toqutaanissani akueraa Adamip kinguaavi ajortillit qitornavissiartaariniassagamigit imminullu uppertut naassaanngitsumik inuunissamut periarfissaqalerniassammata. Biibilimi ima nassuiarneqarpoq: “[Ataasiinnarmik] Guuteqarpoq aammalu ataasiinnarmik Guutimut inunnullu akunnermiliuttoqarluni, taanna tassaasoq inuk Kristusi-Jiisusi, imminut tunniussimasoq akigaluni inuit tamarmik utertitaassutissaannik.” — 1 Timotheusi 2:5, 6.
11. (a) Utertitsissutip pilluaqqussutissartai qanoq assersuusiarineqarsinnaappat? (b) Utertitsissutip pilluaqqussutissartai qanoq annertutigippat?
11 Utertitsissutip qanoq sunniuteqartarnera paasiumallugu takorloorsinnaavarput inuit aningaaserivimmit peqquserluffiusumit sipaakkaminnik tamanik arsaarneqartut tamannalu pissutigalugu akiitsoqalersut. Aningaaserivimmik tamatuminnga piginnittut naapertuilluartumik ukiorpassuarni parnaarussaanissamut eqqartuussaapput. Eqqugaasummi pisuussuteqanngitsut? Sullitat piitsunngorsimammata pissutsinut atugaannut aaqqiissutissaqanngilaq angut inussiarnersoq pisoorlu aningaaserivimmi siulersuisunngunngippat taakkulu sipaagaat taakkununnga tunniullugit akiitsoqarunnaarniassammata. Jehovap Guutip erneratalu asangaagaata tamatumunnga assingusumik Adamip kinguaavi pisiaraat Jiisusillu aava kuisaq tunngavigalugu akiitsuerutitillugit, imaluunniit ajortaannik isumakkeerfigalugit. Taamaattuminguna Johannesi Kuisisoq Jiisusi pillugu ima oqarsinnaasimasoq: “Aajuna Guutip savaaraa silarsuup ajortaanik nammattoq.” (Johannesi 1:29) Inuiaat silarsuarmiittut ajortiminnit piiaaffigineqartut tassaaginnanngillat inuusut, aammali tassaapput toqusimasut.
Utertitsissummut tunngatillugu qanoq pilliuteqartigisoqarsimasoq
12, 13. Aaperaap Iisaamik pilliutiginnikkumanera sumik ilinniarfigisinnaavarput?
12 Utertitsissut Ataatatsinnut qilammiusumut erneranullu asangaagaanut qanoq akisutigisoq paasilluinnarsinnaanngilarput. Biibilimili oqaluttuaqarpoq taakkununnga qanoq akisutigineranik paasinninnerunissamut iluaqutigisinnaasatsinnik. Assersuutigalugu takorlooriaruk Aaperaat qanoq misigisimassasoq Morijamut ulluni pingasuni angalagami Guutip peqqussutaa imaattoq naalanniarlugu: “Ernerit Iisaaq, ernituat asasat, nunamut Morijamut aallaqatiguuk. Tassani ikikkagassatut pilliutiguuk qaqqami ilinnut innersuukkumaakkanni.” — 1 Mosesi 22:2-4.
13 Aaperaat sumiiffimmut Guutip orneqqusaanut kiisami apuuppoq. Eqqarsaatigiuk Aaperaat qanoq naalliutsigisimassasoq Iisaap assaanik isigaanillu qilersuigami aamma nammineq pilliiviliaminut pisikkamiuk. Aaperaap savik ernerminik toqutsissutissani tigugamiuk misigissutsikkut qanoq annikilliortigisimassava! Takorlooruk Iisaaq pilliivimmi innangalluni qanoq misigisimassasoq toqunerminik kinguneqartussamik ipittumik annernaqisumillu kapineqarnissani utaqqillugu. Taamaalisorlu Jehovap inngiliata Aaperaat unitsippaa. Aaperaap Iisaallu taamanikkut iliuuserisaat Jehovap ernermi Saatanip ikiortaanit toqutaanissaanik akuerinninnini imminut qanoq akisutigisimassaneranik paasinninnissamut iluaqutigaarput. Iisaap Aaperaamut suleqataanera Jiisusip uagut pilluta naalliullunilu toqunissaminut piumassuseqarneranik ersersitsilluarpoq. — Hebræerit 11:17-19.
14. Jaakup inuunerani pisimasoq suna utertitsissummik qujamasuutiginninnissamut iluaqutigisinnaavarput?
14 Aamma Jaakup inuunerani pisimasoq utertitsissummut tunngatillugu qanoq pilliuteqartigisoqarsimaneranut erseqqissaataasinnaavoq. Taassuma Josefi ernerminit tamanit asanerpaavaa. Ajoraluartumik taanna qatanngutiminit sinngagineqarlunilu uumissorneqarpoq. Taamaakkaluartorli Josefi qatanngutimi qanoq innerat takusarniarlugu ataataminit aallartitaanissaminut piumassuseqarpoq. Taassuma qatanngutai angerlarsimaffimminnit Hebronimiittumit 100 kilometerit missiliorlugit avannarpasinnerusumiittumi Jaakup savaataanik paarsipput. Takorlooriaruk Jaaku qanoq isumatsatsigisimassasoq Josefip qallersaataa aarasaartuinnaq takugamiuk. Annilaarluni ima oqarpoq: “Tassa ernerma ilupaava, nersutip kiisortup nerisimavaa, ilumut Josefi nersummit alittorneqarsimavoq.” Tamakku tamaasa Jaakup erloqissutigingaarpai, ullorpassuarnilu Josefi aliasuutigaa. (1 Mosesi 37:33, 34) Jehova inuit naammalluinnanngitsut qisuariartarneratorpiaq qisuariarneq ajorpoq. Jaakulli nalaatai eqqarsaatiginerugutsigit, tamanna Guutip ernini asangaakkani ajortumik pineqarmat inuttullu peqqarniitsumik toqutaammat qanoq misigisimasimassaneranik paasinnipajaarnissamut iluaqutigisinnaavarput.
Utertitsissut qanoq iluaqutigisinnaagipput
15, 16. (a) Jehovap qanoq ililluni ersersippaa Kristusip utertitsissutitut pilliutaa akueralugu? (b) Illit utertitsissut qanoq iluaqutigaajuk?
15 Jehovap Guutip ernini aalajaatsoq makitippaa, anersaakkut ittumik timilerlugu naalannassusilerlugulu. (1 Petrusi 3:18) Ullut 40-t ingerlaneranni Jiisusi makititaasimasoq ajoqersukkaminut takutittarpoq, uppernerannik nakussatsitsilluni oqaluussinissarsuarmullu piareersarlugit. Taava qilaliarpoq, aammi kuisap nalinga Guutimut sassaallugu. Aak tamanna taassuma ajoqersugaasa ilumoortut, utertitsissutitut pilliutaata nalinganik upperinnittut, iluaqutissaannut atorneqartussaavoq. Jehovap ersersippaa Kristusip utertitsissutitut pilliutaa akueralugu Jiisusip ajoqersukkaminut ukiumi 33-mi piinsip ulluani Jerusalemimi katersuussimasunut anersaamik illernartumik kuisitinneratigut. — Apustilit Suliaat 2:33.
16 Kristusimut ajoqersukkat tanitat taakku inoqatitik ingerlaannaq kajumissaartalerpaat Guutip kamanneranit anigueqqullugit ajortimik isumakkeerneqaatissaannik Jiisusip Kristusip aqqani kuisinnermikkut. (Atuakkit Apustilit Suliaat 2:38-40). Ullormit pingaaruteqaqisumit maannamut Guutip inuit millionillit kajungilersittarpai imminullu qanittumik attaveqalernissaat akueralugu Jiisusip utertitsissutitut pilliutaanik upperinninnerat tunngavigalugu. (Johannesi 6:44) Tamanna marlunnik ukuninnga apeqqutissaqalersitsivoq: Uagut arlaannarpulluunniit nammineq suliani ajunngitsut pissutigalugit naassaanngitsumik inuunissamik neriuuteqalersimava? Nuannersoq tamanna neriuutigiunnaaratarsinnaavarput?
17. Guutimut ikinngutaanermik immikkut pisinnaatitaaffik nuanningaartoq qanoq isigisariaqarpiuk?
17 Utertitsissut pisassarinngilluinnaraluarparput. Tamatuminngali upperinninnikkut inuit millionillit Guutimut ikinngutaalersimapput nunarsuarmilu paratiisiusumi naassaanngitsumik inuunissaq neriuutigilersimallugu. Jehovamulli ikinngutaalersimanerput taassumunnga ikinngutaajuarnissatsinnut qulakkeerutaanngilaq. Ullormi Guutip kamaffissaani aniguiumalluta ‘utertitsissummik Kristusikkut Jiisusikkut akilerneqartumik’ qamannga pisumik qujamasuutiginnittuartariaqarpugut. — Romamiut 3:24, NV; atuaruk Filippimiut 2:12.
Utertitsissut upperiuaruk
18. Utertitsissummik upperinninnermut suut ilaappat?
18 Allaaserisami matumani allassimaffimmit najoqqutarineqartumit, Johannesi 3:36-mit, erserpoq Naalakkamut Jiisusimut Kristusimut uppernermut ilaasoq taassumunnga naalanneq. Utertitsissummik qujamasuutiginninnerput Jiisusip ajoqersuutaanut, ilaatigut ileqqussanut tunngatillugu oqaasiinut, naapertuuttumik inuunissamut kajumississutigisariaqarparput. (Markusi 7:21-23) ‘Guutip kamannera’ peqqissiminatik kinguaassiuutitigut inuunerluttartunut, quiasaarutipalaanik oqaluttartunut ‘mingunnartunillu sunilluunniit’ iliuuseqartartunut, assersuutigalugu pornografiimik isiginnaartartunut, tamanut ‘nalliutissaaq’. — Efesosimiut 5:3-6.
19. Nuannersutigut sutigut ersersissinnaavarput utertitsissut upperalutigu?
19 Utertitsissummik qujamasuutiginninnerput ‘Guutimut tunniusimanermut naapertuuttunik iliuuseqarnissap’ ulapputiginissaanut kajumississutigisariaqarparput. (2 Petrusi 3:11, NV) Taamaattumik qamannga pisumik qinunissamut, nammineq Biibilimik atuaqqissaartarnissamut, ataatsimiigiartarnissamut, ilaqutariittut atuaqqissaaqatigiinnissamut aallussilluarlutalu oqaluussinissatsinnut piffissaqarluartariaqarpugut. Aamma “[puiunngisaannarsigit] ikiuisarneq tukkornerlu, pilliutit taama ittut Guutip iluarisarimmagit”. — Hebræerit 13:15, 16.
20. Utertitsissummik upperinnittuartut tamarmik siunissami sumik pilluaqqussutisinissartik ilimagisinnaavaat?
20 Jehovap kamannera silarsuarmut ajortumut matumunnga nalliuppat utertitsissummik upperinnilersimanerput tamatuminngalu qujamasuutiginnittuarnerput pissutigalugit qanoq pilluartigissaagut! Aamma aaqqissuussaq nuanningaartoq Guutip kamanneranit aniguissutigisarput silarsuassami nutaami Guutip neriorsuutigisaani qujamasuutigingaarumaarparput. — Atuakkit Johannesi 3:16; Saqqummersitat 7:9, 10, 13, 14.
Qanoq akissavit?
• Sooq utertitsissut pisariaqartipparput?
• Utertitsissut qanoq akisutigaa?
• Pilluaqqussutit suut utertitsissummut ilaappat?
• Qanoq ililluta ersersissinnaavarput Jiisusip utertitsissutitut pilliutaa upperalugu?
[Qupp. 19-mi assiliartaq]
Jehovamik saammaateqateqarnissamut suli periarfissaqarluarpoq
[Qupp. 21-mi assiliartat
Aaperaap, Iisaap Jaakullu nalaataannik eqqarsaatiginneqqissaarneq utertitsissummik qujamasuutiginninnissamut iluaqutigisinnaavarput