Ajortuliortoqartarunnaarnissaanut uppernarsaat!

GUUTIP uagutsinnut tunniuppaa oqaatsini isumassarsiarititaasoq, tamatumanilu nassuiarneqarpoq sooq inuit ajortuliortartut. Aamma nammineq piumasatsitut iliorsinnaatippaatigut imminullu naalakkersinnaatilluta, taamaalilluta ajortuliunnginnissaq aalajangiussinnaalerlutigu. (5 Mosesi 30:15, 16, 19) Taamaattumik eqqunngitsulioqqajaanerput eqqumaffigisinnaavarput pisariaqartunillu allannguilluta. Ajortuliornaveersaarnerput uagutsinnut avatangiisitsinniittunullu naggataatigut nuannaarutaassaaq. — Tussiaat 1:1.

Qanorluunniilli nammineq ajortulioqqajaanerput akiortigigaluarutsigu inoqatitta ajortuliortarnerat silarsuarmut erloqissutaajuarpoq. Biibilimi ima mianersoqqussuteqarpoq: “[Ilisimassavat] ullussani kingullerni nalliukkumaarmata ullut atugarliungaarfissat.” Ullut taakkua ‘atugarliungaarfiunerannut’ pissutaasut ersersinniarlugit versini tulliuttuni ima allassimavoq: “Inuit tassaalerumaarput namminissarsiortut, aningaaserituut, usorsitsaartut, anneruniartut, asissuingaartut, angajoqqaaminnut naalanngitsut, qujasuitsut, mitalliisut, asanniuitsut, saammartitassaanngitsut, mamarliisut, naammatsiuitsut, qiningasut, ajunngitsunut akeraasut, killuussisut, puffajasut, makitaniartut, inuulluarniutit Guutimit pingaarnerutillugit. Taakkua Guutimik mianerinninneq ileqqorisuusaaginnarpaat pissaanerali asiginnarlugu. Taamaattut nigorsimaniakkit!” — 2 Timotheusi 3:1-5.

Immaqa siulittuummi issuakkatsinni oqaatsit “ullussani kingullerni” malugaatit. Qanoq paasivigit? Inuit amerlanerit oqaatsit “ullussani kingullerni” ima paasisarpaat: Suna arlaat naggateqassasoq. Sunaasinnaava? Malugiuk Guuti oqaatsimini, Biibilimi, qanoq neriorsuisoq.

Guutiitsut piuneerunneqarluinnassapput.

“Iluanngitsoq erniinnaq peeruttussaavoq, inaani takuniaraluarukku peerutereersimassaaq. Kisianni qanilaartut nuna kingornutissavaat pilluangaarnertillu nuannaarutigissallugu.” — TUSSIAAT 37:10, 11.

“[Jehovap] sernigisarpai asasini tamaasa, iluaatsulli tamaasa nungutissavai.” — TUSSIAAT 145:20.

Qunutitaasoqassanngilaq.

“Annaatissavai piitsoq ikioqqulluni suaartartoq annikilliortitarlu ikiortissaaleqisoq. Aniguisissavai qunutitaanermit nakuuserfigisaanermillu.” — TUSSIAAT 72:12, 14.

“[Pinngortitat] namminneq aniguisitaajumaartut nungujassusermi inussiaataanermit kiffaanngissuseq Guutip qitornaasa naalannarsiffissami pisassaat pigilerlugu.” — ROMAMIUT 8:21.

Inuit tamarmik pisariaqartitatik pissavaat.

“Tamarmik eqqissillutik inuussapput viinnequtaatimik figenequtaatimillu ataanni kimilluunniit peersinneqarnatik.” — MIKA 4:4.

“Illuliorumaarput namminneq inigisassaminnik viinnequtinillu ikkussuillutik inerititaat nerisassaminnik. Illuliaat allanit inigineqassanngillat ikkussugaalluunniit allanit nerineqassanatik, innuttakka orpiup pisoqaassusiatut utoqqaatigilissammata qinikkamalu nerissammatigit namminneq suliamik inerititaat.” — ESAJA 65:21, 22.

Naapertuilluarneq atuutilissaaq.

“Guutip qinikkani naapertuilluartumik pineqartissannginnerpai ulloq unnuarlu torlorfigiuarpanni? . . . Oqarfigaassi: Naapertuilluartumik pineqartissavai erniinnaartumik.” — LUKASI 18:7, 8.

“[Jehovap] eqqortoq iluaraa imminullu ilumoortut imminiiginnarnagit. Taakku sernissorneqartuartarput.” — TUSSIAAT 37:28.

Namminissarsiorneq naapertuilluarnermik taarserneqassaaq.

“Silarsuarmi najugallit iluartuliornissaq ilikkartarpaat.” — ESAJA 26:9.

“[Neriorsuutaa] naapertorlugu ilimagisaraavut qilaat nutaat nunalu nutaaq iluassutsip najugarisassai.” — 2 PETRUSI 3:13.

Inuit allanngortarput — allanngortoqareerporlu

Neriorsuutinik taamaattunik tusaraangatta qularnanngivissumik nuannaalertarpugut. Neriorsuutilli eqquunnissaannut suna uppernarsaataava? Nalunngiliuk Guutip neriorsuutaasa eqquunnissaannut uppernarsaatissaqareertugut. Uppernarsaatit suut? Maannangaaq inuit millionillit namminissarsiorunnaareersimapput, kinguaassiuutitigut inuunerlukkunnaareersimapput nakuusertarunnaareersimallutillu, aamma unneqqarissuuneq, eqqissisimasuuneq inussiarnersuunerlu ilikkarsimavaat. Ullumikkut Jehovap Nalunaajaasui, 7 millioninit amerlanerusut, ammip qalipaataatigut, naggueqatigiissutsikkut, inuiaassutsikkut, politikkikkut aningaasaqarnikkullu assigiinngissutit, piffissap ingerlanerani uumissuingaarnermut nakuusernerujussuarmullu toqoraanermullu pissutaasimasut, akornutaatinnagit qatanngutigiissuupput nunanit tamalaaneersut.a Ullumikkut taama allanngortoqartiginera Guutip neriorsuutaasa annerusumik eqquukkumaarnerannut upperinninnissatsinnut qularnaatsumik tunngavissiivoq.

Allanngornerilli taamaattut sumik pissuteqarpat? Tamatuma akissutaa atuarneqarsinnaavoq neriorsuummi allami Biibilimeersumi, pruffiitimit Esajamit allanneqartumi. Taanna ima allappoq:

“Amaqqup savaaraq ineqatigissavaa, milakulaallu savaasaaraq aqupeqatigissavaa. Nersuteeraq løvitsiarlu mangiaqatigiissapput, nukappiarannguullu paariumaarpai. . . . Løverlu ivigartorumaarpoq ussittut. Naalungiaq pinnguassaaq pulateriaarsuup inaata killingani, meerannguullu assani mangukkumaarpaa pulateriaarsuup toqunartullip inaanut itersamut. Ajortumik iliortoqarnanilu ajoqusiisoqassanngilaq uanga qaqqanni illernartumi tamarmi, [Jehovamik] ilisimasaqarnerup nuna tamakkerumaarmagu soorlu ermit matoqqagaat immap naqqa.” — Esaja 11:6-9.

Siulittuummi tamatumani uumasut inuillu eqqisseqatigiinnissaat kisiat pineqarpa? Naamik, siulittuummi taannaannaq pineqanngilaq. Malugiuk issuakkap naggataatungaani allanngornermut pissutaasoq uparuarneqartoq: “[Jehovamik] ilisimasaqarnerup nuna [tamakkerumaarpaa].” Guutimik ilisimasaqarnerup uumasut qanoq ittuunerat allanngortissinnaavaa? Naamik. Inuilli allanngortissinnaavai — allanngortoqareerporlu! Siulittuummi tamatumani siulittuutigineqarpoq inuit nersutitut qaasuttutut ilioqqajaasarsimasuugaluit kristumiutut pissuseqarneq ineriartortissagaat Biibilimi ajoqersuutigineqartunik ilikkarnertik maleruaanertillu pissutigalugit.

Pedro tamatumani assersuutissaalluartut ilagaat.b Peqqarniisarnianut ilanngukkami isumaqarluinnarpoq naapertuilluarneq sorsuutigalugu. Sungiusartinneqareerami peqquneqarpoq politiit ineqarfiat qaartissagaa. Taamaaliornissaminut piareersartilluni tigusarineqarpoq. Pedro qaammatini 18-ini parnaarussaaqqavoq, tassanilu inuiaqatigiinnut ajoqutaasumik suliaqarnini ingerlatiinnarpaa. Parnaarussaaqqanerani nulia Jehovap Nalunaajaasuinit Biibilimik atuaqqissaaqatigineqartalerpoq. Pedro iperagaagami aamma Biibilimik atuaqqissaartalerpoq. Jehova Guuti pillugu ilikkakkani pissutigalugit inuttut inuunermullu isiginnittaatsimigut allanngorujussuarpoq. “Jehova qutsavigaara ukiuni peqqarniisaarniartuuninni toqutsisimannginnama,” Pedro oqarpoq. “Ullumikkut anersaap panaa, Biibili, atortarpara inuit allat eqqissinivimmik naapertuilluarnivimmillu — Guutip naalagaaffia pillugu nutaarsiassamik nuannersumik — tusarlerniarlugit.” Allaat Pedrop politiit ineqarfiat qaartartumeerniaraluakkani pulaarpaa, tamatumuunali silarsuaq nakuusernertaqanngitsoq pillugu eqqissinermik tusarliussaq oqaluussissutiginiarlugu.

Guutip oqaasiata inunnut sunniuteqangaarsinnaanerata ajortuerulluinnarnissaa pillugu Guutip neriorsuutaanik upperinninnerput suli nakussatsinneruaa. Aap, inuit ajortuliortuaannassanngillat, inuttulli pitsaanerulissapput. Qanittukkut Jehovap ajortuliat tamarmik pilerfiat, Saatani Diaavulu, ersinngitsumik silarsuarmi pisunik aqutsisoq, piissavaa. Biibilimi ima allassimavoq: ‘Silarsuaq tamarmi Ajortumut naalatsigitippoq.’ (1 Johannesi 5:19) Qanittukkulli Saatani peerutissaaq. Aamma ajortuliorunnaarusunngivissut peerutissapput. Ila taamanikkussamut inuuneq nuannissaqaaq!

Taamatut siunissaqarnissaq qulakkeerumallugu qanoq iliortariaqarpit? Eqqaamajuk ullumikkut inunnik allanngortoqartarneranut ‘Jehovamik ilisimasaqarneq’ pissutaasartoq, ilisimasaqarnerlu tamanna qanittukkut silarsuarmi tamarmi allanngortoqarumaarneranut pissutaajumaartoq. Pedrop iliorneratut — Biibilimeersumik eqqorluartumik ilisimasaqarnermik pigiliussinikkut tamatuminngalu maleruaanikkut aamma illit silarsuarmi ‘iluassutsip najugarisassaani’ inuunissat qilanaarisinnaavat. (2 Petrusi 3:13) Taamaattumik kajumissaarpatsigit periarfissaatillugu Guuti aamma Jiisusi Kristusi pillugit ilisimasaqarnermik pigiliussinissamut periarfissaq asiutinnaveersaaqqullugu, ilinnummi tassaasinnaammat inuuneq naassaanngitsoq. — Johannesi 17:3.

[Quppernerup ataani ilanngussat]

[Qupp. 9-mi issuagaq]

Aamma illit silarsuarmi ‘iluassutsip najugarisassaani’ inuunissat qilanaarisinnaavat. — 2 PETRUSI 3:13