Guutip oqaasia ilinniarfigiuk
Guutimut qanoq qanillisinnaavit?
Apeqqutit ataaniittut eqqarsaatigisarpigit? Akissutaat illit nammineq Biibilinni qanoq nassaarisinnaaneritit allaaserisami matumani sammineqarpoq. Akissutissarsiorneranni Jehovap Nalunaajaasuisa ikiorusuppaatsit.
1. Guutip qinnutit tamaasa tusartarpai?
Jehovap inuit inuiannit tamaneersut qinunikkut imminut saaffiginneqquai. (Tussiaat 65:3) Qinnutilli ilaannai tusaasarpai. Assersuutigalugu Israelikkut ajortuliortuaannarmata taakkua qinnutaat Guutip tusaajumanngilai. (Esaja 1:15) Aamma uiusup nuliaminik ajortumik pinnittartup qinnutai ‘akornuserneqarsinnaapput’. (1 Petrusi 3:7) Taamaakkaluartoq ingasattumik ajortuliorsimasut peqqissimigunik allamillu isumataarunik Guutimit tusarneqassapput. — Atuakkit 2 Nalunaarsuutit 33:9-13.
2. Qanoq qinusassaagut?
Qinuneq immikkut pisinnaatitaaffiuvoq pallorfiginninnitsinnullu ilaalluni, taamaattumik Jehovamuinnaq qinusassaagut. (Matthæusi 4:10; 6:9) Naammalluinnanngitsuugatta Jiisusip aqqani qinusassaagut taanna ‘aqqutissatut’ toqqagaammat. (Johannesi 14:6) Jehovap kissaatiginngilaa qinnutit alanngaarsinnaasavut allanneqarsimasulluunniit uteqattaartassagivut. Kissaatigaali uummammit pisumik qinusassasugut. — Atuakkit Matthæusi 6:7; Filippimiut 4:6, 7.
Pinngortitsisitta nipaatsumik qinnutit tusaasinnaavai. (1 Samueli 1:12, 13) Kajumissaarpaatigut periarfissaqarnerit tamaasa qinusassasugut, soorlu ullup aallartinnerani naaneranilu, nerilernermi ajornartorsiuteqaraangattalu. — Atuakkit Tussiaat 55:23; Matthæusi 15:36.
3. Sooq kristumiut ataatsimiittarpat?
Guutimut qanilliniarneq oqitsuinnaanngilaq, inuit taassumunnga uppinngitsut taassumalu nunarsuarmi eqqissinissaq pillugu neriorsuutaanik illaruaatiginnittut akornanni inuugatta. (2 Timotheusi 3:1, 4; 2 Petrusi 3:3, 13) Taamaattumik uppeqativullu kajumissinartumik najortigiinnissarput pisariaqartipparput. — Atuakkit Hebræerit 10:24, 25.
Guutimik asannittut ikinngutigilerukkit taassumunnga qanillisinnaavutit. Jehovap Nalunaajaasuisa ataatsimiinnerini allat uppernerat nakussatsissutigisinnaavat. — Atuakkit Romamiut 1:11, 12.
4. Guutimut qanoq qanillisinnaavit?
Jehovamut qaninnerulersinnaavutit ilikkakkannik Biibilimeersunik, taassuma suliaanik, siunnersuutaanik neriorsuutaanillu eqqarsaatiginneqqissaarnikkut. Qinunikkut tamakkuninnga eqqarsaatiginneqqissaartaruit Guutip asanninneranik ilisimassusianillu qamannga pisumik pingaartitsilissaatit. — Atuakkit Josva 1:8; Tussiaat 1:1-3.
Guutimut qanillisinnaavutit aatsaat upperalugulu tatigigukku. Uppernerli uumassuseqarpoq ineriartuutissinneqartariaqartoq. Uppernerpit tunngavia pillugu imminut eqqaasittarnikkut uppernerit ineriartuutissittuartariaqarpat. — Atuakkit 1 Thessalonikamiut 5:21; Hebræerit 11:1, 6.
5. Guutimut qanillineq qanoq iluaqutigisinnaaviuk?
Jehovap asasini isumassortarpai. Uppernerannik naassaanngitsumillu inuunissamik neriuutaannik navianartorsiortitsisinnaasunut tamanut sernissortarpai. (Tussiaat 91:1, 2, 7-10) Inooriaatsit peqqiilliuutigisinnaasavut pilluarunnaassutigisinnaasavullu mianersoqqussutigisarpai. Jehovap inooriaatsimik pitsaanerpaamik ilinniartittarpaatigut. — Atuakkit Tussiaat 73:27, 28; Jaaku 4:4, 8.
Paasisaqarnerorusukkuit atuaruk kapitali 17 atuakkami uani, Biibilimi sorpiaat ajoqersuutigineqarpat?, Jehovap Nalunaajaasuinit saqqummersinneqartoq.