Nalunngiliuk?

Naalaffik Jerusalemimiittoq ukiup 70-ip kingorna sanaqqinneqarpa?

JIISUSI siulittuivoq Jehovap naalaffia piuneerunneqarluinnassasoq. Siulittuullu eqquuppoq ukiumi 70-imi Kr.in.king. Romamiut sakkutuuisa Titusimit siuttullit Jerusalemi suujunnaarsimmassuk. (Matt 24:2) Kingusinnerusukkut Romamiut kaasariat Julian naalaffik sanaqqinniarlugu pilersaarpoq.

Julian Romamiut kaasariisa Guutimik nalusut kingullersaattut ilisimaneqarpoq. Konstantinersuaq akkagaa. Kristumiuunerartunit ilinniartinneqarpoq ukiumili 361-imi kaasarinngorami taakkua ajoqersuutaat itigartippai. Oqaluttuarisaaneq pillugu atuakkani Julian ‘Tunussisumik’ taaneqarpoq taamanikkut kristumiussuseq itigartimmagu.

Julian arfinilinnik ukioqartoq angutaa ilaqutaalu allat kristumiuunerartunit toqutaapput, tamannalu pissutaasimasinnaavoq taassuma kristumiunik uumiginninneranut. Kristumiussutsip oqaluttuarisaaneranik ilisimatuut naapertorlugit Julianip juutit kajumissaarpai naalaffik sanaqqeqqullugu, isumaqarami sanaqqinneqarpat uppernarsarneqassasoq Jiisusi pruffiitioqqusersuusoq.a

Julianip naalaffiup sanaqqinneqarnissaanik kissaatiginninnera qularutissaanngilaq. Oqaluttuarisaanermik ilisimatuut oqallisigisarpaat ilumut sanaqqillugu aallartissimaneraa aallartissimaguniullu sooq unitsissimaneraa. Qanorluunniit pisimasoqarsimagaluarpat Julian ukiut marluk inorlugit kaasarioreerluni toqutaavoq, naalaffillu sanaqqinneqanngisaannarpoq.