Siulersuisoqatigiinnut ilaasortaq nutaaq

2012-imi septembarip tallimaanni pingasunngornermi ullaakkut USA-mi Canadamilu Betelikkormiunut nalunaarutigineqarpoq Jehovap Nalunaajaasuisa Siulersuisoqatigiivi nutaamik ataatsimik ilasut. 2012-imi septembarip aallaqqaataanni Mark Sanderson ilaasortaalerpoq.

Qatanngut Sanderson USA-mi Californiami San Diegomi kristumiunik angajoqqaaqarluni peroriartorpoq, 1975-imilu februaarip 9-anni kuisippoq. 1983-imi septembarip aallaqqaataanni Canadami Saskatchewanimi pioneriulerpoq. 1990-imi decembarimi USA-mi Kiffartortut Toqqakkat Ilinniarfianni (maanna Qatanngutinut Angutinut Aappaqanngitsunut Biibilimik Ilinniarfimmik taaguuteqartumi) klassit arfineq-aappaanni naammassivoq. 1991-imi apriilimi qatanngut Sanderson Canadami qeqertami Newfoundlandimi specialpioneritut kiffartortussatut toqqarneqarpoq. Ilagiinnik nakkutilliisutut angalasartutut taartaasutut kiffartoreerluni 1997-imi februaarimi Canadami Betelimi kiffartorusunnersoq aperineqarpoq. 2000-imi novembarimi USA-mi immikkoortortaqarfimmut nuuppoq Napparsimmavinnut Paasissutissiisarfimmi kingusinnerusukkullu Kiffartornermik Nakkutilliisoqarfimmi kiffartussalluni.

2008-mi septembarimi qatanngut Sanderson Immikkoortortaqarfiit Ataatsimiititaliaanni Ilaasortanut Ilinniarfimmi ilinniarpoq, tamatumalu kingorna Filippinerini Immikkoortortaqarfiup Ataatsimiititaliaani ilaasortaalerpoq. 2010-mi septembarimi USA-mut uterusunnersoq aperineqarpoq, tassanilu Siulersuisoqatigiit Kiffartornermut Ataatsimiititaliaanni ikiortaalerpoq.