Sapaatikkut oqaluusseqataasinnaavit?

1. Filippimi Paulusip angalaqataasalu iliuusiat qanoq ilinniarfigisinnaavarput?

¹ Sabbatiuvoq, ulloq juutit Filippimiittut amerlanerit qasuersaarfigisartagaat. Paulusip angalaqataasalu ajoqersuiartorlutik angalanerisa ilaannit illoqarfik aqqusaarpaat. Aamma taakku ullormi tamatumani kiffartornerminni qasuersaalaarniarnerminnut isornartorsiorneqarnavianngillat. Nalunngilaalli juutit qinuniarlutik illoqarfiup avataani katersuuttartut, taamaattumik oqaluussiffiginiarlugit periarfissaq atorluarpaat. Qanoq Paulusi angalaqataalu nuannaartigisimassappat Lydia tusarnaarmat, kingornalu taanna inoqutaalu tamakkerlutik kuisimmata! (ApS 16:13-15) Ullutsinni amerlasuut sapaat qasuersaarfigisarmassuk, soormi oqaluussiffigalugit ullup ilaa atorutsigu?

2. Sapaatikkut malersugaanatik oqaluussisinnaanissaminnut akiorniagassat suut Jehovap innuttaasa qaangersimavaat?

² Sapaatikkut oqaluussisarnissamut sorsuutiginninneq: Ukiup 1927-p ingerlanerani Jehovap innuttai ullup ilaa atorlugu sapaatit tamaasa oqaluussinissamut kajumissaarneqarput. Tamanna tassuuguinnaq akerlilersorneqarnermik kinguneqarpoq. Inuppassuit sapaammi sabbatimik inatsisinut unioqqutitsisutut, eqqissiviilliortitsisutut akuersissuteqaratillu tuniniaasutut Amerikami tigusarineqarsimapput. Jehovalli innuttai tunniutiinnanngillat. 1930-kkunni “nunap immikkoortuani suliniarnersuaq”-mik aaqqissuussisimapput oqaluussisartut ilagiit eqqaamioriit naapeqatigiillutik oqaluusseqatigiittarnissaannut. Tigusarineqartaraluarlutik oqaluussisartut amerlangaaramik oqartussaasut unitsissinnaasimanngilaat. Qatanngutit pilliutigisimasaat pissutigalugit malersugaanata sapaatikkut oqaluussisinnaalernerput pingaartingaarpiuk?

3. Sooq sapaat oqaluussiffigissallugu pitsaava?

³ Ulloq oqaluussiffissaalluartoq: Inuppassuit sapaatikkut sulineq ajorput. Nalinginnaasumik eqqisisimanerusarput. Naalagiartartut ilaat ullormi tamatumani Guuti pillugu oqalukkusunnerusarput. Sapaatikkut ataatsimiittarutta oqaluussinissamut atukkersoreersimassaagut, soormi taava ataatsimiinnissaq sioqqullugu imaluunniit ataatsimeereernerup kingorna oqaluussinissannut pilersaarusioruit? Pisariaqarpat taquarsinnaavutit.

4. Sapaammi ullup ilaa oqaluussinermut atortarutsigu nuannaarneq qanoq ittoq misigissavarput?

⁴ Sapaammi ullup ilaa oqaluussisarutta pisariaqartitatsinnik qasuersaarnissatsinnut suli piffissaqassaagut. Oqaluussereersimalluta qasuersaarnermut ilagitillugu nalerisimaarneq misigissavarput. (Uss 19:23) Immaqa allaat Lydiatut ittumik naapitsineq nuannaarutigisinnaassavarput!