Asanninneq oqaluus­sinissamut kajumis­sissutigaarput

1. 2023-mi ukiumoortumik ataatsimiinnermi qanoq paasitin­neqarpugut?

UKIUMOORTUMIK ataatsimiinneq 2023-mi immikkuul­larissuuvoq.a Paasinnit­taatsitsinnik allannguinerit pillugit aamma oqaluus­sinerput pillugu nalunaarutit soqutiginartut tusarpagut. Assersuutigalugu paasivarput imaassinnaasoq inuit ilaat Babylon­nersuup suujunnaarsitaanerata kingorna Jehovamut kiffartuler­nissamut periarfis­sinneqassasut. Aamma paasitin­neqarpugut oqaluus­sisartut 2023-mi novembarimiit oqaluus­sinermik sukumiisumik nalunaarusior­tarunnaassasut. Taamatut allannguisoqarsimammat imaappa oqaluussineq pingaaruteqarun­naartoq? Naamerluinnaq!

2. Sooq oqaluus­sinerput ullut tamaasa nukingin­narneruleralut­tuinnarpa? (Makkorsi 13:10)

² Oqaluus­sinerput ullut tamaasa nukingin­narneruleralut­tuinnarpoq. Sooq? Naggatissaq nalliutingajalermat. Ulluni kingullerni oqaluussineq pillugu Jiisusi qanoq oqarnersoq eqqarsaatigiuk. (Makkorsi 13:10 atuaruk). Matiusi allappoq Jiisusi oqartoq ‘naggatissap’ nalliutin­nginnerani nutaarsiassat nuannersut nunarsuaq tamakkerlugu oqaluus­sissutigineqassasut. (Mat 24:14) “Naggatissaq” pissutsit ajortut Saatanillu aqutseriaasiata atuukkun­naarnis­saannut innersuus­sutaavoq. Jehovap nalunngilaa “ulloq akunnerlu qaqugu nalliutis­sanersut”, tassa qaqugu akuliutis­sanerluni aalajangiutereersimavaa. (Mat 24:36; 25:13; ApS 1:7) Ullullu tamaasa ulloq taanna qanilliartorpoq. (Rom 13:11) Taamaattumik piffissaq atorluarlugu naggatissamut oqaluus­siuassaagut.

3. Oqaluus­sinissamut suna kajumis­sissutigaarput?

³ Tamatta immikkut apeqqutip uuma eqqarsaatiginissaa pingaaruteqarpoq: Sooq oqaluus­sisarpugut? Naatsumik oqaatigalugu asanninneq kajumis­sissutigigatsigu oqaluus­sisarpugut. Nutaarsiassat nuannersut nuannaringaarpagut, inuit asavagut, pingaar­nertullu Jehova atialu asavagut. Kajumis­sissutigisagut taakku pingasut ataasiak­kaarlugit sammeriartigit.

NUTAARSIASSAT NUANNERSUT NUANNARINGAARATSIGIT OQALUUS­SISARPUGUT

4. Nuannersumik tusarler­neqaraangatta qanoq qisuariar­tarpugut?

⁴ Eqqaamaviuk nuannersumik tusarler­neqaravit qanoq misiginerlutit? Immaqa ilaquttanni naalungiarsuutitaar­toqarpoq, imaluunniit pisariaqar­titarluinnarnik suliffissannik neqeroorfigineqarputit. Qanoq qisuariarpit? Qularnan­ngitsumik tusarluarnerit ilaquttannut ikinngutinnullu oqaatigipal­lakkusus­simassavat. Tusarliussaq allanit tamanit nuanner­nerpaaq tusarakku – tassa Guutip kunngeqarfia pillugu nutaarsiassat nuannersut tusarakkit – aamma taama misigivit?

5. Ilumoortut Biibilimeersut ilinnialeq­qaarakkit qanoq misigivit? (Aamma assit takukkit).

⁵ Ilumoortut Biibilimeersut ilinnialeq­qaarakkit qanoq misiginerlutit eqqarsaatigiuk. Paasivat Ataataqarlutit qilammiusumik ilinnik asannittumik aamma taassuma kissaatigigaa ilaqutariis­sortaminut ilaalis­sasutit. Aamma anniarneq naalliuutillu atuukkun­naarsissagai, asasatit toqukkut annaasimasatit paratiisimi takoqqin­nissaannut periarfis­saqarsin­naasutit nuannersorpassuillu allat paasivatit. (Mak 10:29, 30; Joh 5:28, 29; Rom 8:38, 39; Saqq 21:3, 4) Ilumoortut taakku qamuuna killitsis­sutigingaarpatit, ilaa? (Luk 24:32) Ilikkak­katillu nuannaringaarakkit kikkut tamaasa oqaluttuuk­kusuttalerpatit! – Aamma takuuk Jeremia 20:9.

6. Ernestip Rosellu misigisaat qanoq ilinniarfigisin­naavarput?

⁶ Ilumoortoq paasigaanni inummut isumalerujus­suusinnaavoq. Qatanngutip angutip Ernestimik atillipb qulit missaannik ukioqarluni ataatani toqukkut annaavaa. Ernest oqaluttuarpoq qanoq tamanna sunnerneqaatigisimallugu. Eqqarsarsimavoq qilaliarsimanersoq imaluunniit piujunnaarsimanersoq. Ima oqaluttuarpoq: “Meeraqatikka suli ataatallit usorisarpakka.” Ullut tamangajaasa iliveqarfiliartarpoq ataatamilu ilerrata saani seeqqum­meriarluni ima qinusarluni: “Guuti, qinnuigaakkit ataataga sumiinnersoq paasiteq­qullunga.” Ukiut 17-it missaat ataatami toqunerata kingorna Ernest Biibilimik misissueqateqar­nissamik neqeroorfigineqarami ingerlaannaq akuersivoq. Paasigamiuk toqusut ilisimas­suseqan­ngitsut, tassa toqu sininnertut itisuutut ittoq, Biibilimilu neriorsuutigineqartoq toqusut uummarteq­qinneqarumaartut nuannaarutigeqaa. (Oqal 9:5, 10; ApS 24:15) Kiisami apeqqutit qangali eqqarsaatigisarsimasani akissutis­sarsivai! Ernestip Biibilimin­ngaanniit ilumoortut ilinniakkani nuannaarutigeqai. Nulia Rose aamma Biibilimik misissuisalerpoq, uini assigalugu nutaarsiassat nuannersut nuannaarutigeqai. 1978-imi imermut morsutsitaapput. Ilumoortut naleqangaartut angorniorlutik ilaquttaminnut, ikinngutiminnut allanullu tusarnaarusuttunut oqaluttuarisarpaat. Oqaluus­siffigisimasaat 70-it sinnerlugit Jehova pillugu ilinniarsimapput imermullu morsutsitaasimallutik.

7. Biibilimi ilumoortut nuannaril­luinnaleraangatsigit qanoq pisoqartarpa? (Lukkarsi 6:45)

⁷ Biibilimi ilumoortut pigiliullugit nuannaril­luinnaleraangatsigit nipangersimaannarneq ajorpugut. (Lukkarsi 6:45 atuaruk). Jiisusimit ilinniartitat ima oqartut assigalugit misigivugut: “Takusagut tusakkagullu eqqartorun­naarsin­naanngilagut.” (ApS 4:20) Biibilimi ilumoortut nuannaringaaratsigit taakku pillugit kikkut tamaasa oqaluttuuk­kusuttarpagut.

INUIT ASAGATSIGIT OQALUUS­SISARPUGUT

8. Sooq allat nutaarsiassanik nuannersunik avitseqatigerusut­tarpagut? (Takuuk ungalusaq “Inoqatit asajuk ilinniar­tillugulu”). (Aamma asseq takuuk).

⁸ Jehova erneralu ilaarlugit inuit asavagut. (Uss 8:31; Joh 3:16) ‘Neriuuteqaratillu Guuteqan­ngitsut’ misigin­neqatigingaarpagut. (Ef 2:12) Inuunermi ajornar­torsiuterpassuit pissutigalugit ipilersutullusooq ipput. Annanniullu pisariaqartitaat pigaarput, tassa Guutip kunngeqarfia pillugu nutaarsiassat nuannersut. Taakkununnga asanninnerput misigin­neqatigin­ninnerpullu kajumis­sissutigalugu nutaarsiassat nuannersut oqaluus­sissutigerusungaarpagut. Tamanna pissutigalugu neriuuteqalersin­naapput, maanna pitsaanerpaamik inooriaaseqalersin­naapput, siunissamilu “inuunivik” pigilersin­naavaat – tassa paratiisimi naassaan­ngitsumik inuuneqalersin­naapput. – Tim 1. 6:19.

9. Suna pillugu mianersoq­qusisarpugut, aamma sooq? (Ezekieli 33:7, 8)

⁹ Inuit asagatsigit silarsuup ajortup suujunnaarnissaa pillugu mianersoq­qusarpagut. (Ezekieli 33:7, 8 atuakkit). Inoqatigut ilaquttagullu uppeqatigin­ngisagut nalligaagut. Taakkuami naluaat qanittukkut qanoq pisoqassasoq. “Inuit pinngor­tinneqar­neranniilli maannamut asseqan­ngitsumik nalliuteq­qinngisaan­nartussamillu annikil­liornar­toqangaassaaq.” (Mat 24:21) Kikkut tamaasa paasitik­kusuppagut qanoq pisoqassasoq: Upperisarsiornerit eqqunngitsut peerneqassapput, tamatumalu kingorna Saatanip silarsuaa ajortoq Harmagedonnimi suujunnaarsin­neqassaaq. (Saqq 16:14, 16; 17:16, 17; 19:11, 19, 20) Neriuutigaarput inuit amerlanerpaartaasa mianersoqqussut taanna qisuariarfigissagaat Jehovamullu kiffartoqatigilerusulluta. Taavami maannakkut mianersoq­qussutinut qisuarian­ngitsut, taakkua immaqa ilaat tassaasin­naapput ilaquttat?

10. Sooq pingaaruteqangaarpa pisussat pillugit inuit mianersoq­qujuarnissaat?

¹⁰ Allaaserisap siuliani sammivarput imaassinnaasoq inuit ilaasa Babylon­nersuup suujunnaarsitaanera takugunikku Jehova upperilissagaat tamannalu annaanneqaatigis­sallugu. Tamanna eqqarsaatigalugu qanoq pisoqarumaar­neranik maanna oqaluus­sinissaq nukingin­narnerungaarpoq. Una eqqarsaatigiuk: Maannakkut eqqartukkagut taamanik­kussamut eqqaassajun­narsivaat. (Aamma takuuk Ezekieli 33:33). Immaqa mianersoq­qussutit eqqaasimasagut eqqaagunikkit kingusin­naanngin­nerminni Jehovamut kiffartulerusussapput. Soorlu Filippimi parnaarussanik paarsisup “nuna sajorujus­sualermat” isummani allanngortikkaa, taamatuttaaq imaassinnaavoq maanna uagutsinnut tusarnaarusun­ngitsut ilaasa Babylon­nersuup suujunnaarsitaanera takugunikku isummartik allanngor­tissagaat. – ApS 16:25-34.

JEHOVA ATIALU ASAGATSIGIT OQALUUS­SISARPUGUT

11. Qanoq ersersis­sinnaavarput Jehova unnersiutigalugulu ataqqigipput? (Saqqummersitat 4:11) (Aamma assit takukkit).

¹¹ Oqaluus­sinitsinnut pissutaasoq pingaaruteqar­nerpaaq tassaavoq Jehova Guuti atialu illernartoq asagatsigit. Oqaluus­sinerput Guutimik asasatsinnik unnersiutigin­ninnertut isigaarput. (Saqqummersitat 4:11 atuaruk). Isumaqarluin­narpugut Jehova Guuterput pissaasoq kisimi unnersiutigineqar­tariaqarlunilu ataqqineqar­tariaqartoq. “Suut tamarmik” taassumannga pinngor­tinneqarsimanerat inuunermillu tunisisuunera pillugit oqaluus­sinikkut ataqqillugulu unnersiutigisarparput. Pissutsillu atukkagut naapertorlugit piffissarput nukigullu atorlugit sapinngisatsinnik oqaluus­siniartarpugut. (Mat 6:33; Luk 13:24; Kol 3:23) Guuti asasarput pillugu oqaluus­sinerput nuannareqaarput. Atia Guutitullu qanoq ittuunera killinneqaatigingaaratsigit allanut oqaluttuarin­ngitsoorsin­naanngilagut. Sooq taamaappa?

12. Oqaluus­sinitsinni Jehovap atia qanoq illernarsisit­tarparput?

¹² Jehova asagatsigu atia illernarsisik­kusupparput. (Mat 6:9) Jehova pillugu Saatanip mitalliilluni salluliuutaasa ilumuun­nginnerannik allat oqaluttuuk­kusuppagut. (Mos 1. 3:1-5; Job 2:4; Joh 8:44) Oqaluus­sigaangatta kikkunnut tamanut tusarnaarusuttunut Guuterput pillugu ilumoortut oqaluttuarerusoqaagut. Inuit tamaasa ilisimatik­kusuppagut pissusaa pingaar­nerpaaq tassaasoq asanninneq, naalakkersueriaasialu naapertuil­luartuusoq kunngeqarfiatalu naalliuutit tamaasa ungasin­ngitsukkut atuukkun­naarsil­lugillu inunnut tamanut eqqissineq pilluarnerlu atuutilersissagai. (Tuss 37:10, 11, 29; Joh 1. 4:8) Jehovap tusaamaneqarnera illersoraangatsigu atia illernarsisit­tarparput. Aamma Jehovap Nalunaajaasuisut iliuuserisassarput iliuuserigatsigu nuannaarutigaarput. Sooq taamatut oqarsin­naavugut?

13. Sooq Jehovap Nalunaajaasuinik taaneqar­tarnerput ataqqinaatitut isigaarput? (Esaja 43:10-12)

¹³ Jehovap ilisiman­nittumisut suliassip­paatigut. (Esaja 43:10-12 atuakkit). Ukiut arlaqan­ngitsut matuma siorna Siulersuisoqatigiit allagaanni ima allassimasoqarpoq: “Ataqqinaatigisin­naasarput annerpaaq tassaavoq Jehovap Nalunaajaasuisut taaguuteqarnerput.”c Sooq taamaappa? Eqqunngitsumik iliuuseqarsimasutut pasiller­neqarlutit takorlooriaruk. Pasilliutip ilumuun­nginneranik taavalu eqqunngitsumik iliuuseqar­naviannginninnik ilisiman­nittumik oqaluttuar­tussamik pisariaqar­titsivutit. Qularnanngilaq ilisarisimal­luakkat tatigisallu upperineqar­niassammallu ajunngitsumik tusaamaneqartoq toqqassagit. Jehovap Nalunaajaasumisut toqqarsimam­matigut erserpoq ilisarisimal­luaraatigut tatigigaatigullu allanut oqaluttuas­sasugut taanna kisimi Guutiusoq ilumoortutuaq. Nalunaajaasuunerput ataqqinaatitut isigigatsigu atiata ilisimaneqalersin­nissaanut periarfissat tamaasa atortarpagut uppernarsaarusukkatta taanna pillugu salluliuutit eqqunngitsuusut. Taamaaliorutta taaguuterput tulluusimaarutigisarput eqqortis­savarput – tassa Jehovap Nalunaajaasui! – Tuss 83:19; Rom 10:13-15.

NAGGATISSAMUT OQALUUS­SIUARUSUPPUGUT

14. Ungasin­ngitsukkut nuannersut suut pissappat?

¹⁴ Ungasin­ngitsukkut nuannersorpassuit pinissaat qilanaaraarput! Neriuppugut annikil­liornar­tussarsuup aallartin­nginnerani inuppassuit uppeqatigilis­sagaatigut. Aamma allaat inuit oqaluttuarisaanerata taarnerpaaffiani – annikil­liornar­tussarsuarmi – imaassinnaavoq inuit ilaasa Saatanip silarsuaanik tunussillutik Jehovamut kiffartoqatigilis­sagaatigut, tamannalu nuannaarutigis­saqaarput! – ApS 13:48.

15-16. Qanoq iliortuarusuppugut, qanorlu sivisutigisumik?

¹⁵ Tassa suli suliassaqarpugut. Guutip kunngeqarfia pillugu nutaarsiassat nuannersut – tusarliuteq­qinneqan­ngisaan­nartussat – allanut ingerlateq­qinnissaat pisinnaatitaaf­figaarput. Aammali inuit mianersoq­qujuartariaqarpagut. Pissutsit ajortut atuukkun­naarsin­neqangajalernerat ilisimasariaqarpaat. Eqqartuun­neqarnissaq nalliuppat tusarliussarput Jehovamit pisoq paasissavaat. – Ez 38:23.

¹⁶ Qanoq iliornissarput aalajangiusimavarput? Asanninneq killinneqaatigalugu – tassa nutaarsiassat nuannersut nuannaringaaratsigit, inuit asagatsigit aamma Jehova Guuti atialu asagatsigit – nukingin­nartumik aallussil­luarluta oqaluus­siuarusuppugut Jehovap ima oqarnissaata tungaanut: “Oqaluussineq naammassivoq!”