Illoqarfik ataannartussaq qilanaarlutit utaqqiuk

1. Jerusalemmip qanoq pineqarnissaa pillugu Jiisusi qanoq siulittuiva?

JIISUSI KRISTUSI toqussi ullunik arlaqan­ngitsunik sioqqullugu siulittuivoq Jerusalemmi juutillu guutisiorfiat qanoq pineqassasut. Oqarpoq ‘Jerusalemmi sakkutoorpas­suarnit unguneqassasoq’. (Luk 21:20) Jiisusip ilinniartitani oqarfigai tamanna takugunikku Judiiamiit ingerlaannaq qimaassasut. Romamiut Jerusalemmi ungummassuk Jiisusip oqaasii eqquupput. – Luk 21:21, 22.

2. Apustilip Paulusip kristumiut Judiiamiittut Jerusalem­mimiittullu sumik eqqaasippai?

² Jerusalemmip Romamiunit unguneqarnera ukiunik arlaqan­ngitsunik sioqqullugu apustilip Paulusip Hebræerinut allakkat allappai. Tassani kristumiut Judiiamiittut Jerusalem­mimiittullu pingaarutilimmik siunnersorpai. Pisussat imaannaan­ngitsut piareersar­nissaannut iluaqutigisin­naavaat. Qanoq pisoqassava? Jerusalemmi aserorneqassaaq. Kristumiut aniguis­sagunik angerlarsimaffitik suliffitillu qimattariaqassavaat. Taamaattumik illoqarfik Jerusalemmi pillugu Paulusi allappoq ‘ataannar­navianngitsoq’. Kisianni ima nangippoq: “Illoqarfik pilersin­neqartussaq qilanaarluta utaqqivarput.” – Hebr 13:14.

3. “Illoqarfik piviusunik toqqavilik” suua, aamma sooq qilanaarluta utaqqivarput?

³ Kristumiut Jerusalemmimiit Judiiamiillu qimaaniarlutik aalajangertut illaruaatigineqarlutillu nikanarsar­neqarnerat ilimanarpoq. Uaguttaaq illaruaatigineqar­tarpugut inuit aningaasallu aniguisitsisin­naasutut isiginngin­natsigit. Sooq inuit tatigisaat tatigin­ngilagut? Nalunngin­natsigu ataannar­navianngitsut. Kisianni “illoqarfik piviusunik toqqavilik” – Guutip kunngeqarfia – tassaavoq “illoqarfik pilersin­neqartussaq”. Taannalu qilanaarluta utaqqivarput.a (Hebr 11:10; Mat 6:33) Allaaserisami matumani sammissavagut: (1) Kristumiut siulliit Paulusip siunnersuutaa ‘illoqarfiup pilersin­neqartussap utaqqinissaanut’ qanoq iluaqutigigaat, (2) Jerusalemmip aserugaanissaanut qanoq piareersar­neqartut, aamma (3) uagut Paulusip siunnersuutaa qanoq iluaqutigigipput.

JEHOVA TATIGIUK QIMANNGISAAN­NASSAMMATIT

4. Sooq Jerusalemmi kristumiunut pingaaruteqarpa?

⁴ Jerusalemmi kristumiunut pingaaruteqarpoq. Ukiumi 33-mi kristumiut ilagiivi tassani pilersin­neqaqqaarput. Aamma siulersuisoqatigiit tassaniipput. Kristumiut amerlasuut Jerusalemmimi illoqarput pigisarpas­suaqarlutillu. Taamaattorli Jiisusip ilinniartitani oqarfigisimavai Jerusalemmimiit Judiiamiillu qimaasariaqartut. – Mat 24:16.

5. Paulusi kristumiut pisussanut piareersar­nissaminnut iluaqutigisin­naasaannik qanoq siunnersuiva?

⁵ Paulusip kissaatigaa kristumiut Jerusalemmimit qimaanissamut piareeq­qassasut. Taamaattumik Jehovap Jerusalemmimut isiginnit­taasianik paasinneq­qullugit ikiorpai. Eqqaasippai guutisiorfik, palaseqatigiit pilliutigisar­tagaallu Jehovamit iluarisaajun­naarsimasut. (Hebr 8:13) Jerusalemmimiut amerlanerit Missiarsi itigartis­simavaat. Taamaattumik inuit Jehova guutisiorfiginiarlugu Jerusalem­miliartariaqarun­naarput. Illoqarfik taanna tassanilu guutisiorfik piujunnaassapput. – Luk 13:34, 35.

6. Sooq kristumiut Paulusip siunnersuutaa pisariaqar­tippaat? (Hebræerit 13:5, 6)

⁶ Paulusip hebræerit allaffigimmagit Jerusalemmi illoqarfiuvoq pigissaarfiusoq. Jerusalemmip nunani Kangianiittuni illoqarfittut tusaamasaanerpaajunera atuakkiortup Romamiup allaatigaa. Ukiut tamaasa juutit nunanit allanit nalliut­torsioriar­niarlutik Jerusalem­miliartarput, tamannalu aningaasarsiornikkut siuariar­torfiusarpoq. Ilimanarpoq kristumiut ilaat aamma iluanaaruteqarluartartut. Imaassinnaavoq tamanna pissutigalugu Paulusip ima siunnersorai: “Aningaaserituutut inuussan­ngilasi, pigisasili naammagisigit.” Taavalu Jehovap kiffaminut inuttut ataasiakkaatut neriorsuutaa Allakkani Illernartuni allassimasoq una issuarpaa: “Qimanngisaan­narlutillu imminiin­ngisaan­nassavakkit.” (Hebræerit 13:5, 6 atuakkit; Mos 5. 31:6; Tuss 118:6) Kristumiut Jerusalem­mimiittut Judiiamiittullu neriorsuut tamanna pisariaqar­tilluin­narpaat. Sooq? Allakkanik taakkunannga atuarnermik kingorna angerlarsimaffitik, suliffitik pigisatillu tamaasa qimattariaqarpaat takornar­tatullu inuulerlutik. Tamannalu artornarsimassaaq.

7. Sooq Jehovamik tatigin­nilluinnarneq maanna ilikkar­tariaqarparput?

⁷ Ilinniagassartaa: Qanittukkut qanoq pisoqassava? “Annikil­liornar­toqangaassaaq.” (Mat 24:21) Kristumiut siulliit ilaarlugit eqqumajuarlutalu piareersimassaagut. (Luk 21:34-36) Imaassinnaavoq annikil­liornar­tussarsuarmi pigisagut qimattariaqarigut. Taamanik­kussamut upperil­luinnas­savarput Jehovap qimanngisaan­nassagaatigut. Aamma maanna, annikil­liornar­toqangaanginnerani, ersersis­sinnaavarput Jehova tatigil­luinnarlutigu. Imminut aperisin­naavugut: ‘Aalajangiinikka pilersaarutikkalu ersersitsippat aningaasat pinnagit Jehova isumassuisutut tatigigiga?’ (Tim 1. 6:17) Kristumiut siulliit nalaanni pisoq ilinniarfigisin­naavarput, kisianni siunissami annikil­liornar­tussarsuaq kristumiut misigisimasaannit artornar­nerungaassaaq. Taava annikil­liornar­toqangaalerpat qanoq ililluta nalunngis­sinnaavarput sussanerluta?

SIULERSUISUT NAALAKKIT

8. Jiisusip ilinniartitani sumik ilitsersuuppai?

⁸ Paulusip hebræerinut allanneraniit ukiualunnguit qaangiuttut Romamiut sakkutuuisa Jerusalemmi unguaat. Kristumiut tamanna takugamikku nalunngilaat qimaasariaqarlutik, Jerusalemmimi aserorneqassammat. (Mat 24:3; Luk 21:20, 24) Kisianni sumut qimaassappat? Jiisusip oqarfigai: “Judiiamiittut qaqqanut qimaassapput.” (Luk 21:21) Judiiamili tamatumalu eqqaani qaqqarpas­suaqarpoq. Taava qaqqanut sorlernut qimaassappat?

9. Sooq kristumiut eqqarsaatigisimassavaat qaqqanut sorlernut qimaassanerlutik? (Nunap assinga takuuk).

⁹ Qaqqat kristumiut qimaaffigisin­naasaat eqqarsaatigikkit: Samaariami qaqqat, qaqqaq Hermoni, Libanonimi qaqqat aamma qaqqat kuussuup Jordanip kangianiittut. (Nunap assinga takuuk). Qaqqani taakkunani inuit qimaaffigisin­naasaannik illoqarfeqarpoq. Assersuutigalugu illoqarfik Gamla qaqqami portusuumiikkami ornikkuminaappoq. Juutit ilaat isumaqarput illoqarfik taanna qimaaffigis­sallugu isumannaatsuusoq. Kisianni Romamiut Gamla sorsuffigigamikku suujunnaarsippaat, tassanilu najugaqartut amerlasuut toqutaapput.b

10-11. (a) Jehovap kristumiut qanoq siulersorunarpai? (Hebræerit 13:7, 17) (b) Kristumiut siulersor­timinnut naalannertik qanoq iluaqutigaat? (Aamma asseq takuuk).

¹⁰ Ilagiinni siulersuisut aqqutigalugit Jehovap kristumiut siulersorunarpai. Oqaluttuarisaanermik ilisimatusartoq Eusebios kingusin­nerusukkut allappoq Jerusalemmimi ilagiinni angutit ilaat Guutimit paasitin­neqartut illoqarfimmut Pellamut, Peræamiittumut, qimaassasut. Pella kristumiunut qimaaffissatut pitsaanerpaajuvoq. Jerusalemmimit ungasinngilaq tassungalu angalanissaq ajornarpal­laarani. Pellamiullu amerlanerit juutiun­ngillat, juutillu ingasaas­siniartut Romamiunut akersuun­nerinut akuliuk­kusunnatik. – Nunap assinga takuuk.

¹¹ Kristumiut siulersor­timinnut naalattut qaqqanut qimaapput. (Hebræerit 13:7, 17 atuakkit). Naalakkamik aniguipput. Oqaluttuarisaanermit erserpoq ‘illoqarfimmik piviusumik toqqavilimmik’ – Guutip kunngeqarfianik – neriuffiginnittut Jehovap qimanngisaannarai. – Hebr 11:10.

12-13. Jehovap innuttani artornar­torsiorfiusuni qanoq siulersorsimavai?

¹² Ilinniagassartaa: Jehovap siulersuisut aqqutigalugit innuttani siulersor­tuaannarpai. Angutit aalajaatsut Jehovamit toqqarneqartut artornar­torsiorfiusuni Guutip innuttaanik siulersuisut pillugit Biibilimi oqaluttuarpas­suarpoq. (Mos 5. 31:23; Tuss 77:21) Aamma nalitsinni erserpoq Jehovap siulersortigut aqqutigalugit ikiortaraatigut.

¹³ Assersuutigalugu COVID-19-imik nappaalanersuaqalermat siulersortigut pisariaqar­titatsinnik ilitsersuipput. Utoqqaanertat ilitsersor­neqarput qanoq qatanngutit anersaakkut isumassorsin­naagaat. Nappaalanersuaqaler­neraniit qaammatit ikittuinnaat qaangiummata internetikkut, fjernsynikkut radiukkul­luunniit oqaatsini 500-nit amerlanerusuni ataatsimeersuarpugut. Anersaakkut inuussutissanik tunineqar­tuarsimagatta ataasius­susseqar­tuarpugut. Taamaattumik siunissami qanorluunniit misilin­neqassagaluarutta upperil­luinnarsin­naavarput siulersortitta ilitsersuil­luarnissaat Jehovap isumagissagaa. Jehovamik tatiginninneq inassutaanullu naalanneq pingaaruteqarluinnarput. Annikil­liornar­tussarsuarmili pissuserineqartussat suut aamma pisariaqar­tissavagut?

QATANNGUTIGIITTUT ASAQATIGIINNEQ INOROORSAARNERLU

14. Hebræerit 13:1-3 naapertorlugit Jerusalemmip aserugaanerata nalaani kristumiut pissuserineqartussat suut ersersit­tariaqarpaat?

¹⁴ Annikil­liornar­tussarsuarmi immitsinnut asaqatigiin­nissarput aatsaat taama pingaaruteqar­tigissaaq. Kristumiut Jerusalem­mimiittut Judiiamiittullu maligassiaat malissin­naavarput. Taakku asaqatigiit­tuarsimapput. (Hebr 10:32-34) Ukiunili Jerusalemip aserugaanissaata tungaanut qatanngutigiittut asaqatigiinnertik inoroorsaar­nertillu pisariaqar­tilluin­narsimavaat.c (Hebræerit 13:1-3 atuakkit). Annikil­liornar­tussarsuarmi aamma uagutsinnut taamaassaaq.

15. Sooq kristumiut qimaasut asanninnermik inoroorsaar­nermillu ersersitsisariaqarpat?

¹⁵ Romamiut sakkutuui Jerusalemmimit tunuariasaarmata kristumiut qimaapput ikittuinnarnik nassataqarlutik. (Mat 24:17, 18) Taamaattumik qaqqanut qimaanerminni kingusin­nerusukkullu Pellami najugaqaler­nerminni ikioqatigiit­tariaqarput. Ilimanarpoq kristumiut ilaat assigiin­ngitsunik ‘pisariaqar­titsileriataartartut’. Ikioqatigiin­nermikkulli pigisaminnillu avitseqatigiin­nermikkut ersersis­sinnaavaat inoroorsaarlutillu ilumoorlutik asaqatigiillutik. – Tit 3:14.

16. Uppeqatigut pisariaqar­titsisut asallugit qanoq ersersis­sinnaavarput? (Aamma asseq takuuk).

¹⁶ Ilinniagassartaa: Asanninneq uppeqatitsinnik pisariaqar­titsisunik ikiuinissamut kajumis­sissutigaarput. Qatanngutitta ilaat qanittukkut sorsunnerit ajunaar­nersuil­luunniit pissutigalugit qimaasut uppeqatiminnit timikkut anersaakkullu ikiorneqarsimapput. Qatanngut arnaq Ukrainemi sorsunneq pissutigalugu qimaasoq ima oqarpoq: “Takuarput Jehovap uppeqatigut aqqutigalugit qanoq siulersorlutalu ikiorsimagaatigut. Qatanngutitta Ukrainemi, Ungarnimi maannalu Tysklandimi asannillutik ikiorluarsimavaatigut.” Qatanngutiminnut inoroorsaartut taakkua Jehova suleqatigaat. – Uss 19:17; Kor 2. 1:3, 4.

17. Qatanngutigiittut asaqatigiinneq inoroorsaarnerlu sooq maanna pingaaruteqarluinnarpat?

¹⁷ Annikil­liornar­tussarsuarmi ikioqatigiin­nissarput aatsaat taama pisariaqar­tigissaaq. (Hab 3:16-18) Qatanngutigiittut asaqatigiinneq inoroorsaarnerlu – taamanik­kussamut pingaaruteqarluin­nartussat – qanoq ersersis­sagigut Jehovap maanna ilinniar­tittarpaatigut.

SIUNISSAMI QANOQ PISOQASSASOQ

18. Kristumiut Jerusalemmimit qimaasut qanoq ilaarsin­naavagut?

¹⁸ Oqaluttuarisaanermit uppernarsar­neqarpoq kristumiut qaqqanut qimaasut Jerusalemmip aserugaanerani aniguisimasut. Taakku illoqarfis­suarmit qimaapput, Jehovalli taakku qimanngisaannarpai. Uagummi? Siunissami pisussat pillugit suut tamaasa ilisiman­ngilagut. Taamaattumik Jiisusip oqarneratut piareersimajuar­tariaqarpugut. (Luk 12:40) Aamma Paulusip Hebræerinut siunnersuutai eqqarsaatigeq­qissaarsin­naavagut maleruarlugillu. Oqaatsit taakku aamma uagutsinnut tunngapput. Jehovap nammineq neriorsorpaatigut qimanngisaan­nassallutalu imminiin­ngisaan­nassalluta. (Hebr 13:5, 6) Illoqarfik ataannartussaq – Guutip kunngeqarfia – qilanaarluta utaqqiuarutsigu pilluaq­qussutai naassaan­ngitsussamut nuannaarutigiumaarpagut. – Mat 25:34.