‘Sapinngisassinnik ataasioqatigiin­niartuaritsi’

‘Anersaamit ataqatigiilersin­neqaratta’ ataasioqatigiis­sinnaavugut. Tassa Guutip anersaava taamaalisitsisarpoq. Kisianni Paulusip allaatigisaatut ataasioqatigiinneq sulissutigineqar­tariaqarpoq. Kina sulissutigin­nissava? Kristumiut tamarmik immikkut iliuuseqar­tariaqarput.

Assersuuteqariarta. Takorlooruk biilinik nutaanik tunisittutit. Aserfal­latsaalior­nissaannut kina akisussaava – illit imaluunniit tunisisoq? Akissutaa nalunanngilaq. Biilit aserfal­latsaalior­neqarnatik ajoquteqalerpata tunisisoq pisuutin­neqarsin­naanngilaq.

Taamatuttaaq kristumiutut ataasioqatigiinnerput Guutimit tunissutaavoq, ataasioqatigiit­tuartoqar­nissaali tamatta immikkut akisussaaf­figaarput. Uppeqatitta ilaat eqqisseqatigiun­naarsimagutsigu apeqqut una eqqarsaatigisariaqarparput: ‘Ilagiinni ataasioqatigiit­toqartuar­niassammat sapinngisannik iliuuseqarpunga?’

ATAASIOQATIGIINNEQ SAPINNGISANNIK SULISSUTIGIUK

Paulusip eqqaasaatut ataasioqatigiin­niartuas­sagatta ilaannikkut ilungersor­tariaqar­tarsinnaavugut. Ingammik uppeqatitta ajuallatsis­simappatigut taamaas­sinnaavoq. Tamatigut inuk pineqartoq saaffigalugu ajornar­torsiut oqaloqatigiis­sutigisariaqarpiuk? Taamaat­tariaqanngilaq. Una eqqarsaatigiuk: ‘Saaffigigukku pissutsit ajunngin­nerulissappat, ajornerulis­sappalluunniit?’ Ilaannikkut silatusaar­nerussaaq pisimasoq puiuinnarutsigu ajuallatsitsisimasorluunniit isumakkeerfigiin­narutsigu. – Uss 19:11; Mak 11:25.

Paulusip allaatigisaatut ‘asannilluta kamageqatigiit­tuassaagut’. (Ef 4:2) Taamaaliorsin­naavugut uppeqatitta uagutsitulli naammal­luinnan­ngitsuunerat eqqaamagutsigu. Soorunami tamatta “kinaassuseq nutaaq” atiniarlugu sapinngisatsinnik iliuuseqar­tarpugut. (Ef 4:23, 24) Taamaattorli suli kukkusarpugut. (Rom 3:23) Tamanna eqqaamagutsigu kamageqatigiin­nissarput, isumakkeerfigeqatigiin­nissarput taamaalillutalu ataasioqatigiit­tuarnissarput ajornan­nginnerussapput.

Uagutsinnik ajuallatsitsisimasoq isumakkeerfigigutsigu pisimasorlu puiorutsigu ilagiinni eqqisseqatigiit­tuassaagut. Efesossimiut 4:3-mi grækerit oqaasiisa atorneqartut ilaat nutsiin­navillugu ‘ataqatigiilersitsisumik’ isumaqarpoq. Oqaaserlu tamanna Kolossimiut 2:19-imi ‘naggussat noqarutaannik’ nutserneqarpoq. Noqarutit taamaattut kittorajaatsuupput saarnginillu ataqatigiilersitsisarlutik. Taamatuttaaq isumaqatigiin­ngissuteqaraluarluta uppeqatigiittut eqqisseqatigiinnerput asaqatigiin­nerpullu immitsinnut qanillis­sutigaagut.

Taamaattumik uppeqaterpit ajuallatsippatit, aliasutsippatit paamitsaap­patilluunniit kukkussutai eqqarsaatiginerunagit inuk taanna misigin­neqatiginiarsariuk. (Kol 3:12) Inuit tamarmik naammal­luinnan­ngitsuummata aamma illit ajuallatsitsisimas­sagunarputit. Tamanna eqqaamagukku ilagiit ataasioqatigiit­tuarnissaasa sapinngisannik sulissutiginissaanut iluaqutigissavat.