Sooq Jehovap Nalunaajaasuisa nalliuttut aalajangersimasut peqataaffigineq ajorpaat?

• Jehovap Nalunaajaasuisa nal­liut­toq aalajanger­simasoq peqataaf­figisin­naaner­lugu qanoq aalajanger­tar­paat?

• Jehovap Nalunaajaasuisa nal­liut­tunut aalajanger­simasunut peqataaneq ajoraluar­lutik ilaqut­tatik suli asavaat?

• Jehovap Nalunaajaasuisa inoqatitik nal­liut­tunut aalajanger­simasunut peqataaq­quneq ajor­paat?

Jehovap Nalunaajaasuisa nalliuttoq aalajangersimasoq peqataaffigisinnaanerlugu qanoq aalajangertarpaat?

Jehovap Nalunaajaasuisa nal­liut­torsior­nermut aalajangersimasumut peqataas­sanerlutik aalajangin­ngin­nermin­ni Biibili misis­soq­qaar­tar­paat. Nal­liut­tut nal­liut­torsior­neril­lu ilaat Biibilimi najoq­qutas­sianut akerliul­luin­nar­put. Taamaak­kaangat Jehovap Nalunaajaasui peqataaneq ajor­put. Nal­liut­tunut al­lanut tun­ngatil­lugu Nalunaajaasut tamarmik im­mik­kut aalajangiisar­put. Tamatumalu saniatigut ‘Guutimut inun­nul­lu ilerasuuteqan­ngitsuuniar­tar­put’. – Apustilit Suliaat 24:16.

Jehovap Nalunaajaasui nal­liut­torsioqataas­sanerlutik aalajanger­nialeraangamik ilaatigut apeq­qutit uku eq­qarsaatigisar­paat.a

• Nalliut­torsior­neq ajoqer­suum­mik Biibilimut naaper­tuutin­ngit­sumik tun­ngaveqarpa?

  Biibilimi najoqqutassiaq: “Akor­nan­nit anigitsi avis­saarlugil­lu, oqar­poq Naalagaq, mingun­nar­tumil­lu at­tueqinasi.” – 2 Korinthimiut 6:15-17.

  Jehovap Nalunaajaasuisa ajoqersuutinit anersaak­kut mingun­nar­tunit, tas­sa Biibilimut akerliusunit, avis­saarluin­narumal­lutik nal­liut­torsior­nerit ukunin­nga ilisar­naatil­lit nal­lius­sineq ajor­paat:

  Nalliuttut guutinik allanik pal­lor­figin­nin­ner­mik tun­ngavil­lit. Jiisusi oqar­poq: “Naalagaq Guutit pal­lorfigis­savat taan­nalu kisiat kif­far­tuul­lugu.” (Mat­thæusi 4:10) Jehovap Nalunaajaasuisa peq­qus­sut taan­na malik­kamik­ku juul­li poorskilu nal­lius­sineq ajor­paat, aam­ma maajip aal­laq­qaataatb malun­nar­tin­neq ajor­paat, nal­liut­tum­mi taak­ku guutinik al­lanik Jehovaan­ngitsumik pal­lorfigin­nin­nermik tun­ngaveqarmata. Tamatuma saniatigut nal­liut­tuni ukunani nal­liut­torsioqataaneq ajor­put:

  • Kwanzaa. Encyclopedia of Black Studies naaper­torlugu taaguut kwanzaa swahilisut oqaatsinit ukunan­nga aal­laaveqar­poq: Matunda ya kwanza (kalaal­lisut: inerit­tut siul­liit). Tas­sa “nal­liut­torsior­neq katersuif­fiup naam­mas­sinera pil­lugu nal­liut­torsior­nerit Afrikamiut oqalut­tuarisaaneran­ni eq­qaaneqar­tut siul­liit ilaan­nik tun­ngaveqar­poq”. Kwanzaa ilaasa nal­lius­siner­tut up­perisarsior­nerun­ngitsutut isigisaraluaraat Encyclopedia of African Religion-imi inerit­tut siul­liit pil­lugit Afrikami nal­liut­torsior­nermut sanil­liun­neqar­poq, tas­sanilu “guutit siuaasal­lu qutsaviginiarlugit [inerit­tut siul­liit] pil­liutigineqar­tar­put”. Ujarlerfis­siami nangil­luni al­las­simavoq: “Amerikami qer­ner­tormiut nal­lius­sisar­tagaan­ni kwanzaami siuaasat meeq­qiorsimaneran­nik qujamasuutigin­nin­neq aam­ma taamatut ersersin­niar­neqar­tar­poq.”

    

  • Ukiakkut nalliuttorsiorneq. Tamatumani “qaam­mam­mut guutigititaq ar­naq ataq­qinarsisin­neqar­tar­poq”. (Holidays, Festivals, and Celebrations of the World Dictionary) Tas­sani “il­lumi ar­nat ataq­qin­nil­lutik guutigititamut ar­namut sikit­tar­nerat” ileq­qulersuutit ilagaat. – Religions of the World – A Comprehensive Encyclopedia of Beliefs and Practices.

  • Nauruz (Nowruz). “Nal­liut­torsior­nerup im­mik­koor­tuisa ilaat itsaq zarathustrasior­tunit aal­laaveqar­put, nal­liut­torsior­nermilu zarathustrasior­tut qaam­matisiutaan­ni ul­lut il­ler­nar­ner­paar­taasa ilaat malun­nar­tin­neqar­tar­poq. ... Zarathustrasior­tut ileq­qutoqaat naaper­torlugu pingaar­tumik Ul­loqeq­qar­neranut Anersaaq, [Rapithwin]-imik ilisimaneqar­toq, is­sit­talerut­tor­nerani Ukiup Anersaavanit nunap iluanut pin­ngitsaalisaal­luni pisin­neqarsimasorineqar­toq, ul­lormi Nowruz-imi ul­loqeq­qar­nerani tikil­luaq­quneqar­tar­poq.” – United Nations Educational, Scientific and Cultural Organization.

  • Shab-e Yalda. Atuagaq Sufism in the Secret History of Persia naaper­torlugu ul­lukin­nermik nal­lius­sineq taan­na “qular­nan­ngitsumik Mithramik [qaamanermut guutigititamik] pal­lorfigin­nin­nermut at­tuumas­suteqar­poq”. Aam­ma oqar­toqarsimavoq nal­liut­torsior­neq Romamiut grækeril­lu seqinermut guutigititaan­nik pal­lorfigin­nin­nermut at­tuumas­suteqar­toq.c

  • Thanksgiving. Kwanzaa as­sigalugu nal­liut­torsior­neq taan­na guutit as­sigiin­ngitsut ataq­qinarsisin­niarlugit katersuif­fiup naam­mas­sinera pil­lugu nal­liut­torsior­ner­nik aal­laaveqar­poq. Pif­fis­sap ingerlanerani “ileq­qutoq­qat taak­ku up­perisarsioqatigiin­nit kristumiunit ileq­qorineqar­taler­put”. – A Great and Godly Adventure – The Pilgrims and the Myth of the First Thanksgiving.

  Nalliuttorsiornerit upperisapalaanik iluatsitsinermillu upperinninnermik tunngavillit. Biibilimi al­las­simavoq ‘Gadimut [iluatsitsinermut guutigititamut] nerrivim­mik piareersaasut’ tas­saasut Jehovamik ‘tunus­sisut’. (Esaja 65:11) Taamaat­tumik Jehovap Nalunaajaasuisa nal­liut­tut uku nal­lius­sineq ajor­paat:

  • Ivan Kupala. “Inuit oqar­tar­put [Ivan Kupalap] ul­luani pin­ngor­titaq tupin­nar­tulior­nik­kut pis­saaneqar­tar­toq inuil­lu sapiitsut iluatsitsisul­lu pis­saanerup ilaanik tamatumin­nga pisin­naasut”, taama atuak­kami The A to Z of Belarus-imi al­las­simavoq. Aal­laq­qaam­mut nal­liut­torsior­neq taan­na Guutimik nalusut ul­lor­tunermi nal­lius­sisar­paat. Kisian­ni Encyclopedia of Contemporary Russian Culture-mi al­las­simavoq “kristumiuus­sutsip atuutiler­nerata kingor­na oqaluf­feqarfiup nal­liut­torsiorfiinut [sankthansimut, Johan­nesip Kuisisup inun­ngor­neranik eq­qaaniaanermut] akulerutitin­neqarsimasoq”.

  • Qaammatisiutit naapertorlugit ukiortaarsiorneq (Kiinamiutut ukiortaarsiorneq imaluun­niit Koreamiutut ukiortaarsiorneq). “Ukiup taamaalinerani ilaqutariit, ikin­ngutigiit eq­qarleriil­lu iluatsitsinis­samik qulak­keerin­nin­nis­sar­tik, guutinut anersaanul­lu ataq­qin­nit­tulior­nis­sar­tik ukiumilu nutaami iluatsitsil­luar­nis­samik kis­saas­sinis­sar­tik pingaar­tin­ner­paasar­paat.” (Mooncakes and Hungry Ghosts – Festivals of China) Taamatut­taaq Koreamiut ukior­taarsior­nermin­ni “siuaasatik pal­lorfigisar­paat, anersaapiluit anisin­niarlugit ukior­taamilu iluatsitsinis­sar­tik qulak­keer­niarlugu ileq­qulersuutit iliuuserisar­paat ukiumilu nutaami susoqas­sanersoq paasiniarlugu siulit­tuisarlutik”. – Encyclopedia of New Year’s Holidays Worldwide.

    

  Nalliuttut tarnip toqusuitsuuneranik upperisamik tunngaveqartut. Biibilimi paatsuugas­saan­ngitsumik al­las­simavoq tar­neq toqusin­naasoq. (Tus­siaat 146:4; Jaaku 5:19, 20) Taamaat­tumik Jehovap Nalunaajaasuisa nal­liut­tut ataani eq­qaaneqar­tut, tar­nip toqusuitsuuneranik up­perisamik tun­ngaveqar­tut, nal­lius­sineq ajor­paat:

  • Tarnit tamarmik ulluat (toqusut ulluat). New Catholic Encyclopedia naaper­torlugu ul­loq taan­na tas­saavoq “aalajaal­lutik toqusimasunik eq­qaaniaaneq”. Tamatuma saniatigut ujarlerfis­siami al­las­simavoq: “Ukiuni akul­ler­ni inup­pas­suit isumaqar­tar­put tar­nit in­nermi eq­qiarfim­miit­tut ul­lormi tas­sani alior­tuk­katut, ilisiitsutut, naraserlut­tut as­sigisaat­tul­lu inuunermin­ni im­min­nik ajor­tumik pin­nis­simasunut saq­qum­mersin­naasar­tut.”

  • Festivaali Qingming (Ching Ming) aam­ma tarnit kaattut nalliuttorsiorfiat. Nal­liut­tuni taak­kunani marlun­ni siuaasat ataq­qinarsisin­neqar­tar­put. Atuagaq Celebrating Life Customs Around the World – From Baby Showers to Funerals naaper­torlugu Ching Ming-imi “toqusut kaan­ngin­nias­sam­mata, qilalin­ngin­nias­sam­mata aningaasanil­lu amigaateqan­ngin­nias­sam­mata nerisas­sat, imigas­sat aningaasal­lu pap­pilis­sat ikual­lan­neqar­tar­put”. Atuak­kami aam­ma al­las­simavoq “tar­nit kaat­tut qaam­mataan­ni pingaar­tumil­lu un­nuak­kut qaam­matip imis­sif­fiani [nal­liut­torsior­tut up­perigaat] un­nuanut al­lanut sanil­liul­lugu toqusut inuil­lu akor­nan­ni an­nerusumik at­taveqar­toqar­tar­toq, taamaat­tumik toqusut saam­marsar­niarlugit siuaasal­lu ataq­qiniarlugit iliuuseqar­nis­saq pingaaruteqar­toq”.

  • Chuseok. The Korean Tradition of Religion, Society, and Ethics naaper­torlugu nal­liut­torsior­nermi tamatumani “nerisas­sat viin­nil­lu toqusut tar­ninginut pil­liutigineqar­tar­put”. Pil­liutit “timip toqunerata kingor­na tar­nip piuin­nar­tar­neranik up­perin­nin­nermut takus­sutis­saap­put”.

  Nalliuttut anersaar­sior­ner­mik aal­laavil­lit. Biibilimi al­las­simavoq: “[Siulit­tuisar­toqas­san­ngilaq] angak­kuar­niar­toqas­sananiluun­niit, pisus­sanik ilimasaarisoqas­sanani ilisiin­niar­tar­toqas­sananiluun­niit. Angak­kuar­niutaasunik oqalut­toqar­tas­san­ngilaq, timaajagarsior­tunik sukuiaasar­tunil­luun­niit apersuisoqar­tas­sanani toqoreersunil­lu siunersiuisoqar­tas­sanani. Taamaalior­tut kik­kul­luun­niit Naalak­kap maajugai.” (5 Mosesi 18:10-12) Jehovap Nalunaajaasuisa anersaarsior­nermut, aam­ma ul­loris­sat najoq­qutaralugit siulit­tuisar­nermut, tun­ngasut sam­merusun­ngil­luin­naramik­kit Hal­loween ukuluun­niit nal­lius­sineq ajor­paat:

  • Sinhalatut aam­ma tamilisut ukiortaarsiorneq. “Ileq­qulersuutinut pisumut tamatumun­nga at­tuumas­sutilin­nut ... ilaap­put pif­fis­sani ul­loris­sat najoq­qutaralugit siulit­tuisar­tut iluatsitsinis­samik aalajangersimasaan­ni aalajangersimasunik iliuuseqar­neq.” – Encyclopedia of Sri Lanka.

  • Songkran. Asiamiut nal­liut­torsiutaan­nut taaguut “sanskritisut oqaatsimit ..., ‘aalas­san­nermik’ imaluun­niit ‘al­lan­ngor­nermik’ isumaqar­tumit, aal­laaveqar­poq, aam­ma [nal­liut­torsior­nermi tamatumani] seqer­nup ul­loris­sanut Anguteralam­mik taaguutilin­nut pisimanera nal­lius­sineqar­tar­poq”. – Food, Feasts, and Faith – An Encyclopedia of Food Culture in World Religions.

  Nal­liut­tor­sior­nerit Mosesip inatsisai naaper­tor­lugit pal­lor­figin­nin­ner­mut, Jiisusip im­minut pil­liutigineratigut atuuk­kun­naar­tunut, at­tuumas­sutil­lit. Biibilimi al­las­simavoq ‘Kristusi inatsisit naggatigigaat’. (Romamiut 10:4) Inatsisini Mosesik­kut Israelik­kun­nut tun­niun­neqar­tuni najoqqutassiat kristumiut suli atorsin­naavaat, Mosesil­li inatsisaani nal­liut­torsior­nerit al­laatigineqar­tut nal­lius­sineq ajor­paat. Mis­siarsimut, kristumiut tikiutereersimasutut isigisaan­nut, tik­kuus­sisut aam­ma nal­lius­sineq ajor­paat. Biibilimi al­las­simavoq: “Tamak­ku piumaar­tus­sap tarraan­narai, timili Kristusip pigaa.” (Kolos­semiut 2:17) Eq­qaaneqareersut nal­liut­torsior­neril­lu ilaasa ileq­qulersuutinik Biibilimik tun­ngaveqan­ngitsunik ilaneqarsimanerat pis­sutigalugit Jehovap Nalunaajaasuisa nal­liut­torsior­nerit ataani eq­qaaneqar­tut nal­lius­sineq ajor­paat. Ilaat ukuup­put:

  • Hanukkah. Nal­liut­torsior­nermi tas­sani juutit naalaf­fiata Jerusalemimiit­tup atoq­qaar­teq­qin­neqar­nera eq­qaaniar­neqar­tar­poq. Biibilimili al­las­simavoq Jiisusi ‘tupermi [imaluun­niit: naalaf­fim­mi] an­nerusumi tamatigul­lu naam­mal­luin­nar­nerusumi, as­san­nik sanaajun­ngitsumi, tas­sa: silarsuarmi matumani pin­ngor­titanut ilaan­ngitsumi’ Palasiunin­ngor­toq. (Hebræerit 9:11) Naalaf­fik taan­na Jerusalemimi naalaf­fim­mut taarsiutaasutut kristumiut isigaat.

  • Rosh Hashanah. Tas­saavoq juutit ukiuan­ni ul­loq siul­leq. Itsaq nal­liut­torsior­nermi tamatumani im­mik­kut it­tunik Guutimut pil­liuteqar­toqar­tar­poq. (4 Mosesi 29:1-6) Taamaat­torli Jiisusip Kristusip, Mis­siarsitut, ‘pil­liutinik toqutas­sanik naatitanil­lu pil­liutinik pil­liisar­neq atorun­naarsip­paa’, taamaalil­luni pil­liutit taamaat­tut Guutip isaani atuuk­kun­naarsip­pai. – Danieli 9:26, 27.

• Nalliut­toq upperisar­sioqatigiit assigiin­ngit­sut suleqatigiin­neran­nik taper­siiva?

  Biibilimi najoq­qutas­siaq: “Qanoq ilil­luni up­per­tup up­pin­ngitsoq agguaqatigisin­naavaa? Guutip naalaf­fia guutipiluil­lu qanoq ataqatigiis­sin­naap­pat?” – 2 Korinthimiut 6:15-17.

  Jehovap Nalunaajaasuisa inoqatitik eq­qis­seqatiginiar­tar­paat inuul­lu nam­mineq up­perisaminik toq­qaasin­naatitaanera ataq­qil­lugu, kisian­ni nal­liut­tut up­perisarsioqatigiit as­sigiin­ngitsut suleqatigiin­neran­nik imatut tapersersuisut peqataaf­figineq ajor­paat:

  Kinaas­susil­lit pisul­luun­niit up­perisar­sior­ner­mi pingaarutil­lit inuit as­sigiin­ngitsunik up­perisal­lit ataasioqatigiil­lutik pal­lorfigin­nin­nis­saan­nik taper­ser­suisut nal­lius­sinerat. Guutip itsaq in­nut­tani nunamut nutaamut al­lanik up­perisalin­nik in­nut­talim­mut siulersoramigit ima oqarfigai: “Taak­ku guutigisaal­lu angerfigeqatigis­san­ngilatit. ... Guutigisaam­mi guutisiorfigigaluaruk­kit napititaaratarsin­naagavit.” (2 Mosesi 23:32, 33) Taamaat­tumik Jehovap Nalunaajaasuisa nal­liut­tut uku peqataaf­figineq ajor­paat:

  • Loy Krathong. Thailandimiut nal­liut­torsior­neran­ni tamatumani “inuit pilutanik umiatsiaaraasaliat naneruuseriarlugit tipigis­saatil­liis­sum­mil­luun­niit ik­kus­sivigeriarlugit im­mamut avalatsit­tar­paat. Oqar­toqar­tar­poq umiatsiaasaaq­qat ajutumeer­nerit nas­sarlugit saavit­tar­tut. Nal­liut­torsior­nermi Buddhap tumaa il­ler­nar­toq eq­qaaniar­neqar­tar­poq.” – Encyclopedia of Buddhism.

  • National Repentance Day (kalaal­lisut: ul­loq inuiat­tut peq­qis­simif­fik). Papua Ny Guineami aviisi The National naaper­torlugu naalak­kersuisoqarfim­mi atorfilik oqar­poq pisumi tamatumani peqataasut “kristumiut up­perisaan­nut tun­ngaviusut isumaqatigigaat”. Nangil­luni oqar­poq ul­loq taan­na “nunami kristumiut najoq­qutas­siaan­nik siam­marsaanermut iluaqutaasoq”.

  • Vesak. “Tas­saavoq Buddhasior­tut nal­liut­torsior­neran­ni il­ler­nar­ner­paaq Buddhap inun­ngor­neranik, qaam­marsagaaneranik toquneranil­lu, tas­sa nirvanamut pineranik, eq­qaaniaaneq.” – Holidays, Festivals, and Celebrations of the World Dictionary.

    

  Nal­liut­tut Biibilimi ilin­niar­tit­sis­sutigineqar­tunik tun­ngaveqaratik up­perisar­sior­nik­kut ileq­qutoq­qanik tun­ngavil­lit. Jiisusip up­perisarsior­nik­kut siut­tut ima oqarfigai: “Guutip oqaasii atorun­naarsip­pasi kingor­nus­sarsiasi pil­lugit.” Aam­ma ‘inuit inas­sutiliaat ajoqersuutigisaramik­kit’ pal­lorfigin­nin­nerat asuliin­naanerar­paa. (Mat­thæusi 15:6, 9) Jehovap Nalunaajaasuisa mianersoq­qus­sut taan­na pimooruk­kamik­ku up­perisarsior­nik­kut nal­liut­torsior­nerit amerlasuut nal­lius­sineq ajor­paat.

  • Kunngit pingasut ulluat (Epiphany, Timkat, imaluun­niit Los Reyes Magos). Nal­liut­tumi tamatumani ul­loris­sat najoq­qutaralugit siulit­tuisar­tut Jiisusimut imaluun­niit Jiisusip kuisin­nerani tikeraar­tut eq­qaaniar­neqar­tar­put. Nal­liut­torsior­neq taan­na aq­qutigalugu “Guutimik nalusut uper­naak­kut nal­liut­torsiutaasa ilaat, kuus­suar­nut kuun­nul­lu guutigititanut ataq­qinaataasut, kristumiuus­sutsimut ilan­ngutitin­neqar­put”. (The Christmas Encyclopedia) Timkat, nal­liut­tumut tamatumun­nga as­singusoq, “ileq­qutoq­qamut tamatumun­nga at­tuumas­suteqarluin­nar­poq”. – Encyclopedia of Society and Culture in the Ancient World.

  • Niviarsiap Mariap qilaliartitaanera. Nal­liut­torsior­neq taman­na Jiisusip anaanaata inut­tut timeqarluni qilaliar­neranik up­perin­nin­nermik tun­ngaveqar­poq. Religion and Society – Encyclopedia of Fundamentalism-imi al­las­simavoq “up­perisaq taan­na kristumiunit siul­ler­nit ilisimaneqan­ngitsoq, Al­lak­kanilu Il­ler­nar­tuni al­laatigineqan­ngitsoq”.

  • Mariap isornaateqanngitsumik ilumiuulernera. Mariap “isor­naateqan­ngitsumik ilumiuuler­nera Al­lak­kani Il­ler­nar­tuni ajoqersuutigineqan­ngilaq. ... Oqaluf­feqarfim­mit ajoqersuutigineqar­poq.” – New Catholic Encyclopedia.

  • Iisinnginniarfik. New Catholic Encyclopedia naaper­torlugu pif­fis­saq taan­na peq­qis­simif­fiul­lunilu iisin­ngin­niarfiuvoq ukiuni 300-kkun­ni, tas­sa Biibilip naam­mas­sineqar­neranit ukiut 200-t sin­nerlugit ingerlareersut, pilersin­neqar­toq. Iisin­ngin­niarfiup ul­luisa siul­liat pil­lugu ujarlerfis­siami ima al­las­simavoq: “Aalajaatsut an­niarsiorfim­mi pingasun­ngor­nik­kut arsakunik tunineqar­tar­nerat 1091-imi Beneventomi ilagiit isumalioqatigiit ataatsimiin­nerisa kingor­na ileq­quuler­poq.”

  • Meskel (imaluun­niit Maskal). Etiopiamiut nal­liut­torsior­neran­ni tamatumani “ikumatitanik ikitseriarluni kaavil­lugit qitin­nik­kut san­ningasul­lip ilumoor­tup (san­ningasul­lip Kristusip kikiat­tugaaf­fiata) nas­saarineqar­nera” nal­lius­sineqar­tar­poq, taama Encyclopedia of Society and Culture in the Medieval World-imi al­las­simavoq. Jehoval­li Nalunaajaasuisa san­ningasulik pal­lorfigin­nin­nermin­ni ator­neq ajor­paat.

• Nalliuttumi inuk, peqatigiif­fik imaluun­niit nunagisamut ilisar­naat qutsis­sisin­neqarpa?

  Biibilimi najoqqutassiaq: “Ima oqar­poq Naalagaq: Perloq­qunarsili inuk inoqatiminik tatigin­nit­toq inun­nilu toqujasuni nukis­sarsior­toq uum­mataali Naalak­kamit nigor­toq.” – Jeremia 17:5.

  Jehovap Nalunaajaasuisa inoqatitik ataq­qil­lugil­lu qin­nut­tar­paat, kisian­ni pisut nal­liut­torsior­neril­lu uku peqataaf­figineq ajor­paat:

  Nalliut­tut naalak­ker­suisumik inum­mil­luun­niit nuimasumik im­mik­kut it­tumik ataq­qinar­sisitsisut. Biibilimi al­las­simavoq: “Tatigeqinasiuk inuk anersaar­tor­nera suialanerin­naasoq; sumut naatsorsuus­sas­saava?” (Esaja 2:22) Taamaat­tumik Jehovap Nalunaajaasuisa as­sersuutigalugu kun­ngik­kormiup inuuia nal­lius­sineq ajor­paat.

  Nunagisap erfalasua pil­lugu pingaar­tor­sior­neq. Jehovap Nalunaajaasuisa nunagisap erfalasua nal­liut­torsiutigineq ajor­paat. Sooq? Biibilimi ima al­las­simam­mat: “Guutipilun­nut mianersoritsi!” (1 Johan­nesi 5:21) Nalitsin­ni erfalasoq inuit ilaasa guutipilut­tut – pal­lorfigisatut – isigineq ajor­paat, kisian­ni oqalut­tuarisaanermik ilisimatooq Carlton J. H. Hayes al­lap­poq: “Erfalasoq tas­saavoq inuiaas­sutsimik pingaar­titsisut ilumoorfigin­nin­nermut ilisar­naataat pal­lorfigisaal­lu pingaar­ner­paaq.”

  Iluar­tuutitaq pil­lugu nal­liut­tut nal­liut­tor­sior­neril­luun­niit. Guutimik mianerin­nit­tup apustili Petrusi pal­lorfigim­magu qanoq pisoqar­pa? Biibilimi al­las­simavoq: “[Petrusip] nikueq­quaa oqarlunilu: ‘Nikuigit, uangat­taarmi inuin­naavunga.’” (Apustilit Suliaat 10:25, 26) Petrusi apustilil­lu al­lat im­mik­kut ataq­qineqarusun­ngim­mata qutsis­sisin­neqarusun­ngim­matalu Jehovap Nalunaajaasui iluar­tuutitatut isigineqar­tut ataq­qinarsisin­neqar­niar­nerinut, soorlu nal­liut­torsior­ner­nut ukunun­nga, peqataaneq ajor­put:

  • Iluartut ulluat. “Iluar­tuutitat tamaasa ataq­qinarsisin­niarlugit nal­liut­torsior­neq ... Nal­liut­torsior­neq taan­na sumit aal­laaveqar­nersoq ilisimaneqan­ngilaq.” – New Catholic Encyclopedia.

  • Guadalupemi niviarsiap nalliuttorsiorfia. Nal­liut­torsior­nermi tas­sani “Mexicop ser­nis­sor­taa” – inuit ilaan­nit tas­saasorineqar­toq Maria, Jiisusip anaanaa – ataq­qinarsisin­neqar­tar­poq. Oqar­toqar­tar­poq tupin­nar­tulior­nik­kut 1531-mi naasoris­saasumut saq­qum­mer­toq. – The Greenwood Encyclopedia of Latino Literature.

    

  • Iluartuutitamut ateerisamut ullorititaq. “Iluar­tuutitamut ateerisamut ul­lorititaq tas­saavoq meeq­qap kuisin­nermini apersor­tin­nerminiluun­niit iluar­tuutitaq ateqaatigisaa pil­lugu nal­liut­torsiorfik”, taama atuak­kami Celebrating Life Customs Around the World – From Baby Showers to Funerals-imi al­las­simavoq. Nangil­luni al­las­simavoq “ul­lormi tas­sani inuit up­perisarsior­nermut tun­ngasunik iliuuseqar­tar­tut”.

  Politik­kik­kut atugas­sarititaasunil­luun­niit pitsan­ngor­saaniarluni malun­nar­titsinerit. Biibilimi al­las­simavoq: “Naalagaq qimar­nguf­figalugu pitsaaneruvoq inun­nik [tatigisaqar­nermit].” (Tus­siaat 118:8, 9) Jehovap Nalunaajaasuisa Guuti nunarsuarmi ajor­nar­torsiutinik aaq­qiisin­naasutuatut tatigalugu takutik­kusuk­kamik­ku Inuusuttut Ulluat aam­ma Arnat Ulluat malun­nar­tin­neq ajor­paat. Taman­na aam­ma pis­sutigalugu Emancipation Day, inus­siaateqar­tar­nerup atuuk­kun­naarsin­neqar­neranik eq­qaaniaaneq, malun­nar­tin­neq ajor­paat. Paarlat­tuanik Guutip naalagaaf­fia al­lanik nagguilin­nik uumis­suinermik naligiin­ngin­nermil­lu aaq­qiisin­naasutut isigaat. – Romamiut 2:11; 8:21.

• Nalliuttumi nuna nag­gueqatigiil­luun­niit aalajanger­simasut allanit pingaar­nerusutut pineqar­tarpat?

  Biibilimi najoqqutassiaq: ‘Guuti kinaas­susersior­tuun­ngilaq, inuiaqatigiin­nili kik­kuusuniluun­niit im­minik mianerin­nit­tumik iluar­tulior­tumil­lu ilas­sin­nit­tar­poq.’ – Apustilit Suliaat 10:34, 35.

  Jehovap Nalunaajaasuisa amerlasuut nunagisar­tik nuan­narigaluarlugu inuiaqatigiin­nik naggueqatigiin­nil­luun­niit aalajangersimasunik ima al­laatigineqar­tutut pingaar­nerutitsil­luni nal­liut­torsior­nerit peqataaf­figineq ajor­paat:

  Sak­kutuunik im­mik­kut ittumik ataq­qin­nin­neq. Jiisusip ajoqersuk­kani sorsun­nermik tapersersueq­qunagit ima oqarfigai: “Akeq­qasi asasigit, ilis­sin­nil­lu qinugin­nit­tut qin­nus­sigit.” (Mat­thæusi 5:44) Taamaat­tumik Jehovap Nalunaajaasuisa sak­kutuunik ataq­qin­nil­luni ul­lorsiorfiit imaat­tut peqataaf­figineq ajor­paat:

  • ANZAC Day. “ANZAC uunga naalisaataavoq: Australian and New Zealand Army Cor­ps [Australiami New Zealandimilu sak­kutuut]”, aam­ma “ukiut ingerlanerini ANZAC Day tas­saalersimavoq sorsun­nermi ajunaarsimasunik eq­qaaniaaneq”. – Historical Dictionary of Australia.

  • Veterans Day (Remembrance Day, Remembrance Sunday imaluun­niit sakkutuunik toqutaasimasunik eqqaaniaaneq). Ul­lorsior­ner­ni taak­kunani “sak­kutuut sorsoqataasimasut nunal­lu sorsun­nerini toqutaasimasut” ataq­qiniar­neqar­tar­put. – Encyclopædia Britannica.

  Nunap oqalut­tuarisaaneranut pingaarutilinnik nam­miniilivin­neranil­lu nal­lius­sinerit. Jiisusi ajoqersuk­kani pil­lugit ima oqar­poq: ‘Silarsuup inuisa ilagin­ngilaat, soorlu uangat­taaq silarsuup inuisa ilagin­ngik­kaan­nga.’ (Johan­nesi 17:16, tastamantitâĸ 1961-imi naqitigaq) Jehovap Nalunaajaasui nunap oqalut­tuarisaaneranik ilin­niar­neq nuan­narigaluarlugu pisuni imaat­tuni peqataaneq ajor­put:

  • Australia Day. Worldmark Encyclopedia of Cultures and Daily Life naaper­torlugu “ul­lormi tas­sani 1788-imi tuluit sak­kutuuisa erfalasuler­nerat Australial­lu nunasiaataaler­neranik nalunaarutigin­nin­nerat” eq­qaaniar­neqar­tar­poq.

  • Guy Fawkes Day. Tas­saavoq “Guy Fawkesip katuul­lil­lu al­lat tapersersuisut kun­ngimik Jaakumik siul­lermik aam­ma [tuluit] inatsisar­tuinik 1605-imi qaar­titseriar­nermin­ni iluatsin­ngin­neran­nik inuiaqatigiit­tut nal­liut­torsiorfik eq­qaaniaanerlu”. – A Dictionary of English Folklore.

  • Ulloq namminiiliviffik. Nunani arlalin­ni ul­lormi nam­miniilivif­fim­mi “nunami in­nut­taasut nunamut al­lamut atajun­naar­ner­tik nal­liut­torsiutigisar­paat”. – Merriam-Webster’s Unabridged Dictionary.

• Nalliuttumi inuit tamalikal­lutil­lu kinguaas­siuutitigut inuuner­lut­tarpat?

  Biibilimi najoqqutassiaq: “[Naam­maqaaq] ul­luni inuuf­figeriik­kas­sin­ni Guutimik nalusut piumasaat naam­mas­sisimagas­sigit inuunerlul­lusi, pileritsapilut­tarlusi, imerujuupilut­tarlusi, nuan­naapilut­tarlusi, er­ngut­tarlusi guutipilus­sior­neril­lu ileq­qus­saan­ngil­luin­nar­tut ileq­qoralugit.” – 1 Petrusi 4:3.

  Jehovap Nalunaajaasuisa najoq­qutas­siaq taan­na malik­kamik­ku nal­liut­tut er­nguf­fiusut ingasat­tumil­lu festerfiusut peqataaf­figineq ajor­paat. Jehovap Nalunaajaasuisa ikin­ngutitik ilagis­sal­lugit nuan­narisar­paat, aam­ma imaas­sin­naavoq imigas­sanik aalakoor­nar­tor­talin­nik an­nikitsumik imer­tut imin­ngil­luin­nar­tul­luun­niit. Biibilimi siun­nersuut una sapin­ngisamin­nik malin­niar­tar­paat: “Nerigus­si imerus­siluun­niit qanorluun­niil­lu iliorlusi taamaalius­saasi Guutip ataq­qinaatis­saanik.” – 1 Korinthimiut 10:31.

  Taamaat­tumik Jehovap Nalunaajaasuisa kar­nevalit festivaalil­lu as­sigisaat Biibilimi avoq­qaarineqar­tutut kan­ngunar­tumik pis­susilersorfiusut peqataaf­figineq ajor­paat. Juutit nal­liut­torsior­nerat purim taak­kua ilagaat. Ukior­pas­suar­ni purim ukiuni 400-kkun­ni Kr.in.si. juutit aniguisitaaneran­nik nal­lius­sinerusarsimagaluar­toq maan­na “juutit Mardi Grasiat­tut [New Orleansimi kar­nevalitut] imaluun­niit kar­nevaliat­tut al­laatigineqarsin­naavoq”, taama Essential Judaism-imi al­las­simavoq. Peqataasut amerlasuut “al­laasaarlutik atisalersor­tar­put (amerlaner­tigut angutit ar­natut atisaqar­tar­put), tamalikat­tar­put, er­ngut­tar­put sapin­ngisamil­lu nipilior­niar­tarlutik”.

Jehovap Nalunaajaasuisa nalliuttunut aalajangersimasunut peqataaneq ajoraluarlutik ilaquttatik suli asavaat?

Aap. Biibilimi ilin­niar­titsis­sutigineqar­poq ilaqut­tat tamarmik, qanoq up­perisaqar­nerat apeq­qutaatin­nagu, asaneqarlutil­lu ataq­qineqas­sasut. (1 Petrusi 3:1, 2, 7) Jehovap Nalunaajaasuisa ilaat nal­liut­tuni aalajangersimasuni peqataasarun­naaraangat ilaqutaasut ilaat im­maqa ajual­lat­tar­put, narrujuum­misar­put al­laal­lu ilumoorfigineqarun­naar­tutut misigiler­tarlutik. Taamaat­tumik Jehovap Nalunaajaasuisa amerlasuut ilaqut­tatik asan­nit­tuliorfigisarlugil­lu aalajanger­nermin­nut pis­sutaasunik pis­suseril­lutik nas­suiaat­tarlugil­lu nal­liut­torsiorfiun­ngitsuni pulaal­lat­taasar­paat.

Jehovap Nalunaajaasuisa inoqatitik nalliuttunut aalajangersimasunut peqataaqquneq ajorpaat?

Naamik. Isumaqar­put kik­kut tamarmik nam­min­neq aalajangiisus­saasut. (Josva 24:15) Jehovap Nalunaajaasuisa “kik­kuugaluar­tul­luun­niit”, up­perisaat apeq­qutaatin­nagit, ataq­qivaat. – 1 Petrusi 2:17.