Divulu Dya Kayadi Dya Samuwele
11 Ku dimatekenu dya muvu,* o kithangana kyoso o jisobha kyakexile mutunda phala kulwa o ita, Davidi watumikisa Jowabe ni jiselevende jê ni kifuxi kyoso kya masoladi a Izalayele, phala kubwika akwa Amone, ene anga akondoloka o mbanza ya Laba. Maji-phe, Davidi waxala mu Jeluzaleme.
2 Sayi kizuwa mu usuku,* Davidi wabalumuka mu hama yu wexile mu kwenda ku ditala dya inzo* ya sobha. Tunde ku ditala dyenyodyo, mwene wamono muhatu wexile muzowa. O muhatu wa wabhele kyavulu. 3 Davidi watumu muthu phala kusota kwijiya nanyi wexile o muhatu mwenyó. Kyenyiki, a mwambela exi: “Mwene Bateseba mon’â Eliyamu, muhatu wa Udiya mukwa Hiti.” 4 Mukusuluka, Davidi watumikisa akunji phala kutakana o muhatu ni ku mubhekela-nê. Kyenyiki mwene weza, Davidi anga uzeka-nê. (Kiki kyabhiti kyoso mwene kya kasanene, yu wexile mu dizelesa.)* Mukusuluka, Davidi wa mutumu kuvutuka kubhata dyê.
5 O muhatu wemita, yu watumu kutangela Davidi, wixi: “Eme ngemita.” 6 Mukonda dyakiki, Davidi watumikisa mukunji kwa Jowabe phala ku mutangela: “Ngitumikise Udiya mukwa Hiti.” Kyenyiki, Jowabe watumikisa Udiya kwa Davidi. 7 Kyoso Udiya kyabhixila, Davidi wa mwibhwidisa kyebhi kyexile Jowabe ni masoladi ni kyebhi kya mubhita o ita. 8 Davidi wambela Udiya, wixi: “Ndé kubhata dyé, unyohe-ku.” Kyenyiki, Udiya watundu mu inzo ya sobha, anga a mutumikisa o maujitu a sobha.* 9 Maji Udiya kayi kubhata dyê, wazeka bhu mwelu wa inzo ya sobha, kumoxi ni jiselevende ja mukwa ja ngana yê. 10 Kyenyiki, ambela Davidi, exi: “Udiya kayi kubhata dyê.” Mukonda dyakiki Davidi wambela Udiya, wixi: “Kubhixila kindala mu njila i wabhange? Mukonda dyahi kiwayi kubhata dyé?” 11 Udiya wambela Davidi, wixi: “O Álaka ni mayala a Izalayele ni akwa Judá ala mu jifundu, o mutwameni wami Jowabe ni jiselevende ja ngana yami ala mu mukawu wahatu. Kyebhi kingiya kubhata dyami, phala kudya ni kunwa ni kuzeka ni muhatu wami? Kala eye ngana wene ku mwenyu, eme kinganda bhanga o kima kiki, kikôla!”
12 Mukusuluka Davidi wambela Udiya, wixi: “Nanga hanji o kizuwa kyalelu, mungu ni ngikusule.” Kyenyiki, Udiya anga ukala mu Jeluzaleme mu kizuwa kyenyokyo ni mu kizuwa kyakayela. 13 Davidi wa mwixana phala kudya ni kunwa-nê kumoxi, anga u mu kodiwisa. Kyenyiki, Udiya utunda mu usuku phala kuya muzeka mu hama yê, kumoxi ni jiselevende ja ngana yê, maji mwene kayi kubhata dyê. 14 Mu kamene, Davidi wasoneka mukanda phala Jowabe yu wa utumikisa ni Udiya. 15 Mu mukanda mwene wasoneka-mu kiki: “Udiya mu mutula ku pholo ya ita, bhwoso bhwa teme kyavulu o ita, mukusuluka vutukenu kudima ni mu muxise ubheka wê phala n’a mukwame, n’afu.”
16 Jowabe watonginine kya kyambote o mbanza, yu watula Udiya bhu kididi bhwejidile kwila, bhwene bhwexile o masoladi a nguzu. 17 Kyoso o mayala a mbanza kyatundu phala kubhânga ni Jowabe, sayi masoladi a Davidi a ajibha. Udiya, mukwa Hiti, wafu we. 18 Kyenyiki, Jowabe watangela kwa Davidi yoso yexile mubhita mu ita. 19 Mwene wambela o mukunji, wixi: “Kyoso ki wanda tudila o njimbu yalungu ni ita kwa sobha, 20 nange o sobha ukala ni njinda yavulu anga wibhwidisa: ‘Mukonda dyahi mwayi mubhânga bhwa zukama o mbanza? Ki mwijidile kwila eji mitakula mifula tunde kutala dya ilumbu? 21 Nanyi wajibha Abimeleke mon’â Jelubezete? Ki muhatu wexile kuthandu’a ilumbu wa mutakula ditadi dya kuhuhila, yu wafwila bhenyobho ku Tabeze? Enu mwa zukamena-hi kyavulu ku ilumbu?’ Kyenyiki, eye-phe u mutambwijila, wixi: ‘Ni selevende yê Udiya mukwa Hiti, wafu we.’”
22 Kyenyiki, o mukunji wayi, yu watangela kwa Davidi yoso ya mutangela Jowabe. 23 O mukunji wambela Davidi, wixi: “O jinguma abetele-kota mu nguzu etu ndenge, ya atundu phala kubhânga n’etu mu mukáwu. Maji-phe etu twabhange yoso phala kwavutukisa kate bhu dibhitu dya mbanza. 24 Maji sayi akwa kutakula o mifula exile kuthandu’a ilumbu, atakula mifula ku jiselevende jé. Ku jiselevende ja sobha, amoxi afu. O selevende yé Udiya mukwa Hiti, wafu we.” 25 Davidi wambela o mukunji, wixi: “Tangela Jowabe phala ‘kathandanganye ni ima yiyi, kuma muthu woso-woso utena kufwa mu ita. Bhângenu ni nguzu yoso phala mu tolole o mbanza.’ Usota we ku mu swinisa.”
26 Kyoso o muhatu wa Udiya kyeza mu kwijiya kwila, mwadi we wafu, mwene ukala mudila munumi’ê. 27 Kyabhiti o izuwa yakudila o thambi ya munumi’ê, Davidi watumu ku mubheka ku dibhata dyê, mwene anga ukituka muhat’wê. Maji-phe o kima kyabhange Davidi, Jihova wakiyibhila kyavulu.