Dya Kayadi Dya Jisobha

1 Kyoso kyafu Akabe, akwa Mowabe abhukumukina akwa Izalayele.

2 Sayi kizuwa, Akaziya wakexile bhu njanena ya dixilu dyê dya thala ku Samadiya, mwene wabu yu wa dikwama. Mwene watumikisa akunji, yu wa ambela: “Ndenu mwibhule Bahale-Zebube o nzambi ya akwa Ekolone, se nganda disanza mba kana.” 3 Kyenyiki, o anju ya Jihova yambela Elija* o mukwa Tejibita: “Balumuka, uye mudisanga ni akunji a sobha ya Samadiya, wa ambela, wixi: ‘Mukonda dyahi mwamuya mukwibhula Bahale-Zebube, o nzambi ya akwa Ekolone? O kwila mu Izalayele kimwala Nzambi? 4 Mukonda dyakiki, Jihova wambela o sobha: “Mu hama mu wala kiwanda balumuka-mu dingi, mukidi wanda fwa mwene.”’” Mukiki-phe Elija wayi.

5 Kyoso o akunji kyavutuka kwa sobha Akaziya, mwene wa ebhwidisa: “Mukonda dyahi mwavutuka kya?” 6 Ene a mutambwijila, exi: “Sayi diyala weza mudisanga n’etu yu watwambela, wixi: ‘Vutukenu kwa sobha wa mitumikisa anga mu mutangela, mwixi: “Kiki kyene kyambe Jihova: ‘Mukonda dyahi mwa muya mukwibhula kwa Bahale-Zebube, o nzambi ya akwa Ekolone? O kwila mu Izalayele kimwala Nzambi? Kyenyiki, mu hama muwala kiwanda tunda-mu. Mukidi wanda fwa mwene.’”’” 7 Mukiki-phe, o sobha wa ebhwidisa: “Kyebhi kyexile o diyala dyeza mudisanga n’enu wa mitangela o ima yiyi?” 8 Ene a mutambwijila, exi: “O diyala dyazwatele divunga dya kibha, wadikutile phonda mu mbunda.” O sobha wambe: “Yó Elija mukwa Tejibita.”

9 Kyenyiki, o sobha watumikisa kabhitangu kamoxi ni makwinyi atanu a masoladi mê. O kabhitangu wayi muzwela ni Elija waxikamene ku mulundu, yu wambe wixi: “Diyala dya Nzambi yakidi, o sobha wambe kiki: ‘Tuluka.’” 10 Maji Elija watambwijila o kabhitangu ka makwinyi atanu a masoladi, wixi: “Se eme ngi diyala dya Nzambi, ku dyulu kulawuke túbhya, tujikinise eye ni makwinyi atanu a masoladi mé.” Kyenyiki, ku dyulu kwalawuka túbhya twajikinisa mwene ni makwinyi atanu a masoladi mê.

11 Mukiki, o sobha watumikisa dingi kabhitangu kengi ni makwinyi atanu a masoladi mê. Mwene wayi muzwela ni Elija, yu wambe wixi: “Diyala dya Nzambi yakidi, kiki kyene kyambe o sobha: ‘Tuluka ni lusolo.’” 12 Elija watambwijila o kabhitangu ka makwinyi atanu a masoladi, wixi: “Se eme ngi diyala dya Nzambi, ku dyulu kulawuke túbhya, tujikinise eye ni makwinyi atanu a masoladi mé.” Kyenyiki, ku dyulu kwalawuka túbhya twatundu kwa Nzambi, twajikinisa mwene ni makwinyi atanu a masoladi mê.

13 Mukusuluka, o sobha watumikisa o kabhitangu ka katatu ni makwinyi atanu a masoladi mê. Kyenyiki, o kabhitangu wabande ku mulundu, wafukama bhu pholo ya Elija yu wa mudyondela mu kwamba: “Diyala dya Nzambi yakidi, tukwatele henda, eme ni makwinyi atanu a jiselevende jé. 14 O jikabhitangu jiyadi ja masoladi ni makwinyi atanu a masoladi mâ, a ajikinisa ku túbhya twatundu ku dyulu, maji kindala ngikwatele henda.”

15 O anju ya Jihova yambela Elija: “Tuluka-nê. Kana kukala ni wôma wê.” Kyenyiki, Elija watuluka wayi kumoxi ni kabhitangu ka masoladi mudisanga ni sobha. 16 Kyoso Elija kyabhixila bhwakexile o sobha, wa mwambela, wixi: “Kiki kyene kyambe Jihova: ‘Eye watumikisa akunji phala kwibhwidisa Bahale-Zebube, o nzambi ya akwa Ekolone. O kwila mu Izalayele kimwala Nzambi? Mukonda dyahi k’usoto kwijiya o kizwelu kyê? Mukonda dyakiki, mu hama mu wala kiwanda balumuka-mu dingi, mukidi wanda fwa mwene.’” 17 Akaziya he ufwa kala kyazwela Jihova kwa Elija. Kuma mwene kexile ni mon’a diyala, Jeholamu* mwéne wakituka sobha bhu kididi kyê, ku muvu wa kayadi ka utuminu wa Jeholamu mon’a Jozafate sobha ya Judá.

18 O ima ya mukwa ya musoso wa Akaziya, yoso yabhangele, a isoneka mu divulu dya misoso ya izuwa ya jisobha ja Izalayele.