Ikalakalu ya Jipoxolo
26 Ngilipa wambela Phawulu: “Ngitangele kyá o ima ya mu kutatela.” Kyenyiki, Phawulu wasununa o lukwaku lwê, wamateka o kuzwela, wixi:
2 “Sobha Ngilipa, nga sanguluka mukonda ngala bhu pholo yé phala kudizokela mu ima yoso ya mu ngitatela o Jijudé. 3 Mukonda eye wejiya kyambote o ijila ni maka oso abhita mwaxaxi ka Jijudé. Mu kiki, nga kudyóndo, ng’ivwidile ni mwanyu woso.
4 “Jijudé javulu a ng’ijiya tundé mu undenge wami, katé o kithangana ki ngakexile mu Jeluzaleme. 5 Se ene amesena, atena ku kwijidisa kwila, eme ngexile ngi Falizewu. O Jifalizewu aswina dingi mu ubhezelu wâ, o Jijudé ja mukwá ndenge. 6 Eme a mu ngifundisa mukonda dya kidyelelu kyami mu kikanenu kyabhange Nzambi ku jikuku jetu. 7 O kwinyi ni kiyadi kya miji yetu, akexile mukingila o kikumbidilu kya kidyelelu kiki, mu kusidivila Nzambi ni kuswina kwoso usuku ni mwanya. Ngana, o Jijudé a mu ngifundisa mukonda dya kidyelelu kiki.
8 “Mukonda dyahi mufika kwila, Nzambi katena kufukununa o madifundu? 9 Eme nga xikinine kwila, ngatokalele kubhanga yoso phala kuzukutisa yó aboka o dijina dya Jezú mukwa Nazalé. 10 Yiyi yene o ima i ngabhangele mu Jeluzaleme. Kuma angibhele ungana ku akunji a makota, ngatele maxibulu* avulu mu kaleya. Kyoso kyakexile phala kwajibha, eme nga xikinine kwila a ajibhe mwene. 11 Mu malombe* moso ngexile mwabeta muveji javulu mu kwa jijidika kudituna o kixikanu kyâ. Kuma nga akwatele njinda yavulu, ngexile mwa zukutisa katé mu jimbanza ja mukwá.
12 “Kiki kyene kya ngibhangesa kuya mu mbanza ya Damasku, ni kutena ni ungana wa ngibhele o akunji a makota. 13 Ngana yami, mu njila, ku mediya, ngamono mukengeji wa tundu ku dyulu, wa tu mwikina. O mukengeji wenyó o kubhenya kwê kwabetele dingi kota, o kwa mwanya ndenge. 14 Etu enyoso twabu bhoxi, anga ngivwa dízwi dya ngambela mu dimi dya Hebalayiku: ‘Sawúlu, Sawúlu, mukonda dyahi wa mu ngi zukutisa? Mu kuzoka n’eme wa mu dibhekela ngó maka.’ 15 Eme nga mwibhwidisa: ‘Éye nanyi Ngana?’ O Ngana wa ngi tambwijila: ‘Éme Jezú, yó wa mu muzukutisa. 16 Maji balumuka, wimane. Eme nga kutukulukila phala ukale u selevende yami ni mbangi ya ima i wamono ni ima i nganda ku kulondekesa. 17 Nganda kubhulula bhu maku a mundu yú ni ku athu akwa jixi jengi, ku nganda kutumikisa, 18 phala kujikula o mesu mâ n’a tunde mu kitombe, n’eze mu mukengeji, n’a tunde we mukutena kwa Satanaji, n’eze mukutena kwa Nzambi. Phala o ituxi yâ a iloloke, n’a tambule undundu kala athu osole mukonda dya kixikanu kyâ kokwami.’
19 “Kyenyiki, Sobha Ngilipa, nga belesela o kima ki ngamono mu kisumwa kyatundu ku dyulu. 20 Eme ngaboko o njimbu kwila, o athu abhingile kudyela o ituxi ni kulungulula o ukexilu wâ, mu kubhanga ima ilondekesa kwila ene adyela o ituxi yâ. O njimbu yiyi nga dyangele ku ibokela akwa Damasku, mu kusuluka akwa Jeluzaleme ni oso mu mbandu ya Judeya, ni akwa jixi jengi. 21 Kiki kyene kyabhangesa o Jijudé ku ngi kwata mu tembulu, ni kumesena ku ngijibha. 22 Kuma Nzambi wene mu ngi kwatekesa, katé lelu nga musuluka mu kubhana umbangi ku makota ni ku jindenge, mu kulonga o ima yasoneka o Jipolofeta ni Mozé kwila, yeji bhita. O mikanda yiyi yambe 23 kwila Kidistu weji tala hadi, mwéne weji dyanga ku mufukununa bhukaxi ka madifundu. Weji bokela we ni kubheka o mukengeji ku kifuxi kiki ni ku akwa jixi jengi.”
24 Kyoso Phawulu kyakexile hanji muzwela, Festu wadikola, wixi: “Phawulu, eye wa musaluka! O kwijiya kwavulu kwa mu kubhangesa kusaluka!” 25 Phawulu wa mu tambwijila: “Ngana Festu, eme ki nga musaluka, maji o ima i nga muzwela yakidi, ya kilunji. 26 Mu kidi sobha, eye wejiya kyambote o ima yoso yiyi, kyene ki nga muzwelela sé héle. Ngixikina ni kidi kyoso kwila, o ima yiyi wa ijiya mwene kyambote, mukonda ka ibhangele mu kaswekele. 27 Sobha Ngilipa, uxikana ku Jipolofeta? Ngejiya kwila uxikana.” 28 Kyenyiki Ngilipa wambela Phawulu, wixi: “Kindala kiki weji ngi xikinisa kukala ngi Kidistá.” 29 Phawulu wambe: “Ngidyonda kwa Nzambi kwila kindala kiki, mba ku hádya, eye Ngana ni athu oso a mu ngivwa lelu, mu kituke kala eme, maji sé ku mikuta ni malubhambu yá.”
30 Kyenyiki, o sobha Ngilipa ni nguvulu, ni Mbelenise, ni mayala akexile-nê, emana. 31 Maji kyoso kyakexile mutunda, amateka kudikunda mudyâ, exi: “O diyala didi kabhange kima kibhangesa ku mujibha, mba ku muta mu kaleya.” 32 Kyenyiki, Ngilipa watangela Festu, wixi: “Se o diyala didi kabhingile kuya kwa Sézalu, eji mujituna.”