Daniyele

12 “Mu kithangana kyenyokyo, kwa kà tukuluka Mingyedi,* o kilamba kyadikota, kyanda zokela o mundu wé. Kwa kà kala thembu ya kutata, kiluwa i kala-ku tunde kyabhange o athu kate o thembu yiyi. Mu thembu yenyoyo, o mundu wé, kifwa, oso yó a asoneka o majina mu divulu dya Nzambi, wa kà bhuluka.* 2 Athu avulu afu* anda kwafukununa, amoxi phala kutambula mwenyu wa kalelaku, amukwa phala ku akwatesa jisonyi kate ku hádya ni hádya.

3 “O yó ala ni kilunji anda bhenya kyambote mukwa ni dyulu mu mwanya. O yó akwatekesa athu avulu kubhanga o ima yambote, anda bhenya mukwa ni jithéthembwa kate ku hádya ni hádya.

4 “Eye-phe Daniyele, o dilombolwelu dya izwelu yiyi, kikutu hanji. Kana kukitangela muthu. Jika o divulu ni kidimbu, dikale kyenyiki kate mu thembu yasukina. Athu avulu anda tokwesa kyambote o divulu didi. O kwijiya kwakidi kwanda dibandekesa.”

5 Eme Daniyele, ngamono athu ayadi emana bhu mbandu a ngiji, umoxi ku mbandu ya ngiji kunu, o mukwa ku sambwa kuná. 6 Umoxi-ku webhula o diyala dyatele izwatu ya linyu wemanene ku thandu a menya a ngiji, wixi: “Kwanda bhita thembu kuxi kate kyanda dikumbidila o ima yiyi?” 7 Mu kusuluka, ngevu o diyala dyatele izwatu ya linyu wemanene ku thandu a menya a ngiji. Mwene waleka o maku ayadi bhulu, yu waloko mu dijina dya Nzambi wene ku mwenyu, wixi: “Kwanda bhita muvu woxinde, mivu yoxinde ni kaxaxi ka muvu.* Ima yoso yiyi yanda dikumbidila kyoso kyanda bhwa o kutena kwa mundu ukôla.”

8 Eme-phe ngevu o maka, maji ka ngitetulukila. Bhenyobho ngebhula: “Ngana yami, ihi-phe yanda bhita ku disukilu dya ima yiyi?”

9 Kyenyiki, mwene wambe: “Ndé kya Daniyele, mukonda o dilombolwelu dya izwelu yiyi, kikutu hanji. Kana kuditangela muthu. U dijika ni kidimbu, dikale kyenyiki kate mu thembu yasukina. 10 Athu avulu anda dizelesa, ene anda bhanga ima yambote, o mwenyu wâ wanda yuka dingi. O athu ayibha, anda bhanga ima yayibha, o maka yá kanda ku atetulukila. Maji o yó ala ni kilunji, o maka anda ku atetulukila.

11 “Tunde o kithangana kyanda kweha kubhakula o jisata ja izuwa yoso, kate kyanda bhinganesa-bhu o kisunji kibhekela o kibwika, kwanda bhita midi hama jiyadi ni makwinyi avwa a izuwa.

12 “Wazediwa yó u kingila ni mwanyu woso, kate ku disukilu dya midi hama jitatu ni makwinyi atatu ni kitanu a izuwa!

13 “Eye-phe, kolokota kate kudizubhilu. Sumbala wanda fwa,* kudisukilu dya izuwa, anda kufukununa phala kutambula o futu yé.”