Kala Kyasoneka Luka
20 Sayi kizuwa, Jezú wakexile mu longa o mundu mu tembulu ni kwa bokela o njimbu yambote. O akunji a makota ni jimesene ja kulonga o Kijila, kumoxi ni adyakime a mundu, eza. 2 Anga a mwibhwidisa: “Tutangele, ungana wahi uwala nawu phala kubhanga o ima yiyi? Nanyi wakubhana o ungana yú?” 3 Mwene wa avutwila: “Eme wami nganda mi ibhula kima kimoxi, enu mu ngi tambwijila: 4 O ungana wa Nzwá wa kubatizala, watundile kwa Nzambi,* inga ku athu?” 5 Ene axinganeka mudyâ: “Se twamba, ‘watundile kwa Nzambi,’ mwene wanda zwela kwila, ‘mukonda dyahi-phe, ki mwa muxikina?’ 6 Maji se tuzwela kwila ‘ku athu,’ o mundu woso wanda tu buba ni matadi, mukonda ene oso axikina kwila, Nzwá wexile polofeta.” 7 Mu kyenyiki, ambe kwila kejidile se o ungana wa Nzwá watundile kwebhi. 8 Jezú wa atangela: “Eme wami kinganda mi tangela se ungana wahi ungala nawu phala kubhanga o ima yiyi.”
9 Mwene anga umateka kuta kifika ku mundu, wixi: “Sayi diyala dyakexile ni dibhya dya mividi. Mwene anga udibhana ku idimakaji phala kudilanga, yu wayi ku ixi yengi phala kukala-ku thembu yavulu. 10 Mu kithangana kya kubhongolola, mwene watumikisa mubhika umoxi ku idimakaji, phala kutambula-ku tu ibundu. Maji o idimakaji ya mubeta, anga a mu kaya ni maku ahatu. 11 Mwene watumikisa mubhika wa mukwá. A mubeta we, a mu sebhulula* anga a mu kaya ni maku ahatu. 12 Mwene watumikisa o mubhika wa katatu, maji a mu kwama we, anga a mu kaya. 13 Mukonda dya kiki, o ngana ya dibhya wambe: ‘Ihi i nganda bhanga? Nganda tumikisa o mon’ami wakazola. Nange anda muxila.’ 14 Kyoso o idimakaji kya mumono, axinganeka mudyâ, exi: ‘Yú mwéne o mulundudi. Tu mu jibhe phala o undundu uxale n’etu.’ 15 Kyenyiki, o idimakaji a mukwata, a mu takula bhu kanga dya dibhya, anga a mu jibha. Ihi-phe yanda kwa bhanga o ngana ya dibhya? 16 Mu kuvutuka, mwene wanda jibha o idimakaji yenyóyo, ni kubhana o dibhya ku idimakaji yengi.”
Kyoso kyevu o ima yiyi, ene ambe: “Tamanu ki kibhite!” 17 Mwene-phe wa atale swí, yu wambe: “Ihi-phe ilombolola o izwelu yiyi yosoneke mu Mikanda Ikôla: ‘O ditadi dya ditunu o atungi, dyene dya kituka o ditadi dya betakota’?* 18 Woso udibhala ku ditadi didi, wanda bukujuka. O woso-phe o ditadi di mu lundumukina, wanda sasujuka.”
19 O jimesene ja kulonga o Kijila ni akunji a makota, asoto ndunge phala ku mu kwata mu kithangana kyenyókyo, mukonda amono kwila mwene wakexile muzwela yalungu ni ene. Maji akexile ni wôma wa mundu. 20 Kyazubha ku mu tonginina, a tumikisa mayala a afutile kitadi phala kudilondekesa kala athu ambote, n’a mu kwate mu izwelu yê, phala ku mubhakula ku jinguvulu ni ku jingana. 21 Ene a mwibhwidisa: “Mesene, twejiya kwila u mukwa kuzwela ni kulonga mu kidi, ni kwila ki wene mu londekesa katombo, maji ulonga o kidi kyalungu ni Nzambi: 22 O kwila twatokala* kufuta o lubhaku kwa Sézalu, inga kana?” 23 Maji Jezú watongolola o mangonya mâ, yu wa ambela: 24 “Ngi londekesyenu denádyu dimoxi. O pholo yiyi ni kidimbu kiki kya nanyi?” Ene a mu tambwijila: “Kya Sézalu.” 25 Mwene wa atangela: “Bhanenu kwa Sézalu o ima ya Sézalu, maji kwa Nzambi, o ima ya Nzambi.” 26 Kyenyiki, ene katena ku mu kwata mu ima ya zwela bhu pholo ya mundu, maji adiwana ni kitambwijilu kyê, anga adixibha.
27 Kyenyiki sayi Jisadusewu, yó kaxikina kwila kwene difukunukinu, eza kwa mwene, ya a mwibhwidisa: 28 “Mesene, Mozé wa tu sonekena kwila: ‘Se diyala ufwa anga uxisa o muhatu sé kuvwala-n’ê twana, o phang’yê watokala kukazala ni mutudi n’a vwale ana phala kusokolola o mwiji wa phang’yê wafu.’ 29 Kwexile sambwadi dya jiphange ja mala. O wa dyanga wakazala, maji wafu sé kuvwala twana. 30 O wa kayadi 31 ni wa katatu akazala ni mutudi. Kyene kyabhiti we ni sambwadi dya jiphange; ene oso afu sé kuvwala twana. 32 Mu kusuka-ku o muhatu wafu we. 33 Kyenyiki, ku difukunukinu mwene wanda kala muhatu wa nanyi? Mukonda o sambwadi akazala-n’ê.”
34 Jezú wa atangela, wixi: “O athu a mundu yú* akazala, ya a abhana mu ukaza, 35 maji o yó afwama kutambula o mwenyu ku mundu wanda kwizaku ni kwa fukununa mw’alunga, kanda kazala né kwa bhana mu ukaza. 36 Mu kidi, ene katena kufwa dingi, mukonda ala kala o jianju, ene an’â Nzambi mukonda dya kukala an’a difukunukinu. 37 Maji kwila o madifundu anda fukunuka, katé mwene Mozé wejidisa o kidi kiki kyoso kyazwela yalungu ni kisasa, kyambe kwila Jihova mwéne ‘o Nzambi ya Mbalahamu, Nzambi ya Izake ni Nzambi ya Jakobo.’ 38 Mukonda mwene ki Nzambi ya madifundu, maji ya athu ala ku mwenyu, mukonda phala mwene, ene oso ala ku mwenyu.” 39 Sayi jimesene ja kulonga o Kijila, ambe: “Mesene, wazwela kyambote.” 40 Kyenyiki, ene katenene dingi ku mubhanga né ngó kibhwidisu kimoxi.
41 Mwene anga wa ebhwidisa: “Mukonda dyahi-phe o athu amba kwila Kidistu mon’â Davidi? 42 Kuma mu divulu dya Jisálamu, Davidi wambe: ‘Jihova watangela Ngana yami: “Xikama bhu mbandu yami ya kadilu, 43 katé ki ngitula o jinguma jé, bhoxi dya inama yé.”’ 44 Se Davidi u mwixana Ngana; kyebhi-phe Kidistu kyakala mon’ê?”
45 Kyoso o mundu kyakexile ku mwivwa, mwene watangela o maxibulu mê: 46 “Dilangyenu ni jimesene ja kulonga o Kijila, awabhela kwenda ni izwatu yalebha ni kwa menekena mu itanda, awabhela we o ididi ya betakota* mu malombe* ni mu jifesa, 47 Ene atambula o ima yangene ya atudi,* abhanga misambu yalebha, phala kwa ximana ku athu. O kaxitiku kâ kanda betakota.”*