Ikalakalu ya Jipoxolo
12 Mu izuwa yenyóyo sobha Helode wamateka kuzukutisa o athu mu kilunga. 2 Mwene watumu kujibha ni xibhata Tiyaku, phang’ya Nzwá. 3 Mu kumona kwila, kiki kyakexile mu sangulukisa o Jijudé, mwene wakutu we Phetele. (Kiki kyabhiti mu kithangana kya Jimbolo ja kambe o Felemendu.) 4 Mwene wa mukutu, yu watumu ku muta mu kaleya, wa mu bhakula bhu maku a ibuka iwana ya masoladi, kala kibuka ni masoladi awana. Helode wamesenene ku mu londekesa ku mundu* kyoso kyeji bhita o Fesa ya Phasu. 5 Kyenyiki, Phetele ukala mu kaleya, maji o athu mu kilunga akexile ku mu sambela kwa Nzambi ni kuswina kwoso.
6 Mu usuku ande dya Helode kubheka Phetele bhu pholo dya mundu, Phetele wakexile muzeka, a mu kutile ni malubhambu ayadi mu maku. Mwene wakexile bhukaxi ka masoladi ayadi, bhu dibhitu bhwa kexile masoladi akexile mu langa o kaleya. 7 Mu kithangana kyenyókyo, o anju ya Jihova yatuluka. Mu kaleya mwa mwika mukengeji. O anju ya kwata ku jimbanji ja Phetele, ya mu phaphumuna, ya mwambela: “Balumuka ni lusolo!” O malubhambu a mukutile nawu o maku, abu. 8 O anju ya mwambela: “Disokejeke, ta o jihayi jé.” Phetele anga ubhanga kiki. Mu kusuka-ku ya mwambela: “Zwata o divunga dyé, ngi kayele.” 9 Phetele watundu, wa mukayela, maji kejidile kwila, o ima yakexile mubhita bhukaxi ka anju yexile yakidi mwene. Wabanzele kwila, kisumwa. 10 Kyoso ene kyabhiti ku kibuka kya dyanga ni kya kayadi kya alangidi, abhixila bhu dibhitu dya felu dya ku tundila bhu kanga dya mbanza. O dibhitu anga dijikuka mudyê. Kyoso kya tundu mu kaleya, amateka kwendela mu kikoka, mu kithangana kyenyókyo, o anju ya muxisa. 11 Kyazubha kutongolola o ima yakexile mubhita, Phetele wambe: “Kindala ngejiya ni kidi kyoso kwila, Jihova watumikisa o anju yê, yu wa ngi bhulula bhu maku a Helode ni ku ima yoso yamesenene o Jijudé kwila ibhita n’eme.”
12 Kyazubha kubhita o ima yiyi, mwene wayi ku inzo ya Madiya many’a Nzwá amwixana we Máluku, mwa dyongekele athu avulu akexile mu samba. 13 Kyoso kya phuphu ku dibhitu, selevende ya muhatu amwixana Lode wayi mu mu jikwila. 14 Mwene kyevu o dízwi dya Phetele, dibhitu ka di jikula dingi mukonda wa sanguluka, mwene wayi ni kulenga m’onzo mutangela o jiphange kwila Phetele wemana bhu mwelu. 15 A mwambela, exi: “Eye wa saluka!” Maji mwene wa jiji mu kwa tangela kwila kidi mwene. Ene ambe: “Yóyo o anju yê.” 16 Phetele wasuluka mu ku phupha o dibhitu. Kyoso kya dijikula, a mu mono anga adiwana. 17 Mwene wa abhange kijimbwete ni lukwaku phala adixibhe, yu wa alombolwela kyambote kyebhi Jihova kya mu katwile mu kaleya, anga wa ambela, wixi: “Tangelenu o ima yiyi kwa Tiyaku ni ku jiphange.” Kyenyiki, mwene watundu-mu, yu wayi bhu kididi kyengi.
18 Mu kimene, kukala kavwanza mwaxaxi ka masoladi, ene akexile mu dibhwidisa se ihi ya bhitile ni Phetele. 19 Helode wa musoto kyambote, kuma ka musange, webhwidisa o alangidi yu watumu kwa ambata phala kwa kaxtikala. Helode anga utunda ku Judeya, uya ku Sezaleya, kwenyóko wa bhiti-ku tu izuwa.
20 Helode wakexile ni njinda* ya akwa Tilu ni akwa Sidónya. Ene abakana kudisanga-nê. Kyazubha kuzwela ni Balastu o kimbadi kya inzo ya sobha,* abhingi n’a kale ni paze ni sobha, mukonda o ixi ya Helode yene yakexile mu bhana o kúdya ku jixi jâ. 21 Sayi kizuwa Helode wate izwatu ya usobha, waxikama ku kyandu kya ungana yu wamateka kuzwela bhu pholo dya mundu. 22 O mundu wa bhongolokele wamateka kudikola: “Didi dízwi dya nzambi, ki dya muthu kana!” 23 Mu kithangana kyenyókyo o anju ya Jihova ya mu kwama, mukonda kabhana kijingu kwa Nzambi. Mwene a mudi ku mawindu,* yu wafu.
24 O mak’â Jihova akexile mu dimwanga dingi, athu avulu exile muxikana.
25 Kyoso Balanabé ni Sawúlu kyazubha o kikalakalu kyâ kya kukwatekesa o jiphange mu Jeluzaleme, avutuka ku Andiyokiya, ya ambata Nzwá amwixana we Máluku.