Kala Kyasoneka Matesu

14 Mu kithangana kyenyókyo, Helode mwenexi ya mbanza ya Ngalileya, wevu o ima yakexile mu bhanga Jezú, 2 anga utangela o jiselevende jê, wixi: “Yú Nzwá dya Batizu, a mu fukununa mw’alunga, kyene kya mu bhanga o madiwanu* yá.” 3 Helode* wakwatele Nzwá, yu wa mu kutile mu kaleya, mukonda dya Helodiya muhatu wa phang’yê Filipe. 4 Mukonda Nzwá wakexile mu mwambela, wixi: “Mwene katokala kukala muhatu wé.” 5 Sumbala Helode wamesenene ku mu jibha, mwene wakexile ni wôma wa mundu, mukonda a mu xikanene kwila polofeta. 6 Maji, mu kizuwa kyoso Helode kyatenesa mivu, o mon’a muhatu wa Helodiya, wa kini bhu pholo ya ajitu, Helode anga ki mu wabhela kyavulu. 7 Mu kyenyiki mwene wa mu lôkela kwila, weji mu bhana yoso yeji mu bhinga. 8 Kuma a mu funyisa kwa many’â, mwene wambe: “Ngibhane bhenyabha, o mútwe wa Nzwá dya Batizu bhu dilonga dyonéne.” 9 Sumbala ni kuluwala, o sobha watumu ku mu bhekela o mútwe, mukonda dya kulôka kwê ni kuxila o ajitu akexile mu dya* nê kumoxi. 10 Mu kiki, mwene watumu kubatula o mútwe wa Nzwá mu kaleya. 11 Anga abheka o mútwe bhu dilonga dyonéne, a ubhana o mon’a kilumba, yu wa ubhana kwa many’â. 12 Maxibulu mê anga eza akatula o kimbi kyê, ya ayi mu ki funda. Mu kusuluka, ayi mu tangela Jezú o ima yabhiti. 13 Kyoso Jezú kyevu o maka yá, utunda mu kididi kyenyókyo ni ulungu, anga uya kididi kyéngi n’a kale ubheka. Maji kyoso o athu kya k’ivu, atundu mu jimbanza jâ, yá a mu kayela bhoxi.

14 Kyabhixila bhu mbandu a kalunga,* wamono mundu wavulu, mwene anga wa akwatela henda, hé usaka o jihaxi jâ. 15 Mu kutula mu ngoloxi o maxibulu mê a mu zukama, anga azwela, exi: “Mumu, mu mukáwu mu twala, dikumbi dyafu kyá. Eha o mundu kuya mu jisanzala phala kusumba kúdya.” 16 Maji Jezú wa atangela, wixi: “Ene kabhingi kuya; bhanenu-wu kima phala kúdya.” 17 Ene a mu tambwijila, exi: “Bhabha, kitwala ni kudya kwasoko, twala ngó ni mbolo jitanu ni jimbiji jiyadi.” 18 Mwene wambe: “Ngi bhekelyenu-ju.” 19 Mwene anga utumina o mundu kuxikama ku yangu. Yu wakatula mbolo jitanu ni jimbiji jiyadi, watale ku dyulu, wasambe, anga ujibukula ujibhana ku maxibulu, ene anga a jiwanena o mundu. 20 Mu kiki-phe athu oso adi, ekuta, ya abhongolola o ibhasu yasubhuka, anga itenesa kwinyi ni kiyadi kya inda yezala. 21 O athu adi atenesa midi jitanu ja mala, o ahatu ni ana ndenge ka atange. 22 Mu kithangana kyenyókyo, kyoso mwene kyakexile musula o mundu mwene wa tumu o maxibulu mê kudilônga mu ulungu ni ku mu twamenena ku sambwa, maji mwene wakexile hanji mu lekela o mundu.

23 Kyazubha kulekela o mundu, mwene wabande ubheka wê ku mulundu phala kusamba. Mu usuku, mwene wakexile-ku ubheka wê. 24 O ulungu wakexile kyá dikanga,* o mabhuku anga akala mu dibeta-ku ni nguzu yavulu mukonda dya kitembu. 25 Mu kukya,* mwene wayi mu disanga na-wu, mu kwendela kuthandu a menya a kalunga. 26 Kyoso o maxibulu kya mu mono kwendela kuthandu a menya, ene a sasumuka, anga azwela, exi: “Kiki kisunji!” anga adikola ni wôma. 27 Mu kithangana kyenyókyo Jezú wa atangela, wixi: “Swinenu! Eme mwene, kimukale ni wôma.” 28 Phetele anga u mu tangela, wixi: “Ngana se eye mwéne, ngi tume ngi ku sange koko kuthandu a menya.” 29 Mwene wa mwambela, wixi: “Zá!” Phetele anga utunda mu ulungu, anga wendela kuthandu a menya mu kudisanga ni Jezú. 30 Maji kyoso kyamono o kitembu kyadikota, wôma wa mu kwata. O kyamateka o kuboba, mwene wadikola, wixi: “Ngana, ngi bhulule!” 31 Jezú-phe ni lusolo lwoso usununa o lukwaku lwê, u mu kwata, anga u mwambela, wixi: “Eye watolo o kixikanu, o phata ya ku kwatela-hi?” 32 Kyoso kya dilôngo mu ulungu, o kitembu kyadikota kya tululuka. 33 O maxibulu akexile mu ulungu a mu fukamena,* anga a mwambela, exi: “Mu kidi, eye u Mon’a Nzambi mwene.” 34 Ene a bhixila ku sambwa, atuluka mu Jenezalé.

35 Kyoso kya mu mono, o athu mu kididi kyenyókyo abhana ngolokela mu jimbanza joso ja zukamene, o mundu anga u mu bhekela o jihaxi joso. 36 Ene anga a mu dyondela phala kwa ehela ku mu kwata ngó ku mbandu ya kizwatu kyê. Athu oso akexile mu kwata ku kizwatu kyê, akexile mudisanza.