Kala Kyasoneka Nzwá
9 Kyoso Jezú kyakexile mu kwenda, wamono diyala a muvwala kyá kifofo. 2 O maxibulu mê anga amwibhula, exi: “Mesene,* o diyala didi, phala ku muvwala kifofo, nanyi wate kituxi, mwene inga o jitata jê?” 3 Jezú watambwijila, wixi: “Kikale mwene mba o jitata jê kate kituxi, maji kiki kyabhiti, phala o athu amone o kutena* kwa Nzambi. 4 Kyoso kikwala hanji mwanya, twatokala kubhanga o ikalakalu ya Yó wa ngi tumikisa, mukonda usuku yu wiza, sé-ku muthu wanda tena kukalakala. 5 Kuma ngala hanji mu ngongo, ngi mukengeji wa mundu.” 6 Kyazubha kuzwela o ima yiyi, wate máthe bhoxi, ubhanga malôwa ni mathe mê, anga u ata mu mesu a diyala, 7 yu wa mutangela, wixi: “Ndé wadisukule mu ditangi dya Silôwa” (dijina didi dilombolola, “A Mu Tumu”). O diyala wayi, wadisukula anga wavutuka ni kumona.
8 Kyenyiki, o jivizinyu jê ni yó akexile mu mu mona kubhinga jimola, adibhwidisa, exi: “Yú ki mwéne o diyala wakexile muxikama mu ikoka ni kubhinga jimola?” 9 Sayi yá, akexile muzwela: “Mwéne mwene.” A mukwá, exi: “Kana, wadifwangana ngó ni mwene.” Maji o diyala wakexile muzwela: “Éme mwene.” 10 Ene anga a mwibhwidisa, exi: “Kyebhi o mesu mé, kya jikuka?” 11 Mwene wa a tambwijila, wixi: “O diyala a mwixana Jezú wa bhange malôwa, wa a te mu mesu mami, anga wa ng’ambela, wixi: ‘Ndé wa di sukule mu ditangi dya Silôwa. Kyenyiki, ngayi, nga di sukula, eme nga mateka o kumona.” 12 Mukonda dya kiki, ene a mwibhwidisa, exi: “O diyala didi wala kwebhi?” Mwene wa tambwijila, wixi: “Ki nga kijiya.”
13 Ene anga ambata o diyala dyexile kifofo, ku Jifalizewu. 14 Kyexile kizuwa kya Sábhalu, kyoso Jezú kyabhangele o malôwa ni kujikula o mesu a diyala. 15 Kyenyiki, o Jifalizewu akala we ku mwibhwidisa, se kyebhi kyamateka o kumona. Mwene wa atambwijila, wixi: “Mwene wate malôwa mu mesu mami, nga di sukula, anga ngamateka o kumona.” 16 Amoxi ku Jifalizewu ambe, exi: “O diyala didi katundu kwa Nzambi, mukonda mwene kaxila o kizuwa kya Sábhalu.” A mukwá ambe, exi: “Kyebhi o muthu mukwa ituxi utena kubhanga o madiwanu yá?” Mu kiki, ene a diwanuna mu ibuka. 17 Ene ebhwidisa dingi o diyala wexile kifofo, exi: “Kuma mwene wajikula o mesu mé, ihi i wamba yalungu ni mwene?” O diyala wa atambwijila: “Mwene polofeta.”
18 Maji o Jijudé kaxikina kwila mwene wexile kifofo ni kwila wamateka o kumona. Kyenyiki exana o jitata jê, 19 anga a ebhwidisa, exi: “Yú mwene mon’enu mwa mutange kwila, mwa muvwala kifofo? Kyebhi mwene kindala wa mu mona?” 20 O jitata jê atambwijila: “Twejiya kwila yú mon’etu, ni kwila twa muvwala mwene kifofo. 21 Maji ki twejiya se kyebhi mwene kindala wa mu mona kyá, mba se nanyi wa mu jikula o mesu. Mu ibhwidisyenu, mwene wala kyá mu kitala kya soko, azwele mudyê.” 22 O jitata jê azwela o ima yiyi mukonda akexile ni wôma wa Jijudé, kuma o Jijudé atele kikutu kwila, muthu woso-woso weji xikina Jezú kala Kidistu, atokalele ku mu kaya mu dilombe.* 23 Kiki kyene kyabhangesa o jitata jê kuzwela kwila: “Mwene wala kyá mu kitala kya soko. Mu ibhwidisyenu.”
24 Kyenyiki, o Jijudé exana dingi o diyala wexile kifofo, anga a mwambela, exi: “Fumanesa Nzambi! Mukonda o diyala didi, mukwa ituxi.” 25 Mwene wa avutwila, wixi: “Se mwene mukwa ituxi, ki nga kijiya. Ngejiya ngó kima kimoxi, ngexile ngi kifofo, kindala nga mu mona.” 26 Ene a mu ibhwidisa, exi: “Mwene wa ku bhange ihi? Kyebhi kya kujikula o mesu?” 27 Mwene wa atambwijila, wixi: “Eme nga mi tangela kyá, maji ki mwa ng’ivu. Mukonda dyahi mwa mesena kwívwa dingi lwa mukwá? O kwila enu wenu mwamesena kukala mu maxibulu mê?” 28 Mukonda dya kiki, ene a mu sebhulula, exi: “Eye u dixibulu dya diyala dyódyo, maji etu tu maxibulu a Mozé. 29 Twejiya kwila Nzambi wazwela ni Mozé, maji o diyala didi, kitwejiya se mwene watundu kwebhi.” 30 O diyala wa atambwijila, wixi: “O izwelu yenu, i ngi bhangesa kudiwana! Enu mwa kambe kwijiya kwebhi kwatundu mwene, sumbala wa ngi jikula o mesu. 31 Twejiya kwila Nzambi kene mu kwívwa akwa ituxi, maji se muthu ukala ni wôma wa Nzambi ni kubhanga o vondadi yê, mwene u mwívwa. 32 Tundé ukulu, kiluwa twívwa muthu woso-woso wajikula mesu a muthu a muvwala kifofo. 33 Se o diyala didi katundile kwa Nzambi, mwene keji tena kubhanga kima.” 34 Ene a mwambela: “Eye a kuvwala mu nzungule dya ituxi, wamesena utulonga?” Ene anga a mu kaya mu dilombe.*
35 Jezú wevu kwila, o Jifalizewu akaye o diyala. Kyoso kya mu sange, wa mwibhwidisa: “Eye wa xikana o Mon’a muthu?” 36 O diyala wa mu tambwijila: “Ngana, mwene nanyi? Ngi tangele, phala ngi mu xikane!” 37 Jezú wa mwambela: “Eye wa mu mwene kyá, mu kidi, mwéne o muthu wa muzwela n’eye.” 38 O diyala wambe: “Ngana, eme nga muxikana”. Anga u mu fukamena. 39 Jezú wambe, wixi: “Eme ngeza mu ngongo phala Nzambi afundise o ngongo yiyi. Phala oso ka mu mona, amone, o yó a mu mona, akale ifofo.” 40 Sayi Jifalizewu akexile nê kumoxi evu o ima yiyi, a mu ibhwidisa, exi: “O kwila etu twala we tu ifofo?” 41 Jezú wa ambela: “Se mwexile mu ifofo, ki mweji kala ni kikuma kya ituxi. Kuma mwa mu zwela kwila, ‘twa mumona,’ mukala jinga ni ituxi yenu.”