Kisumwa Kyalondekesa Kwa Nzwá

11 Anga angibhana lumbungu lwadifwangana ni mbangala ya kuzonga, kyoso o anju kyakexile mu ngambela: “Balumuka uzonge o tembulu ya Nzambi ni kalatódyu kê, ni yó a mubheza mwenyómo. 2 Maji kana kuzonga o kithádi kya kanga kya tembulu, mukonda akibhana ku akwa jixi jengi, ene anda titidila o mbanza ikôla mu makwinyi awana ni kiyadi kya jimbeji. 3 Nganda bhangesa kwila o jimbangi jami jiyadi, jitanga o maka a upolofeta mu midi ni hama jiyadi ni makwinyi asamanu a izuwa. Ene anda zwata izwatu ya jisaku. 4 O jimbangi jiyadi jilombolola o mixi iyadi ya midiva, ni tundeya tuyadi twemana bhu pholo ya Ngana ya ngongo yoso.

5 Se bhukala muthu umesena kwabhanga kima kyayibha, mu makanu mâ mwanda tunda túbhya, o túbhya twanda jibha o jinguma jâ. Se bhukala muthu umesena kwabhanga kima kyayibha, mwene wanda fwa mu ukexilu yú. 6 Ene ala ni ungana wa kujika o dyulu phala ki kunoke mvula mu izuwa yoso yanda tanga o mak’â Nzambi kala jipolofeta. Ene ala we ni ungana wa kubhilula o menya n’a kituke manyinga, phala kubwikisa o ngongo ni mabhebhu oso mu jiveji jamesena.

7 Kyoso o jimbangi jiyadi kyanda zubha kubhana o umbangi wâ, o kyama kya muxitu kya mutunda mu dikungu dyazongo, kyanda lwa ita ni ene ni kwa tolola ni kwa jibha. 8 O imbi yâ yanda xala mu kikoka kya mbanza yadikota mwa jibhile we o Ngana yâ ku taka.* O mbanza yiyi ilombolola Sodoma ni Ijitu. 9 Athu avulu mu madyembu moso, mu miji yoso, mu madimi ni mu ifuxi, anda tala o imbi ya jimbangi jiyadi mu izuwa itatu ni kaxaxi, o athu kanda kwehela kufunda o imbi yâ mu mbila. 10 O athu atungu mu ngongo anda sanguluka kyavulu ni kudibhana maujitu mukonda dya ene, kuma jipolofeta jiji jiyadi jakexile mutalesa hadi ku athu atungu mu ngongo.

11 Kyoso kyabhiti o izuwa itatu ni kaxaxi, Nzambi wa abhana dingi o muha wa mwenyu ene anga emana, o athu amono o ima yiyi kubhita, akexile ni wôma wavulu. 12 O jimbangi jiyadi evu dízwi dya swina dya tundu ku dyulu dya ambela: “Bandenu kuku.” Bhukaxi ka dituta, ene abande katé ku dyulu, o jinguma jâ a amono.* 13 Mu kithangana kyenyókyo, kwabhiti kitungutu kyadikota kya ixi, o mbandu ya kakwinyi ya mbanza yabu, sambwadi dya jimidi ja athu afwila mu kitungutu, o athu asubhuka akexile ni wôma, ene anga aximana Nzambi ya dyulu.

14 O dilamba dya kayadi dyabhiti kyá. Talesa! O dilamba dya katatu didiza ni lusolo.

15 O anju ya kasambwadi yaxiki o koloneta yê. Ku dyulu anga kukala mázwi aswina ambe: “O utuminu wa ngongo, wakituka o Utuminu wa Ngana yetu ni wa Kidistu yê. Mwene wanda tumina katé ku hádya ni hádya.”

16 O makwinyi ayadi ni kiwana kya tufunga, axikama ku yandu bhu pholo ya Nzambi, afukama ni jipholo bhoxi anga abheza Nzambi. 17 Ene amba: “Twa kusakidila Jihova Nzambi, o Muteni-a-Yoso yó wene-ku, yó wakexile-ku, mukonda walondekesa o kutena kwé kwadikota, eye wamateka kya o kutumina. 18 Maji o ifuxi ya futuluka, o kizuwa kya njinda yé kyabhixila. O kithangana kyoxinde phala kufundisa o madifundu ni kubesowala o abhik’é o jipolofeta, o athu osole* ni yó axila o dijina dyé kikale o ana ndenge ni makota kyazukama. Kithangana kyabhixila kya kubwikisa yó ene mu bwikisa o ixi.”

19 Kyenyiki o tembulu ya Nzambi mu dyulu yajikuka, anga kumoneka o alaka ya kikutu kyê mu tembulu yê, kukala jinzaji, mázwi, inuminu, kitungutu ni mvula yadikota ya matadi.