O Mukanda wa Kayadi kwa Timote
4 Ngi kutendelesa ni kidi kyoso bhu pholo ya Nzambi, ni ya Kidistu Jezú, yó wanda fundisa o athu ala ku mwenyu ni madifundu mu kutukuluka kwê, ni mu Utuminu wê kwila: 2 Boka o maka a Nzambi, bhanga kyenyiki ni lusolo, kikale mu ithangana yambote mba mu ithangana yabhonzo, u atendelesa, u abazela, u adimuna ni mwanyu woso ni uhete woso wa kulonga. 3 Kwanda bhixila kithangana o athu kanda xikina dingi o ulongelu wambote,* maji mu kukayela o jihânji jâ jayibha anda disotela ndumba dya jimesene phala kwatangela yoso yamesena kwívwa.* 4 Muveji dya kubhana mátwi ku milongi ya kidi, ene anda bhana mátwi mu misoso ya makutu. 5 Eye-phe, enda ni kudilanga mu ima yoso, kolokota mu kutala hadi, bhanga o kikalakalu kya mukunji,* kumbidila kyambote o kikalakalu kyé kwa Nzambi.
6 Kuma a mu ngi zunzumuna kya kala ngisata ya uhôlwa, o ola ya ku ngibhulula yazukama kya. 7 Nga lwu ita yambote, ngalenge o dikanga dyoso dya ngixindile, ngakolokota mu kixikanu. 8 Tunde lelu ndu ku hádya nga mukingila jinga o kitundu kya kuyuka kya ngibhakela, kyanda ngibhana o Ngana, o mufundixi wayuka kala futu, mu kizuwa kya kezaku. Keme ngó, maji ni oso yó a mu kingila o kutukuluka kwê.
9 Bhanga yoso i utena phala kwiza mu ngi kunda kindala. 10 Kuma Demaze wa ngi bwazeka* mukonda dya kuzola o mundu yú,* mwene wayi ku Tesalonika. Kelesende wayi ku Ngalásya, o Titu wayi ku Ndalamaxya. 11 Luka mwene ngó waxala bhabha kumoxi neme. Kyoso ki wanda kwiza, wiza ni Máluku mukonda mwene wanda ngi kwatekesa kyavulu mu sidivisu yami kwa Nzambi. 12 Maji Tikiku nga mu tumikisa ku Efezu. 13 Kyoso ki wanda kwiza, ngibhekele o kapote ku ngaxisa ku Tolowade mu inzo ya Kalupu. Ngibhekele we o madivulu bengebenge o mikanda ya malânda.
14 Xandele o mukalakadi* wa kobidi, wa ngibhange phulu yavulu. Jihova wanda muvutwila mu ima yoso yene mubhanga. 15 Eye-phe, watokala we kudilanga ni mwene, mukonda mwene kaxikina o njimbu itwene muboka.
16 Muveji ya dyanga i ngazokela o kixikanu kyami, seku muthu wakexile ku mbandu yami, maji enyoso a ngi bwazeka,* kota se Nzambi ka afundise mukonda dya kima kiki. 17 Maji Ngana wakexile ku mbandu yami yu wa ngiswinisa phala bhukaxi kami, o njimbu yambote azubhe ku iboka, o akwa jixi joso n’a ivwe. Ngana wa ngibhulula mu dikanu dya hoji. 18 Ngana wanda ngikudila ku ima yoso yayibha, ni ku ngibhulula phala ku ng’ambata ku Utuminu wê wa dyulu. O fuma yoso ikale ya mwene katé ku hádya ni hádya. Kyene.*
19 Menekena o mwiji wa Pidisila ni Akila, ni mwiji wa Onezifolo.
20 Elastu waxala mu mbanza ya Kolindu, Tolofimu nga muxisa ku Miletu maji wakate. 21 Bhanga yoso phala u ngisange ande dya kubhixila o kixibhu.*
Ebulu ni Pude, ni Linu ni Kilawudya ni jiphange joso, a kutumikisa o umenekenu.
22 Ngana abesowale o ukexilu u mwene mu londekesa. O ngalasa ya Nzambi ikale ni enu.