Ku Akwa Loma
11 Kyenyiki, ng’ibhula: O kwila Nzambi waditunu o mundu wê? Kana! Eme wami ngi mukwa Izalayele, ngatundu ku mbutu ya Mbalahamu, ku mwiji wa Bejamí. 2 Nzambi kaditunu o mundu wê wadyangele ku usola. Enu ki mwejiya ihi izwela o Mikanda Ikôla yalungu ni Elija? Mwene wadikola kwa Nzambi, mukonda dya Izalayele, wixi: 3 “Jihova, ene ajibha o jipolofeta jé, abulu o jikalatódyu jé. Kindala, ene andala we ku ngijibha!” 4 Maji ihi ya mutangela Nzambi? Mwene wa mutangela, wixi: “Ngala hanji ni sambwadi dya midi ya athu aditunu kubheza Bahale.” 5 Kyene we kimoxi, mu thembu yiyi, Nzambi, bhukaxi ka ngalasa yê, wasolo kibuka kyofele kya athu. 6 Mwene wa asolo mukonda dya ngalasa yê, kana mu ibhangelu yâ. Se ene a asolele mukonda dya ibhangelu yâ, kikyeji kala dingi mu ngalasa ya Nzambi.
7 Ihi itwamba? O kima kya mesenene akwa Izalayele, ki oso akitambula, maji athu ofele ngó a asolo éne akitambula. O athu amukwá aditunu kwívwa. 8 Kala kya ki soneka mu Mikanda Ikôla, exi: “Nzambi wa a kolesa o mixima ni ilunji yâ, phala katene kumona ni mesu mâ, né kwívwa ni mátwi mâ, katé mu kizuwa kya lelu.” 9 Davidi wambe we: “O jifesa jâ jikituke mubhetu ni ditadi dya kudibhukana, phala ene atambule kaxtiku. 10 Mesu mâ akale mwavundu phala kamone, akotamese jinga o makunda mâ ni imbamba yaneme.”
11 Kyenyiki, ng’ibhula: O kwila o Jijudé kyoso kyadibhale, adibhale sé kukala ni kidyelelu kya kubalumuka? Kana! Kuma ene abhukumukina o Kijila, o athu akwa jixi jengi atambula o kubhuluka, o kiki kyabhangesa o Jijudé kukala ni difuba. 12 Kyenyiki, sayiku mabesá phala o athu oso mu ngongo. O Jijudé atambula mabesá ofele, phala o akwa jixi jengi atambule dingi ene ndenge. O mabesá enyá anda vula dingi kyoso ene kyanda tenena!
13 Kindala nga mu mizwelela enu mu akwa jixi jengi. Kuma ngi poxolo phala o athu akwa jixi jengi, nga mu jingisa* o ukunji wami, 14 phala kubhangesa o mundu wami* kukala ni difuba ni kubhulula amoxi mudyâ. 15 Kuma ene a asandula kwa Nzambi, kiki kya kwatekesa amoxi mu ngongo kukala ni ukamba ni Nzambi. Se mwene uxikina dingi o Jijudé, kiki kyanda kala kála a abheka dingi ku mwenyu. 16 Kyenyiki, se o mbandu ya dyanga ya mbolo a imona kala ikôla, o mbolo yoso ikôla we. Se o jindanji ja muxi jikôla, o jithangu jikôla we.
17 Sayi jithangu a jibatula. Sumbala enu mwexile mu mixi ya midiva ya muxitu, a mi phaphe mwaxaxi ka jithangu ja subhuka. Mwabhange we mbandu mu kutambula umvwama ku jindanji ja muxi wa midiva. 18 Maji kanenu kubanza* kwila enu mwa betakota, o jithangu ja mukwá ndenge. Se mwa mubanza* kwila enu mwa betakota, lembalalenu kwila, k’enu mwakwata o jindanji, maji o jindanji jene ja mikwata. 19 Sayi muthu mudyenu wanda zwela, wixi: “O jithangu a jibatula phala n’a ngi phaphe-ku.” 20 Kyene mwene! Ene a abatula mukonda kalondekesa kixikanu, maji enu mwaxala mukonda mwa londekesa kixikanu. Kyenyiki, kanenu kudizangeleka, maji kalenu ni wôma wa Nzambi. 21 Se Nzambi wabatula o jithangu ja dyanga ja muxi wa midiva, mwene utena we ku mibatula enu. 22 Enu mwatena kumona o ngalasa ya Nzambi ni njinda yê. Mwene walondekesa o njinda yê ku jithangu jobatule. Maji se mu nangenena mu ngalasa yê, mwene wanda mi londekesa o ngalasa yê. Se ki mubhange kiki, enu wenu anda mibatula. 23 Maji se o Jijudé alondekesa dingi kixikanu, anda kwa phapha dingi ku muxi wa midiva, mukonda Nzambi utena kwa phapha dingi. 24 Mukonda enu a mibatula ku muxi wa midiva wa muxitu, ya a mi phaphe ku muxi wa midiva wokune, sumbala kene mu kibhanga lwavulu. O kwila kyanda bhonza ku phapha dingi o jithangu ja dyanga jobatule ku muxi wâ wa midiva?
25 Jiphange jami, ngamesena kwila mwijiye kyambote o ikutu yiyi ya Nzambi, phala ki mubanze kwila mwala mu jinjimu. Sayi athu ku akwa Izalayele axiti o mátwi mâ. Kiki kyanda bhita katé kyanda tenena o athu oso akwa jixi jengi a asolo kwala Nzambi. 26 Kyenyiki kyene ngó akwa Izalayele oso anda bhuluka. Kala kyamba o Mikanda Ikôla, exi: “O mubhuludi wanda tunda mu Ziyone, wanda katula o kuyibha kwoso ku mwiji wa Jakobo. 27 Kiki kyene o kikutu kinganda ta ni ene, kyoso kinganda loloka o ituxi yâ.” 28 Sayi athu ku Jijudé aditunu o njimbu yambote, o kiki kya mibhekela mbote. Maji ene a asolo kwa Nzambi, mwene wa azolo mukonda dya jikuku jâ. 29 Nzambi kanda dyela ku maujitu abhana mwene. Mwene kanda dyela we mu kwixana o athu a asolo. 30 Mukonda m’ukulu enu mwexile mu bhukumukina Nzambi, maji kindala mwene wa mikwatela henda, mukonda dya kubhukumuka kwa Jijudé. 31 Kindala ene akwa kubhukumuka, maji enu Nzambi wa mikwatela henda, phala ene a akwatele we henda kala kya mikwatela enu. 32 Kuma ene oso a akutu kwa Nzambi mukonda dya kubhukumuka kwâ, phala mwene akwatele henda ku athu oso.
33 O maumvwama a Nzambi, o unjimu ni kwijiya kwê kwazongo kinene! O kufundisa kwê, o athu katena ku kutongolola, o jinjila jê o athu katena ku jijiya! 34 Kala kyósoneke mu Mikanda Ikôla, exi: “Nanyi utena kwijiya o ixinganeku ya Jihova? Nanyi utena ku mutangela o ima yatokala kubhanga?” 35 Mba “nanyi wa twamene kubhana kima kwa Nzambi, phala Nzambi n’a mu vutwile nakyu?” 36 Mukonda Nzambi mwéne wabhange o ima yoso. Yeneku mukonda dya kutena kwê, yeneku phala mwene. O fuma ikale ya mwene katé ku hádya ni hádya. Kyene!*