Ku Akwa Loma
5 Kindala kya tumono kala tu athu ayuka mukonda dya kixikanu kyetu, tukale ni ukamba wambote* ni Nzambi bhukaxi ka Ngana yetu, Jezú Kidistu. 2 O kixikanu kyetu ki tu kwatekesa kuzukama kwa Nzambi ni kutambula o ngalasa ya Nzambi. Tutena kusanguluka mukonda twala ni kidyelelu kya kutambula o fuma ya Nzambi. 3 Ki kyene ngó, maji tusanguluka we mu kubhita mu jiphaxi, kuma twejiya kwila, o jiphaxi jetu jibhekela kukolokota. 4 O kukolokota kwetu, kubhangesa Nzambi kutuxikina, o kutuxikina kubhekela kidyelelu. 5 O kidyelelu kyetu ki ki tubhekela jisonyi. Kyenyiki bhukaxi ka nzumbi ikôla ya tubhana Nzambi, o mixima yetu yezala ni henda yê.
6 Kyoso ki twa kambele kikwatekesu, Kidistu mu kithangana kyatokala wa fwila akwa ituxi. 7 Kyeji bhonza kuxikina kufwila muthu wayuka, maji muthu wambote nange axikina ku mu fwila. 8 Maji Nzambi wa tulondekesa o henda yê, mukonda kyoso kitwexile hanji tu akwa ituxi, Kidistu wafu bhu kididi kyetu. 9 Kuma bhukaxi ka manyinga a Jezú, Nzambi wa tumono kyá kala tu athu ayuka, tutena kudyelela kwila, twanda bhuluka ku njinda yê. 10 Kyoso kitwexile tu jinguma ja Nzambi, twa kituka tu makamba mê bhukaxi ka kufwa kwa Mon’ê. Kiki kilondekesa kwila, bhukaxi ka mwenyu wa Jezú twanda bhuluka, mukonda twala tu makamba a Nzambi. 11 O kima kyabhange Nzambi bhukaxi ka Ngana yetu Jezú Kidistu ki tu sangulukisa, mukonda bhukaxi kê, twala ni ukamba ni Nzambi.
12 Bhukaxi ka muthu umoxi, o kituxi kyabokona mu ngongo, o kituxi anga kyabheka o kufwa. Mu kiki, o kufwa kwa dimwange ku athu oso mu ngongo, mukonda ene oso akexile ni ituxi. 13 Ande dya kubhana o Kijila kya Mozé, o kituxi kyakexile kyá mu ngongo. Maji bhwa kambe o kijila, o athu katena kukala ni kikuma kya kuta kituxi. 14 O kufwa kwatumina kala sobha tundé kwa Adá katé kwa Mozé, katé mwene ku athu katele kituxi kya difu ni kya Adá. Adá wa difwanganene ni yó weji kwiza-ku.
15 Maji o ujitu wa Nzambi ki wadifu ni kituxi kya Adá. Mukonda dya kituxi kya muthu umoxi, athu avulu afu. Maji o ngalasa ya Nzambi ni ujitu* wê bhukaxi kangalasa ya muthu umoxi, Jezú Kidistu, ya betakota. Bhukaxi ka ujitu wenyú, Nzambi ubhana nzungule dya mabesá ku athu avulu! 16 O ujitu wa Nzambi ki wa difwangana ni kituxi kyatele o muthu umoxi, mu ukexilu yú: O kufundisa kwejila mukonda dya kituxi kya muthu umoxi, o kaxtiku. Sumbala athu atele ituxi yavulu, maji bhukaxi ka ujitu wa Nzambi, mwene wa amona kala athu ayuka. 17 Mukonda dya kituxi kya muthu umoxi, o kufwa kwa tumina kala sobha. Maji o ngalasa ya Nzambi ni ujitu wê wa kuyuka wa beta dingi kota. O athu atambula o ngalasa yiyi ya Nzambi ni ujitu wê, anda tumina kala jisobha mukonda dya muthu umoxi, Jezú Kidistu!
18 Kyenyiki, bhukaxi ka kitondalu kimoxi, athu oso a abalakala. Kyene we kimoxi bhukaxi ka kibhangelu kimoxi kya yuka, o athu oso atena kwa mona kala athu ayuka phala kutambula o mwenyu. 19 Mukonda bhukaxi ka kuxibhaka kwa muthu umoxi athu avulu akituka akwa ituxi, kyene we kimoxi, bhukaxi ka kutumaka kwa muthu umoxi, avulu anda kituka athu a yuka. 20 O Kijila a kibhana phala kulondekesa o ituxi ya athu. Maji bhwoso bhwala ituxi yavulu, o ngalasa ya Nzambi isomboka dingi. 21 Kala o kituxi kya tumina kumoxi ni kalunga, o ngalasa ya Nzambi itumina we bhukaxi ka kuyuka. Kiki kyanda bhangesa athu kutambula mwenyu wakalelaku bhukaxi ka Ngana yetu, Jezú Kidistu.