Kala Kyasoneka Máluku

8 Mu izuwa yenyoyo, mundu wavulu wa bhongolokela dingi kwa Jezú, ene kakexile ni kima phala kudya. Kyenyiki, mwene wexana o maxibulu mê wa ambela, wixi: 2 “O mundu nga ukwatela henda, mukonda ala kyá izuwa itatu n’eme, ene kala ni kima phala kudya. 3 Se ngi asula phala kuya ku jinzo jâ ni nzala,* anda fwila mu njila, mukonda amoxi mudyâ atundu dikanga.” 4 Maji o maxibulu a mu vutwila, exi: “Jimbolo jasoko tu jisanga kwebhi mu mukáwu mumu, phala athu oso adya, anga ekuta?” 5 Mwene wa ebhwidisa, wixi: “Mbolo jikuxi ji mwala naju?” Ene ambe, exi: “Sambwadi.” 6 Mwene anga utuma o mundu kuxikama bhoxi. Wa kwata o sambwadi dya jimbolo, wasambe,* wa ji bukujula, yu wamateka ku ji bhana ku maxibulu mê, o maxibulu anga a ji wanena o mundu. 7 Ene akexile we ni tumbiji. Kyoso Jezú kya zubha o kusakidila Nzambi, watangela o maxibulu mê phala ku tu wanena o mundu. 8 Kyenyiki, ene adi, ekuta, anga abhongolola sambwadi dya inda ya makota, yezala ni ibhasu ya subhuka. 9 Ene oso adi, atenesa midi jiwana ja mala. Kyenyiki, wasula o mundu.

10 Mu kithangana kyenyókyo, mwene wa dilôngo mu ulungu ni maxibulu mê, anga ubhixila mu mbanza ya Ndalamanuta. 11 Mwenyomo o Jifalizewu a mu zukama anga amateka kuzoka n’ê, mu ku mu bhinga kijimbwete kya dyulu, phala ku mu londa. 12 Mwene anga u hemena, yu wambe, wixi: “Mukonda dyahi o mwiji yú, usota kijimbwete? Ngi mi tangela o kidi kwila, mwiji yú ki wanda tambula né ngó kijimbwete kimoxi.” 13 Kyenyiki, mwene wa axisa, wa dilôngo dingi mu ulungu, yu wayi ku sambwa.

14 Maji o maxibulu a jimbi kwambata o jimbolo, mu kiki, ene akexile ngó ni mbolo imoxi mu ulungu. 15 Jezú wa atendelesa, wixi: “Alukenu! Dilangyenu ni felemendu ya Jifalizewu ni ya Helode.” 16 Ene anga amateka ku difwetela mudyâ mukonda dya kukamba kwambata jimbolo. 17 Kyoso Jezú kya amono, wa ebhwidisa, wixi: “Mukonda dyahi mwa mu difwetela yalungu ni kukamba kwambata jimbolo? Ki mwa tetuluka luwa o ima i nga mi tangela? O mixima yenu yakolo hanji mu kutongoloka? 18 ‘Sumbala mwala ni mesu, ki mwa mu mona? Sumbala mwala ni mátwi, ki mwa mu kwívwa?’ Ki mu lembalala 19 inda ikuxi yezalele ni ibhasu ya jimbolo ji mwa bhongolola, kyoso ki nga bukujula o jimbolo jitanu phala ku ji wanena ku midi jitanu ja mala?” Ene a mu tambwijila, exi: “Dikwinyi ni kiyadi.” 20 “Ni kyoso ki nga bukujula o sambwadi dya jimbolo phala ku ji wanena ku midi jiwana ja mala, inda ikuxi yezalele ni ibhasu ya jimbolo ji mwa bhongolola?” Ene a mu tambwijila, exi: “Sambwadi.” 21 Mwene wa ambela, wixi: “Enu ki mwa tendela luwa?”

22 Ene anga abhixila mu Betesayida. Mwenyomo, a mu bhekela diyala dyexile kifofo, o athu a dyondela Jezú phala ku mu kwata. 23 Jezú wakwata ku lukwaku lwa diyala dyexile kifofo, anga utunda n’ê mu sanzala. Kyoso mwene kya phamena mathe ku mesu a diyala, wate o maku mê kuthandu dyê, anga u mu ibhwidisa, wixi: “Wa mu mona kima?” 24 O diyala watale bhulu, yu wa mu ambela, wixi: “Nga mu mona athu, maji ene edi kala mixi ya mu kwenda.” 25 Jezú wate dingi o maku mê ku mesu a diyala, anga o diyala udisanza, umona kyá kyambote. 26 Kyenyiki, Jezú wa mu tumu kuya kubhata dyê, yu wa mu tendelesa, wixi: “Kana kubokona mu sanzala.”

27 Jezú ni maxibulu mê ayi mu jisanzala ja Sezaleya ya Filipe. Mu njila, Jezú wa ebhwidisa, wixi: “O athu azwela kwila, eme nanyi?” 28 Ene a mu tambwijila, exi: “Nzwá dya Batizu, maji amoxi exi, Elija, amukwa hanji exi, polofeta yoso-yoso.” 29 Mwene wa ebhwidisa, wixi: “Abha enu, mwene mu zwela kwila éme nanyi?” Phetele wa mu tambwijila, wixi: “Eye u Kidistu.” 30 Mwene wa atendelesa ni kuswina kwoso phala ka kitangele muthu. 31 Kyenyiki, mwene wamateka kwalonga kwila, o Mon’â muthu anda mu talesa hadi yavulu, ni ku mu dituna ku adyakime a mundu, ku akunji a makota, ni ku jimesene ja kulonga o Kitumu. Ni kwila anda mu jibha, ni ku mu fukununa mu kizuwa kya katatu. 32 Jezú wa a jimbulwila o maka yá ni kidi kyoso. Mu kiki, Phetele wa mwambata ku mbandu, yu wamateka ku mu bazela. 33 Jezú wa sakuka, watale o maxibulu mê, yu wabazela Phetele, wixi: “Tunda bhabha* Satanaji! Mukonda o ima i u xinganeka ki ya Nzambi kana, maji ya athu.”

34 Mwene anga wixana o mundu kumoxi ni maxibulu mê, yu wa atangela, wixi: “Se muthu wamesena ku ngi kayela, aditune mwene mudyê, a zangule o taka* yê, n’a ngi kayele jinga. 35 Woso wamesena kubhulula o mwenyu wê, wanda ku utexi, maji woso utexi o mwenyu wê mukonda dyami ni dya njimbu yambote, wanda ku ubhulula. 36 Mu kidi, mbote yahi imona o muthu se u nganyala o ngongo yoso, maji utexi o mwenyu wê? 37 Mba ihi yanda bhana o muthu phala kubhulula o mwenyu wê? 38 Woso ukala ni jisonyi jami ni ja maka mami ku mwiji yú wa jiphánda ni ituxi, o Mon’a muthu wanda kala we ni jisonyi jê, kyoso kyanda kwiza ni fuma ya Tat’ê, kumoxi ni jianju jê jikôla.”