Kala Kyasoneka Nzwá

18 Kyazubha kuzwela o ima yiyi, Jezú wayi ni maxibulu mê ku sámbwa dya Honga ya Kidelone. Kwenyóko kwakexile jaludim, kwene kwayi Jezú ni maxibulu mê. 2 Juda, yó weji mu sumbisa, wejidile we o kididi kyenyókyo, mukonda ithangana yavulu kwene kwakexile mudyongeka Jezú ni maxibulu mê. 3 Kyenyiki, Juda weza ni kibuka kya masoladi ni alangidi a atumikisa kwala o akunji a makota ni Jifalizewu. Ene eza ni makongolo ni tundeya ni mawuta. 4 Mu kwijiya o ima yoso yeji bhita ni mwene, Jezú wayi ku pholo dya ene, anga wa ebhwidisa: “Mwa musota nanyi?” 5 A mu tambwijila, exi: “Jezú dya Nazalé.” Mwene wa atangela: “Éme mwene.” Juda, yó weji ku mu sumbisa, wakexile kumoxi ni ene.

6 Kyoso Jezú kya atangela kwila, “Éme mwene,” ene avutuka kudima, anga adibhala bhoxi. 7 Jezú anga wa ebhwidisa dingi: “Mwa musota nanyi?” Ene, exi: “Jezú dya Nazalé.” 8 Jezú wa tambwijila, wixi: “Nga mi tangela kyá kwila, éme mwene. Kyenyiki, se mwa mu ngisota eme, mayala yá ehenu-wu, ayá.” 9 Kiki kyabhiti phala kudikumbidila o kima kyatangele mwene, kyoso kyambe: “Ki kujimbidila muthu kwa yó oso u wa ngibhana.”

10 Ximá dya Phetele wakatula o xibhata yakexile nayu, yu wabatula o dítwi dya kadilu dya mubhika wa mukunji wa dikota. O mubhika yó dijina dyê, Máluku. 11 Jezú watangela Phetele, wixi: “Vutula o xibhata bhu kididi kyê. O kwila ki nga tokala kunwa ku dikawu* dya ngibhana o Tata?”

12 Kyenyiki, o masoladi ni kabhitangu ka masoladi ni alangidi a Jijudé, akwata Jezú, anga a mukuta. 13 Kya dyanga ene a mwambata ku inzo ya Hanaji, mukonda wexile ukowakimi wa Kayafa, o mukunji wa dikota mu muvu wenyó. 14 Kayafa mwéne wazwelele ku Jijudé kwila, kyeji betakota se muthu umoxi ufwila o mundu woso.

15 Kyenyiki, Ximá dya Phetele ni dixibulu dya mukwá, akexile mukayela Jezú. O dixibulu didi a mwijidile ku mukunji wa dikota. Mwene wabokona kumoxi ni Jezú mu kithádi kya inzo ya mukunji wa dikota, 16 maji Phetele wemana bhukanga bhu mbandu ya mwelu. O dixibulu a mwijidile ku mukunji wa dikota, watundu bhukanga, wazwela ni mulangidi wa muhatu, anga ubokwesa Phetele. 17 O muhatu wakexile mulanga o mwelu, webhwidisa Phetele, wixi: “Eye we ki udixibulu dya diyala dyódyo?” Mwene wa mu tambwijila: “Eme kana!” 18 O abhika ni alangidi awika túbhya, ya akexile mu kwota, mukonda kwakexile mubhanga mbambi. Phetele wakexile we mu kwota ni ene.

19 O mukunji wa dikota anga webhwidisa Jezú yalungu ni maxibulu mê ni ulongelu wê. 20 Jezú wa mu tambwijila, wixi: “Eme ngalongo bhu pholo dya mundu. Ngakexile mulonga mu malombe* ni mu tembulu, mu kididi mwene mu dyongeka o Jijudé. Ki ngazwela kima mu kaswekele. 21 Mukonda dyahi wa mu ngi ibhwidisa? Ebhwidisa o athu evu o ima i nga atangela. Ene ejiya kyambote o ima i ngazwela.” 22 Kyoso Jezú kyazubha kuzwela o ima yiyi, sayi mulangidi wemanene bhu mbandu yê wa mubhana huxi ku pholo, yu wambe: “Kiki kyene ki utambwijila o mukunji wa dikota?” 23 Jezú wa mu tambwijila: “Se ngazwela kima kyayibha, ngi tangele. Maji, se ngazwela o kidi, mukonda dyahi wa ngibeta?” 24 Kyenyiki, Hanaji watumu ku mukuta, yu wa mutumikisa kwa Kayafa, o mukunji wa dikota.

25 Ximá dya Phetele wemanene bhenyobho mu kwota. Anga a mu ebhwidisa: “Eye we ki udixibulu dya diyala dyódyo?” Mwene waditunu, yu wambe: “Eme kana!” 26 Kwexile we mubhika wa mukunji wa dikota, ndandu ya yó a mubatwile o dítwi kwa Phetele, wa mutangela, wixi: “Eme nga kumono kumoxi ni mwene mu jaludim.” 27 Phetele anga udituna dingi lwa mukwá. Mu kithangana kyenyókyo, o dikolombolo dya kokola.

28 Mu kimene-mene kyaselu, atundu ni Jezú ku inzo ya Kayafa, ya ayi-nê mu inzo ya nguvulu. Maji ene kabokona mu inzo ya nguvulu, phala ka dikasanese,* mukonda a mesenene kudya o Phasu. 29 Pilatu anga uya mudisanga nawu, yu wa ebhwidisa: “Kituxi kyahi kyate o diyala didi?” 30 Ene a mu tambwijila, exi: “Se o diyala didi katele kituxi, kitweji mubheka kokwé.” 31 Pilatu wa atangela: “Mu ambatyenu énu mwene, mu mufundise kala kitanga o Kijila kyenu.” Ene a mu tambwijila, exi: “Mu Kijila kyetu, kikôla kujibha muthu.” 32 Kiki kyabhiti phala kudikumbidila o izwelu ya Jezú, yalungu ni kyebhi mwene kyeji fwa.

33 Pilatu anga ubokona dingi lwa mukwá mu inzo ya nguvulu, wexana Jezú yu wa mwibhwidisa: “Eye u Sobha ya Jijudé?” 34 Jezú wa muvutwila, wixi: “Eye wa mu ngibhanga o kibhwidisu kiki mu vondadi yé, inga athu engi a kutangela yalungu n’eme?” 35 Pilatu wa tambwijila: “Eye wafika kwila eme ngi Judé? Akwa ixi yé ni akunji a makota, éne a kubheka kokwami. Ihi i wabhange?” 36 Jezú wa mu tambwijila: “O Utuminu wami ki utokala mu ngongo mumu. Se Utuminu wami watokalele mu ngongo mumu, o akayedi ami eji bhânga phala ka ngibhakule ku Jijudé. Maji mu kidi, o Utuminu wami ki wa ngongo yiyi.” 37 Pilatu anga u mwibhwidisa: “Eye u sobha?” Jezú wa mu tambwijila: “Éye-mwene wa mu kizwela kwila, ngi sobha. Kyene kya ngi vwalela, kyene ki ng’ejila mu ngongo, phala kubhana o umbangi wa kidi. Woso wala kumbandu ya kidi, wívwa o dízwi dyami.” 38 Pilatu wa mwambela, wixi: “O kidi ihi?”

Kyoso kyazubha kuzwela kiki, wayi muzwela dingi ni Jijudé, mwene wa atangela: “Eme kingamono kituxi ku diyala didi. 39 Maji enu mwala ni kifwa kya kwila, mu kithangana kya Fesa ya Phasu, ngi mi jitwina muthu. Kyenyiki, mwa mesena kwila, ngi mi jitwina o Sobha ya Jijudé?” 40 Ene adikola dingi, exi: “O diyala didi, kana! Twa mesena Balabaji!” Balabaji-phe, wexile kifumbe.