Kala Kyasoneka Máluku
14 Kwa kambele izuwa iyadi phala o Fesa ya Phasu ni Fesa ya Jimbolo ja kambe Felemendu. O akunji a makota ni jimesene ja kulonga o Kijila, akexile mu sota ndunge phala kukuta* Jezú ni ku mu jibha. 2 Maji akexile mu zwela, exi: “Mu kithangana kya Fesa ya Phasu kana, phala o mundu kabhange kavwanza.”
3 Kyoso mwene kyakexile mu dya* mu inzo ya Ximá, o mukwa dibhute, mu mbanza ya Betanya, kwabhixila muhatu ni ngalafa ya alabasa, mwakexile máji a dizumba ate kitadi kyavulu. O máji yá o bhange ni náladu,* ka ifungisa ni kima kyoso-kyoso. Mwene anga ujikula o ngalafa ya alabasa, yu wamateka kulundulula o máji ku mútwe wa Jezú. 4 O maxibulu kya kimono kya a ibhila, ya amateka kuzwela mudyâ, exi: “Mukonda dyahi o máji yá, a mwatexi mu kingoho? 5 O máji yá, hinu twa asumbisa hama jitatu ja madenádyu ndenge, o kitadi tu kibhana ku jingadyama!” O kima kyabhange o muhatu, ene a ki ibhila.* 6 Maji Jezú wa ambela, wixi: “O muhatu, mwehyenu. Mukonda dyahi mwa mu mu thandanganyesa? Mwene wa ngi bhange kima kyambote. 7 Mukonda enu mwanda kala jinga ni jingadyama, kithangana kyoso-kyoso ki mwa mesena mutena kwa bhangela o mbote. Eme-phe ki nganda xala jinga ni enu. 8 Mwene wabhange yoso yatena, wa kalanga kulundulula máji a dizumba ku mukutu wami, mu kuxinganeka kyoso kyanda ngi funda. 9 Ngi mi tangela o kidi kwila, kididi kyoso-kyoso kwanda bokela o njimbu yambote mu ngongo, o kima kyabhange o muhatu yú, anda kitumbula, mu ku mu lembalala.
10 Juda dya Kadiyota, muthu watokala ku dikwinyi ni kiyadi kya jipoxolo, wayi ku akunji a makota phala kusumbisa Jezú kwa ene. 11 Kyoso ene kyevu o kima kyazwela mwene, asanguluka kyavulu, anga akanena ku mu bhana kitadi kya phalata. Mu kyenyiki, mwene wamateka kusota kithangana kya fwama phala ku mu sumbisa.
12 Mu kizuwa kya dyanga kya Fesa ya Jimbolo ja kambe Felemendu,* kyoso o athu kyakexile mu bhakula o sata ya Phasu, o maxibulu a mu ibhwidisa, exi: “Kwebhi ku wamesena kwila, tu ku yudikila o kididi phala o fesa ya Phasu?” 13 Kyenyiki, mwene watumu maxibulu ayadi, yu wa atangela, wixi: “Ndenu mu mbanza, mwanda takana ni diyala dya mu kwambata disanga dya menya. Mu kayelyenu. 14 Inzo yoso mwa bokona mwene, tangelenu o ngana mukwa inzo, mwixi: ‘O Mesene wambe: “O dixilu dya ajitu dyala kwebhi, ni ngi dye-mu o Phasu kumoxi ni maxibulu mami?”’ 15 Mwene wanda mi londekesa kididi kyadikota mu inzo ya thandu, kyosokejeke kyá. Yudikenu o ima yoso mwenyomo phala etu.” 16 O maxibulu ayi, abokona mu mbanza, ya asange yoso kála kyatangele mwene, anga a yudika o Phasu.
17 Mu ngoloxi, mwene wabhixila ni kwinyi ni kiyadi kya jipoxolo. 18 Kyoso kyakexile mudya ku meza, Jezú wambe, wixi: “Ngi mi ambela o kidi kwila, sayi muthu mudyenu wanda ngi sumbisa.” 19 Ene a luwala, anga akala ku mwibhwidisa, exi: “Ngana, o kwila eme?” 20 Mwene wa a tambwijila, wixi: “Mwéne muthu watokala ku kwinyi ni kiyadi kya jipoxolo, yó uta o lukwaku lwê mu ditijela kumoxi n’eme. 21 Kala kyosoneke mu Mikanda Ikôla, o Mon’a muthu, wanda fwa mwene. Maji lamba dya yó usumbisa o Mon’a muthu! Kyeji kala kota se ka mu vwalele.”
22 Kyakexile mudya, mwene wakwata mbolo, wasakidila Nzambi, wa ibukujula, anga u iwanena o maxibulu, wixi: “Tambulenu, o mbolo yiyi, ilombolola o mukutu wami.” 23 Anga ukatula o kopho, usakidila Nzambi, ubhana ku maxibulu, ene oso anga anwa-ku. 24 Mwene wa atangela: “O vinyu yiyi, ilombolola o ‘manyinga mami ma kikutu,’ anda kwa zunzumuna phala o mbote ya athu avulu. 25 Ngi mi ambela o kidi kwila, ki nganda nwa dingi ku vinyu yiyi, katé o kizuwa ki twanda nwa kumoxi vinyu ya ubhe mu Utuminu wa Nzambi.” 26 Kyoso kyazubha o kwimba mu kuximana* Nzambi, ayi ku Mulundu wa Midiva.
27 Jezú-phe wa atangela, wixi: “Enu oso mwanda ngi xisa,* kuma kyósoneke: ‘Nganda jibha o mubhidi, anga o jimbudi ji mwangana.’ 28 Maji kyoso kyanda ngi fukununa, nganda mi twamenena ku Ngalileya.” 29 Phetele-phe wa mu vutwila, wixi: “Né mwene se ene oso akuxisa, eme ki nganda kuxisa kana.” 30 Jezú wa mu tangela, wixi: “Ngi kutangela o kidi kwila, lelu, mu usuku wenyú, ande dya dikolombolo kukokola luyadi, eye wanda ngi dituna lutatu.” 31 Maji mwene ni kujiza kwê, wixi: “Né mwene se kubhinga kwila ngifwa kumoxi n’eye, eme ki nganda kudituna.” O maxibulu oso kyene we kyazwela.
32 Jezú ni maxibulu mê abhixila mu kididi ak’ixana Jetesemane, mwene anga u atangela, wixi: “Xikamenu bhabha, ngandaya mu samba.” 33 Mwene wambata Phetele, Tiyaku ni Nzwá, anga uluwala kyavulu, ukala ni kikote ku muxima. 34 Mwene wa atangela, wixi: “Ngala ni kikote kyadikota ku muxima. Xalenu bhabha, kolokotenu mu kudilanga.” 35 Mwene anga u sondoloka bhofele, ufukama bhoxi, yu wamateka o kusamba phala se kibhana o kithangana kyokyo kibhite. 36 Mwene wambe, wixi: “Aba,* Tata! Eye utena kubhanga yoso; o dikáwu didi ngi katule-dyu. Ki kibhite kala ki nga mesena eme, maji kala ki wamesena eye.” 37 Mwene wavutuka, yu wa asange azeka, anga wambela Phetele wixi: “Ximá, wa mu zeka? Eye ki watena kudilanga né ngó ola imoxi? 38 Kolokotenu mu kudilanga, sulukenu ni kusamba phala ki mu dibhale mu jitendasá. Mu kidi, o muthu wamesena kubhanga o kima kyatokala, maji o mukutu-phe* wabhwila.” 39 Mwene wa sondoloka dingi, anga usamba, o ima ya zwela yene imoxi. 40 Mwene weza dingi, wa asange azeka mukonda akexile ni kilu kyavulu. Mukonda dya kiki, ene kejidile kyebhi kyeji mu tambwijila. 41 Mwene wavutuka lwa katatu, yu wa atangela, wixi: “Mu kithangana kala kiki, enu mwa mu nyoha ni kuzeka? Kwabhu kyá! O ola yabhixila! O Mon’a muthu anda mu bhakula bhu maku ma akwâ ituxi. 42 Balumukenu, twende. Mukonda o muthu wanda ngi sumbisa, yu wiza kyá.”
43 Mu kithangana kyenyókyo kyakexile hanji mu zwela, Juda wabhangele mbandu ku dikwinyi ni kiyadi kya jipoxolo, weza kumoxi ni mundu wavulu ambata jixibhata ni jimbangala. Ene a atumikisa kwala o akunji a makota ni jimesene ja kulonga o Kijila ni adyakime a mundu. 44 O muthu weji ku mu sumbisa wa abhele kijimbwete, wixi: “O yó woso nganda mu bhana nzobole, mwéne o muthu; mu kutyenu. Muye-nê kumoxi. 45 Juda anga uya katé bhwakexile Jezú, kya mu zukama, wambe: “Mesene!”* Anga u mu bhana nzobole. 46 Mu kiki, ene a mu kwata, anga a mu kuta. 47 Muthu umoxi wakexile-bhu, wasungu o xibhata, yu wakwama o mubhika wa mukunji wadikota, mu ku mu batula o dítwi. 48 Jezú wa ambela, wixi: “Enu mweza mu ngi kuta ni jixibhata ni jimbangala, kala ngi kifumbe?” 49 Izuwa yoso nga kexile mu kala ni enu mu tembulu ni kulonga, maji ki mwa ngi kutu. Yoso yiyi-phe, yabhiti phala ku dikumbidila yosoneke mu Mikanda Ikôla.”
50 Anga o maxibulu oso a mu xisa, ya a lenge. 51 Bhwakexile, munzangala watele kizwatu kya linyu yafina kuthandu dya mukutu.* Mwene wakexile mu kayela Jezú, anga afikisa ku mu kwata. 52 Mwene wa xangumuka, yu wa lenge sé o kizwatu kya linyu.*
53 Jezú anga a mwambata katé ku mukunji wadikota. O akunji oso a makota, ni adyakime a mundu ni jimesene ja kulonga o Kitumu, a di bhongolola. 54 Maji, Phetele wakexile mu mu kayela kadikanga, katé mu kithádi kya inzo ya mukunji wadikota, yu waxikama kumoxi ni akalakadi a inzo, mu kwota túbhya. 55 O akunji a makota ni athu oso mu kyônge, akexile mu sota kikuma kwa Jezú phala ku mu tatela ni ku mu jibha, maji a lémbwa. 56 Athu avulu akexile mu bhana umbangi wa makutu, maji kala muthu wakexile mu zwela kima kyengi. 57 Sayi athu abalumuka, amateka kubhana umbangi wa makutu, mu kuzwela, exi: 58 “Etu twa mwívu kuzwela, wixi: ‘O tembulu yiyi a itungu ni maku, ngi ibula, anga mu izuwa itatu, ngi tunga yengi ka itungu ni maku.’” 59 Né mwene mu maka enyá, o umbangi wâ ki wexile umoxi.
60 O mukunji wadikota-phe wa balumuka mu kaxi kâ, yu webhwidisa Jezú, wixi: “Eye ki wanda kwa tambwijila? Ki wanda zwela kima, ku ima ya mu kutatela o mayala yá?” 61 Maji mwene wadixibha, katambwijila kima. O mukunji wadikota wa mu ibhwidisa dingi, wixi: “O kwila eye u Kidistu, o Mon’a Nzambi Ukôla?” 62 Jezú anga u tambwijila, wixi: “Eme mwéne! Enu mwanda mona o Mon’a muthu kuxikama ku mbandu ya kadilu ya Muteni wa yoso* ni kwiza ku matuta.” 63 O mukunji wadikota kya k’ivu, watandula o kizwatu kyê, yu wambe: “O kwila twa bhindamena dingi jimbangi? 64 Enu mwevu kwila, mwene waxingi Nzambi. Mwafika kyebhi?” Ene oso amono kwila, mwene watokala kufwa. 65 Sayi athu amateka ku mu phamena mathe, a mu vungina o mesu, a mu bhana jihome, ya a mu tangela, exi: “Se u polofeta, tu tangele, nanyi wa ku beta?” Kyazubha ku mu bhana o jihuxi, o alangidi a mwambata.
66 Kyoso Phetele kyakexile mu kithádi, kwabhixila kilumba, mukalakadi wa inzo ya mukunji wadikota. 67 Kyamono Phetele mu kwota túbhya, wa mu tale swí, yu wambe: “Eye we wakexile ni Jezú dya Nazalé.” 68 Maji mwene waditunu, wambe, wixi: “Diyala didi, ki nga mu ijiya. Eme ki ngejiya o kima ki wa mu zwela.” Mwene anga uya mu jimbandu ja mwelu. 69 O kilumba kya mu mono, wamateka dingi kutangela o athu akexile-bhu, wixi: “Mwenyú muthu umoxi ku maxibulu mê.” 70 Lwa mukwá dingi, mwene waditunu. Mu kubhita ka kithangana, o athu akexile-bhu amateka dingi kwambela Phetele, exi: “Mu kidi, eye watokala kwa ene, mukonda u mukwa Ngalileya.” 71 Mwene phe wamateka kudilokela, wixi: “O diyala didi di mwa mu zwela, ki nga mu ijiya!” 72 Mu kithangana kyenyókyo, dikolombolo dya kokola lwa kayadi. Phetele anga ulembalala o kizwelu kya Jezú, kyoso kyambele: “Ande dya dikolombolo kukokola luyadi, eye wanda ngi dituna lutatu.” Ni kikote ku muxima, mwene wamateka o kudila.