Mukanda wa Dyanga ku Akwa Kolindu
3 Phange jami, ki ngi tenene ku mizwelela kala mu athu akulu mu nzumbi. Maji nga mizwelele kala mu athu ala ni ixinganeku ya mundu yú, kala mu ana awisu mu njila ya Kidistu. 2 Ki nga mibhanene kudya kwa nguzu, maji nga mibhanene lete mukonda ki mwa kudile luwa. Mu kidi, katé kiki ki mwa kulu luwa, 3 mukonda mwala hanji ni ixinganeku ya mundu yú. Kuma mwene mu dikwatela difuba ni kuzoka mudyenu, o kwila mwala hanji ni ibanzelu ya mundu yú? Ki mwene mubhanga o ima kala kibhanga o athu ku mundu yú? 4 Mukonda kyoso muthu mudyenu uzwela, wixi: “Eme ngi mukayedi wa Phawulu,” o mukwá wamba: “Eme ngi mukayedi wa Apolo,” o kwila ki mwa mu xinganeka kala kixinganeka o athu a mundu yú?
5 Kyenyiki-phe, Apolo nanyi? O Phawulu we nanyi? Etu twala ngó tu akunji abhanga o kikalakalu kya tubhana Ngana yetu, kya ku mi kwatekesa ku muxikana. 6 Eme nga kunu o mbutu, Apolo wa itekela, maji Nzambi mwéne wa ikudisa. 7 Kyenyiki o muthu wakunu kikima, o wa itekela we kikima, maji o wa betakota Nzambi watena ku ikudisa. 8 O muthu ukuna ni yó utekela, akalakala kumoxi, maji kala muthu wanda tambula o futu yê mu kikalakalu kyê. 9 Mukonda etu twa mu kalakala kumoxi ni Nzambi. Enu mu dibhya dya mudima Nzambi, enu we mu inzo ya mutunga Nzambi.
10 Nzambi wa ngi londekesa o ngalasa yê, mukonda dya kiki ngate kaboko kala ngi mutungi wa hete, maji sayiku muthu wengi wa mutunga kuthandu dya kaboko kaka. Kyenyiki, kala muthu aluke kyoso kyatunga ku kaboko kaka. 11 Mukonda sé-ku muthu utena kuta kaboko kengi, kikale ngó koko ko tule kyá, Jezú Kidistu. 12 Kyenyiki se muthu utunga inzo ku kaboko kaka ni ulu, phalata, matadi ala ni valolo yavulu, mabaya, mba yangu ya kukuta, 13 kala muthu o kikalakalu kyê kyanda dimonekena* mu kithangana kya kizukutisu. Mu kizuwa kyenyókyo, o túbhya twanda londekesa kyebhi kyala o kikalakalu kya muthu ni muthu. 14 Se o túbhya ki tujokotesa o inzo ya muthu watungu ku kaboko kaka, mwene wanda tambula mabesá. 15 Se o túbhya tujokotesa o inzo ya muthu, o ima yê yoso yanda dibota, maji mwene wanda bhuluka, wanda kala kála muthu wa bhuluka ku túbhya.
16 Ki mwejiya kwila enu mu tembulu ya Nzambi ni kwila o nzumbi ya Nzambi yatungu moxi dyenu? 17 Se muthu ubwikisa o tembulu ya Nzambi, Nzambi wanda mu bwikisa we, mukonda o tembulu ya Nzambi, tembulu ikôla. O tembulu yiyi, enu mwene.
18 Kana muthu udinganala mudyê mwene: Se muthu mudyenu ubanza kwila, mwene njimu mu ngongo mumu,* adibhange kyôwa, phala kukituka njimu. 19 Mukonda o unjimu wa mundu yú, bhu pholo ya Nzambi, wôwa. Kuma kyosoneke mu Mikanda Ikôla, exi: “Nzambi wehela o jinjimu kubwa mu mibhetu yâ.” 20 Kyosoneke we, exi: “Jihova wejiya kwila o ixinganeku ya jinjimu, ixinganeku ya kingoho.” 21 Ki bhu kale muthu udizangeleka mu ima ibhanga o athu, mukonda yoso ya mitokala: 22 Kikale Phawulu, Apolo, Sefa,* o ngongo, o mwenyu, o kufwa, kikale o ima yene-ku, mba o ima yanda kwiza ku hádya, yene yoso ya mitokala. 23 Enu phe mwatokala kwa Kidistu, o Kidistu watokala kwa Nzambi.