Kisumwa Kyalondekesa Kwa Nzwá

2 “O anju ya kilunga kya Efezu, mu sonekene: O yó wakwata o sambwadi dya jithéthembwa bhu lukwaku lwê lwa kadilu, wenda mwaxaxi ka sambwadi dya tundeya twa ulu, wambe kiki: 2 ‘Ngejiya o ima iwene mubhanga, o ikalakalu yé ya nguzu ni kukolokota kwé. Ngejiya we kwila eye ki wene mu kwehela o athu ayibha kukala mwaxaxi ké. O athu azwela kwila jipoxolo maji mu kidi ki jipoxolo, eye wa alola, anga wa amono kwila akwa makutu. 3 Eye wene mu londekesa kuswina, wakolokota mu ibhidi yavulu mukonda dya dijina dyami, sé ngó kubhwila. 4 Maji-phe, ngi kubazela mu kima kiki: Eye waxisa o henda i wakexile nayu kudimatekenu.

5 “‘Kyenyiki, xinganeka kwebhi ku watondala, ni udyele o ituxi yé, anga ubhanga o ima iwexile mubhanga kudimatekenu. Se kana, nganda kwiza mukatula o kandeya ké bhu kididi kyé, se ukamba kudyela. 6 Maji sayi kima kyambote ki wa mubhanga: eye wazembe o ima yene mubhanga o kibuka kya Nikolawu, eme wami nga izembe. 7 Woso wala ni mátwi, evwe izwela o nzumbi ikôla ku ilunga: Woso utolola, nganda mwehela kudya ku muxi wa mwenyu wala mu palayízu ya Nzambi.’

8 “O anju ya kilunga kya Esmina mu sonekene: O yó ‘Wadyanga, Wasukidila,’ yó wafwile yu wavutuka ku mwenyu, wambe kiki: 9 ‘Ngejiya o hadi i wamutala ni wadyama wé, maji eye umvwama. Ngejiya we o athu amba kwila Jijudé ene mu kuxinga. Mukidi ene ki Jijudé, maji kibuka* kyatokala kwa Satanaji. 10 Kana kukala ni wôma wa jiphaxi jiwanda bhita naju. O Dyabhu wanda suluka mu kutakula amoxi mudyenu mukaleya phala ku mi polovala mu maukexilu oso, mwanda tala hadi mu dikwinyi dya izuwa. Kolokota mu ufiyele katé ku ufwilu wé, anga ngi kubhana o kitundu kya mwenyu. 11 Woso wala ni mátwi, evwe o ima ya muzwela o nzumbi ikôla ku ilunga: Woso utolola o izukutisu, o kufwa kwa kayadi kikwanda ku mukwata.’

12 “O anju ya kilunga kya Pelengamu mu sonekene: O yó wala ni xibhata yatu ya mazu ayadi, wambe kiki: 13 ‘Ngejiya kwebhi ku watungu, eye watungu kwala o kyandu kya Satanaji. Maji eye wakolokota mu kulondekesa o ufiyele wé kokwami, eye ki waditunu o kixikanu kyé kokwami, né mwene mu izuwa ya mbangi yami yafiyele Andipa, a mu jibhila bhu mbandu yenu, bhene bhwatungu Satanaji.

14 “‘Maji-phe, ngi kubazela mu ima yiyi: wala ni athu a mukayela o ilongesu ya Balamu, walongo Balake kutondalesa an’â Izalayele, kudya o ima yosatele o iteka ni kubhanga undumbu.* 15 Mwaxaxi kenu mwala we yó a mukayela o ilongesu ya kibuka kya Nikolawu. 16 Mu kyenyiki, dyela o ituxi yé. Se ukamba kudyela, nganda kwiza ni lusolo ku wal’oko, ni xibhata yalebha yala mu kanu dyami phala kulwa ni ene.

17 “‘Woso wala ni mátwi, evwe ya muzwela o nzumbi ikôla ku ilunga: Woso utolola o izukutisu, nganda mubhana o maná osweke, ni kaditadi kazele. Bhu ditadi bhwala dijina dya ubhe, sé-ku muthu wadijiya, kikale ngó yó waditambula.’

18 “O anju ya kilunga kya Tiyatila mu sonekene: O Mon’â Nzambi yó wala ni mesu edi kala mulengu wa mulekujuka, o inama yê yedi kala ngondo ya katunda, mwene wambe kiki: 19 ‘Ngejiya o ima i wa mubhanga, o henda yé, o kixikanu kyé, o ukunji wé ni kukolokota kwé. Ngejiya we kwila o ibhangelu yé ya kindala yavulu dingi, o yokulu ndenge.

20 “‘Maji ngi kubazela mu ima yiyi: wa mu lendukila* o muhatu yó Jezabele, wa mu dixana kwila polofeta, wa mulonga ni kunganala o jiselevende jami n’a bhange undumbu ni kudya o ima yosatele o iteka. 21 Nga mubhana kithangana phala kudyela, maji mwene kadyela o undumbu* wabhange. 22 Kwakambe ngó nganda bheka uhaxi wadikota kwa mwene ni kwa yó ene muta-nê jiphánda. Se ene akamba kudyela o ituxi yâ, nganda kwabhekela we hadi yadikota. 23 Nganda jibha o twana twê ni mabhebhu, kyenyiki ilunga yoso yanda kwijiya kwila, éme ngitonginina o ixinganeku yazongo* ni mixima ya athu. Nganda vutwila ku muthu ni muthu kala kyasoko ni ibhangelu yê.

24 “‘Maji ngitangela yó asubhuka ku Tiyatila, oso kakayela o ilongesu ya Jezabele, yó keza mukwijiya o “ima yazongo ya Satanaji”, ngi atangela, ngixi: Kinganda mitudila dingi kimbamba kyengi kyaneme. 25 Kyenyiki, mu dikwatenena ku ima imwala nayu, katé kinganda kwiza. 26 Woso utolola o izukutisu ni kubelesela o jinjila jami, nganda mubhana o ungana wa kutumina o ifuxi, 27 kala ki ngatambula o ungana kwa Tata yami. O muthu yú wanda tumina o ifuxi ni mbasá ya felu, wanda ibwikisa kala itutu ya mavu. 28 Nganda mubhana o théthembwa ya kamene. 29 Woso wala ni mátwi, evwe ya muzwela o nzumbi ikôla ku ilunga.’