Kala Kyasoneka Matesu
1 Divulu dya musoso* wa Jezú Kidistu,* mon’â Davidi, mon’â Mbalahamu:
2 Mbalahamu uvwala Izake;
Izake uvwala Jakobo;
Jakobo uvwala Judá ni jiphange jê;
3 Judá uvwala Peleji ni Nzelá kwa Tamale;
Peleji uvwala Hezelone;
Hezelone uvwala Lame;
4 Lame uvwala Aminadabe;
Aminadabe uvwala Nasono;
Nasono uvwala Salumone;
5 Salumone uvwala Bowaji kwa Lahaba;
Bowaji uvwala Obede kwa Lute;
Obede uvwala Jesé;
6 Jesé uvwala Davidi, o sobha.
Davidi uvwala Solomá kwa muhatu wa Udiya;
7 Solomá uvwala Lombowamu;
Lombowamu uvwala Abiya;
Abiya uvwala Aza;
8 Aza uvwala Jozafate;
Jozafate u vwala Jolamu;
Jolamu u vwala Uziya;
9 Uziya uvwala Jotamu;
Jotamu uvwala Akaji;
Akaji uvwala Hezekiya;
10 Hezekiya uvwala Manasa;
Manasa uvwala Amone;
Amone uvwala Joziya;
11 Joziya uvwala Jakoniya ni jiphange jê, kyoso kyambata o Jijudé ku Babilonya.
12 Kyoso o Jijudé kya kexile mu Babilonya, Jakoniya uvwala Salatiyele;
Salatiyele uvwala Nzolobabele;
13 Nzolobabele uvwala Abihude;
Abihude uvwala Eliyakimi;
Eliyakimi uvwala Azolo;
14 Azolo uvwala Zadoko;
Zadoko uvwala Akimi;
Akimi uvwala Elihude;
15 Elihude uvwala Eliyazale;
Eliyazale uvwala Matana;
Matana uvwala Jakobo;
16 Jakobo uvwala Zuze, mwadi* wa Madiya, wa vwala Jezú, a mwixana Kidistu.
17 Mu kiki-phe, miji yoso tundé kwa Mbalahamu katé kwa Davidi, ya tenesa kwinyi ni kiwana kya miji; tundé kwa Davidi katé kyambatele o Jijudé ku Babilonya, kwinyi ni kiwana kya miji; tundé kyambatele o Jijudé ku Babilonya katé kwa Kidistu, kwinyi ni kiwana kya miji.
18 Kiki kyene kyabhiti ni uvwalelu wa Jezú Kidistu: Kyoso Madiya many’â, kyexile phala kukazala ni Zuze, ande dya kuzeka kumoxi, mwene wemita bhukaxi ka nzumbi ikôla.* 19 Kuma mwadi wê Zuze wexile muthu wambote, ka mesenene ku mu kwatesa jisonyi bhu pholo ya athu, wabanze ku mu senga mu kaswekele. 20 Kyenyiki, kyoso mwene kyazubha kubanza o maka enyá, o anju ya Jihova* ya mu tukulukila ku nzoji, anga ya mwambela: “Zuze, mon’â Davidi, kukale ni wôma wa kwambata muhatu wé, Madiya ku bhata. Mukonda mwene wemita bhukaxi ka nzumbi ikôla. 21 Mwene wanda vwala mon’a diyala, eye u mu luka o dijina dya Jezú,* mwene wanda bhulula o mundu wê ku ituxi yâ.” 22 Yoso yiyi yabhiti phala ku dikumbidila o kizwelu kya Jihova bhukaxi ka polofeta yê kyoso kyambe: 23 “Talesenu! O muzeletete* wanda kwimita, wanda vwala mon’a diyala, anda mu luka o dijina dya Imanuwele.” O dijina didi, dilombolola “Nzambi Wala N’etu.”
24 Mu kiki, Zuze wa balumuka ku kilu, yu wabhange yoso kála kya mu tumu o anju ya Jihova, wambata muhatu wê kubhata dyê. 25 Maji mwene ka zekele ni Madiya katé kyavwala o mona, anga u muluka o dijina dya Jezú.