Mikeya

5 “Kindala-phe wa mudisema.*

Eye u mon’a kilumba a kukondoloka ku jinguma.

Etu atukondoloka ku jinguma.

 2 Éye u Beleme dya Efalata,

Wabeta mu kutola mwaxaxi ka jimbanza* ja Judá,

Momwé mwene mwanda tunda yó wanda tumina Izalayele.

Mukonda mwéne wene-ko kya tunde ukulu, tunde xahulu.

 3 Maji mwene wanda mibwazeka.

Kate mu kithangana kya kwila, o yó wanda vwala, avwale.

 4 Ni nguzu yanda mubhana Jihova, mwene wanda balumuka phala kwinga o kibhanga,

Mwene wanda kibhanga ni kutena kwa Jihova Nzambi yê, mukonda dijina dyê dyonene.

Ene anda tunga ni kutululuka,

Mukonda o athu oso mu ngongo anda kwijiya o kutena kwa utuminu wê.

Se mukwa Asídya wiza, ubokona mu ixi yetu, anga ubula o jinzo jetu ja matala,

Etu twanda tumikisa sambwadi dya abhidi, kifwa dinake dya ilamba* phala kubhânga-nawu.

 6 Ene anda bhânga mu ixi ya akwa Asídya ni xibhata,

Kate ku jimbambe ja ixi ya Nimilode.

Mwene wanda tubhulula bhu maku amukwa Asídya,

Kyoso mwene kyanda bokona mu ixi yetu phala ku ibwika.

 7 Bhukaxi ka ifuxi, o yó anda subhuka ku mbutu ya Jakobo,

A ka dibhanga kala dimume ditunda kwa Jihova,

Kala mvula ibetesa o yangu.

Ene kanda dyelela muthu,

Né ngo kudyelela ku an’a athu.

 8 Yó asubhuka ku mbutu ya Jakobo,

Mwaxaxi ka ifuxi yavulu,

A kadibhanga kala hoji yala mwaxaxi ka yama.

Kala o mon’a hoji mwaxaxi ka jimbudi,

Kyaya ni kubhita mwaxaxi kâ, ujikwata anga u jijibha.

Kibhwanda kala muthu ujibhulula.

 9 Eye wanda tolola o jinguma jé.

O jinguma jé joso wanda jibwika.”

10 Jihova wambe kiki: “Mu kizuwa kyenyiki,

Nganda jibha o jikabalu jé ni kubwika o makalu mé a ita.

11 Nganda bwika o jimbanza ja ixi yé,

Nganda bula o jimbonge jé.

12 Nganda zubha o ima ya wanga iwene mubhanga.

Kibhwakakala mukwa kuzambula mwaxaxi ké.

13 O iteka ni jiphiladi jala mwaxaxi ké nganda jibula.

Eye kwanda fukamena dingi o ima i wabhange.

14 O iteka* yé nganda ibula

Nganda bula we o jimbanza jé.

15 O ifuxi yakambe kubelesela,

Nganda ikastikala ni njinda yavulu.”