Kala Kyasoneka Máluku

15 Ki kwaki, o akunji a makota ni adyakime a mundu ni jimesene ja kulonga o Kijila adyôngeka, phala kumona ihi yeji bhanga. Ene anga akuta Jezú, a mwambata ya a mu bhakula kwa Pilatu. 2 Pilatu anga u mu ibhwidisa, wixi: “O kwila eye u Sobha ya Jijudé?” Jezú wa mu tambwijila, wixi: “Eye mwéne wa kitange.” 3 O akunji a makota, anga akala ku mu tatela ima yavulu. 4 Kyenyiki, Pilatu wa mu ibhwidisa dingi, wixi: “Eye ki wanda tambwijila? Evwa o ima yoso ya mu kutatela.” 5 Maji Jezú kazwela dingi kima. Mukonda dya kiki, Pilatu wadiwana kyavulu.

6 Mu kithangana kya Fesa ya Phasu, o nguvulu wakexile mu jituna muthu umoxi a mu balakala, yó eji mu sola kwala o mundu. 7 Mu kithangana kyenyókyo, o diyala amwixana Balabaji, wakexile mu kaleya kumoxi ni yó a bhukumukine o nguvulu. Mu ku bhukumuka kwâ, ajibhile athu. 8 Mu kiki, o mundu wazukama kwa Pilatu, anga amateka ku mu bhinga phala kubhanga o kima kyakexile mu bhanga kyá. 9 Mwene wa atangela, wixi: “Mwa mesena kwila ngi jituna o Sobha ya Jijudé?” 10 Mukonda Pilatu wejidile kwila, o akunji a makota a mu bhakula mukonda dya lwímbi. 11 Maji o akunji a makota aswinisa o mundu phala abhinge kujituna Balabaji muveji dya Jezú. 12 Pilatu wa ebhwidisa dingi, wixi: “Ihi i nganda bhanga ni muthu mwa mwixana Sobha ya Jijudé?” 13 Ene adikola dingi, exi: “Mu phaphele ku taka!”* 14 Maji Pilatu wambe: “Mukonda dyahi? Kituxi kyahi kyate mwene?” Ene aswina dingi ni kudikola, exi: “Mu phaphele ku taka!”* 15 Kuma Pilatu wa mesenene kusangulukisa o mundu, wajituna Balabaji. Kyoso kyazubha kubeta Jezú ni jixikote, mwene wa mu bhakula phala ku mu phaphela ku taka.*

16 O masoladi a mwambata mu kithádi kya inzo ya nguvulu, anga ongeka o kibuka kyoso kya masoladi. 17 Ene a mu zwika divunga dya kusuka, anga endi kitundu kya minya, ya a mu tula-kyu ku mútwe, 18 anga amateka ku mu sebhulula, exi: “Tanaku! Eye u Sobha ya Jijudé!” 19 Ene a mu beta ni mbangala ku mútwe, a mu phamena mathe, ya a fukama bhu pholo yê ni jipholo bhoxi. 20 Kyoso kyazubha ku mu sebhulula, a mu katula o divunga dya kusuka, a mu zwika dingi o izwatu yê. Anga a mwambata bhu kanga phala ku mu phaphela ku taka.* 21 Ene anga atakana ni diyala wakexile mu tunda ku mabhya, a mwixana Ximá mukwa Silene, tata ya Xandele ni Lufu. Ene a mu jijidika kwambata o taka.*

22 Mu kiki, a mwambata mu kididi ak’ixana Ngolongota, kilombolola “Kididi kya Kiholongonyo.” 23 Kwenyóko, a mesenene ku mu bhana vinyu yo funge ni milongo a ixana mila,* maji mwene waditunu ku inwa. 24 Anga a mu phaphela ku taka,* a wane o izwatu yê ni ku itela jisólote, kala muthu n’a mone ihi yeji tambula. 25 Mu ola ya katatu* a mu phaphela ku taka.* 26 Kuthandu anga asoneka-ku o kitatelu, exi: “O Sobha ya Jijudé.” 27 A phaphela we ifumbe iyadi ku jitaka, umoxi ku mbandu yê ya kadilu o mukwá ku kyasu. 28 —— 29 O athu akexile mu bhita, akexile mu mu sebhulula ni kubhuka* o mítwe, exi: “Eyó! Weji bula o tembulu ni ku itunga mu izuwa itatu, 30 dibhulule, tuluka ku taka.”* 31 Kyene we kimoxi, o akunji a makota ni jimesene ja kulonga o Kitumu, akexile we ku mu sebhulula mu kuzwela, exi: “Wabhulula athu engi, maji mwene katena kudibhulula! 32 O Kidistu Sobha ya Izalayele atuluke kindala ku taka,* phala tu mu mone ni tu mu xikane.” Katé mwene ni yó a aphaphele we ku jitaka ku mbandu yê a mu sebhulula.

33 Mu ola ya kasamanu* ixi yenyóyo ikala mwavundu, katé mu ola ya kavwa.* 34 Mu ola ya kavwa Jezú wadikola ni dizwí dya swina, wixi: “Eli, Eli, lama sabactâni?” Kiki kilombolola, “Nzambi yami, Nzambi yami, mukonda dyahi wa ngi xisa?” 35 Amoxi akexile kwenyóko, kyoso kya mu ivu ambe, exi: “Ivwenu! Mwene wa mu kwixana Elija.” 36 Anga bhukala muthu uya ni lusolo, ukwata xiponja, u ibonda mu vindangele, u ita mu ka muxi anga u mu nwisa; yú wambe, wixi: “Mwehyenu ni tu mone se Elija wiza ku mu katula-bhu.” 37 Maji Jezú wadikola ni dízwi dya swina, yu wafu. 38 O kulutina ya tembulu ya tanduka mu kaxi, tundé kuthandu katé ku lwiji. 39 Kyoso o kabhitangu ka masoladi wemanene kwenyóko, kyamono o ima yoso yabhiti, wambe, wixi: “Mu kidi, o diyala didi wexile mwene o Mon’a Nzambi.”

40 Kwexile we ahatu akexile kadikanga. Mudyâ mwakexile Madiya dya Manda ni Madiya many’â Tiyaku dya ndenge, ni Zuze ni Salomé. 41 Ahatu enyá a mu kayela ni ku mu sidivila, kyoso mwene kyakexile mu Ngalileya. Kwakexile we ahatu avulu ayile-nê kumoxi mu Jeluzaleme.

42 Mu ngoloxi, kuma o dikumbi dyexile mu fwa kyá, kyexile o kizuwa kya kudiyudika, ande dya kubhixila o Sábhalu, 43 kwa bhixila Zuze mukwa Dimateya watokala mu Inzo ya Kufundisa ya Jijudé, wakexile we mu kinga o Utuminu wa Nzambi. Mwene anga wôma u mu bhwa, uya kwa Pilatu, u mu bhinga o kimbi kya Jezú. 44 Maji Pilatu wa mesenene kwijiya se mwene wafwile kyá. Mu kiki, wexana o kabhitangu ka masoladi yu wa mu ibhwidisa se Jezú wafu kyá. 45 Kyazubha ku k’ijiya bhukaxi ka kabhitangu ka masoladi, wa tumu kubhana o kimbi kwa Zuze. 46 Zuze wasumbu dilasola dya linyu yafina, anga ukatula o kimbi kya Jezú ku taka.* Mwene wa ki vungu mu dilasola dya linyu yafina, yu wa kite mu mbila yakandele mu ndanji. Mu kusuluka, waxiti o mwelu wa mbila ni ditadi. 47 Maji Madiya dya Manda ni Madiya many’â Zuze, akexile mu tala bhwa tudile o kimbi kya Jezú.