Zakadiya
13 “Mu kizuwa kyenyokyo, anda kanda fixi ya menya phala o inzo ya Davidi, ni yó atungu mu Jeluzaleme, phala ku azelesa ku ituxi ni ku ufusa wâ.
2 Jihova dya ifuxi wambe kiki: “Mu kizuwa kyenyokyo, nganda jima o majina a iteka mu ixi yiyi, yene kanda ilembalala dingi. Nganda kaya o jipolofeta jala mu ixi yiyi, o athu kanda kala dingi ni hanji ya kubhanga ima yayibha. 3 Se bhukala muthu uzwela dingi maka a upolofeta, tat’ê ni mam’ê, yó a muvwala, anda mwambela: ‘Eye wanda fwa, mukonda wazwela makutu mu dijina dya Jihova.’ O tat’ê ni mam’ê yó a muvwala anda mukubula ni xibhata, mukonda dya kuzwela maka a upolofeta.
4 “Mu kizuwa kyenyokyo, o jipolofeta mu kutanga o kisumwa kyamono, o jisonyi janda ku akwata. Ene kanda zwata dingi divunga dya kibha phala kunganala akwa. 5 Kala muthu mudyâ, wanda zwela: ‘Eme ki ngi polofeta, ngi kidimakaji, mukonda kyoso ki ngexile ngi munzangala sayi diyala wa ngisumbu phala kukala ngi mubhika.’ 6 Se bhukala muthu u mwibhwidisa: ‘O jifidila jiwala-naju mu isuxi, wadikwama kwebhi?’ Mwene wanda tambwijila: ‘A ngikwama mu inzo ya makamba mami.’”
7 Jihova dya ifuxi wambe:
“Balumuka, kwata o xibhata, jibha o mubhidi, kamba dyami.
Kwama o mubhidi, o jimbudi janda mwangana.
Nganda kastikala o athu kala ni valolo.”
8 Jihova wambe: “Mu ixi yiyi,
Anda jibha-mu athu avulu,
Atolo anda subhuka.
9 O anda subhuka, nganda kwabhitisa mu túbhya.
Nganda ku azelesa, mukwa ni kyene munzunza o phalata,
Nganda ku alola kala kyene mubhanga ni ulu.
Ene anda dikola mu dijina dyami,
Eme nganda ku atambwijila.
Eme nganda zwela: ‘Yú wene o mundu wami.’
Ene anda zwela: ‘Jihova mwéne o Nzambi yetu.’”