Mukanda wa Dyanga ku Akwa Kolindu
2 Jiphange jami, kyoso kingayile kokwenu phala ku mibokela o ikutu ya Nzambi, ki nga mesenene ku mibhangesa kudiwana ni izwelu yami, mba ni unjimu wami. 2 Mukonda kyoso ki ngakexile ni enu, ki ngisoto ku mitangela kima kyengi, maji nga mitangela ngó yalungu ni Jezú Kidistu, yó amujibhile ku taka.* 3 Kyoso kingayile ku mikunda, nga zozele, ngexile ni wôma ni kuteketa kwavulu. 4 O uzwelelu ni ulongelu wami, kiwexile wa fuma kala wa jinjimu ja mundu yú, maji wa londekesa o kutena kwa nzumbi ikôla. 5 Ngabhange kiki phala muxikane mu kutena kwa Nzambi, kana mu unjimu wa athu.
6 Kyenyiki, twa muzwela yalungu ni unjimu wa athu ala ni kixikanu kyakolo, kana o unjimu wa mundu yú,* mba o unjimu wa jinguvulu ja mundu yú, yó anda kwa jikinisa. 7 Maji twa muzwela yalungu ni ikutu ya Nzambi, o unjimu wê wo sweke. Nzambi wakanene o unjimu yú tundé xahulu, phala o fuma yetu. 8 O jinguvulu ja mundu yú* kejiya o unjimu yú, mukonda se a wijidile, keji jibha* Jezú, o Ngana yadikota. 9 Maji kala kyosoneke mu Mikanda Ikôla, exi: “O ima ka imono ku muthu, ka ívu, né ku ixinganeka jinga ku muxima, yene o ima ya sokejeka Nzambi phala yó a mu zolo.” 10 Mukonda o ima yiyi, Nzambi wa tu jimbulwila nayu bhukaxi ka nzumbi yê. Kuma o nzumbi itokwesa o ima yoso, katé mwene o ima ya zongo ya Nzambi.
11 O kwila sayi muthu utena kwijiya o ixinganeku ya muthu wengi? Kana! O muxima* wa muthu wene ngó utena ku ijiya. Kyene we kimoxi, sé-ku muthu wejiya o ixinganeku ya Nzambi, kikale ngó o nzumbi ya Nzambi. 12 Etu ki twa tambula o nzumbi ya mundu yú, maji o nzumbi itunda kwa Nzambi, phala tutene kwijiya o ima ya tubhana Nzambi ni henda yoso. 13 Twa mu mitangela we o ima yiyi, kana ni maka o longe ni unjimu wa athu, maji ni maka o longe bhukaxi ka nzumbi ikôla. Kyenyiki, tuzwela o maka atutangela bhukaxi ka nzumbi ikôla phala kujimbulula o kidi kya Nzambi.
14 Maji o muthu wa xitu kaxikina* o ima ya nzumbi ya Nzambi, mukonda phala mwene wôwa. Mwene katena ku ijiya, mukonda phala ku ijiya, o muthu watokala kukala ni nzumbi ya Nzambi. 15 O muthu-phe wala ni nzumbi ya Nzambi, utokwesa kyambote o ima yoso, maji o muthu mwenyú sé-ku muthu utena ku mu tokwesa. 16 O Mikanda Ikôla yamba: “Nanyi utena kwijiya o kilunji kya Jihova phala ku mulonga?” Maji etu twala ni kilunji kya Kidistu.