Kwa Titu
3 Suluka mu kwalembalesa kubelesela o maungana ni jinguvulu, n’a kale polondo phala kubhanga ikalakalu yambote, 2 atangele kwila kalokalale muthu woso-woso, kakale akwa jimvunda, maji akale athu alenduka, alondekesa o kubatama ku athu oso. 3 Etu we m’ukulu kyene ki twakexile, twatobhele, twa bhukumukine, akexile mu tu nganala ku athu, twexile tu abhika a jihânji ni jivondadi jayibha, mu kubhanga ima yayibha, akwa lwimbi, twa ibhile kinéne, twadizembele mudyetu.
4 Maji kyoso Nzambi, o Mubhuludi wetu, kyalondekesa o henda yê ku athu oso, 5 mwene watubhulula (ki mukonda dya ikalakalu yayuka i twabhangele, maji mukonda dya henda yê), mu kutuzelesa* ni menya, ni mu kutubhangesa kukala tu athu a ubhe bhukaxi ka nzumbi ikôla. 6 Mwene watubhana nzungule ya nzumbi yiyi bhukaxi ka Jezú Kidistu, o Mubhuludi wetu, 7 phala kyazubha ku tumona kwila twa yuka bhukaxi ka henda ya Nzambi, tukale tu alundudi a kidyelelu kya mwenyu wakalelaku.
8 Kuma o maka yá a fiyele, ngamesena kwila ukolokota mu kwatanga, phala o athu axikana Nzambi, akale muxinganeka kubhanga o ikalakalu yambote. O ima yiyi yawabha, ibhekela mbote ku athu oso.
9 O jiphata-phe ja wôwa lenga-ju ni maka alungu ni uvwalelu, ni kuzoka mukonda dya Kitumu, kuma o ima yiyi yakingoho, ki yala ni valolo. 10 Muthu woso ulonga milongi ya makutu, se wamubazela* kyá lumoxi mba luyadi, mu sandulyenu, 11 mukonda mwene waxisa o njila yakidi, wamuta kituxi ni kudibelesa mudyê.
12 Kyoso kinganda ku kutumikisa Alutemá mba Tikiku, bhanga yoso phala kungisanga mu mbanza ya Nikopolo, mukonda mwéne mu ngasolo kubhita o kixibhu.* 13 Sokejeka o imbamba yoso yatokala, phala Nzena o mesene ya Kitumu kwenda o njila ni Apolo, phala ki ku akambe kima. 14 O jiphange jetu adilonge we kubhanga ikalakalu yambote, n’a tene kukwatekesa yó abhindama, phala akolokote mu kubhanga o mbote.
15 Oso ala n’eme a mi tumikisa o umenekenu, menekena we oso atuzolo ala mu kuxikana.
O henda ya Nzambi, ikale ni enu oso.