Malakiya
1 Njimbu yatundu kwa Nzambi:
Njimbu ya Jihova kwa Malakiya* phala ku itudila akwa Izalayele.
2 Jihova wambe kiki: “Eme nga mikwatela henda.”
Maji enu mwa mukwibhula, mwixi: “Kyebhi ki watukwatela henda?”
Jihova wambe: “Izawú kexile phange ya Jakobo?” “Eme ngazolo Jakobo, 3 maji ngaditunu* Izawú, ngabhangesa o milundu yê kukala ngundu. O undundu wê nga ubhana ku makombe mu mukáwu.”*
4 “Idomo* wambe: ‘Sumbala a tutolola, maji twanda vutuka phala kutungulula o mbanza.’ Jihova dya ifuxi wambe wixi: ‘Ene anda itunga, maji eme nganda ibwika, “anda ixana ixi yezala ni athu ayibha ni mundu a ubalakala kwa Jihova kate ku hádya ni hádya.” 5 Mwanda mona o ima yoso yiyi ni mesu menu, enu mwanda zwela: “Jihova a mujingise mu ixi yoso ya Izalayele.”’”
6 “‘O mona ujingisa tat’ê, o mubhika ujingisa ngana yê. Maji-phe, se eme ngi tat’enu, mukonda dyahi ki mwa mungijingisa? Se ngi ngana yenu, mukonda dyahi ki mwa mungikwatela wôma?’* Kiki kyene ki ngambe éme ngi Jihova dya ifuxi ku akunji kene muxila o dijina dyami.
“‘Maji-phe, enu mwa muzwela: “Kyebhi ki twasebhulula o dijina dyé?”’
7 “‘Mu kubhakula kudya* kwakasana ku kalatódyu kami.’
“‘Enu mwa muzwela: “Kyebhi ki twa kukasanesa?”’
“‘Mu kwamba: “O meza a Jihova kala ni valolo.” 8 Kyoso ki mubhakula kibhaku kyafu o mesu phala o sata, enu mwamba: “Kikyayibhe!” Kyoso ki mubhakula kibhaku kyanemana mba kyakate, enu mwamba: “Kikyayibhe!”’”
“Ngamidyondo, xinganekenu hanji kubhakula o ibhaku yiyi ku nguvulu yenu. O kwila mwene wanda sanguluka? O kwila wanda mitambulula kyambote?” Kiki kyene kyambe Jihova dya ifuxi.
9 “Ngamidyondo, dyondelenu kwa Nzambi n’a tukwatele henda. Se mubhakula o jisata jiji, o kwila mwene wanda mitambulula ni ngalasa?” Kiki kyene kyambe Jihova dya ifuxi.
10 “Nanyi mudyenu uxikina kujika o mabhitu se ku mufuta?* Enu kimwene muwika o túbhya ku kalatódyu kami se kukobhalala kima.” Jihova dya ifuxi wambe: “Eme kingakuxikina, kingasanguluka ni jisata jimwene mubhakula.”
11 “Maji o dijina dyami anda dijingisa mwaxaxi ka ifuxi, tunde kutundila o dikumbi ndu kufwila o dikumbi. Mu ididi yoso anda kwoha-mu jisata, anda jibhakula kala ujitu wayuka, mu dijina dyami, mukonda o dijina dyami anda dijingisa mwaxaxi ka ifuxi.” Kiki kyene kyambe Jihova dya ifuxi.
12 “Maji-phe, enu mwa muxidisa o dijina dyami mu kwamba: ‘O meza a Jihova akasana, o jisata ni kudya kwala ku meza kikwala ni valolo.’ 13 Enu we mwamuzwela: ‘Kiki kyatukumu kya!’ Enu kimwamubhana valolo ku ima yiyi .” Kiki kyene kyambe Jihova dya ifuxi. Enu mwa mubheka ibhaku i mwanyana, yanemana ni yakate. Yene i mwa mubheka phala ku ibhakula. O kwila eme ngatokala kuxikina o maujitu menu?” Kiki kyene kyambe Jihova.
14 Jihova dya ifuxi wambe kiki: “Lamba dya yó wala ni kibhaku kya ndumbe kyadisanze mu kibhanga kyê, maji uta kikutu anga ubhakula kibhaku kyanemana phala Jihova. Mukonda eme ngi Sobha yadikota. O dijina dyami anda dikwatela wôma mwaxaxi ka ifuxi.”